8. கா³மணிஸம்யுத்தம்

1. சண்ட³ஸுத்தம்

353. ஸாவத்தி²னிதா³னம். அத² கோ² சண்டோ³ கா³மணி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² சண்டோ³ கா³மணி ப⁴க³வந்தம் ஏதத³வோச – ‘‘கோ நு கோ², ப⁴ந்தே, ஹேது, கோ பச்சயோ யேன மிதே⁴கச்சோ சண்டோ³ சண்டோ³த்வேவ [யேன மிதே⁴கச்சோ சண்டோ³தேவ (ஸீ. பீ.)] ஸங்க²ம் க³ச்ச²தி. கோ பன, ப⁴ந்தே, ஹேது, கோ பச்சயோ யேன மிதே⁴கச்சோ ஸோரதோ ஸோரதோத்வேவ [யேன மிதே⁴கச்சோ ஸுரதோதேவ (ஸீ. பீ.)] ஸங்க²ம் க³ச்ச²தீ’’தி? ‘‘இத⁴, கா³மணி, ஏகச்சஸ்ஸ ராகோ³ அப்பஹீனோ ஹோதி. ராக³ஸ்ஸ அப்பஹீனத்தா பரே கோபேந்தி, பரேஹி கோபியமானோ கோபம் பாதுகரோதி. ஸோ சண்டோ³த்வேவ ஸங்க²ம் க³ச்ச²தி. தோ³ஸோ அப்பஹீனோ ஹோதி. தோ³ஸஸ்ஸ அப்பஹீனத்தா பரே கோபேந்தி, பரேஹி கோபியமானோ கோபம் பாதுகரோதி. ஸோ சண்டோ³த்வேவ ஸங்க²ம் க³ச்ச²தி. மோஹோ அப்பஹீனோ ஹோதி. மோஹஸ்ஸ அப்பஹீனத்தா பரே கோபேந்தி, பரேஹி கோபியமானோ கோபம் பாதுகரோதி. ஸோ சண்டோ³த்வேவ ஸங்க²ம் க³ச்ச²தி. அயம் கோ², கா³மணி, ஹேது, அயம் பச்சயோ யேன மிதே⁴கச்சோ சண்டோ³ சண்டோ³த்வேவ ஸங்க²ம் க³ச்ச²தி’’.

‘‘இத⁴ பன, கா³மணி, ஏகச்சஸ்ஸ ராகோ³ பஹீனோ ஹோதி. ராக³ஸ்ஸ பஹீனத்தா பரே ந கோபேந்தி, பரேஹி கோபியமானோ கோபம் ந பாதுகரோதி. ஸோ ஸோரதோத்வேவ ஸங்க²ம் க³ச்ச²தி. தோ³ஸோ பஹீனோ ஹோதி. தோ³ஸஸ்ஸ பஹீனத்தா பரே ந கோபேந்தி, பரேஹி கோபியமானோ கோபம் ந பாதுகரோதி. ஸோ ஸோரதோத்வேவ ஸங்க²ம் க³ச்ச²தி. மோஹோ பஹீனோ ஹோதி. மோஹஸ்ஸ பஹீனத்தா பரே ந கோபேந்தி, பரேஹி கோபியமானோ கோபம் ந பாதுகரோதி. ஸோ ஸோரதோத்வேவ ஸங்க²ம் க³ச்ச²தி. அயம் கோ², கா³மணி, ஹேது அயம் பச்சயோ யேன மிதே⁴கச்சோ ஸோரதோ ஸோரதோத்வேவ ஸங்க²ம் க³ச்ச²தீ’’தி.

ஏவம் வுத்தே, சண்டோ³ கா³மணி ப⁴க³வந்தம் ஏதத³வோச – ‘‘அபி⁴க்கந்தம், ப⁴ந்தே, அபி⁴க்கந்தம், ப⁴ந்தே! ஸேய்யதா²பி, ப⁴ந்தே, நிக்குஜ்ஜிதம் வா உக்குஜ்ஜேய்ய, படிச்ச²ன்னம் வா விவரேய்ய, மூள்ஹஸ்ஸ வா மக்³க³ம் ஆசிக்கே²ய்ய, அந்த⁴காரே வா தேலபஜ்ஜோதம் தா⁴ரேய்ய – சக்கு²மந்தோ ரூபானி த³க்க²ந்தீதி; ஏவமேவம் ப⁴க³வதா அனேகபரியாயேன த⁴ம்மோ பகாஸிதோ. ஏஸாஹம், ப⁴ந்தே, ப⁴க³வந்தம் ஸரணம் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. உபாஸகம் மம் ப⁴க³வா தா⁴ரேது அஜ்ஜதக்³கே³ பாணுபேதம் ஸரணம் க³த’’ந்தி. பட²மம்.

2. தாலபுடஸுத்தம்

354. ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. அத² கோ² தாலபுடோ [தாலபுத்தோ (ஸீ. ஸ்யா. கம்.)] நடகா³மணி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² தாலபுடோ நடகா³மணி ப⁴க³வந்தம் ஏதத³வோச – ‘‘ஸுதம் மேதம், ப⁴ந்தே, புப்³ப³கானம் ஆசரியபாசரியானம் நடானம் பா⁴ஸமானானம் – ‘யோ ஸோ நடோ ரங்க³மஜ்ஜே² ஸமஜ்ஜமஜ்ஜே² ஸச்சாலிகேன ஜனம் ஹாஸேதி ரமேதி, ஸோ காயஸ்ஸ பே⁴தா³ பரம் மரணா பஹாஸானம் தே³வானம் ஸஹப்³யதம் உபபஜ்ஜதீ’தி. இத⁴ ப⁴க³வா கிமாஹா’’தி? ‘‘அலம், கா³மணி, திட்ட²தேதம். மா மம் ஏதம் புச்சீ²’’தி. து³தியம்பி கோ² தாலபுடோ நடகா³மணி ப⁴க³வந்தம் ஏதத³வோச – ‘‘ஸுதம் மேதம், ப⁴ந்தே, புப்³ப³கானம் ஆசரியபாசரியானம் நடானம் பா⁴ஸமானானம் – ‘யோ ஸோ நடோ ரங்க³மஜ்ஜே² ஸமஜ்ஜமஜ்ஜே² ஸச்சாலிகேன ஜனம் ஹாஸேதி ரமேதி, ஸோ காயஸ்ஸ பே⁴தா³ பரம் மரணா பஹாஸானம் தே³வானம் ஸஹப்³யதம் உபபஜ்ஜதீ’தி. இத⁴ ப⁴க³வா கிமாஹா’’தி? ‘‘அலம், கா³மணி, திட்ட²தேதம். மா மம் ஏதம் புச்சீ²’’தி. ததியம்பி கோ² தாலபுடோ நடகா³மணி ப⁴க³வந்தம் ஏதத³வோச – ‘‘ஸுதம் மேதம், ப⁴ந்தே, புப்³ப³கானம் ஆசரியபாசரியானம் நடானம் பா⁴ஸமானானம் – ‘யோ ஸோ நடோ ரங்க³மஜ்ஜே² ஸமஜ்ஜமஜ்ஜே² ஸச்சாலிகேன ஜனம் ஹாஸேதி ரமேதி, ஸோ காயஸ்ஸ பே⁴தா³ பரம் மரணா பஹாஸானம் தே³வானம் ஸஹப்³யதம் உபபஜ்ஜதீ’தி. இத⁴ ப⁴க³வா கிமாஹா’’தி?

‘‘அத்³தா⁴ கோ² த்யாஹம், கா³மணி, ந லபா⁴மி [நாலத்த²ம் (ஸ்யா. கம். பீ. க.)] – ‘அலம், கா³மணி, திட்ட²தேதம், மா மம் ஏதம் புச்சீ²’தி. அபி ச த்யாஹம் ப்³யாகரிஸ்ஸாமி. புப்³பே³ கோ², கா³மணி, ஸத்தா அவீதராகா³ ராக³ப³ந்த⁴னப³த்³தா⁴. தேஸம் நடோ ரங்க³மஜ்ஜே² ஸமஜ்ஜமஜ்ஜே² யே த⁴ம்மா ரஜனீயா தே உபஸம்ஹரதி பி⁴ய்யோஸோமத்தாய. புப்³பே³ கோ², கா³மணி, ஸத்தா அவீததோ³ஸா தோ³ஸப³ந்த⁴னப³த்³தா⁴. தேஸம் நடோ ரங்க³மஜ்ஜே² ஸமஜ்ஜமஜ்ஜே² யே த⁴ம்மா தோ³ஸனீயா தே உபஸம்ஹரதி பி⁴ய்யோஸோமத்தாய. புப்³பே³ கோ², கா³மணி, ஸத்தா அவீதமோஹா மோஹப³ந்த⁴னப³த்³தா⁴. தேஸம் நடோ ரங்க³மஜ்ஜே² ஸமஜ்ஜமஜ்ஜே² யே த⁴ம்மா மோஹனீயா தே உபஸம்ஹரதி பி⁴ய்யோஸோமத்தாய. ஸோ அத்தனா மத்தோ பமத்தோ பரே மதே³த்வா பமாதே³த்வா காயஸ்ஸ பே⁴தா³ பரம் மரணா பஹாஸோ நாம நிரயோ தத்த² உபபஜ்ஜதி. ஸசே கோ² பனஸ்ஸ ஏவம்தி³ட்டி² ஹோதி – ‘யோ ஸோ நடோ ரங்க³மஜ்ஜே² ஸமஜ்ஜமஜ்ஜே² ஸச்சாலிகேன ஜனம் ஹாஸேதி ரமேதி, ஸோ காயஸ்ஸ பே⁴தா³ பரம் மரணா பஹாஸானம் தே³வானம் ஸஹப்³யதம் உபபஜ்ஜதீ’தி, ஸாஸ்ஸ ஹோதி மிச்சா²தி³ட்டி². மிச்சா²தி³ட்டி²கஸ்ஸ கோ² பனாஹம், கா³மணி, புரிஸபுக்³க³லஸ்ஸ த்³வின்னம் க³தீனம் அஞ்ஞதரம் க³திம் வதா³மி – நிரயம் வா திரச்சா²னயோனிம் வா’’தி.

ஏவம் வுத்தே, தாலபுடோ நடகா³மணி, பரோதி³, அஸ்ஸூனி பவத்தேஸி. ‘‘ஏதம் கோ² த்யாஹம், கா³மணி, நாலத்த²ம் – ‘அலம், கா³மணி, திட்ட²தேதம்; மா மம் ஏதம் புச்சீ²’’’தி. ‘‘நாஹம், ப⁴ந்தே, ஏதம் ரோதா³மி யம் மம் ப⁴க³வா ஏவமாஹ; அபி சாஹம், ப⁴ந்தே, புப்³ப³கேஹி ஆசரியபாசரியேஹி நடேஹி தீ³க⁴ரத்தம் நிகதோ வஞ்சிதோ பலுத்³தோ⁴ – ‘யோ ஸோ நடோ ரங்க³மஜ்ஜே² ஸமஜ்ஜமஜ்ஜே² ஸச்சாலிகேன ஜனம் ஹாஸேதி ரமேதி ஸோ காயஸ்ஸ பே⁴தா³ பரம் மரணா பஹாஸானம் தே³வானம் ஸஹப்³யதம் உபபஜ்ஜதீ’’’தி. ‘‘அபி⁴க்கந்தம், ப⁴ந்தே, அபி⁴க்கந்தம், ப⁴ந்தே! ஸேய்யதா²பி, ப⁴ந்தே, நிக்குஜ்ஜிதம் வா உக்குஜ்ஜேய்ய, படிச்ச²ன்னம் வா விவரேய்ய, மூள்ஹஸ்ஸ வா மக்³க³ம் ஆசிக்கே²ய்ய, அந்த⁴காரே வா தேலபஜ்ஜோதம் தா⁴ரேய்ய – சக்கு²மந்தோ ரூபானி த³க்க²ந்தீதி; ஏவமேவம் ப⁴க³வதா அனேகபரியாயேன த⁴ம்மோ பகாஸிதோ. ஏஸாஹம், ப⁴ந்தே, ப⁴க³வந்தம் ஸரணம் க³ச்சா²மி த⁴ம்மஞ்ச பி⁴க்கு²ஸங்க⁴ஞ்ச. லபே⁴ய்யாஹம், ப⁴ந்தே, ப⁴க³வதோ ஸந்திகே பப்³ப³ஜ்ஜம், லபே⁴ய்யம் உபஸம்பத³’’ந்தி. அலத்த² கோ² தாலபுடோ நடகா³மணி ப⁴க³வதோ ஸந்திகே பப்³ப³ஜ்ஜம், அலத்த² உபஸம்பத³ம். அசிரூபஸம்பன்னோ ச பனாயஸ்மா தாலபுடோ…பே… அரஹதம் அஹோஸீதி. து³தியம்.

3. யோதா⁴ஜீவஸுத்தம்

355. அத² கோ² யோதா⁴ஜீவோ கா³மணி யேன ப⁴க³வா தேனுபஸங்கமி; உபஸங்கமித்வா…பே… ஏகமந்தம் நிஸின்னோ கோ² யோதா⁴ஜீவோ கா³மணி ப⁴க³வந்தம் ஏதத³வோச – ‘‘ஸுதம் மேதம், ப⁴ந்தே, புப்³ப³கானம் ஆசரியபாசரியானம் யோதா⁴ஜீவானம் பா⁴ஸமானானம் – ‘யோ ஸோ யோதா⁴ஜீவோ ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே ஹனந்தி பரியாபாதே³ந்தி, ஸோ காயஸ்ஸ பே⁴தா³ பரம் மரணா பரஜிதானம் தே³வானம் ஸஹப்³யதம் உபபஜ்ஜதீ’தி. இத⁴ ப⁴க³வா கிமாஹா’’தி? ‘‘அலம், கா³மணி, திட்ட²தேதம்; மா மம் ஏதம் புச்சீ²’’தி. து³தியம்பி கோ²…பே… ததியம்பி கோ² யோதா⁴ஜீவோ கா³மணி ப⁴க³வந்தம் ஏதத³வோச – ‘‘ஸுதம் மேதம், ப⁴ந்தே, புப்³ப³கானம் ஆசரியபாசரியானம் யோதா⁴ஜீவானம் பா⁴ஸமானானம் – ‘யோ ஸோ யோதா⁴ஜீவோ ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே ஹனந்தி பரியாபாதே³ந்தி, ஸோ காயஸ்ஸ பே⁴தா³ பரம் மரணா பரஜிதானம் தே³வானம் ஸஹப்³யதம் உபபஜ்ஜதீ’தி. இத⁴ ப⁴க³வா கிமாஹா’’தி?

‘‘அத்³தா⁴ கோ² த்யாஹம், கா³மணி, ந லபா⁴மி – ‘அலம், கா³மணி, திட்ட²தேதம்; மா மம் ஏதம் புச்சீ²’தி. அபி ச த்யாஹம் ப்³யாகரிஸ்ஸாமி. யோ ஸோ, கா³மணி, யோதா⁴ஜீவோ ஸங்கா³மே உஸ்ஸஹதி வாயமதி, தஸ்ஸ தம் சித்தம் புப்³பே³ க³ஹிதம் [ஹீனம் (ஸீ. பீ.)] து³க்கடம் து³ப்பணிஹிதம் – ‘இமே ஸத்தா ஹஞ்ஞந்து வா ப³ஜ்ஜ²ந்து வா உச்சி²ஜ்ஜந்து வா வினஸ்ஸந்து வா மா வா அஹேஸும் இதி வா’தி. தமேனம் உஸ்ஸஹந்தம் வாயமந்தம் பரே ஹனந்தி பரியாபாதே³ந்தி; ஸோ காயஸ்ஸ பே⁴தா³ பரம் மரணா பரஜிதோ நாம நிரயோ தத்த² உபபஜ்ஜதீதி. ஸசே கோ² பனஸ்ஸ ஏவம் தி³ட்டி² ஹோதி – ‘யோ ஸோ யோதா⁴ஜீவோ ஸங்கா³மே உஸ்ஸஹதி வாயமதி தமேனம் உஸ்ஸஹந்தம் வாயமந்தம் பரே ஹனந்தி பரியாபாதே³ந்தி, ஸோ காயஸ்ஸ பே⁴தா³ பரம் மரணா பரஜிதானம் தே³வானம் ஸஹப்³யதம் உபபஜ்ஜதீ’தி, ஸாஸ்ஸ ஹோதி மிச்சா²தி³ட்டி². மிச்சா²தி³ட்டி²கஸ்ஸ கோ² பனாஹம், கா³மணி, புரிஸபுக்³க³லஸ்ஸ த்³வின்னம் க³தீனம் அஞ்ஞதரம் க³திம் வதா³மி – நிரயம் வா திரச்சா²னயோனிம் வா’’தி.

ஏவம் வுத்தே, யோதா⁴ஜீவோ கா³மணி பரோதி³, அஸ்ஸூனி பவத்தேஸி. ‘‘ஏதம் கோ² த்யாஹம், கா³மணி, நாலத்த²ம் – ‘அலம், கா³மணி, திட்ட²தேதம்; மா மம் ஏதம் புச்சீ²’’’தி. ‘‘நாஹம், ப⁴ந்தே, ஏதம் ரோதா³மி யம் மம் ப⁴க³வா ஏவமாஹ; அபிசாஹம், ப⁴ந்தே, புப்³ப³கேஹி ஆசரியபாசரியேஹி யோதா⁴ஜீவேஹி தீ³க⁴ரத்தம் நிகதோ வஞ்சிதோ பலுத்³தோ⁴ – ‘யோ ஸோ யோதா⁴ஜீவோ ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே ஹனந்தி பரியாபாதே³ந்தி, ஸோ காயஸ்ஸ பே⁴தா³ பரம் மரணா பரஜிதானம் தே³வானம் ஸஹப்³யதம் உபபஜ்ஜதீ’’’தி. ‘‘அபி⁴க்கந்தம், ப⁴ந்தே…பே… அஜ்ஜதக்³கே³ பாணுபேதம் ஸரணம் க³த’’ந்தி. ததியம்.

4. ஹத்தா²ரோஹஸுத்தம்

356. அத² கோ² ஹத்தா²ரோஹோ கா³மணி யேன ப⁴க³வா தேனுபஸங்கமி; உபஸங்கமித்வா…பே… அஜ்ஜதக்³கே³ பாணுபேதம் ஸரணம் க³தந்தி. சதுத்த²ம்.

