1. சக்கவத்திராஜஸுத்தம்

997. ஸாவத்தி²னிதா³னம். தத்ர கோ² ப⁴க³வா…பே… ஏதத³வோச – ‘‘கிஞ்சாபி, பி⁴க்க²வே, ராஜா சக்கவத்தீ [சக்கவத்தி (ஸ்யா. கம். பீ. க.)] சதுன்னம் தீ³பானம் இஸ்ஸரியாதி⁴பச்சம் ரஜ்ஜம் காரேத்வா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதி தே³வானம் தாவதிம்ஸானம் ஸஹப்³யதம், ஸோ தத்த² நந்த³னே வனே அச்ச²ராஸங்க⁴பரிவுதோ தி³ப்³பே³ஹி ச பஞ்சஹி காமகு³ணேஹி ஸமப்பிதோ ஸமங்கீ³பூ⁴தோ பரிசாரேதி, ஸோ சதூஹி த⁴ம்மேஹி அஸமன்னாக³தோ, அத² கோ² ஸோ அபரிமுத்தோவ [அபரிமுத்தோ ச (ஸ்யா. கம். க.)] நிரயா அபரிமுத்தோ திரச்சா²னயோனியா அபரிமுத்தோ பேத்திவிஸயா அபரிமுத்தோ அபாயது³க்³க³திவினிபாதா. கிஞ்சாபி, பி⁴க்க²வே, அரியஸாவகோ பிண்டி³யாலோபேன யாபேதி, நந்தகானி ச தா⁴ரேதி, ஸோ சதூஹி த⁴ம்மேஹி ஸமன்னாக³தோ, அத² கோ² ஸோ பரிமுத்தோ [பரிமுத்தோ ச (ஸ்யா. கம். க.)] நிரயா பரிமுத்தோ திரச்சா²னயோனியா பரிமுத்தோ பேத்திவிஸயா பரிமுத்தோ அபாயது³க்³க³திவினிபாதா’’.

‘‘கதமேஹி சதூஹி? இத⁴, பி⁴க்க²வே, அரியஸாவகோ பு³த்³தே⁴ அவேச்சப்பஸாதே³ன ஸமன்னாக³தோ ஹோதி – ‘இதிபி ஸோ ப⁴க³வா அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானம் பு³த்³தோ⁴ ப⁴க³வா’தி. த⁴ம்மே அவேச்சப்பஸாதே³ன ஸமன்னாக³தோ ஹோதி – ‘ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீ’தி. ஸங்கே⁴ அவேச்சப்பஸாதே³ன ஸமன்னாக³தோ ஹோதி – ‘ஸுப்படிபன்னோ ப⁴க³வதோ ஸாவகஸங்கோ⁴, உஜுப்படிபன்னோ ப⁴க³வதோ ஸாவகஸங்கோ⁴, ஞாயப்படிபன்னோ ப⁴க³வதோ ஸாவகஸங்கோ⁴, ஸாமீசிப்படிபன்னோ ப⁴க³வதோ ஸாவகஸங்கோ⁴, யதி³த³ம் – சத்தாரி புரிஸயுகா³னி அட்ட² புரிஸபுக்³க³லா, ஏஸ ப⁴க³வதோ ஸாவகஸங்கோ⁴ ஆஹுனேய்யோ பாஹுனேய்யோ த³க்கி²ணேய்யோ அஞ்ஜலிகரணீயோ அனுத்தரம் புஞ்ஞக்கே²த்தம் லோகஸ்ஸா’தி. அரியகந்தேஹி ஸீலேஹி ஸமன்னாக³தோ ஹோதி அக²ண்டே³ஹி அச்சி²த்³தே³ஹி அஸப³லேஹி அகம்மாஸேஹி பு⁴ஜிஸ்ஸேஹி விஞ்ஞுப்பஸத்தே²ஹி அபராமட்டே²ஹி ஸமாதி⁴ஸம்வத்தனிகேஹி. இமேஹி சதூஹி த⁴ம்மேஹி ஸமன்னாக³தோ ஹோதி. யோ ச, பி⁴க்க²வே, சதுன்னம் தீ³பானம் படிலாபோ⁴, யோ சதுன்னம் த⁴ம்மானம் படிலாபோ⁴ சதுன்னம் தீ³பானம் படிலாபோ⁴ சதுன்னம் த⁴ம்மானம் படிலாப⁴ஸ்ஸ கலம் நாக்³க⁴தி ஸோளஸி’’ந்தி. பட²மம்.