5. அஸ்ஸாரோஹஸுத்தம்

357. அத² கோ² அஸ்ஸாரோஹோ கா³மணி யேன ப⁴க³வா தேனுபஸங்கமி; உபஸங்கமித்வா ஏகமந்தம் நிஸீதி³. ஏகமந்தம் நிஸின்னோ கோ² அஸ்ஸாரோஹோ கா³மணி ப⁴க³வந்தம் ஏதத³வோச – ‘‘ஸுதம் மேதம், ப⁴ந்தே, புப்³ப³கானம் ஆசரியபாசரியானம் அஸ்ஸாரோஹானம் பா⁴ஸமானானம் – ‘யோ ஸோ அஸ்ஸாரோஹோ ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே ஹனந்தி பரியாபாதே³ந்தி, ஸோ காயஸ்ஸ பே⁴தா³ பரம் மரணா பரஜிதானம் தே³வானம் ஸஹப்³யதம் உபபஜ்ஜதீ’தி. இத⁴ ப⁴க³வா கிமாஹா’’தி? ‘‘அலம், கா³மணி, திட்ட²தேதம்; மா மம் ஏதம் புச்சீ²’’தி. து³தியம்பி கோ²…பே… ததியம்பி கோ² அஸ்ஸாரோஹோ கா³மணி ப⁴க³வந்தம் ஏதத³வோச – ‘‘ஸுதம் மேதம், ப⁴ந்தே, புப்³ப³கானம் ஆசரியபாசரியானம் அஸ்ஸாரோஹானம் பா⁴ஸமானானம் – ‘யோ ஸோ அஸ்ஸாரோஹோ ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே ஹனந்தி பரியாபாதே³ந்தி, ஸோ காயஸ்ஸ பே⁴தா³ பரம் மரணா பரஜிதானம் தே³வானம் ஸஹப்³யதம் உபபஜ்ஜதீ’தி. இத⁴ ப⁴க³வா கிமாஹா’’தி?

‘‘அத்³தா⁴ கோ² த்யாஹம், கா³மணி, ந லபா⁴மி – ‘அலம், கா³மணி, திட்ட²தேதம்; மா மம் ஏதம் புச்சீ²’தி. அபி ச கோ² த்யாஹம் ப்³யாகரிஸ்ஸாமி. யோ ஸோ, கா³மணி, அஸ்ஸாரோஹோ ஸங்கா³மே உஸ்ஸஹதி வாயமதி தஸ்ஸ தம் சித்தம் புப்³பே³ க³ஹிதம் து³க்கடம் து³ப்பணிஹிதம் – ‘இமே ஸத்தா ஹஞ்ஞந்து வா ப³ஜ்ஜ²ந்து வா உச்சி²ஜ்ஜந்து வா வினஸ்ஸந்து வா மா அஹேஸும் இதி வா’தி. தமேனம் உஸ்ஸஹந்தம் வாயமந்தம் பரே ஹனந்தி பரியாபாதே³ந்தி, ஸோ காயஸ்ஸ பே⁴தா³ பரம் மரணா பரஜிதோ நாம நிரயோ தத்த² உபபஜ்ஜதி. ஸசே கோ² பனஸ்ஸ ஏவம் தி³ட்டி² ஹோதி – ‘யோ ஸோ அஸ்ஸாரோஹோ ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே ஹனந்தி பரியாபாதே³ந்தி, ஸோ காயஸ்ஸ பே⁴தா³ பரம் மரணா பரஜிதானம் தே³வானம் ஸஹப்³யதம் உபபஜ்ஜதீ’தி, ஸாஸ்ஸ ஹோதி மிச்சா²தி³ட்டி². மிச்சா²தி³ட்டி²கஸ்ஸ கோ² பனாஹம் கா³மணி, புரிஸபுக்³க³லஸ்ஸ த்³வின்னம் க³தீனம் அஞ்ஞதரம் க³திம் வதா³மி – நிரயம் வா திரச்சா²னயோனிம் வா’’தி.

ஏவம் வுத்தே, அஸ்ஸாரோஹோ கா³மணி பரோதி³, அஸ்ஸூனி பவத்தேஸி. ‘‘ஏதம் கோ² த்யாஹம், கா³மணி, நாலத்த²ம் – ‘அலம், கா³மணி, திட்ட²தேதம்; மா மம் ஏதம் புச்சீ²’’’தி. ‘‘நாஹம், ப⁴ந்தே, ஏதம் ரோதா³மி யம் மம் ப⁴க³வா ஏவமாஹ. அபிசாஹம், ப⁴ந்தே, புப்³ப³கேஹி ஆசரியபாசரியேஹி அஸ்ஸாரோஹேஹி தீ³க⁴ரத்தம் நிகதோ வஞ்சிதோ பலுத்³தோ⁴ – ‘யோ ஸோ அஸ்ஸாரோஹோ ஸங்கா³மே உஸ்ஸஹதி வாயமதி, தமேனம் உஸ்ஸஹந்தம் வாயமந்தம் பரே ஹனந்தி பரியாபாதே³ந்தி, ஸோ காயஸ்ஸ பே⁴தா³ பரம் மரணா பரஜிதானம் தே³வானம் ஸஹப்³யதம் உபபஜ்ஜதீ’’’தி. ‘‘அபி⁴க்கந்தம், ப⁴ந்தே…பே… அஜ்ஜதக்³கே³ பாணுபேதம் ஸரணம் க³த’’ந்தி. பஞ்சமம்.

6. அஸிப³ந்த⁴கபுத்தஸுத்தம்

358. ஏகம் ஸமயம் ப⁴க³வா நாளந்தா³யம் விஹரதி பாவாரிகம்ப³வனே. அத² கோ² அஸிப³ந்த⁴கபுத்தோ கா³மணி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² அஸிப³ந்த⁴கபுத்தோ கா³மணி ப⁴க³வந்தம் ஏதத³வோச – ‘‘ப்³ராஹ்மணா, ப⁴ந்தே, பச்சா² பூ⁴மகா காமண்ட³லுகா ஸேவாலமாலிகா உத³கோரோஹகா அக்³கி³பரிசாரகா. தே மதம் காலங்கதம் உய்யாபேந்தி நாம ஸஞ்ஞாபேந்தி நாம ஸக்³க³ம் நாம ஓக்காமேந்தி. ப⁴க³வா பன, ப⁴ந்தே, அரஹம் ஸம்மாஸம்பு³த்³தோ⁴ பஹோதி ததா² காதும் யதா² ஸப்³போ³ லோகோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜேய்யா’’தி? ‘‘தேன ஹி, கா³மணி, தஞ்ஞேவேத்த² படிபுச்சி²ஸ்ஸாமி. யதா² தே க²மேய்ய ததா² நம் ப்³யாகரேய்யாஸீ’’தி.

‘‘தம் கிம் மஞ்ஞஸி, கா³மணி, இத⁴ஸ்ஸ புரிஸோ பாணாதிபாதீ அதி³ன்னாதா³யீ காமேஸுமிச்சா²சாரீ முஸாவாதீ³ பிஸுணவாசோ ப²ருஸவாசோ ஸம்ப²ப்பலாபீ அபி⁴ஜ்ஜா²லு ப்³யாபன்னசித்தோ மிச்சா²தி³ட்டி²கோ. தமேனம் மஹா ஜனகாயோ ஸங்க³ம்ம ஸமாக³ம்ம ஆயாசேய்ய தோ²மேய்ய பஞ்ஜலிகோ அனுபரிஸக்கேய்ய – ‘அயம் புரிஸோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதூ’தி. தம் கிம் மஞ்ஞஸி, கா³மணி, அபி நு ஸோ புரிஸோ மஹதோ ஜனகாயஸ்ஸ ஆயாசனஹேது வா தோ²மனஹேது வா பஞ்ஜலிகா அனுபரிஸக்கனஹேது வா காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜேய்யா’’தி? ‘‘நோ ஹேதம், ப⁴ந்தே’’.

‘‘ஸேய்யதா²பி, கா³மணி, புரிஸோ மஹதிம் புது²ஸிலம் க³ம்பீ⁴ரே உத³கரஹதே³ பக்கி²பேய்ய. தமேனம் மஹா ஜனகாயோ ஸங்க³ம்ம ஸமாக³ம்ம ஆயாசேய்ய தோ²மேய்ய பஞ்ஜலிகோ அனுபரிஸக்கேய்ய – ‘உம்முஜ்ஜ, போ⁴ புது²ஸிலே, உப்லவ, போ⁴ புது²ஸிலே, த²லமுப்லவ, போ⁴ புது²ஸிலே’தி. தம் கிம் மஞ்ஞஸி, கா³மணி, அபி நு ஸா புது²ஸிலா மஹதோ ஜனகாயஸ்ஸ ஆயாசனஹேது வா தோ²மனஹேது வா பஞ்ஜலிகா அனுபரிஸக்கனஹேது வா உம்முஜ்ஜேய்ய வா உப்லவேய்ய வா த²லம் வா உப்லவேய்யா’’தி? ‘‘நோ ஹேதம், ப⁴ந்தே’’. ‘‘ஏவமேவ கோ², கா³மணி, யோ ஸோ புரிஸோ பாணாதிபாதீ அதி³ன்னாதா³யீ காமேஸுமிச்சா²சாரீ முஸாவாதீ³ பிஸுணவாசோ ப²ருஸவாசோ ஸம்ப²ப்பலாபீ அபி⁴ஜ்ஜா²லு ப்³யாபன்னசித்தோ மிச்சா²தி³ட்டி²கோ. கிஞ்சாபி தம் மஹா ஜனகாயோ ஸங்க³ம்ம ஸமாக³ம்ம ஆயாசேய்ய தோ²மேய்ய பஞ்ஜலிகோ அனுபரிஸக்கேய்ய – ‘அயம் புரிஸோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜதூ’’’தி, அத² கோ² ஸோ புரிஸோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜேய்ய.

‘‘தம் கிம் மஞ்ஞஸி, கா³மணி, இத⁴ஸ்ஸ [இத⁴ (க.), இத⁴ சஸ்ஸ (?)] புரிஸோ பாணாதிபாதா படிவிரதோ அதி³ன்னாதா³னா படிவிரதோ காமேஸுமிச்சா²சாரா படிவிரதோ முஸாவாதா³ படிவிரதோ பிஸுணாய வாசாய படிவிரதோ ப²ருஸாய வாசாய படிவிரதோ ஸம்ப²ப்பலாபா படிவிரதோ அனபி⁴ஜ்ஜா²லு அப்³யாபன்னசித்தோ ஸம்மாதி³ட்டி²கோ. தமேனம் மஹா ஜனகாயோ ஸங்க³ம்ம ஸமாக³ம்ம ஆயாசேய்ய தோ²மேய்ய பஞ்ஜலிகோ அனுபரிஸக்கேய்ய – ‘அயம் புரிஸோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதூ’தி. தம் கிம் மஞ்ஞஸி, கா³மணி, அபி நு ஸோ புரிஸோ மஹதோ ஜனகாயஸ்ஸ ஆயாசனஹேது வா தோ²மனஹேது வா பஞ்ஜலிகா அனுபரிஸக்கனஹேது வா காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜேய்யா’’தி? ‘‘நோ ஹேதம், ப⁴ந்தே’’.

‘‘ஸேய்யதா²பி, கா³மணி, புரிஸோ ஸப்பிகும்ப⁴ம் வா தேலகும்ப⁴ம் வா க³ம்பீ⁴ரே உத³கரஹதே³ ஓகா³ஹேத்வா பி⁴ந்தே³ய்ய. தத்ர யாஸ்ஸ ஸக்க²ரா வா கட²லா வா ஸா அதோ⁴கா³மீ [அதோ⁴கா³மினீ (?)] அஸ்ஸ; யஞ்ச க்²வஸ்ஸ தத்ர ஸப்பி வா தேலம் வா தம் உத்³த⁴ம் கா³மி அஸ்ஸ. தமேனம் மஹா ஜனகாயோ ஸங்க³ம்ம ஸமாக³ம்ம ஆயாசேய்ய தோ²மேய்ய பஞ்ஜலிகோ அனுபரிஸக்கேய்ய – ‘ஓஸீத³, போ⁴ ஸப்பிதேல, ஸம்ஸீத³, போ⁴ ஸப்பிதேல, அதோ⁴ க³ச்ச², போ⁴ ஸப்பிதேலா’தி. தம் கிம் மஞ்ஞஸி, கா³மணி, அபி நு தம் ஸப்பிதேலம் மஹதோ ஜனகாயஸ்ஸ ஆயாசனஹேது வா தோ²மனஹேது வா பஞ்ஜலிகா அனுபரிஸக்கனஹேது வா ஓஸீதே³ய்ய வா ஸம்ஸீதே³ய்ய வா அதோ⁴ வா க³ச்சே²ய்யா’’தி? ‘‘நோ ஹேதம், ப⁴ந்தே’’. ‘‘ஏவமேவ கோ², கா³மணி, யோ ஸோ புரிஸோ பாணாதிபாதா படிவிரதோ, அதி³ன்னாதா³னா படிவிரதோ, காமேஸுமிச்சா²சாரா படிவிரதோ, முஸாவாதா³ படிவிரதோ, பிஸுணாய வாசாய படிவிரதோ, ப²ருஸாய வாசாய படிவிரதோ, ஸம்ப²ப்பலாபா படிவிரதோ, அனபி⁴ஜ்ஜா²லு, அப்³யாபன்னசித்தோ, ஸம்மாதி³ட்டி²கோ, கிஞ்சாபி தம் மஹா ஜனகாயோ ஸங்க³ம்ம ஸமாக³ம்ம ஆயாசேய்ய தோ²மேய்ய பஞ்ஜலிகோ அனுபரிஸக்கேய்ய – ‘அயம் புரிஸோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதூ’தி, அத² கோ² ஸோ புரிஸோ காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜேய்யா’’தி. ஏவம் வுத்தே, அஸிப³ந்த⁴கபுத்தோ கா³மணி ப⁴க³வந்தம் ஏதத³வோச – ‘‘அபி⁴க்கந்தம், ப⁴ந்தே…பே… அஜ்ஜதக்³கே³ பாணுபேதம் ஸரணம் க³த’’ந்தி. ச²ட்ட²ம்.

7. கே²த்தூபமஸுத்தம்

359. ஏகம் ஸமயம் ப⁴க³வா நாளந்தா³யம் விஹரதி பாவாரிகம்ப³வனே. அத² கோ² அஸிப³ந்த⁴கபுத்தோ கா³மணி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² அஸிப³ந்த⁴கபுத்தோ கா³மணி ப⁴க³வந்தம் ஏதத³வோச – ‘‘நனு, ப⁴ந்தே, ப⁴க³வா ஸப்³ப³பாணபூ⁴தஹிதானுகம்பீ விஹரதீ’’தி? ‘‘ஏவம், கா³மணி, ததா²க³தோ ஸப்³ப³பாணபூ⁴தஹிதானுகம்பீ விஹரதீ’’தி. ‘‘அத² கிஞ்சரஹி, ப⁴ந்தே, ப⁴க³வா ஏகச்சானம் ஸக்கச்சம் த⁴ம்மம் தே³ஸேதி, ஏகச்சானம் நோ ததா² ஸக்கச்சம் த⁴ம்மம் தே³ஸேதீ’’தி? ‘‘தேன ஹி, கா³மணி, தஞ்ஞேவேத்த² படிபுச்சி²ஸ்ஸாமி. யதா² தே க²மேய்ய ததா² நம் ப்³யாகரேய்யாஸி. தம் கிம் மஞ்ஞஸி, கா³மணி, இத⁴ஸ்ஸு [இத⁴ (ஸீ. ஸ்யா. கம். பீ.)] கஸ்ஸகஸ்ஸ க³ஹபதினோ தீணி கே²த்தானி – ஏகம் கே²த்தம் அக்³க³ம், ஏகம் கே²த்தம் மஜ்ஜி²மம், ஏகம் கே²த்தம் ஹீனம் ஜங்க³லம் ஊஸரம் பாபபூ⁴மி. தம் கிம் மஞ்ஞஸி, கா³மணி, அஸு கஸ்ஸகோ க³ஹபதி பீ³ஜானி பதிட்டா²பேதுகாமோ கத்த² பட²மம் பதிட்டா²பேய்ய, யம் வா அது³ம் கே²த்தம் அக்³க³ம், யம் வா அது³ம் கே²த்தம் மஜ்ஜி²மம், யம் வா அது³ம் கே²த்தம் ஹீனம் ஜங்க³லம் ஊஸரம் பாபபூ⁴மீ’’தி? ‘‘அஸு, ப⁴ந்தே, கஸ்ஸகோ க³ஹபதி பீ³ஜானி பதிட்டா²பேதுகாமோ யம் அது³ம் கே²த்தம் அக்³க³ம் தத்த² பதிட்டா²பேய்ய. தத்த² பதிட்டா²பேத்வா யம் அது³ம் கே²த்தம் மஜ்ஜி²மம் தத்த² பதிட்டா²பேய்ய. தத்த² பதிட்டா²பேத்வா யம் அது³ம் கே²த்தம் ஹீனம் ஜங்க³லம் ஊஸரம் பாபபூ⁴மி தத்த² பதிட்டா²பேய்யபி, நோபி பதிட்டா²பேய்ய. தம் கிஸ்ஸ ஹேது? அந்தமஸோ கோ³ப⁴த்தம்பி ப⁴விஸ்ஸதீ’’தி.

‘‘ஸேய்யதா²பி, கா³மணி, யம் அது³ம் கே²த்தம் அக்³க³ம்; ஏவமேவ மய்ஹம் பி⁴க்கு²பி⁴க்கு²னியோ. தேஸாஹம் த⁴ம்மம் தே³ஸேமி – ஆதி³கல்யாணம் மஜ்ஜே²கல்யாணம் பரியோஸானகல்யாணம், ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேமி. தம் கிஸ்ஸ ஹேது? ஏதே ஹி, கா³மணி, மம்தீ³பா மம்லேணா மம்தாணா மம்ஸரணா விஹரந்தி. ஸேய்யதா²பி, கா³மணி, யம் அது³ம் கே²த்தம் மஜ்ஜி²மம்; ஏவமேவ மய்ஹம் உபாஸகஉபாஸிகாயோ. தேஸம் பாஹம் த⁴ம்மம் தே³ஸேமி – ஆதி³கல்யாணம் மஜ்ஜே²கல்யாணம் பரியோஸானகல்யாணம், ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேமி. தம் கிஸ்ஸ ஹேது? ஏதே ஹி, கா³மணி, மம்தீ³பா மம்லேணா மம்தாணா மம்ஸரணா விஹரந்தி. ஸேய்யதா²பி, கா³மணி, யம் அது³ம் கே²த்தம் ஹீனம் ஜங்க³லம் ஊஸரம் பாபபூ⁴மி; ஏவமேவ மய்ஹம் அஞ்ஞதித்தி²யா ஸமணப்³ராஹ்மணபரிப்³பா³ஜகா. தேஸம் பாஹம் த⁴ம்மம் தே³ஸேமி – ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம், கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேமி. தம் கிஸ்ஸ ஹேது? அப்பேவ நாம ஏகம் பத³ம்பி ஆஜானேய்யும் தம் நேஸம் அஸ்ஸ தீ³க⁴ரத்தம் ஹிதாய ஸுகா²யா’’தி.

‘‘ஸேய்யதா²பி, கா³மணி, புரிஸஸ்ஸ தயோ உத³கமணிகா – ஏகோ உத³கமணிகோ அச்சி²த்³தோ³ அஹாரீ அபரிஹாரீ, ஏகோ உத³கமணிகோ அச்சி²த்³தோ³ ஹாரீ பரிஹாரீ, ஏகோ உத³கமணிகோ சி²த்³தோ³ ஹாரீ பரிஹாரீ. தம் கிம் மஞ்ஞஸி, கா³மணி, அஸு புரிஸோ உத³கம் நிக்கி²பிதுகாமோ கத்த² பட²மம் நிக்கி²பேய்ய, யோ வா ஸோ உத³கமணிகோ அச்சி²த்³தோ³ அஹாரீ அபரிஹாரீ, யோ வா ஸோ உத³கமணிகோ அச்சி²த்³தோ³ ஹாரீ பரிஹாரீ, யோ வா ஸோ உத³கமணிகோ சி²த்³தோ³ ஹாரீ பரிஹாரீ’’தி? ‘‘அஸு, ப⁴ந்தே, புரிஸோ உத³கம் நிக்கி²பிதுகாமோ, யோ ஸோ உத³கமணிகோ அச்சி²த்³தோ³ அஹாரீ அபரிஹாரீ தத்த² நிக்கி²பேய்ய, தத்த² நிக்கி²பித்வா, யோ ஸோ உத³கமணிகோ அச்சி²த்³தோ³ ஹாரீ பரிஹாரீ தத்த² நிக்கி²பேய்ய, தத்த² நிக்கி²பித்வா, யோ ஸோ உத³கமணிகோ சி²த்³தோ³ ஹாரீ பரிஹாரீ தத்த² நிக்கி²பேய்யபி, நோபி நிக்கி²பேய்ய. தம் கிஸ்ஸ ஹேது? அந்தமஸோ ப⁴ண்ட³தோ⁴வனம்பி ப⁴விஸ்ஸதீ’’தி.

‘‘ஸேய்யதா²பி, கா³மணி, யோ ஸோ உத³கமணிகோ அச்சி²த்³தோ³ அஹாரீ அபரிஹாரீ; ஏவமேவ மய்ஹம் பி⁴க்கு²பி⁴க்கு²னியோ. தேஸாஹம் த⁴ம்மம் தே³ஸேமி – ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம், கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேமி. தம் கிஸ்ஸ ஹேது? ஏதே ஹி, கா³மணி, மம்தீ³பா மம்லேணா மம்தாணா மம்ஸரணா விஹரந்தி. ஸேய்யதா²பி, கா³மணி, யோ ஸோ உத³கமணிகோ அச்சி²த்³தோ³ ஹாரீ பரிஹாரீ; ஏவமேவ மய்ஹம் உபாஸகஉபாஸிகாயோ. தேஸாஹம் த⁴ம்மம் தே³ஸேமி – ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம், கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேமி. தம் கிஸ்ஸ ஹேது? ஏதே ஹி, கா³மணி, மம்தீ³பா மம்லேணா மம்தாணா மம்ஸரணா விஹரந்தி. ஸேய்யதா²பி, கா³மணி, யோ ஸோ உத³கமணிகோ சி²த்³தோ³ ஹாரீ பரிஹாரீ; ஏவமேவ மய்ஹம் அஞ்ஞதித்தி²யா ஸமணப்³ராஹ்மணபரிப்³பா³ஜகா. தேஸாஹம் த⁴ம்மம் தே³ஸேமி – ஆதி³கல்யாணம் மஜ்ஜே²கல்யாணம் பரியோஸானகல்யாணம் ஸாத்த²ம் ஸப்³யஞ்ஜனம் கேவலபரிபுண்ணம் பரிஸுத்³த⁴ம் ப்³ரஹ்மசரியம் பகாஸேமி. தம் கிஸ்ஸ ஹேது? அப்பேவ நாம ஏகம் பத³ம்பி ஆஜானேய்யும், தம் நேஸம் அஸ்ஸ தீ³க⁴ரத்தம் ஹிதாய ஸுகா²யா’’தி. ஏவம் வுத்தே, அஸிப³ந்த⁴கபுத்தோ கா³மணி ப⁴க³வந்தம் ஏதத³வோச – ‘‘அபி⁴க்கந்தம், ப⁴ந்தே…பே… அஜ்ஜதக்³கே³ பாணுபேதம் ஸரணம் க³த’’ந்தி. ஸத்தமம்.

8. ஸங்க²த⁴மஸுத்தம்

360. ஏகம் ஸமயம் ப⁴க³வா நாளந்தா³யம் விஹரதி பாவாரிகம்ப³வனே. அத² கோ² அஸிப³ந்த⁴கபுத்தோ கா³மணி நிக³ண்ட²ஸாவகோ யேன ப⁴க³வா தேனுபஸங்கமி; உபஸங்கமித்வா ஏகமந்தம் நிஸீதி³. ஏகமந்தம் நிஸின்னம் கோ² அஸிப³ந்த⁴கபுத்தம் கா³மணிம் ப⁴க³வா ஏதத³வோச – ‘‘கத²ம் நு கோ², கா³மணி, நிக³ண்டோ² நாடபுத்தோ ஸாவகானம் த⁴ம்மம் தே³ஸேதீ’’தி? ‘‘ஏவம் கோ², ப⁴ந்தே, நிக³ண்டோ² நாடபுத்தோ ஸாவகானம் த⁴ம்மம் தே³ஸேதி – ‘யோ கோசி பாணம் அதிபாதேதி, ஸப்³போ³ ஸோ ஆபாயிகோ நேரயிகோ, யோ கோசி அதி³ன்னம் ஆதி³யதி, ஸப்³போ³ ஸோ ஆபாயிகோ நேரயிகோ, யோ கோசி காமேஸு மிச்சா² சரதி, ஸப்³போ³ ஸோ ஆபாயிகோ நேரயிகோ, யோ கோசி முஸா ப⁴ணதி ஸப்³போ³, ஸோ ஆபாயிகோ நேரயிகோ. யம்ப³ஹுலம் யம்ப³ஹுலம் விஹரதி, தேன தேன நீயதீ’தி. ஏவம் கோ², ப⁴ந்தே, நிக³ண்டோ² நாடபுத்தோ ஸாவகானம் த⁴ம்மம் தே³ஸேதீ’’தி. ‘‘‘யம்ப³ஹுலம் யம்ப³ஹுலஞ்ச, கா³மணி, விஹரதி, தேன தேன நீயதி’, ஏவம் ஸந்தே ந கோசி ஆபாயிகோ நேரயிகோ ப⁴விஸ்ஸதி, யதா² நிக³ண்ட²ஸ்ஸ நாடபுத்தஸ்ஸ வசனம்’’.

‘‘தம் கிம் மஞ்ஞஸி, கா³மணி, யோ ஸோ புரிஸோ பாணாதிபாதீ ரத்தியா வா தி³வஸஸ்ஸ வா ஸமயாஸமயம் உபாதா³ய, கதமோ ப³ஹுதரோ ஸமயோ, யம் வா ஸோ பாணமதிபாதேதி, யம் வா ஸோ பாணம் நாதிபாதேதீ’’தி? ‘‘யோ ஸோ, ப⁴ந்தே, புரிஸோ பாணாதிபாதீ ரத்தியா வா தி³வஸஸ்ஸ வா ஸமயாஸமயம் உபாதா³ய, அப்பதரோ ஸோ ஸமயோ யம் ஸோ பாணமதிபாதேதி, அத² கோ² ஸ்வேவ ப³ஹுதரோ ஸமயோ யம் ஸோ பாணம் நாதிபாதேதீ’’தி. ‘‘‘யம்ப³ஹுலம் யம்ப³ஹுலஞ்ச, கா³மணி, விஹரதி தேன தேன நீயதீ’தி, ஏவம் ஸந்தே ந கோசி ஆபாயிகோ நேரயிகோ ப⁴விஸ்ஸதி, யதா² நிக³ண்ட²ஸ்ஸ நாடபுத்தஸ்ஸ வசனம்’’.

‘‘தம் கிம் மஞ்ஞஸி, கா³மணி, யோ ஸோ புரிஸோ அதி³ன்னாதா³யீ ரத்தியா வா தி³வஸஸ்ஸ வா ஸமயாஸமயம் உபாதா³ய, கதமோ ப³ஹுதரோ ஸமயோ, யம் வா ஸோ அதி³ன்னம் ஆதி³யதி, யம் வா ஸோ அதி³ன்னம் நாதி³யதீ’’தி. ‘‘யோ ஸோ, ப⁴ந்தே, புரிஸோ அதி³ன்னாதா³யீ ரத்தியா வா தி³வஸஸ்ஸ வா ஸமயாஸமயம் உபாதா³ய அப்பதரோ ஸோ ஸமயோ, யம் ஸோ அதி³ன்னம் ஆதி³யதி, அத² கோ² ஸ்வேவ ப³ஹுதரோ ஸமயோ, யம் ஸோ அதி³ன்னம் நாதி³யதீ’’தி. ‘‘‘யம்ப³ஹுலம் யம்ப³ஹுலஞ்ச, கா³மணி, விஹரதி தேன தேன நீயதீ’தி, ஏவம் ஸந்தே ந கோசி ஆபாயிகோ நேரயிகோ ப⁴விஸ்ஸதி, யதா² நிக³ண்ட²ஸ்ஸ நாடபுத்தஸ்ஸ வசனம்’’.

‘‘தம் கிம் மஞ்ஞஸி, கா³மணி, யோ ஸோ புரிஸோ காமேஸுமிச்சா²சாரீ ரத்தியா வா தி³வஸஸ்ஸ வா ஸமயாஸமயம் உபாதா³ய, கதமோ ப³ஹுதரோ ஸமயோ, யம் வா ஸோ காமேஸு மிச்சா² சரதி, யம் வா ஸோ காமேஸு மிச்சா² ந சரதீ’’தி? ‘‘யோ ஸோ, ப⁴ந்தே, புரிஸோ காமேஸுமிச்சா²சாரீ ரத்தியா வா தி³வஸஸ்ஸ வா ஸமயாஸமயம் உபாதா³ய, அப்பதரோ ஸோ ஸமயோ யம் ஸோ காமேஸு மிச்சா² சரதி, அத² கோ² ஸ்வேவ ப³ஹுதரோ ஸமயோ, யம் ஸோ காமேஸு மிச்சா² ந சரதீ’’தி. ‘‘‘யம்ப³ஹுலம் யம்ப³ஹுலஞ்ச, கா³மணி, விஹரதி தேன தேன நீயதீ’தி, ஏவம் ஸந்தே ந கோசி ஆபாயிகோ நேரயிகோ ப⁴விஸ்ஸதி, யதா² நிக³ண்ட²ஸ்ஸ நாடபுத்தஸ்ஸ வசனம்’’.

‘‘தம் கிம் மஞ்ஞஸி, கா³மணி, யோ ஸோ புரிஸோ முஸாவாதீ³ ரத்தியா வா தி³வஸஸ்ஸ வா ஸமயாஸமயம் உபாதா³ய, கதமோ ப³ஹுதரோ ஸமயோ, யம் வா ஸோ முஸா ப⁴ணதி, யம் வா ஸோ முஸா ந ப⁴ணதீ’’தி? ‘‘யோ ஸோ, ப⁴ந்தே, புரிஸோ முஸாவாதீ³ ரத்தியா வா தி³வஸஸ்ஸ வா ஸமயாஸமயம் உபாதா³ய, அப்பதரோ ஸோ ஸமயோ, யம் ஸோ முஸா ப⁴ணதி, அத² கோ² ஸ்வேவ ப³ஹுதரோ ஸமயோ, யம் ஸோ முஸா ந ப⁴ணதீ’’தி. ‘‘‘யம்ப³ஹுலம் யம்ப³ஹுலஞ்ச, கா³மணி, விஹரதி தேன தேன நீயதீ’தி, ஏவம் ஸந்தே ந கோசி ஆபாயிகோ நேரயிகோ ப⁴விஸ்ஸதி, யதா² நிக³ண்ட²ஸ்ஸ நாடபுத்தஸ்ஸ வசனம்’’.

‘‘இத⁴, கா³மணி, ஏகச்சோ ஸத்தா² ஏவம்வாதீ³ ஹோதி ஏவம்தி³ட்டி² [ஏவம்தி³ட்டீ² (க.)] – ‘யோ கோசி பாணமதிபாதேதி, ஸப்³போ³ ஸோ ஆபாயிகோ நேரயிகோ, யோ கோசி அதி³ன்னம் ஆதி³யதி, ஸப்³போ³ ஸோ ஆபாயிகோ நேரயிகோ, யோ கோசி காமேஸு மிச்சா² சரதி, ஸப்³போ³ ஸோ ஆபாயிகோ நேரயிகோ, யோ கோசி முஸா ப⁴ணதி, ஸப்³போ³ ஸோ ஆபாயிகோ நேரயிகோ’தி. தஸ்மிம் கோ² பன, கா³மணி, ஸத்த²ரி ஸாவகோ அபி⁴ப்பஸன்னோ ஹோதி. தஸ்ஸ ஏவம் ஹோதி – ‘மய்ஹம் கோ² ஸத்தா² ஏவம்வாதீ³ ஏவம்தி³ட்டி² – யோ கோசி பாணமதிபாதேதி, ஸப்³போ³ ஸோ ஆபாயிகோ நேரயிகோதி. அத்தி² கோ² பன மயா பாணோ அதிபாதிதோ, அஹம்பம்ஹி ஆபாயிகோ நேரயிகோதி தி³ட்டி²ம் படிலப⁴தி. தம், கா³மணி, வாசம் அப்பஹாய தம் சித்தம் அப்பஹாய தம் தி³ட்டி²ம் அப்படினிஸ்ஸஜ்ஜித்வா யதா²ப⁴தம் நிக்கி²த்தோ ஏவம் நிரயே. மய்ஹம் கோ² ஸத்தா² ஏவம்வாதீ³ ஏவம்தி³ட்டி² – யோ கோசி அதி³ன்னம் ஆதி³யதி, ஸப்³போ³ ஸோ ஆபாயிகோ நேரயிகோதி. அத்தி² கோ² பன மயா அதி³ன்னம் ஆதி³ன்னம் அஹம்பம்ஹி ஆபாயிகோ நேரயிகோதி தி³ட்டி²ம் படிலப⁴தி. தம், கா³மணி, வாசம் அப்பஹாய தம் சித்தம் அப்பஹாய தம் தி³ட்டி²ம் அப்படினிஸ்ஸஜ்ஜித்வா யதா²ப⁴தம் நிக்கி²த்தோ ஏவம் நிரயே. மய்ஹம் கோ² ஸத்தா² ஏவம்வாதீ³ ஏவம்தி³ட்டி² – யோ கோசி காமேஸு மிச்சா² சரதி, ஸப்³போ³ ஸோ ஆபாயிகோ நேரயிகோ’தி. அத்தி² கோ² பன மயா காமேஸு மிச்சா² சிண்ணம். ‘அஹம்பம்ஹி ஆபாயிகோ நேரயிகோ’தி தி³ட்டி²ம் படிலப⁴தி. தம், கா³மணி, வாசம் அப்பஹாய தம் சித்தம் அப்பஹாய தம் தி³ட்டி²ம் அப்படினிஸ்ஸஜ்ஜித்வா யதா²ப⁴தம் நிக்கி²த்தோ ஏவம் நிரயே. மய்ஹம் கோ² ஸத்தா² ஏவம்வாதீ³ ஏவம்தி³ட்டி² – யோ கோசி முஸா ப⁴ணதி, ஸப்³போ³ ஸோ ஆபாயிகோ நேரயிகோதி. அத்தி² கோ² பன மயா முஸா ப⁴ணிதம். ‘அஹம்பம்ஹி ஆபாயிகோ நேரயிகோ’தி தி³ட்டி²ம் படிலப⁴தி. தம், கா³மணி, வாசம் அப்பஹாய தம் சித்தம் அப்பஹாய தம் தி³ட்டி²ம் அப்படினிஸ்ஸஜ்ஜித்வா யதா²ப⁴தம் நிக்கி²த்தோ ஏவம் நிரயே.

‘‘இத⁴ பன, கா³மணி, ததா²க³தோ லோகே உப்பஜ்ஜதி அரஹம் ஸம்மாஸம்பு³த்³தோ⁴ விஜ்ஜாசரணஸம்பன்னோ ஸுக³தோ லோகவிதூ³ அனுத்தரோ புரிஸத³ம்மஸாரதி² ஸத்தா² தே³வமனுஸ்ஸானம் பு³த்³தோ⁴ ப⁴க³வா. ஸோ அனேகபரியாயேன பாணாதிபாதம் க³ரஹதி விக³ரஹதி, ‘பாணாதிபாதா விரமதா²’தி சாஹ. அதி³ன்னாதா³னம் க³ரஹதி விக³ரஹதி, ‘அதி³ன்னாதா³னா விரமதா²’தி சாஹ. காமேஸுமிச்சா²சாரம் க³ரஹதி, விக³ரஹதி ‘காமேஸுமிச்சா²சாரா விரமதா²’தி சாஹ. முஸாவாத³ம் க³ரஹதி விக³ரஹதி ‘முஸாவாதா³ விரமதா²’தி சாஹ. தஸ்மிம் கோ² பன, கா³மணி, ஸத்த²ரி ஸாவகோ அபி⁴ப்பஸன்னோ ஹோதி. ஸோ இதி படிஸஞ்சிக்க²தி – ‘ப⁴க³வா கோ² அனேகபரியாயேன பாணாதிபாதம் க³ரஹதி விக³ரஹதி, பாணாதிபாதா விரமதா²தி சாஹ. அத்தி² கோ² பன மயா பாணோ அதிபாதிதோ யாவதகோ வா தாவதகோ வா. யோ கோ² பன மயா பாணோ அதிபாதிதோ யாவதகோ வா தாவதகோ வா, தம் ந ஸுட்டு², தம் ந ஸாது⁴. அஹஞ்சேவ [அஹஞ்சே (?)] கோ² பன தப்பச்சயா விப்படிஸாரீ அஸ்ஸம். ந மேதம் பாபம் கம்மம் [பாபகம்மம் (ஸ்யா. கம். பீ. க.)] அகதம் ப⁴விஸ்ஸதீ’தி. ஸோ இதி படிஸங்கா²ய தஞ்சேவ பாணாதிபாதம் பஜஹதி. ஆயதிஞ்ச பாணாதிபாதா படிவிரதோ ஹோதி. ஏவமேதஸ்ஸ பாபஸ்ஸ கம்மஸ்ஸ பஹானம் ஹோதி. ஏவமேதஸ்ஸ பாபஸ்ஸ கம்மஸ்ஸ ஸமதிக்கமோ ஹோதி.

‘‘‘ப⁴க³வா கோ² அனேகபரியாயேன அதி³ன்னாதா³னம் க³ரஹதி விக³ரஹதி, அதி³ன்னாதா³னா விரமதா²தி சாஹ. அத்தி² கோ² பன மயா அதி³ன்னம் ஆதி³ன்னம் யாவதகம் வா தாவதகம் வா. யம் கோ² பன மயா அதி³ன்னம் ஆதி³ன்னம் யாவதகம் வா தாவதகம் வா தம் ந ஸுட்டு², தம் ந ஸாது⁴. அஹஞ்சேவ கோ² பன தப்பச்சயா விப்படிஸாரீ அஸ்ஸம், ந மேதம் பாபம் கம்மம் அகதம் ப⁴விஸ்ஸதீ’தி. ஸோ இதி படிஸங்கா²ய தஞ்சேவ அதி³ன்னாதா³னம் பஜஹதி. ஆயதிஞ்ச அதி³ன்னாதா³னா படிவிரதோ ஹோதி. ஏவமேதஸ்ஸ பாபஸ்ஸ கம்மஸ்ஸ பஹானம் ஹோதி. ஏவமேதஸ்ஸ பாபஸ்ஸ கம்மஸ்ஸ ஸமதிக்கமோ ஹோதி.

‘‘‘ப⁴க³வா கோ² பன அனேகபரியாயேன காமேஸுமிச்சா²சாரம் க³ரஹதி விக³ரஹதி, காமேஸுமிச்சா²சாரா விரமதா²தி சாஹ. அத்தி² கோ² பன மயா காமேஸு மிச்சா² சிண்ணம் யாவதகம் வா தாவதகம் வா. யம் கோ² பன மயா காமேஸு மிச்சா² சிண்ணம் யாவதகம் வா தாவதகம் வா தம் ந ஸுட்டு², தம் ந ஸாது⁴. அஹஞ்சேவ கோ² பன தப்பச்சயா விப்படிஸாரீ அஸ்ஸம், ந மேதம் பாபம் கம்மம் அகதம் ப⁴விஸ்ஸதீ’தி. ஸோ இதி படிஸங்கா²ய தஞ்சேவ காமேஸுமிச்சா²சாரம் பஜஹதி, ஆயதிஞ்ச காமேஸுமிச்சா²சாரா படிவிரதோ ஹோதி. ஏவமேதஸ்ஸ பாபஸ்ஸ கம்மஸ்ஸ பஹானம் ஹோதி. ஏவமேதஸ்ஸ பாபஸ்ஸ கம்மஸ்ஸ ஸமதிக்கமோ ஹோதி.

‘‘‘ப⁴க³வா கோ² பன அனேகபரியாயேன முஸாவாத³ம் க³ரஹதி விக³ரஹதி, முஸாவாதா³ விரமதா²தி சாஹ. அத்தி² கோ² பன மயா முஸா ப⁴ணிதம் யாவதகம் வா தாவதகம் வா. யம் கோ² பன மயா முஸா ப⁴ணிதம் யாவதகம் வா தாவதகம் வா தம் ந ஸுட்டு², தம் ந ஸாது⁴. அஹஞ்சேவ கோ² பன தப்பச்சயா விப்படிஸாரீ அஸ்ஸம், ந மேதம் பாபம் கம்மம் அகதம் ப⁴விஸ்ஸதீ’தி. ஸோ இதி படிஸங்கா²ய தஞ்சேவ முஸாவாத³ம் பஜஹதி, ஆயதிஞ்ச முஸாவாதா³ படிவிரதோ ஹோதி. ஏவமேதஸ்ஸ பாபஸ்ஸ கம்மஸ்ஸ பஹானம் ஹோதி. ஏவமேதஸ்ஸ பாபஸ்ஸ கம்மஸ்ஸ ஸமதிக்கமோ ஹோதி.

‘‘ஸோ பாணாதிபாதம் பஹாய பாணாதிபாதா படிவிரதோ ஹோதி. அதி³ன்னாதா³னம் பஹாய அதி³ன்னாதா³னா படிவிரதோ ஹோதி. காமேஸுமிச்சா²சாரம் பஹாய காமேஸுமிச்சா²சாரா படிவிரதோ ஹோதி. முஸாவாத³ம் பஹாய முஸாவாதா³ படிவிரதோ ஹோதி. பிஸுணம் வாசம் பஹாய பிஸுணாய வாசாய படிவிரதோ ஹோதி. ப²ருஸம் வாசம் பஹாய ப²ருஸாய வாசாய படிவிரதோ ஹோதி. ஸம்ப²ப்பலாபம் பஹாய ஸம்ப²ப்பலாபா படிவிரதோ ஹோதி. அபி⁴ஜ்ஜ²ம் பஹாய அனபி⁴ஜ்ஜா²லு ஹோதி. ப்³யாபாத³ப்பதோ³ஸம் பஹாய அப்³யாபன்னசித்தோ ஹோதி. மிச்சா²தி³ட்டி²ம் பஹாய ஸம்மாதி³ட்டி²கோ ஹோதி.

‘‘ஸ கோ² ஸோ, கா³மணி, அரியஸாவகோ ஏவம் விக³தாபி⁴ஜ்ஜோ² விக³தப்³யாபாதோ³ அஸம்மூள்ஹோ ஸம்பஜானோ படிஸ்ஸதோ கருணாஸஹக³தேன சேதஸா…பே… முதி³தாஸஹக³தேன சேதஸா…பே…. உபேக்கா²ஸஹக³தேன சேதஸா ஏகம் தி³ஸம் ப²ரித்வா விஹரதி, ததா² து³தியம், ததா² ததியம், ததா² சதுத்த²ம். இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் உபேக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. ஸேய்யதா²பி, கா³மணி, ப³லவா ஸங்க²த⁴மோ அப்பகஸிரேனேவ சதுத்³தி³ஸா விஞ்ஞாபேய்ய; ஏவமேவ கோ², கா³மணி, ஏவம் பா⁴விதாய உபேக்கா²ய சேதோவிமுத்தியா ஏவம் ப³ஹுலீகதாய யம் பமாணகதம் கம்மம் ந தம் தத்ராவஸிஸ்ஸதி, ந தம் தத்ராவதிட்ட²தீ’’தி. ஏவம் வுத்தே, அஸிப³ந்த⁴கபுத்தோ கா³மணி ப⁴க³வந்தம் ஏதத³வோச – ‘‘அபி⁴க்கந்தம், ப⁴ந்தே, அபி⁴க்கந்தம், ப⁴ந்தே…பே… உபாஸகம் மம் ப⁴க³வா தா⁴ரேது அஜ்ஜதக்³கே³ பாணுபேதம் ஸரணம் க³த’’ந்தி. அட்ட²மம்.

9. குலஸுத்தம்

361. ஏகம் ஸமயம் ப⁴க³வா கோஸலேஸு சாரிகம் சரமானோ மஹதா பி⁴க்கு²ஸங்கே⁴ன ஸத்³தி⁴ம் யேன நாளந்தா³ தத³வஸரி. தத்ர ஸுத³ம் ப⁴க³வா நாளந்தா³யம் விஹரதி பாவாரிகம்ப³வனே.

தேன கோ² பன ஸமயேன நாளந்தா³ து³ப்³பி⁴க்கா² ஹோதி த்³வீஹிதிகா ஸேதட்டி²கா ஸலாகாவுத்தா. தேன கோ² பன ஸமயேன நிக³ண்டோ² நாடபுத்தோ நாளந்தா³யம் படிவஸதி மஹதியா நிக³ண்ட²பரிஸாய ஸத்³தி⁴ம். அத² கோ² அஸிப³ந்த⁴கபுத்தோ கா³மணி நிக³ண்ட²ஸாவகோ யேன நிக³ண்டோ² நாடபுத்தோ தேனுபஸங்கமி; உபஸங்கமித்வா நிக³ண்ட²ம் நாடபுத்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² அஸிப³ந்த⁴கபுத்தம் கா³மணிம் நிக³ண்டோ² நாடபுத்தோ ஏதத³வோச – ‘‘ஏஹி த்வம், கா³மணி, ஸமணஸ்ஸ கோ³தமஸ்ஸ வாத³ம் ஆரோபேஹி. ஏவம் தே கல்யாணோ கித்திஸத்³தோ³ அப்³பு⁴க்³க³ச்சி²ஸ்ஸதி – ‘அஸிப³ந்த⁴கபுத்தேன கா³மணினா ஸமணஸ்ஸ கோ³தமஸ்ஸ ஏவம்மஹித்³தி⁴கஸ்ஸ ஏவம்மஹானுபா⁴வஸ்ஸ வாதோ³ ஆரோபிதோ’’’தி.

‘‘கத²ம் பனாஹம், ப⁴ந்தே, ஸமணஸ்ஸ கோ³தமஸ்ஸ ஏவம்மஹித்³தி⁴கஸ்ஸ ஏவம்மஹானுபா⁴வஸ்ஸ வாத³ம் ஆரோபேஸ்ஸாமீ’’தி? ‘‘ஏஹி த்வம், கா³மணி, யேன ஸமணோ கோ³தமோ தேனுபஸங்கம; உபஸங்கமித்வா ஸமணம் கோ³தமம் ஏவம் வதே³ஹி – ‘நனு, ப⁴ந்தே, ப⁴க³வா அனேகபரியாயேன குலானம் அனுத்³த³யம் [அனுத³யம் (ஸ்யா. கம். பீ. க.)] வண்ணேதி, அனுரக்க²ம் வண்ணேதி, அனுகம்பம் வண்ணேதீ’தி? ஸசே கோ², கா³மணி, ஸமணோ கோ³தமோ ஏவம் புட்டோ² ஏவம் ப்³யாகரோதி – ‘ஏவம், கா³மணி, ததா²க³தோ அனேகபரியாயேன குலானம் அனுத்³த³யம் வண்ணேதி, அனுரக்க²ம் வண்ணேதி, அனுகம்பம் வண்ணேதீ’தி, தமேனம் த்வம் ஏவம் வதே³ய்யாஸி – ‘அத² கிஞ்சரஹி, ப⁴ந்தே, ப⁴க³வா து³ப்³பி⁴க்கே² த்³வீஹிதிகே ஸேதட்டி²கே ஸலாகாவுத்தே மஹதா பி⁴க்கு²ஸங்கே⁴ன ஸத்³தி⁴ம் சாரிகம் சரதி? உச்சே²தா³ய ப⁴க³வா குலானம் படிபன்னோ, அனயாய ப⁴க³வா குலானம் படிபன்னோ, உபகா⁴தாய ப⁴க³வா குலானம் படிபன்னோ’தி! இமம் கோ² தே, கா³மணி, ஸமணோ கோ³தமோ உப⁴தோகோடிகம் பஞ்ஹம் புட்டோ² நேவ ஸக்க²தி [ஸக்கி²தி (ஸீ.) ம. நி. 2.83] உக்³கி³லிதும், நேவ ஸக்க²தி ஓகி³லிது’’ந்தி. ‘‘ஏவம், ப⁴ந்தே’’தி கோ² அஸிப³ந்த⁴கபுத்தோ கா³மணி நிக³ண்ட²ஸ்ஸ நாடபுத்தஸ்ஸ படிஸ்ஸுத்வா உட்டா²யாஸனா நிக³ண்ட²ம் நாடபுத்தம் அபி⁴வாதே³த்வா பத³க்கி²ணம் கத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² அஸிப³ந்த⁴கபுத்தோ கா³மணி ப⁴க³வந்தம் ஏதத³வோச –

‘‘நனு, ப⁴ந்தே, ப⁴க³வா அனேகபரியாயேன குலானம் அனுத்³த³யம் வண்ணேதி, அனுரக்க²ம் வண்ணேதி, அனுகம்பம் வண்ணேதீ’’தி? ‘‘ஏவம், கா³மணி, ததா²க³தோ அனேகபரியாயேன குலானம் அனுத்³த³யம் வண்ணேதி, அனுரக்க²ம் வண்ணேதி, அனுகம்பம் வண்ணேதீ’’தி. ‘‘அத² கிஞ்சரஹி, ப⁴ந்தே, ப⁴க³வா து³ப்³பி⁴க்கே² த்³வீஹிதிகே ஸேதட்டி²கே ஸலாகாவுத்தே மஹதா பி⁴க்கு²ஸங்கே⁴ன ஸத்³தி⁴ம் சாரிகம் சரதி? உச்சே²தா³ய ப⁴க³வா குலானம் படிபன்னோ, அனயாய ப⁴க³வா குலானம் படிபன்னோ, உபகா⁴தாய ப⁴க³வா குலானம் படிபன்னோ’’தி. ‘‘இதோ ஸோ, கா³மணி, ஏகனவுதிகப்பே [ஏகனவுதோ கப்போ (ஸ்யா. கம்.), ஏகனவுதிகப்போ (பீ.)] யமஹம் அனுஸ்ஸராமி, நாபி⁴ஜானாமி கிஞ்சி குலம் பக்கபி⁴க்கா²னுப்பதா³னமத்தேன உபஹதபுப்³ப³ம். அத² கோ² யானி தானி குலானி அட்³டா⁴னி மஹத்³த⁴னானி மஹாபோ⁴கா³னி பஹூதஜாதரூபரஜதானி பஹூதவித்தூபகரணானி பஹூதத⁴னத⁴ஞ்ஞானி, ஸப்³பா³னி தானி தா³னஸம்பூ⁴தானி சேவ ஸச்சஸம்பூ⁴தானி ச ஸாமஞ்ஞஸம்பூ⁴தானி ச. அட்ட² கோ², கா³மணி, ஹேதூ, அட்ட² பச்சயா குலானம் உபகா⁴தாய. ராஜதோ வா குலானி உபகா⁴தம் க³ச்ச²ந்தி, சோரதோ வா குலானி உபகா⁴தம் க³ச்ச²ந்தி, அக்³கி³தோ வா குலானி உபகா⁴தம் க³ச்ச²ந்தி, உத³கதோ வா குலானி உபகா⁴தம் க³ச்ச²ந்தி, நிஹிதம் வா டா²னா விக³ச்ச²தி [நிஹிதம் வா நாதி⁴க³ச்ச²ந்தி (ஸீ. பீ.)], து³ப்பயுத்தா வா கம்மந்தா விபஜ்ஜந்தி, குலே வா குலங்கா³ரோதி [குலானம் வா குலங்கா³ரோ (ஸீ.)] உப்பஜ்ஜதி, யோ தே போ⁴கே³ விகிரதி வித⁴மதி வித்³த⁴ம்ஸேதி, அனிச்சதாயே அட்ட²மீதி. இமே கோ², கா³மணி, அட்ட² ஹேதூ, அட்ட² பச்சயா குலானம் உபகா⁴தாய. இமேஸு கோ², கா³மணி, அட்ட²ஸு ஹேதூஸு, அட்ட²ஸு பச்சயேஸு ஸம்விஜ்ஜமானேஸு யோ மம் ஏவம் வதே³ய்ய – ‘உச்சே²தா³ய ப⁴க³வா குலானம் படிபன்னோ, அனயாய ப⁴க³வா குலானம் படிபன்னோ, உபகா⁴தாய ப⁴க³வா குலானம் படிபன்னோ’தி, தம், கா³மணி, வாசம் அப்பஹாய தம் சித்தம் அப்பஹாய தம் தி³ட்டி²ம் அப்படினிஸ்ஸஜ்ஜித்வா யதா²ப⁴தம் நிக்கி²த்தோ ஏவம் நிரயே’’தி. ஏவம் வுத்தே, அஸிப³ந்த⁴கபுத்தோ கா³மணி ப⁴க³வந்தம் ஏதத³வோச – ‘‘அபி⁴க்கந்தம், ப⁴ந்தே, அபி⁴க்கந்தம், ப⁴ந்தே…பே… உபாஸகம் மம் ப⁴க³வா தா⁴ரேது அஜ்ஜதக்³கே³ பாணுபேதம் ஸரணம் க³த’’ந்தி. நவமம்.

10. மணிசூளகஸுத்தம்

362. ஏகம் ஸமயம் ப⁴க³வா ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ராஜந்தேபுரே ராஜபரிஸாய ஸன்னிஸின்னானம் ஸன்னிபதிதானம் அயமந்தராகதா² உத³பாதி³ – ‘‘கப்பதி ஸமணானம் ஸக்யபுத்தியானம் ஜாதரூபரஜதம், ஸாதி³யந்தி ஸமணா ஸக்யபுத்தியா ஜாதரூபரஜதம், படிக்³க³ண்ஹந்தி ஸமணா ஸக்யபுத்தியா ஜாதரூபரஜத’’ந்தி!

தேன கோ² பன ஸமயேன மணிசூளகோ கா³மணி தஸ்ஸம் பரிஸாயம் நிஸின்னோ ஹோதி. அத² கோ² மணிசூளகோ கா³மணி தம் பரிஸம் ஏதத³வோச – ‘‘மா அய்யோ [அய்யா (ஸீ. பீ.)] ஏவம் அவசுத்த². ந கப்பதி ஸமணானம் ஸக்யபுத்தியானம் ஜாதரூபரஜதம், ந ஸாதி³யந்தி ஸமணா ஸக்யபுத்தியா ஜாதரூபரஜதம், நப்படிக்³க³ண்ஹந்தி ஸமணா ஸக்யபுத்தியா ஜாதரூபரஜதம், நிக்கி²த்தமணிஸுவண்ணா ஸமணா ஸக்யபுத்தியா அபேதஜாதரூபரஜதா’’தி. அஸக்கி² கோ² மணிசூளகோ கா³மணி தம் பரிஸம் ஸஞ்ஞாபேதும். அத² கோ² மணிசூளகோ கா³மணி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² மணிசூளகோ கா³மணி ப⁴க³வந்தம் ஏதத³வோச – ‘‘இத⁴, ப⁴ந்தே, ராஜந்தேபுரே ராஜபரிஸாய ஸன்னிஸின்னானம் ஸன்னிபதிதானம் அயமந்தராகதா² உத³பாதி³ – ‘கப்பதி ஸமணானம் ஸக்யபுத்தியானம் ஜாதரூபரஜதம், ஸாதி³யந்தி ஸமணா ஸக்யபுத்தியா ஜாதரூபரஜதம், படிக்³க³ண்ஹந்தி ஸமணா ஸக்யபுத்தியா ஜாதரூபரஜத’ந்தி. ஏவம் வுத்தே, அஹம், ப⁴ந்தே, தம் பரிஸம் ஏதத³வோசம் – ‘மா அய்யோ ஏவம் அவசுத்த². ந கப்பதி ஸமணானம் ஸக்யபுத்தியானம் ஜாதரூபரஜதம், ந ஸாதி³யந்தி ஸமணா ஸக்யபுத்தியா ஜாதரூபரஜதம், நப்படிக்³க³ண்ஹந்தி ஸமணா ஸக்யபுத்தியா ஜாதரூபரஜதம், நிக்கி²த்தமணிஸுவண்ணா ஸமணா ஸக்யபுத்தியா அபேதஜாதரூபரஜதா’தி. அஸக்கி²ம் க்²வாஹம், ப⁴ந்தே, தம் பரிஸம் ஸஞ்ஞாபேதும். கச்சாஹம், ப⁴ந்தே, ஏவம் ப்³யாகரமானோ வுத்தவாதீ³ சேவ ப⁴க³வதோ ஹோமி, ந ச ப⁴க³வந்தம் அபூ⁴தேன அப்³பா⁴சிக்கா²மி, த⁴ம்மஸ்ஸ சானுத⁴ம்மம் ப்³யாகரோமி, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹம் டா²னம் ஆக³ச்ச²தீ’’தி?

‘‘தக்³க⁴ த்வம், கா³மணி, ஏவம் ப்³யாகரமானோ வுத்தவாதீ³ சேவ மே ஹோஸி, ந ச மம் அபூ⁴தேன அப்³பா⁴சிக்க²ஸி, த⁴ம்மஸ்ஸ சானுத⁴ம்மம் ப்³யாகரோஸி, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹம் டா²னம் ஆக³ச்ச²தி. ந ஹி, கா³மணி, கப்பதி ஸமணானம் ஸக்யபுத்தியானம் ஜாதரூபரஜதம், ந ஸாதி³யந்தி ஸமணா ஸக்யபுத்தியா ஜாதரூபரஜதம், நப்படிக்³க³ண்ஹந்தி ஸமணா ஸக்யபுத்தியா ஜாதரூபரஜதம், நிக்கி²த்தமணிஸுவண்ணா ஸமணா ஸக்யபுத்தியா அபேதஜாதரூபரஜதா. யஸ்ஸ கோ², கா³மணி, ஜாதரூபரஜதம் கப்பதி, பஞ்சபி தஸ்ஸ காமகு³ணா கப்பந்தி. யஸ்ஸ பஞ்ச காமகு³ணா கப்பந்தி ( ) [(தஸ்ஸபி ஜாதரூபரஜதம் கப்பதி,) (ஸ்யா. கம்.)], ஏகம்ஸேனேதம், கா³மணி, தா⁴ரேய்யாஸி அஸ்ஸமணத⁴ம்மோ அஸக்யபுத்தியத⁴ம்மோதி. அபி சாஹம், கா³மணி, ஏவம் வதா³மி – திணம் திணத்தி²கேன பரியேஸிதப்³ப³ம், தா³ரு தா³ருத்தி²கேன பரியேஸிதப்³ப³ம், ஸகடம் ஸகடத்தி²கேன பரியேஸிதப்³ப³ம், புரிஸோ புரிஸத்தி²கேன பரியேஸிதப்³போ³ [பரியேஸிதப்³போ³’’தி (?)]. நத்வேவாஹம், கா³மணி, கேனசி பரியாயேன ‘ஜாதரூபரஜதம் ஸாதி³தப்³ப³ம் பரியேஸிதப்³ப³’ந்தி வதா³மீ’’தி. த³ஸமம்.

11. ப⁴த்³ரகஸுத்தம்

363. ஏகம் ஸமயம் ப⁴க³வா மல்லேஸு விஹரதி உருவேலகப்பம் நாம மல்லானம் நிக³மோ. அத² கோ² ப⁴த்³ரகோ கா³மணி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ப⁴த்³ரகோ கா³மணி ப⁴க³வந்தம் ஏதத³வோச – ‘‘ஸாது⁴ மே, ப⁴ந்தே, ப⁴க³வா து³க்க²ஸ்ஸ ஸமுத³யஞ்ச அத்த²ங்க³மஞ்ச தே³ஸேதூ’’தி. ‘‘அஹஞ்சே [அஹஞ்ச (ஸ்யா. கம். க.)] தே, கா³மணி, அதீதமத்³தா⁴னம் ஆரப்³ப⁴ து³க்க²ஸ்ஸ ஸமுத³யஞ்ச அத்த²ங்க³மஞ்ச தே³ஸேய்யம் – ‘ஏவம் அஹோஸி அதீதமத்³தா⁴ன’ந்தி, தத்ர தே ஸியா கங்கா², ஸியா விமதி. அஹம் சே [அஹஞ்ச (ஸ்யா. கம். க.)] தே, கா³மணி, அனாக³தமத்³தா⁴னம் ஆரப்³ப⁴ து³க்க²ஸ்ஸ ஸமுத³யஞ்ச அத்த²ங்க³மஞ்ச தே³ஸேய்யம் – ‘ஏவம் ப⁴விஸ்ஸதி அனாக³தமத்³தா⁴ன’ந்தி, தத்ராபி தே ஸியா கங்கா², ஸியா விமதி. அபி சாஹம், கா³மணி, இதே⁴வ நிஸின்னோ ஏத்தே²வ தே நிஸின்னஸ்ஸ து³க்க²ஸ்ஸ ஸமுத³யஞ்ச அத்த²ங்க³மஞ்ச தே³ஸேஸ்ஸாமி. தம் ஸுணாஹி, ஸாது⁴கம் மனஸி கரோஹி; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² ப⁴த்³ரகோ கா³மணி ப⁴க³வதோ பச்சஸ்ஸோஸி. ப⁴க³வா ஏதத³வோச –

‘‘தம் கிம் மஞ்ஞஸி, கா³மணி, அத்தி² தே உருவேலகப்பே மனுஸ்ஸா யேஸம் தே வதே⁴ன வா ப³ந்தே⁴ன வா ஜானியா வா க³ரஹாய வா உப்பஜ்ஜேய்யும் ஸோகபரிதே³வது³க்க²தோ³மனஸ்ஸுபாயாஸா’’தி? ‘‘அத்தி² மே, ப⁴ந்தே, உருவேலகப்பே மனுஸ்ஸா யேஸம் மே வதே⁴ன வா ப³ந்தே⁴ன வா ஜானியா வா க³ரஹாய வா உப்பஜ்ஜேய்யும் ஸோகபரிதே³வது³க்க²தோ³மனஸ்ஸுபாயாஸா’’தி. ‘‘அத்தி² பன தே, கா³மணி, உருவேலகப்பே மனுஸ்ஸா யேஸம் தே வதே⁴ன வா ப³ந்தே⁴ன வா ஜானியா வா க³ரஹாய வா நுப்பஜ்ஜேய்யும் ஸோகபரிதே³வது³க்க²தோ³மனஸ்ஸுபாயாஸா’’தி? ‘‘அத்தி² மே, ப⁴ந்தே, உருவேலகப்பே மனுஸ்ஸா யேஸம் மே வதே⁴ன வா ப³ந்தே⁴ன வா ஜானியா வா க³ரஹாய வா நுப்பஜ்ஜேய்யும் ஸோகபரிதே³வது³க்க²தோ³மனஸ்ஸுபாயாஸா’’தி. ‘‘கோ நு கோ², கா³மணி, ஹேது, கோ பச்சயோ யேன தே ஏகச்சானம் உருவேலகப்பியானம் மனுஸ்ஸானம் வதே⁴ன வா ப³ந்தே⁴ன வா ஜானியா வா க³ரஹாய வா உப்பஜ்ஜேய்யும் ஸோகபரிதே³வது³க்க²தோ³மனஸ்ஸுபாயாஸா’’தி? ‘‘யேஸம் மே, ப⁴ந்தே, உருவேலகப்பியானம் மனுஸ்ஸானம் வதே⁴ன வா ப³ந்தே⁴ன வா ஜானியா வா க³ரஹாய வா உப்பஜ்ஜேய்யும் ஸோகபரிதே³வது³க்க²தோ³மனஸ்ஸுபாயாஸா, அத்தி² மே தேஸு ச²ந்த³ராகோ³. யேஸம் பன, ப⁴ந்தே, உருவேலகப்பியானம் மனுஸ்ஸானம் வதே⁴ன வா ப³ந்தே⁴ன வா ஜானியா வா க³ரஹாய வா நுப்பஜ்ஜேய்யும் ஸோகபரிதே³வது³க்க²தோ³மனஸ்ஸுபாயாஸா, நத்தி² மே தேஸு ச²ந்த³ராகோ³’’தி. ‘‘இமினா த்வம், கா³மணி, த⁴ம்மேன தி³ட்டே²ன விதி³தேன அகாலிகேன பத்தேன பரியோகா³ள்ஹேன அதீதானாக³தே நயம் நேஹி – ‘யம் கோ² கிஞ்சி அதீதமத்³தா⁴னம் து³க்க²ம் உப்பஜ்ஜமானம் உப்பஜ்ஜி [உப்பஜ்ஜதி (ஸப்³ப³த்த²)] ஸப்³ப³ம் தம் ச²ந்த³மூலகம் ச²ந்த³னிதா³னம். ச²ந்தோ³ ஹி மூலம் து³க்க²ஸ்ஸ. யம்பி ஹி கிஞ்சி அனாக³தமத்³தா⁴னம் து³க்க²ம் உப்பஜ்ஜமானம் உப்பஜ்ஜிஸ்ஸதி, ஸப்³ப³ம் தம் ச²ந்த³மூலகம் ச²ந்த³னிதா³னம். ச²ந்தோ³ ஹி மூலம் து³க்க²ஸ்ஸா’’’தி. ‘‘அச்ச²ரியம், ப⁴ந்தே, அப்³பு⁴தம், ப⁴ந்தே! யாவ ஸுபா⁴ஸிதம் சித³ம் [ஸுபா⁴ஸிதமித³ம் (ஸீ. பீ.)], ப⁴ந்தே, ப⁴க³வதா [யங்கிஞ்சி அதீதமத்³தா⁴னம் து³க்க²ம் உப்பஜ்ஜமானம் உப்பஜ்ஜதி, ஸப்³ப³ந்தம் ச²ந்த³மூலகம் ச²ந்த³னிதா³னம், ச²ந்தோ³ ஹி மூலம் து³க்க²ஸ்ஸாதி, யங்கிஞ்சி அனாக³தமத்³தா⁴னம் து³க்க²ம் உப்பஜ்ஜமானம் உப்பஜ்ஜிஸ்ஸதி ஸப்³ப³ந்தம் ச²ந்த³மூலகம் ச²ந்த³னிதா³னம், ச²ந்தோ³ ஹி மூலம் து³க்க²ஸ்ஸா’’தி (ஸ்யா. கம்.)] – ‘யம் கிஞ்சி து³க்க²ம் உப்பஜ்ஜமானம் உப்பஜ்ஜதி, ஸப்³ப³ம் தம் ச²ந்த³மூலகம் ச²ந்த³னிதா³னம். ச²ந்தோ³ ஹி மூலம் து³க்க²ஸ்ஸா’தி. [‘‘யங்கிஞ்சி அதீதமத்³தா⁴னம் து³க்க²ம் உப்பஜ்ஜமானம் உப்பஜ்ஜதி, ஸப்³ப³ந்தம் ச²ந்த³மூலகம் ச²ந்த³னிதா³னம், ச²ந்தோ³ ஹி மூலம் தூ³க்க²ஸ்ஸாதி, யங்கிஞ்சி அனாக³தமத்³தா⁴னம் து³க்க²ம் உப்பஜ்ஜமானம் உப்பஜ்ஜிஸ்ஸதி, ஸப்³ப³ந்தம் ச²ந்த³மூலகம் ச²ந்த³னிதா³னம், ச²ந்தோ³ ஹி மூலம் து³க்க²ஸ்ஸா’’தி (ஸ்யா. கம்)] அத்தி² மே, ப⁴ந்தே, சிரவாஸீ நாம குமாரோ ப³ஹி ஆவஸதே² [ஆவேஸனே (?)] படிவஸதி. ஸோ க்²வாஹம், ப⁴ந்தே, காலஸ்ஸேவ வுட்டா²ய புரிஸம் உய்யோஜேமி [உய்யோஜேஸிம் (க.)] – ‘க³ச்ச², ப⁴ணே, சிரவாஸிம் குமாரம் ஜானாஹீ’தி. யாவகீவஞ்ச, ப⁴ந்தே, ஸோ புரிஸோ நாக³ச்ச²தி, தஸ்ஸ மே ஹோதேவ அஞ்ஞத²த்தம் – ‘மா ஹேவ சிரவாஸிஸ்ஸ குமாரஸ்ஸ கிஞ்சி ஆபா³த⁴யித்தா²’’’தி [ஆபா³த⁴யேதா²தி (ஸ்யா. கம். பீ. க.)].

‘‘தம் கிம் மஞ்ஞஸி, கா³மணி, சிரவாஸிஸ்ஸ குமாரஸ்ஸ வதே⁴ன வா ப³ந்தே⁴ன வா ஜானியா வா க³ரஹாய வா உப்பஜ்ஜேய்யும் ஸோகபரிதே³வது³க்க²தோ³மனஸ்ஸுபாயாஸா’’தி? ‘‘சிரவாஸிஸ்ஸ மே, ப⁴ந்தே, குமாரஸ்ஸ வதே⁴ன வா ப³ந்தே⁴ன வா ஜானியா வா க³ரஹாய வா ஜீவிதஸ்ஸபி ஸியா அஞ்ஞத²த்தம், கிம் பன மே நுப்பஜ்ஜிஸ்ஸந்தி ஸோகபரிதே³வது³க்க²தோ³மனஸ்ஸுபாயாஸா’’தி. ‘‘இமினாபி கோ² ஏதம், கா³மணி, பரியாயேன வேதி³தப்³ப³ம் – ‘யம் கிஞ்சி து³க்க²ம் உப்பஜ்ஜமானம் உப்பஜ்ஜதி, ஸப்³ப³ம் தம் ச²ந்த³மூலகம் ச²ந்த³னிதா³னம். ச²ந்தோ³ ஹி மூலம் து³க்க²ஸ்ஸா’’’தி.

‘‘தம் கிம் மஞ்ஞஸி, கா³மணி, யதா³ தே சிரவாஸிமாதா [சிரவாஸிஸ்ஸ மாதா (ஸீ. பீ.)] அதி³ட்டா² அஹோஸி, அஸ்ஸுதா அஹோஸி, தே சிரவாஸிமாதுயா ச²ந்தோ³ வா ராகோ³ வா பேமம் வா’’தி? ‘‘நோ ஹேதம், ப⁴ந்தே’’. ‘‘த³ஸ்ஸனம் வா தே, கா³மணி, ஆக³ம்ம ஸவனம் வா ஏவம் தே அஹோஸி – ‘சிரவாஸிமாதுயா ச²ந்தோ³ வா ராகோ³ வா பேமம் வா’’’தி? ‘‘ஏவம், ப⁴ந்தே’’.

‘‘தம் கிம் மஞ்ஞஸி, கா³மணி, சிரவாஸிமாதுயா தே வதே⁴ன வா ப³ந்தே⁴ன வா ஜானியா வா க³ரஹாய வா உப்பஜ்ஜேய்யும் ஸோகபரிதே³வது³க்க²தோ³மனஸ்ஸுபாயாஸா’’தி? ‘‘சிரவாஸிமாதுயா மே, ப⁴ந்தே, வதே⁴ன வா ப³ந்தே⁴ன வா ஜானியா வா க³ரஹாய வா ஜீவிதஸ்ஸபி ஸியா அஞ்ஞத²த்தம், கிம் பன மே நுப்பஜ்ஜிஸ்ஸந்தி ஸோகபரிதே³வது³க்க²தோ³மனஸ்ஸுபாயாஸா’’தி! ‘‘இமினாபி கோ² ஏதம், கா³மணி, பரியாயேன வேதி³தப்³ப³ம் – ‘யம் கிஞ்சி து³க்க²ம் உப்பஜ்ஜமானம் உப்பஜ்ஜதி, ஸப்³ப³ம் தம் ச²ந்த³மூலகம் ச²ந்த³னிதா³னம். ச²ந்தோ³ ஹி மூலம் து³க்க²ஸ்ஸா’’’தி. ஏகாத³ஸமம்.

12. ராஸியஸுத்தம்

364. அத² கோ² ராஸியோ கா³மணி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ராஸியோ கா³மணி ப⁴க³வந்தம் ஏதத³வோச – ‘‘ஸுதம் மேதம், ப⁴ந்தே, ‘ஸமணோ கோ³தமோ ஸப்³ப³ம் தபம் க³ரஹதி, ஸப்³ப³ம் தபஸ்ஸிம் லூக²ஜீவிம் ஏகம்ஸேன உபவத³தி உபக்கோஸதீ’தி [உபக்கோஸதி உபவத³தீதி (தீ³. நி. 1.381)]. யே தே, ப⁴ந்தே, ஏவமாஹம்ஸு – ‘ஸமணோ கோ³தமோ ஸப்³ப³ம் தபம் க³ரஹதி, ஸப்³ப³ம் தபஸ்ஸிம் லூக²ஜீவிம் ஏகம்ஸேன உபவத³தி உபக்கோஸதீ’தி, கச்சி தே, ப⁴ந்தே, ப⁴க³வதோ வுத்தவாதி³னோ, ந ச ப⁴க³வந்தம் அபூ⁴தேன அப்³பா⁴சிக்க²ந்தி, த⁴ம்மஸ்ஸ சானுத⁴ம்மம் ப்³யாகரோந்தி, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹம் டா²னம் ஆக³ச்ச²தீ’’தி? ‘‘யே தே, கா³மணி, ஏவமாஹம்ஸு – ‘ஸமணோ கோ³தமோ ஸப்³ப³ம் தபம் க³ரஹதி, ஸப்³ப³ம் தபஸ்ஸிம் லூக²ஜீவிம் ஏகம்ஸேன உபவத³தி உபக்கோஸதீ’தி, ந மே தே வுத்தவாதி³னோ, அப்³பா⁴சிக்க²ந்தி ச பன மம் தே அஸதா துச்சா² அபூ⁴தேன’’.

‘‘த்³வேமே, கா³மணி, அந்தா பப்³ப³ஜிதேன ந ஸேவிதப்³பா³ – யோ சாயம் காமேஸு காமஸுக²ல்லிகானுயோகோ³ ஹீனோ க³ம்மோ போது²ஜ்ஜனிகோ அனரியோ அனத்த²ஸம்ஹிதோ, யோ சாயம் அத்தகிலமதா²னுயோகோ³ து³க்கோ² அனரியோ அனத்த²ஸம்ஹிதோ. ஏதே தே, கா³மணி, உபோ⁴ அந்தே அனுபக³ம்ம மஜ்ஜி²மா படிபதா³ ததா²க³தேன அபி⁴ஸம்பு³த்³தா⁴ – சக்கு²கரணீ ஞாணகரணீ உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி. கதமா ச ஸா, கா³மணி, மஜ்ஜி²மா படிபதா³ ததா²க³தேன அபி⁴ஸம்பு³த்³தா⁴ – சக்கு²கரணீ ஞாணகரணீ உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி? அயமேவ அரியோ அட்ட²ங்கி³கோ மக்³கோ³, ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴. அயம் கோ² ஸா, கா³மணி, மஜ்ஜி²மா படிபதா³ ததா²க³தேன அபி⁴ஸம்பு³த்³தா⁴ – சக்கு²கரணீ ஞாணகரணீ உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி.

‘‘தயோ கோ² மே, கா³மணி, காமபோ⁴கி³னோ ஸந்தோ ஸம்விஜ்ஜமானா லோகஸ்மிம். கதமே தயோ? இத⁴, கா³மணி, ஏகச்சோ காமபோ⁴கீ³ அத⁴ம்மேன போ⁴கே³ பரியேஸதி, ஸாஹஸேன அத⁴ம்மேன போ⁴கே³ பரியேஸித்வா ஸாஹஸேன ந அத்தானம் ஸுகே²தி ந பீணேதி ந ஸம்விப⁴ஜதி ந புஞ்ஞானி கரோதி. இத⁴ பன, கா³மணி, ஏகச்சோ காமபோ⁴கீ³ அத⁴ம்மேன போ⁴கே³ பரியேஸதி ஸாஹஸேன. அத⁴ம்மேன போ⁴கே³ பரியேஸித்வா ஸாஹஸேன அத்தானம் ஸுகே²தி பீணேதி, ந ஸம்விப⁴ஜதி ந புஞ்ஞானி கரோதி. இத⁴ பன, கா³மணி, ஏகச்சோ காமபோ⁴கீ³ அத⁴ம்மேன போ⁴கே³ பரியேஸதி ஸாஹஸேன. அத⁴ம்மேன போ⁴கே³ பரியேஸித்வா ஸாஹஸேன அத்தானம் ஸுகே²தி பீணேதி ஸம்விப⁴ஜதி புஞ்ஞானி கரோதி.

‘‘இத⁴ பன, கா³மணி, ஏகச்சோ காமபோ⁴கீ³ த⁴ம்மாத⁴ம்மேன போ⁴கே³ பரியேஸதி ஸாஹஸேனபி அஸாஹஸேனபி. த⁴ம்மாத⁴ம்மேன போ⁴கே³ பரியேஸித்வா ஸாஹஸேனபி அஸாஹஸேனபி ந அத்தானம் ஸுகே²தி, ந பீணேதி, ந ஸம்விப⁴ஜதி, ந புஞ்ஞானி கரோதி. இத⁴ பன, கா³மணி, ஏகச்சோ காமபோ⁴கீ³ த⁴ம்மாத⁴ம்மேன போ⁴கே³ பரியேஸதி ஸாஹஸேனபி அஸாஹஸேனபி. த⁴ம்மாத⁴ம்மேன போ⁴கே³ பரியேஸித்வா ஸாஹஸேனபி அஸாஹஸேனபி அத்தானம் ஸுகே²தி பீணேதி, ந ஸம்விப⁴ஜதி, ந புஞ்ஞானி கரோதி. இத⁴ பன, கா³மணி, ஏகச்சோ காமபோ⁴கீ³ த⁴ம்மாத⁴ம்மேன போ⁴கே³ பரியேஸதி, ஸாஹஸேனபி அஸாஹஸேனபி. த⁴ம்மாத⁴ம்மேன போ⁴கே³ பரியேஸித்வா ஸாஹஸேனபி அஸாஹஸேனபி அத்தானம் ஸுகே²தி பீணேதி ஸம்விப⁴ஜதி புஞ்ஞானி கரோதி.

‘‘இத⁴ பன, கா³மணி, ஏகச்சோ காமபோ⁴கீ³ த⁴ம்மேன போ⁴கே³ பரியேஸதி அஸாஹஸேன. த⁴ம்மேன போ⁴கே³ பரியேஸித்வா அஸாஹஸேன ந அத்தானம் ஸுகே²தி, ந பீணேதி, ந ஸம்விப⁴ஜதி, ந புஞ்ஞானி கரோதி. இத⁴ பன, கா³மணி, ஏகச்சோ காமபோ⁴கீ³ த⁴ம்மேன போ⁴கே³ பரியேஸதி அஸாஹஸேன. த⁴ம்மேன போ⁴கே³ பரியேஸித்வா அஸாஹஸேன அத்தானம் ஸுகே²தி பீணேதி, ந ஸம்விப⁴ஜதி, ந புஞ்ஞானி கரோதி. இத⁴ பன, கா³மணி, ஏகச்சோ காமபோ⁴கீ³ த⁴ம்மேன போ⁴கே³ பரியேஸதி அஸாஹஸேன. த⁴ம்மேன போ⁴கே³ பரியேஸித்வா அஸாஹஸேன அத்தானம் ஸுகே²தி பீணேதி ஸம்விப⁴ஜதி புஞ்ஞானி கரோதி. தே ச போ⁴கே³ க³தி⁴தோ [க³தி²தோ (ஸீ.)] முச்சி²தோ அஜ்ஜோ²பன்னோ அனாதீ³னவத³ஸ்ஸாவீ அனிஸ்ஸரணபஞ்ஞோ பரிபு⁴ஞ்ஜதி. இத⁴ பன, கா³மணி, ஏகச்சோ காமபோ⁴கீ³ த⁴ம்மேன போ⁴கே³ பரியேஸதி அஸாஹஸேன. த⁴ம்மேன போ⁴கே³ பரியேஸித்வா அஸாஹஸேன அத்தானம் ஸுகே²தி பீணேதி ஸம்விப⁴ஜதி புஞ்ஞானி கரோதி. தே ச போ⁴கே³ அக³தி⁴தோ அமுச்சி²தோ அனஜ்ஜோ²பன்னோ ஆதீ³னவத³ஸ்ஸாவீ நிஸ்ஸரணபஞ்ஞோ பரிபு⁴ஞ்ஜதி.

‘‘தத்ர, கா³மணி, ய்வாயம் காமபோ⁴கீ³ அத⁴ம்மேன போ⁴கே³ பரியேஸதி ஸாஹஸேன, அத⁴ம்மேன போ⁴கே³ பரியேஸித்வா ஸாஹஸேன ந அத்தானம் ஸுகே²தி, ந பீணேதி, ந ஸம்விப⁴ஜதி, ந புஞ்ஞானி கரோதி. அயம், கா³மணி, காமபோ⁴கீ³ தீஹி டா²னேஹி கா³ரய்ஹோ. கதமேஹி தீஹி டா²னேஹி கா³ரய்ஹோ? அத⁴ம்மேன போ⁴கே³ பரியேஸதி ஸாஹஸேனாதி, இமினா பட²மேன டா²னேன கா³ரய்ஹோ. ந அத்தானம் ஸுகே²தி ந பீணேதீதி, இமினா து³தியேன டா²னேன கா³ரய்ஹோ. ந ஸம்விப⁴ஜதி, ந புஞ்ஞானி கரோதீதி, இமினா ததியேன டா²னேன கா³ரய்ஹோ. அயம், கா³மணி, காமபோ⁴கீ³ இமேஹி தீஹி டா²னேஹி கா³ரய்ஹோ.

‘‘தத்ர, கா³மணி, ய்வாயம் காமபோ⁴கீ³ அத⁴ம்மேன போ⁴கே³ பரியேஸதி ஸாஹஸேன, அத⁴ம்மேன போ⁴கே³ பரியேஸித்வா ஸாஹஸேன அத்தானம் ஸுகே²தி பீணேதி, ந ஸம்விப⁴ஜதி, ந புஞ்ஞானி கரோதி. அயம், கா³மணி, காமபோ⁴கீ³ த்³வீஹி டா²னேஹி கா³ரய்ஹோ, ஏகேன டா²னேன பாஸம்ஸோ. கதமேஹி த்³வீஹி டா²னேஹி கா³ரய்ஹோ? அத⁴ம்மேன போ⁴கே³ பரியேஸதி ஸாஹஸேனாதி, இமினா பட²மேன டா²னேன கா³ரய்ஹோ. ந ஸம்விப⁴ஜதி, ந புஞ்ஞானி கரோதீதி, இமினா து³தியேன டா²னேன கா³ரய்ஹோ. கதமேன ஏகேன டா²னேன பாஸம்ஸோ? அத்தானம் ஸுகே²தி பீணேதீதி, இமினா ஏகேன டா²னேன பாஸம்ஸோ. அயம், கா³மணி, காமபோ⁴கீ³ இமேஹி த்³வீஹி டா²னேஹி கா³ரய்ஹோ, இமினா ஏகேன டா²னேன பாஸம்ஸோ.

‘‘தத்ர, கா³மணி, ய்வாயம் காமபோ⁴கீ³ அத⁴ம்மேன போ⁴கே³ பரியேஸதி ஸாஹஸேன, அத⁴ம்மேன போ⁴கே³ பரியேஸித்வா ஸாஹஸேன அத்தானம் ஸுகே²தி பீணேதி ஸம்விப⁴ஜதி புஞ்ஞானி கரோதி. அயம், கா³மணி, காமபோ⁴கீ³ ஏகேன டா²னேன கா³ரய்ஹோ, த்³வீஹி டா²னேஹி பாஸம்ஸோ. கதமேன ஏகேன டா²னேன கா³ரய்ஹோ? அத⁴ம்மேன போ⁴கே³ பரியேஸதி ஸாஹஸேனாதி, இமினா ஏகேன டா²னேன கா³ரய்ஹோ. கதமேஹி த்³வீஹி டா²னேஹி பாஸம்ஸோ? அத்தானம் ஸுகே²தி பீணேதீதி, இமினா பட²மேன டா²னேன பாஸம்ஸோ. ஸம்விப⁴ஜதி புஞ்ஞானி கரோதீதி, இமினா து³தியேன டா²னேன பாஸம்ஸோ. அயம், கா³மணி, காமபோ⁴கீ³, இமினா ஏகேன டா²னேன கா³ரய்ஹோ, இமேஹி த்³வீஹி டா²னேஹி பாஸம்ஸோ.

‘‘தத்ர, கா³மணி, ய்வாயம் காமபோ⁴கீ³ த⁴ம்மாத⁴ம்மேன போ⁴கே³ பரியேஸதி ஸாஹஸேனபி அஸாஹஸேனபி, த⁴ம்மாத⁴ம்மேன போ⁴கே³ பரியேஸித்வா ஸாஹஸேனபி அஸாஹஸேனபி ந அத்தானம் ஸுகே²தி, ந பீணேதி, ந ஸம்விப⁴ஜதி, ந புஞ்ஞானி கரோதி. அயம், கா³மணி, காமபோ⁴கீ³ ஏகேன டா²னேன பாஸம்ஸோ, தீஹி டா²னேஹி கா³ரய்ஹோ. கதமேன ஏகேன டா²னேன பாஸம்ஸோ? த⁴ம்மேன போ⁴கே³ பரியேஸதி அஸாஹஸேனாதி, இமினா ஏகேன டா²னேன பாஸம்ஸோ. கதமேஹி தீஹி டா²னேஹி கா³ரய்ஹோ? அத⁴ம்மேன போ⁴கே³ பரியேஸதி ஸாஹஸேனாதி, இமினா பட²மேன டா²னேன கா³ரய்ஹோ. ந அத்தானம் ஸுகே²தி, ந பீணேதீதி, இமினா து³தியேன டா²னேன கா³ரய்ஹோ. ந ஸம்விப⁴ஜதி, ந புஞ்ஞானி கரோதீதி, இமினா ததியேன டா²னேன கா³ரய்ஹோ. அயம், கா³மணி, காமபோ⁴கீ³ இமினா ஏகேன டா²னேன பாஸம்ஸோ, இமேஹி தீஹி டா²னேஹி கா³ரய்ஹோ.

‘‘தத்ர, கா³மணி, ய்வாயம் காமபோ⁴கீ³ த⁴ம்மாத⁴ம்மேன போ⁴கே³ பரியேஸதி ஸாஹஸேனபி அஸாஹஸேனபி, த⁴ம்மாத⁴ம்மேன போ⁴கே³ பரியேஸித்வா ஸாஹஸேனபி அஸாஹஸேனபி அத்தானம் ஸுகே²தி பீணேதி, ந ஸம்விப⁴ஜதி, ந புஞ்ஞானி கரோதி. அயம், கா³மணி, காமபோ⁴கீ³ த்³வீஹி டா²னேஹி பாஸம்ஸோ, த்³வீஹி டா²னேஹி கா³ரய்ஹோ. கதமேஹி த்³வீஹி டா²னேஹி பாஸம்ஸோ? த⁴ம்மேன போ⁴கே³ பரியேஸதி அஸாஹஸேனாதி, இமினா பட²மேன டா²னேன பாஸம்ஸோ. அத்தானம் ஸுகே²தி பீணேதீதி, இமினா து³தியேன டா²னேன பாஸம்ஸோ. கதமேஹி த்³வீஹி டா²னேஹி கா³ரய்ஹோ? அத⁴ம்மேன போ⁴கே³ பரியேஸதி ஸாஹஸேனாதி, இமினா பட²மேன டா²னேன கா³ரய்ஹோ. ந ஸம்விப⁴ஜதி, ந புஞ்ஞானி கரோதீதி, இமினா து³தியேன டா²னேன கா³ரய்ஹோ. அயம், கா³மணி, காமபோ⁴கீ³ இமேஹி த்³வீஹி டா²னேஹி பாஸம்ஸோ, இமேஹி த்³வீஹி டா²னேஹி கா³ரய்ஹோ.

‘‘தத்ர, கா³மணி, ய்வாயம் காமபோ⁴கீ³ த⁴ம்மாத⁴ம்மேன போ⁴கே³ பரியேஸதி ஸாஹஸேனபி அஸாஹஸேனபி, த⁴ம்மாத⁴ம்மேன போ⁴கே³ பரியேஸித்வா ஸாஹஸேனபி அஸாஹஸேனபி அத்தானம் ஸுகே²தி பீணேதி ஸம்விப⁴ஜதி புஞ்ஞானி கரோதி. அயம், கா³மணி, காமபோ⁴கீ³ தீஹி டா²னேஹி பாஸம்ஸோ, ஏகேன டா²னேன கா³ரய்ஹோ. கதமேஹி தீஹி டா²னேஹி பாஸம்ஸோ? த⁴ம்மேன போ⁴கே³ பரியேஸதி அஸாஹஸேனாதி, இமினா பட²மேன டா²னேன பாஸம்ஸோ. அத்தானம் ஸுகே²தி பீணேதீதி, இமினா து³தியேன டா²னேன பாஸம்ஸோ. ஸம்விப⁴ஜதி புஞ்ஞானி கரோதீதி, இமினா ததியேன டா²னேன பாஸம்ஸோ. கதமேன ஏகேன டா²னேன கா³ரய்ஹோ? அத⁴ம்மேன போ⁴கே³ பரியேஸதி ஸாஹஸேனாதி, இமினா ஏகேன டா²னேன கா³ரய்ஹோ. அயம், கா³மணி, காமபோ⁴கீ³ இமேஹி தீஹி டா²னேஹி பாஸம்ஸோ, இமினா ஏகேன டா²னேன கா³ரய்ஹோ.

‘‘தத்ர, கா³மணி, ய்வாயம் காமபோ⁴கீ³ த⁴ம்மேன போ⁴கே³ பரியேஸதி அஸாஹஸேன, த⁴ம்மேன போ⁴கே³ பரியேஸித்வா அஸாஹஸேன, ந அத்தானம் ஸுகே²தி, ந பீணேதி, ந ஸம்விப⁴ஜதி, ந புஞ்ஞானி கரோதி. அயம், கா³மணி, காமபோ⁴கீ³ ஏகேன டா²னேன பாஸம்ஸோ, த்³வீஹி டா²னேஹி கா³ரய்ஹோ. கதமேன ஏகேன டா²னேன பாஸம்ஸோ? த⁴ம்மேன போ⁴கே³ பரியேஸதி அஸாஹஸேனாதி, இமினா ஏகேன டா²னேன பாஸம்ஸோ. கதமேஹி த்³வீஹி டா²னேஹி கா³ரய்ஹோ? ந அத்தானம் ஸுகே²தி, ந பீணேதீதி, இமினா பட²மேன டா²னேன கா³ரய்ஹோ. ந ஸம்விப⁴ஜதி, ந புஞ்ஞானி கரோதீதி, இமினா து³தியேன டா²னேன கா³ரய்ஹோ. அயம், கா³மணி, காமபோ⁴கீ³ இமினா ஏகேன டா²னேன பாஸம்ஸோ, இமேஹி த்³வீஹி டா²னேஹி கா³ரய்ஹோ.

‘‘தத்ர, கா³மணி, ய்வாயம் காமபோ⁴கீ³ த⁴ம்மேன போ⁴கே³ பரியேஸதி அஸாஹஸேன, த⁴ம்மேன போ⁴கே³ பரியேஸித்வா அஸாஹஸேன அத்தானம் ஸுகே²தி பீணேதி, ந ஸம்விப⁴ஜதி, ந புஞ்ஞானி கரோதி. அயம், கா³மணி, காமபோ⁴கீ³ த்³வீஹி டா²னேஹி பாஸம்ஸோ, ஏகேன டா²னேன கா³ரய்ஹோ. கதமேஹி த்³வீஹி டா²னேஹி பாஸம்ஸோ? த⁴ம்மேன போ⁴கே³ பரியேஸதி அஸாஹஸேனாதி, இமினா பட²மேன டா²னேன பாஸம்ஸோ. அத்தானம் ஸுகே²தி பீணேதீதி, இமினா து³தியேன டா²னேன பாஸம்ஸோ. கதமேன ஏகேன டா²னேன கா³ரய்ஹோ? ந ஸம்விப⁴ஜதி, ந புஞ்ஞானி கரோதீதி, இமினா ஏகேன டா²னேன கா³ரய்ஹோ. அயம், கா³மணி, காமபோ⁴கீ³ இமேஹி த்³வீஹி டா²னேஹி பாஸம்ஸோ, இமினா ஏகேன டா²னேன கா³ரய்ஹோ.

‘‘தத்ர, கா³மணி, ய்வாயம் காமபோ⁴கீ³ த⁴ம்மேன போ⁴கே³ பரியேஸதி அஸாஹஸேன, த⁴ம்மேன போ⁴கே³ பரியேஸித்வா அஸாஹஸேன அத்தானம் ஸுகே²தி பீணேதி ஸம்விப⁴ஜதி புஞ்ஞானி கரோதி, தே ச போ⁴கே³ க³தி⁴தோ முச்சி²தோ அஜ்ஜோ²பன்னோ அனாதீ³னவத³ஸ்ஸாவீ அனிஸ்ஸரணபஞ்ஞோ பரிபு⁴ஞ்ஜதி. அயம், கா³மணி, காமபோ⁴கீ³ தீஹி டா²னேஹி பாஸம்ஸோ, ஏகேன டா²னேன கா³ரய்ஹோ. கதமேஹி தீஹி டா²னேஹி பாஸம்ஸோ? த⁴ம்மேன போ⁴கே³ பரியேஸதி அஸாஹஸேனாதி, இமினா பட²மேன டா²னேன பாஸம்ஸோ. அத்தானம் ஸுகே²தி பீணேதீதி, இமினா து³தியேன டா²னேன பாஸம்ஸோ. ஸம்விப⁴ஜதி புஞ்ஞானி கரோதீதி, இமினா ததியேன டா²னேன பாஸம்ஸோ. கதமேன ஏகேன டா²னேன கா³ரய்ஹோ? தே ச போ⁴கே³ க³தி⁴தோ முச்சி²தோ அஜ்ஜோ²பன்னோ அனாதீ³னவத³ஸ்ஸாவீ அனிஸ்ஸரணபஞ்ஞோ பரிபு⁴ஞ்ஜதீதி, இமினா ஏகேன டா²னேன கா³ரய்ஹோ. அயம், கா³மணி, காமபோ⁴கீ³ இமேஹி தீஹி டா²னேஹி பாஸம்ஸோ, இமினா ஏகேன டா²னேன கா³ரய்ஹோ.

‘‘தத்ர, கா³மணி, ய்வாயம் காமபோ⁴கீ³ த⁴ம்மேன போ⁴கே³ பரியேஸதி அஸாஹஸேன, த⁴ம்மேன போ⁴கே³ பரியேஸித்வா அஸாஹஸேன அத்தானம் ஸுகே²தி பீணேதி ஸம்விப⁴ஜதி புஞ்ஞானி கரோதி. தே ச போ⁴கே³ அக³தி⁴தோ அமுச்சி²தோ அனஜ்ஜோ²பன்னோ ஆதீ³னவத³ஸ்ஸாவீ நிஸ்ஸரணபஞ்ஞோ பரிபு⁴ஞ்ஜதி. அயம், கா³மணி, காமபோ⁴கீ³ சதூஹி டா²னேஹி பாஸம்ஸோ. கதமேஹி சதூஹி டா²னேஹி பாஸம்ஸோ? த⁴ம்மேன போ⁴கே³ பரியேஸதி அஸாஹஸேனாதி, இமினா பட²மேன டா²னேன பாஸம்ஸோ. அத்தானம் ஸுகே²தி பீணேதீதி, இமினா து³தியேன டா²னேன பாஸம்ஸோ. ஸம்விப⁴ஜதி புஞ்ஞானி கரோதீதி, இமினா ததியேன டா²னேன பாஸம்ஸோ. தே ச போ⁴கே³ அக³தி⁴தோ அமுச்சி²தோ அனஜ்ஜோ²பன்னோ ஆதீ³னவத³ஸ்ஸாவீ நிஸ்ஸரணபஞ்ஞோ பரிபு⁴ஞ்ஜதீதி, இமினா சதுத்தே²ன டா²னேன பாஸம்ஸோ. அயம், கா³மணி, காமபோ⁴கீ³ இமேஹி சதூஹி டா²னேஹி பாஸம்ஸோ.

‘‘தயோமே, கா³மணி, தபஸ்ஸினோ லூக²ஜீவினோ ஸந்தோ ஸம்விஜ்ஜமானா லோகஸ்மிம். கதமே தயோ? இத⁴, கா³மணி, ஏகச்சோ தபஸ்ஸீ லூக²ஜீவீ ஸத்³தா⁴ அகா³ரஸ்மா அனகா³ரியம் பப்³ப³ஜிதோ ஹோதி – ‘அப்பேவ நாம குஸலம் த⁴ம்மம் அதி⁴க³ச்சே²ய்யம், அப்பேவ நாம உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸம் ஸச்சி²கரேய்ய’ந்தி. ஸோ அத்தானம் ஆதாபேதி பரிதாபேதி, குஸலஞ்ச த⁴ம்மம் நாதி⁴க³ச்ச²தி, உத்தரி ச மனுஸ்ஸத⁴ம்மா அலமரியஞாணத³ஸ்ஸனவிஸேஸம் ந ஸச்சி²கரோதி.

‘‘இத⁴ பன, கா³மணி, ஏகச்சோ தபஸ்ஸீ லூக²ஜீவீ ஸத்³தா⁴ அகா³ரஸ்மா அனகா³ரியம் பப்³ப³ஜிதோ ஹோதி – ‘அப்பேவ நாம குஸலம் த⁴ம்மம் அதி⁴க³ச்சே²ய்யம், அப்பேவ நாம உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸம் ஸச்சி²கரேய்ய’ந்தி. ஸோ அத்தானம் ஆதாபேதி பரிதாபேதி, குஸலஞ்ஹி கோ² த⁴ம்மம் அதி⁴க³ச்ச²தி, உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸம் ந ஸச்சி²கரோதி.

‘‘இத⁴ பன, கா³மணி, ஏகச்சோ தபஸ்ஸீ லூக²ஜீவீ ஸத்³தா⁴ அகா³ரஸ்மா அனகா³ரியம் பப்³ப³ஜிதோ ஹோதி – ‘அப்பேவ நாம குஸலம் த⁴ம்மம் அதி⁴க³ச்சே²ய்யம், அப்பேவ நாம உத்தரிமனுஸ்ஸத⁴ம்மா அலமரியஞாணத³ஸ்ஸனவிஸேஸம் ஸச்சி²கரேய்ய’ந்தி. ஸோ அத்தானம் ஆதாபேதி பரிதாபேதி, குஸலஞ்ச த⁴ம்மம் அதி⁴க³ச்ச²தி, உத்தரி ச மனுஸ்ஸத⁴ம்மா அலமரியஞாணத³ஸ்ஸனவிஸேஸம் ஸச்சி²கரோதி.

‘‘தத்ர, கா³மணி, ய்வாயம் தபஸ்ஸீ லூக²ஜீவீ அத்தானம் ஆதாபேதி பரிதாபேதி, குஸலஞ்ச த⁴ம்மம் நாதி⁴க³ச்ச²தி, உத்தரி ச மனுஸ்ஸத⁴ம்மா அலமரியஞாணத³ஸ்ஸனவிஸேஸம் ந ஸச்சி²கரோதி. அயம், கா³மணி, தபஸ்ஸீ லூக²ஜீவீ தீஹி டா²னேஹி கா³ரய்ஹோ. கதமேஹி தீஹி டா²னேஹி கா³ரய்ஹோ? அத்தானம் ஆதாபேதி பரிதாபேதீதி, இமினா பட²மேன டா²னேன கா³ரய்ஹோ. குஸலஞ்ச த⁴ம்மம் நாதி⁴க³ச்ச²தீதி, இமினா து³தியேன டா²னேன கா³ரய்ஹோ. உத்தரி ச மனுஸ்ஸத⁴ம்மா அலமரியஞாணத³ஸ்ஸனவிஸேஸம் ந ஸச்சி²கரோதீதி, இமினா ததியேன டா²னேன கா³ரய்ஹோ. அயம், கா³மணி, தபஸ்ஸீ லூக²ஜீவீ, இமேஹி தீஹி டா²னேஹி கா³ரய்ஹோ.

‘‘தத்ர, கா³மணி, ய்வாயம் தபஸ்ஸீ லூக²ஜீவீ அத்தானம் ஆதாபேதி பரிதாபேதி, குஸலஞ்ஹி கோ² த⁴ம்மம் அதி⁴க³ச்ச²தி, உத்தரி ச மனுஸ்ஸத⁴ம்மா அலமரியஞாணத³ஸ்ஸனவிஸேஸம் ந ஸச்சி²கரோதி. அயம், கா³மணி, தபஸ்ஸீ லூக²ஜீவீ த்³வீஹி டா²னேஹி கா³ரய்ஹோ, ஏகேன டா²னேன பாஸம்ஸோ. கதமேஹி த்³வீஹி டா²னேஹி கா³ரய்ஹோ? அத்தானம் ஆதாபேதி பரிதாபேதீதி, இமினா பட²மேன டா²னேன கா³ரய்ஹோ. உத்தரி ச மனுஸ்ஸத⁴ம்மா அலமரியஞாணத³ஸ்ஸனவிஸேஸம் ந ஸச்சி²கரோதீதி, இமினா து³தியேன டா²னேன கா³ரய்ஹோ. கதமேன ஏகேன டா²னேன பாஸம்ஸோ? குஸலஞ்ஹி கோ² த⁴ம்மம் அதி⁴க³ச்ச²தீதி, இமினா ஏகேன டா²னேன பாஸம்ஸோ. அயம், கா³மணி, தபஸ்ஸீ லூக²ஜீவீ இமேஹி த்³வீஹி டா²னேஹி கா³ரய்ஹோ, இமினா ஏகேன டா²னேன பாஸம்ஸோ.

‘‘தத்ர, கா³மணி, ய்வாயம் தபஸ்ஸீ லூக²ஜீவீ அத்தானம் ஆதாபேதி பரிதாபேதி, குஸலஞ்ச த⁴ம்மம் அதி⁴க³ச்ச²தி, உத்தரி ச மனுஸ்ஸத⁴ம்மா அலமரியஞாணத³ஸ்ஸனவிஸேஸம் ஸச்சி²கரோதி. அயம், கா³மணி, தபஸ்ஸீ லூக²ஜீவீ ஏகேன டா²னேன கா³ரய்ஹோ, த்³வீஹி டா²னேஹி பாஸம்ஸோ. கதமேன ஏகேன டா²னேன கா³ரய்ஹோ? அத்தானம் ஆதாபேதி பரிதாபேதீதி, இமினா ஏகேன டா²னேன கா³ரய்ஹோ. கதமேஹி த்³வீஹி டா²னேஹி பாஸம்ஸோ? குஸலஞ்ச த⁴ம்மம் அதி⁴க³ச்ச²தீதி, இமினா பட²மேன டா²னேன பாஸம்ஸோ. உத்தரி ச மனுஸ்ஸத⁴ம்மா அலமரியஞாணத³ஸ்ஸனவிஸேஸம் ஸச்சி²கரோதீதி, இமினா து³தியேன டா²னேன பாஸம்ஸோ. அயம், கா³மணி, தபஸ்ஸீ லூக²ஜீவீ இமினா ஏகேன டா²னேன கா³ரய்ஹோ, இமேஹி த்³வீஹி டா²னேஹி பாஸம்ஸோ.

‘‘திஸ்ஸோ இமா, கா³மணி, ஸந்தி³ட்டி²கா நிஜ்ஜரா அகாலிகா ஏஹிபஸ்ஸிகா ஓபனேய்யிகா பச்சத்தம் வேதி³தப்³பா³ விஞ்ஞூஹி. கதமா திஸ்ஸோ? யம் ரத்தோ ராகா³தி⁴கரணம் அத்தப்³யாபா³தா⁴யபி சேதேதி, பரப்³யாபா³தா⁴யபி சேதேதி, உப⁴யப்³யாபா³தா⁴யபி சேதேதி. ராகே³ பஹீனே நேவத்தப்³யாபா³தா⁴ய சேதேதி, ந பரப்³யாபா³தா⁴ய சேதேதி, ந உப⁴யப்³யாபா³தா⁴ய சேதேதி. ஸந்தி³ட்டி²கா நிஜ்ஜரா அகாலிகா ஏஹிபஸ்ஸிகா ஓபனேய்யிகா பச்சத்தம் வேதி³தப்³பா³ விஞ்ஞூஹி. யம் து³ட்டோ² தோ³ஸாதி⁴கரணம் அத்தப்³யாபா³தா⁴யபி சேதேதி, பரப்³யாபா³தா⁴யபி சேதேதி, உப⁴யப்³யாபா³தா⁴யபி சேதேதி. தோ³ஸே பஹீனே நேவத்தப்³யாபா³தா⁴ய சேதேதி, ந பரப்³யாபா³தா⁴ய சேதேதி, ந உப⁴யப்³யாபா³தா⁴ய சேதேதி. ஸந்தி³ட்டி²கா நிஜ்ஜரா அகாலிகா ஏஹிபஸ்ஸிகா ஓபனேய்யிகா பச்சத்தம் வேதி³தப்³பா³ விஞ்ஞூஹி. யம் மூள்ஹோ மோஹாதி⁴கரணம் அத்தப்³யாபா³தா⁴யபி சேதேதி, பரப்³யாபா³தா⁴யபி சேதேதி, உப⁴யப்³யாபா³தா⁴யபி சேதேதி. மோஹே பஹீனே நேவத்தப்³யாபா³தா⁴ய சேதேதி, ந பரப்³யாபா³தா⁴ய சேதேதி, ந உப⁴யப்³யாபா³தா⁴ய சேதேதி. ஸந்தி³ட்டி²கா நிஜ்ஜரா அகாலிகா ஏஹிபஸ்ஸிகா ஓபனேய்யிகா பச்சத்தம் வேதி³தப்³பா³ விஞ்ஞூஹி. இமா கோ², கா³மணி, திஸ்ஸோ ஸந்தி³ட்டி²கா நிஜ்ஜரா அகாலிகா ஏஹிபஸ்ஸிகா ஓபனேய்யிகா பச்சத்தம் வேதி³தப்³பா³ விஞ்ஞூஹீ’’தி.

ஏவம் வுத்தே, ராஸியோ கா³மணி ப⁴க³வந்தம் ஏதத³வோச – ‘‘அபி⁴க்கந்தம், ப⁴ந்தே…பே… உபாஸகம் மம் ப⁴க³வா தா⁴ரேது அஜ்ஜதக்³கே³ பாணுபேதம் ஸரணம் க³த’’ந்தி. த்³வாத³ஸமம்.

13. பாடலியஸுத்தம்

365. ஏகம் ஸமயம் ப⁴க³வா கோலியேஸு விஹரதி உத்தரம் நாம [உத்தரகம் நாம (ஸீ.)] கோலியானம் நிக³மோ. அத² கோ² பாடலியோ கா³மணி யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² பாடலியோ கா³மணி ப⁴க³வந்தம் ஏதத³வோச – ‘‘ஸுதம் மேதம், ப⁴ந்தே – ‘ஸமணோ கோ³தமோ மாயம் ஜானாதீ’தி. யே தே, ப⁴ந்தே, ஏவமாஹம்ஸு – ‘ஸமணோ கோ³தமோ மாயம் ஜானாதீ’தி, கச்சி தே, ப⁴ந்தே, ப⁴க³வதோ வுத்தவாதி³னோ, ந ச ப⁴க³வந்தம் அபூ⁴தேன அப்³பா⁴சிக்க²ந்தி, த⁴ம்மஸ்ஸ சானுத⁴ம்மம் ப்³யாகரோந்தி, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹம் டா²னம் ஆக³ச்ச²தி? அனப்³பா⁴சிக்கி²துகாமா ஹி மயம், ப⁴ந்தே, ப⁴க³வந்த’’ந்தி. ‘‘யே தே, கா³மணி, ஏவமாஹம்ஸு – ‘ஸமணோ கோ³தமோ மாயம் ஜானாதீ’தி, வுத்தவாதி³னோ சேவ மே, தே ந ச மம் அபூ⁴தேன அப்³பா⁴சிக்க²ந்தி, த⁴ம்மஸ்ஸ சானுத⁴ம்மம் ப்³யாகரோந்தி, ந ச கோசி ஸஹத⁴ம்மிகோ வாதா³னுவாதோ³ கா³ரய்ஹம் டா²னம் ஆக³ச்ச²தீதி, ஸச்சம்யேவ கிர, போ⁴, மயம் தேஸம் ஸமணப்³ராஹ்மணானம் ந ஸத்³த³ஹாம – ‘ஸமணோ கோ³தமோ மாயம் ஜானாதீதி, ஸமணோ க²லு போ⁴ கோ³தமோ மாயாவீ’தி. யோ நு கோ², கா³மணி, ஏவம் வதே³தி – ‘அஹம் மாயம் ஜானாமீ’தி, ஸோ ஏவம் வதே³தி – ‘அஹம் மாயாவீ’தி. ததே²வ தம் ப⁴க³வா ஹோதி, ததே²வ தம் ஸுக³த ஹோதீ’’தி. தேன ஹி, கா³மணி, தஞ்ஞேவேத்த² படிபுச்சி²ஸ்ஸாமி; யதா² தே க²மேய்ய, ததா² தம் ப்³யாகரேய்யாஸி –

‘‘தம் கிம் மஞ்ஞஸி, கா³மணி, ஜானாஸி த்வம் கோலியானம் லம்ப³சூளகே ப⁴டே’’தி? ‘‘ஜானாமஹம், ப⁴ந்தே, கோலியானம் லம்ப³சூளகே ப⁴டே’’தி. ‘‘தம் கிம் மஞ்ஞஸி, கா³மணி, கிமத்தி²யா கோலியானம் லம்ப³சூளகா ப⁴டா’’தி? ‘‘யே ச, ப⁴ந்தே, கோலியானம் சோரா தே ச படிஸேதே⁴தும், யானி ச கோலியானம் தூ³தேய்யானி தானி ச வஹாதும் [தானி ச பஹாதும் (ஸ்யா. கம்.), தானி ச யாதும் (கத்த²சி), தானி சாவஹாதும் (?)], ஏதத³த்தி²யா, ப⁴ந்தே, கோலியானம் லம்ப³சூளகா ப⁴டா’’தி. ‘‘தம் கிம் மஞ்ஞஸி, கா³மணி, ஜானாஸி த்வம் கோலியானம் லம்ப³சூளகே ப⁴டே ஸீலவந்தே வா தே து³ஸ்ஸீலே வா’’தி? ‘‘ஜானாமஹம், ப⁴ந்தே, கோலியானம் லம்ப³சூளகே ப⁴டே து³ஸ்ஸீலே பாபத⁴ம்மே; யே ச லோகே து³ஸ்ஸீலா பாபத⁴ம்மா கோலியானம் லம்ப³சூளகா ப⁴டா தேஸம் அஞ்ஞதரா’’தி. ‘‘யோ நு கோ², கா³மணி, ஏவம் வதே³ய்ய – ‘பாடலியோ கா³மணி ஜானாதி கோலியானம் லம்ப³சூளகே ப⁴டே து³ஸ்ஸீலே பாபத⁴ம்மே, பாடலியோபி கா³மணி து³ஸ்ஸீலோ பாபத⁴ம்மோ’தி, ஸம்மா நு கோ² ஸோ வத³மானோ வதே³ய்யா’’தி? ‘‘நோ ஹேதம், ப⁴ந்தே! அஞ்ஞே, ப⁴ந்தே, கோலியானம் லம்ப³சூளகா ப⁴டா, அஞ்ஞோஹமஸ்மி. அஞ்ஞதா²த⁴ம்மா கோலியானம் லம்ப³சூளகா ப⁴டா, அஞ்ஞதா²த⁴ம்மோஹமஸ்மீ’’தி. ‘‘த்வஞ்ஹி நாம, கா³மணி, லச்ச²ஸி – ‘பாடலியோ கா³மணி ஜானாதி கோலியானம் லம்ப³சூளகே ப⁴டே து³ஸ்ஸீலே பாபத⁴ம்மே, ந ச பாடலியோ கா³மணி து³ஸ்ஸீலோ பாபத⁴ம்மோ’தி, கஸ்மா ததா²க³தோ ந லச்ச²தி – ‘ததா²க³தோ மாயம் ஜானாதி, ந ச ததா²க³தோ மாயாவீ’தி? மாயம் சாஹம், கா³மணி, பஜானாமி, மாயாய ச விபாகம், யதா²படிபன்னோ ச மாயாவீ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி தஞ்ச பஜானாமி’’.

‘‘பாணாதிபாதம் சாஹம், கா³மணி, பஜானாமி, பாணாதிபாதஸ்ஸ ச விபாகம், யதா²படிபன்னோ ச பாணாதிபாதீ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி தஞ்ச பஜானாமி. அதி³ன்னாதா³னம் சாஹம், கா³மணி, பஜானாமி, அதி³ன்னாதா³னஸ்ஸ ச விபாகம், யதா²படிபன்னோ ச அதி³ன்னாதா³யீ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி தஞ்ச பஜானாமி. காமேஸுமிச்சா²சாரம் சாஹம், கா³மணி, பஜானாமி, காமேஸுமிச்சா²சாரஸ்ஸ ச விபாகம், யதா²படிபன்னோ ச காமேஸுமிச்சா²சாரீ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி தஞ்ச பஜானாமி. முஸாவாத³ம் சாஹம், கா³மணி, பஜானாமி, முஸாவாத³ஸ்ஸ ச விபாகம், யதா²படிபன்னோ ச முஸாவாதீ³ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி தஞ்ச பஜானாமி. பிஸுணவாசம் சாஹம், கா³மணி, பஜானாமி, பிஸுணவாசாய ச விபாகம், யதா²படிபன்னோ ச பிஸுணவாசோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி தஞ்ச பஜானாமி. ப²ருஸவாசம் சாஹம், கா³மணி, பஜானாமி, ப²ருஸவாசாய ச விபாகம், யதா²படிபன்னோ ச ப²ருஸவாசோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி தஞ்ச பஜானாமி. ஸம்ப²ப்பலாபம் சாஹம், கா³மணி, பஜானாமி, ஸம்ப²ப்பலாபஸ்ஸ ச விபாகம், யதா²படிபன்னோ ச ஸம்ப²ப்பலாபீ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி தஞ்ச பஜானாமி. அபி⁴ஜ்ஜ²ம் சாஹம், கா³மணி, பஜானாமி, அபி⁴ஜ்ஜா²ய ச விபாகம், யதா²படிபன்னோ ச அபி⁴ஜ்ஜா²லு காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி தஞ்ச பஜானாமி. ப்³யாபாத³பதோ³ஸம் சாஹம், கா³மணி, பஜானாமி, ப்³யாபாத³பதோ³ஸஸ்ஸ ச விபாகம், யதா²படிபன்னோ ச ப்³யாபன்னசித்தோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி தஞ்ச பஜானாமி. மிச்சா²தி³ட்டி²ம் சாஹம், கா³மணி, பஜானாமி, மிச்சா²தி³ட்டி²யா ச விபாகம், யதா²படிபன்னோ ச மிச்சா²தி³ட்டி²கோ காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபஜ்ஜதி தஞ்ச பஜானாமி.

‘‘ஸந்தி ஹி, கா³மணி, ஏகே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘யோ கோசி பாணமதிபாதேதி, ஸப்³போ³ ஸோ தி³ட்டே²வ த⁴ம்மே து³க்க²ம் தோ³மனஸ்ஸம் படிஸம்வேத³யதி. யோ கோசி அதி³ன்னம் ஆதி³யதி, ஸப்³போ³ ஸோ தி³ட்டே²வ த⁴ம்மே து³க்க²ம் தோ³மனஸ்ஸம் படிஸம்வேத³யதி. யோ கோசி காமேஸு மிச்சா² சரதி, ஸப்³போ³ ஸோ தி³ட்டே²வ த⁴ம்மே து³க்க²ம் தோ³மனஸ்ஸம் படிஸம்வேத³யதி. யோ கோசி முஸா ப⁴ணதி, ஸப்³போ³ ஸோ தி³ட்டே²வ த⁴ம்மே து³க்க²ம் தோ³மனஸ்ஸம் படிஸம்வேத³யதீ’’’தி.

‘‘தி³ஸ்ஸதி கோ² பன, கா³மணி, இதே⁴கச்சோ மாலீ குண்ட³லீ ஸுன்ஹாதோ [ஸுனஹாதோ (ஸீ. ஸ்யா. கம். பீ.)] ஸுவிலித்தோ கப்பிதகேஸமஸ்ஸு இத்தி²காமேஹி ராஜா மஞ்ஞே பரிசாரேந்தோ. தமேனம் ஏவமாஹம்ஸு – ‘அம்போ⁴! அயம் புரிஸோ கிம் அகாஸி மாலீ குண்ட³லீ ஸுன்ஹாதோ ஸுவிலித்தோ கப்பிதகேஸமஸ்ஸு இத்தி²காமேஹி ராஜா மஞ்ஞே பரிசாரேதீ’தி? தமேனம் ஏவமாஹம்ஸு – ‘அம்போ⁴! அயம் புரிஸோ ரஞ்ஞோ பச்சத்தி²கம் பஸய்ஹ ஜீவிதா வோரோபேஸி. தஸ்ஸ ராஜா அத்தமனோ அபி⁴ஹாரமதா³ஸி. தேனாயம் புரிஸோ மாலீ குண்ட³லீ ஸுன்ஹாதோ ஸுவிலித்தோ கப்பிதகேஸமஸ்ஸு, இத்தி²காமேஹி ராஜா மஞ்ஞே பரிசாரேதீ’’’தி.

‘‘தி³ஸ்ஸதி கோ², கா³மணி, இதே⁴கச்சோ த³ள்ஹாய ரஜ்ஜுயா பச்சா²பா³ஹம் கா³ள்ஹப³ந்த⁴னம் ப³ந்தி⁴த்வா கு²ரமுண்ட³ம் கரித்வா க²ரஸ்ஸரேன பணவேன ரதி²யாய ரதி²யம் [ரதி²காய ரதி²கம் (ஸீ.)] ஸிங்கா⁴டகேன ஸிங்கா⁴டகம் பரினேத்வா, த³க்கி²ணேன த்³வாரேன நிக்கா²மேத்வா, த³க்கி²ணதோ நக³ரஸ்ஸ ஸீஸம் சி²ஜ்ஜமானோ. தமேனம் ஏவமாஹம்ஸு – ‘அம்போ⁴! அயம் புரிஸோ கிம் அகாஸி, த³ள்ஹாய ரஜ்ஜுயா பச்சா²பா³ஹம் கா³ள்ஹப³ந்த⁴னம் ப³ந்தி⁴த்வா கு²ரமுண்ட³ம் கரித்வா க²ரஸ்ஸரேன பணவேன ரதி²யாய ரதி²யம் ஸிங்கா⁴டகேன ஸிங்கா⁴டகம் பரினேத்வா த³க்கி²ணேன த்³வாரேன நிக்கா²மேத்வா த³க்கி²ணதோ நக³ரஸ்ஸ ஸீஸம் சி²ந்த³தீ’தி [சி²ஜ்ஜதீதி (கத்த²சி)]? தமேனம் ஏவமாஹம்ஸு – ‘அம்போ⁴! அயம் புரிஸோ ராஜவேரீ இத்தி²ம் வா புரிஸம் வா ஜீவிதா வோரோபேஸி, தேன நம் ராஜானோ க³ஹேத்வா ஏவரூபம் கம்மகாரணம் காரேந்தீ’’’தி.

‘‘தம் கிம் மஞ்ஞஸி, கா³மணி, அபி நு தே ஏவரூபம் தி³ட்ட²ம் வா ஸுதம் வா’’தி? ‘‘தி³ட்ட²ஞ்ச நோ, ப⁴ந்தே, ஸுதஞ்ச ஸுய்யிஸ்ஸதி சா’’தி. ‘‘தத்ர, கா³மணி, யே தே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘யோ கோசி பாணமதிபாதேதி, ஸப்³போ³ ஸோ தி³ட்டே²வ த⁴ம்மே து³க்க²ம் தோ³மனஸ்ஸம் படிஸம்வேத³யதீ’தி, ஸச்சம் வா தே ஆஹம்ஸு முஸா வா’’தி? ‘‘முஸா, ப⁴ந்தே’’. ‘‘யே பன தே துச்ச²ம் முஸா விலபந்தி, ஸீலவந்தோ வா தே து³ஸ்ஸீலா வா’’தி? ‘‘து³ஸ்ஸீலா, ப⁴ந்தே’’. ‘‘யே பன தே து³ஸ்ஸீலா பாபத⁴ம்மா மிச்சா²படிபன்னா வா தே ஸம்மாபடிபன்னா வா’’தி? ‘‘மிச்சா²படிபன்னா, ப⁴ந்தே’’. ‘‘யே பன தே மிச்சா²படிபன்னா மிச்சா²தி³ட்டி²கா வா தே ஸம்மாதி³ட்டி²கா வா’’தி? ‘‘மிச்சா²தி³ட்டி²கா, ப⁴ந்தே’’. ‘‘யே பன தே மிச்சா²தி³ட்டி²கா கல்லம் நு தேஸு பஸீதி³து’’ந்தி? ‘‘நோ ஹேதம், ப⁴ந்தே’’.

‘‘தி³ஸ்ஸதி கோ² பன, கா³மணி, இதே⁴கச்சோ மாலீ குண்ட³லீ…பே… இத்தி²காமேஹி ராஜா மஞ்ஞே பரிசாரேந்தோ. தமேனம் ஏவமாஹம்ஸு – ‘அம்போ⁴! அயம் புரிஸோ கிம் அகாஸி மாலீ குண்ட³லீ…பே… இத்தி²காமேஹி ராஜா மஞ்ஞே பரிசாரேதீ’தி? தமேனம் ஏவமாஹம்ஸு – ‘அம்போ⁴! அயம் புரிஸோ ரஞ்ஞோ பச்சத்தி²கஸ்ஸ பஸய்ஹ ரதனம் அஹாஸி [பஸய்ஹ அதி³ன்னம் ரதனம் ஆதி³யி (க.)]. தஸ்ஸ ராஜா அத்தமனோ அபி⁴ஹாரமதா³ஸி. தேனாயம் புரிஸோ மாலீ குண்ட³லீ…பே… இத்தி²காமேஹி ராஜா மஞ்ஞே பரிசாரேதீ’’’தி.

‘‘தி³ஸ்ஸதி கோ², கா³மணி, இதே⁴கச்சோ த³ள்ஹாய ரஜ்ஜுயா…பே… த³க்கி²ணதோ நக³ரஸ்ஸ ஸீஸம் சி²ஜ்ஜமானோ தமேனம் ஏவமாஹம்ஸு – ‘அம்போ⁴! அயம் புரிஸோ கிம் அகாஸி த³ள்ஹாய ரஜ்ஜுயா…பே… த³க்கி²ணதோ நக³ரஸ்ஸ ஸீஸம் சி²ந்த³தீ’தி? தமேனம் ஏவமாஹம்ஸு – ‘அம்போ⁴! அயம் புரிஸோ கா³மா வா அரஞ்ஞா வா அதி³ன்னம் தே²ய்யஸங்கா²தம் ஆதி³யி. தேன நம் ராஜானோ க³ஹேத்வா ஏவரூபம் கம்மகாரணம் காரேந்தீ’தி. தம் கிம் மஞ்ஞஸி, கா³மணி, அபி நு தே ஏவரூபம் தி³ட்ட²ம் வா ஸுதம் வா’’தி? ‘‘தி³ட்ட²ஞ்ச நோ, ப⁴ந்தே, ஸுதஞ்ச ஸுய்யிஸ்ஸதி சா’’தி. ‘‘தத்ர, கா³மணி, யே தே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘யோ கோசி அதி³ன்னம் ஆதி³யதி, ஸப்³போ³ ஸோ தி³ட்டே²வ த⁴ம்மே து³க்க²ம் தோ³மனஸ்ஸம் படிஸம்வேத³யதீ’தி, ஸச்சம் வா தே ஆஹம்ஸு முஸா வாதி…பே… கல்லம் நு தேஸு பஸீதி³து’’ந்தி? ‘‘நோ ஹேதம், ப⁴ந்தே’’.

‘‘தி³ஸ்ஸதி கோ² பன, கா³மணி, இதே⁴கச்சோ மாலீ குண்ட³லீ…பே… இத்தி²காமேஹி ராஜா மஞ்ஞே பரிசாரேந்தோ. தமேனம் ஏவமாஹம்ஸு – ‘அம்போ⁴! அயம் புரிஸோ கிம் அகாஸி மாலீ குண்ட³லீ…பே… இத்தி²காமேஹி ராஜா மஞ்ஞே பரிசாரேதீ’தி? தமேனம் ஏவமாஹம்ஸு – ‘அம்போ⁴! அயம் புரிஸோ ரஞ்ஞோ பச்சத்தி²கஸ்ஸ தா³ரேஸு சாரித்தம் ஆபஜ்ஜி. தஸ்ஸ ராஜா அத்தமனோ அபி⁴ஹாரமதா³ஸி. தேனாயம் புரிஸோ மாலீ குண்ட³லீ…பே… இத்தி²காமேஹி ராஜா மஞ்ஞே பரிசாரேதீ’’’தி.

‘‘தி³ஸ்ஸதி கோ², கா³மணி, இதே⁴கச்சோ த³ள்ஹாய ரஜ்ஜுயா…பே… த³க்கி²ணதோ நக³ரஸ்ஸ ஸீஸம் சி²ஜ்ஜமானோ. தமேனம் ஏவமாஹம்ஸு – ‘அம்போ⁴! அயம் புரிஸோ கிம் அகாஸி த³ள்ஹாய ரஜ்ஜுயா…பே… த³க்கி²ணதோ நக³ரஸ்ஸ ஸீஸம் சி²ந்த³தீ’தி? தமேனம் ஏவமாஹம்ஸு – ‘அம்போ⁴! அயம் புரிஸோ குலித்தீ²ஸு குலகுமாரீஸு சாரித்தம் ஆபஜ்ஜி, தேன நம் ராஜானோ க³ஹேத்வா ஏவரூபம் கம்மகாரணம் காரேந்தீ’தி. தம் கிம் மஞ்ஞஸி, கா³மணி, அபி நு தே ஏவரூபம் தி³ட்ட²ம் வா ஸுதம் வா’’தி? ‘‘தி³ட்ட²ஞ்ச நோ, ப⁴ந்தே, ஸுதஞ்ச ஸுய்யிஸ்ஸதி சா’’தி. ‘‘தத்ர, கா³மணி, யே தே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘யோ கோசி காமேஸு மிச்சா² சரதி, ஸப்³போ³ ஸோ தி³ட்டே²வ த⁴ம்மே து³க்க²ம் தோ³மனஸ்ஸம் படிஸம்வேத³யதீ’தி, ஸச்சம் வா தே ஆஹம்ஸு முஸா வாதி…பே… கல்லம் நு தேஸு பஸீதி³து’’ந்தி? ‘‘நோ ஹேதம், ப⁴ந்தே’’.

‘‘தி³ஸ்ஸதி கோ² பன, கா³மணி, இதே⁴கச்சோ மாலீ குண்ட³லீ ஸுன்ஹாதோ ஸுவிலித்தோ கப்பிதகேஸமஸ்ஸு இத்தி²காமேஹி ராஜா மஞ்ஞே பரிசாரேந்தோ. தமேனம் ஏவமாஹம்ஸு – ‘அம்போ⁴! அயம் புரிஸோ கிம் அகாஸி மாலீ குண்ட³லீ ஸுன்ஹாதோ ஸுவிலித்தோ கப்பிதகேஸமஸ்ஸு இத்தி²காமேஹி ராஜா மஞ்ஞே பரிசாரேதீ’தி? தமேனம் ஏவமாஹம்ஸு – ‘அம்போ⁴! அயம் புரிஸோ ராஜானம் முஸாவாதே³ன ஹாஸேஸி. தஸ்ஸ ராஜா அத்தமனோ அபி⁴ஹாரமதா³ஸி. தேனாயம் புரிஸோ மாலீ குண்ட³லீ ஸுன்ஹாதோ ஸுவிலித்தோ கப்பிதகேஸமஸ்ஸு இத்தி²காமேஹி ராஜா மஞ்ஞே பரிசாரேதீ’’’தி.

‘‘தி³ஸ்ஸதி கோ², கா³மணி, இதே⁴கச்சோ த³ள்ஹாய ரஜ்ஜுயா பச்சா²பா³ஹம் கா³ள்ஹப³ந்த⁴னம் ப³ந்தி⁴த்வா கு²ரமுண்ட³ம் கரித்வா க²ரஸ்ஸரேன பணவேன ரதி²யாய ரதி²யம் ஸிங்கா⁴டகேன ஸிங்கா⁴டகம் பரினேத்வா த³க்கி²ணேன த்³வாரேன நிக்கா²மேத்வா த³க்கி²ணதோ நக³ரஸ்ஸ ஸீஸம் சி²ஜ்ஜமானோ. தமேனம் ஏவமாஹம்ஸு – ‘அம்போ⁴! அயம் புரிஸோ கிம் அகாஸி த³ள்ஹாய ரஜ்ஜுயா பச்சா²பா³ஹம் கா³ள்ஹப³ந்த⁴னம் ப³ந்தி⁴த்வா கு²ரமுண்ட³ம் கரித்வா க²ரஸ்ஸரேன பணவேன ரதி²யாய ரதி²யம் ஸிங்கா⁴டகேன ஸிங்கா⁴டகம் பரினேத்வா, த³க்கி²ணேன த்³வாரேன நிக்கா²மேத்வா, த³க்கி²ணதோ நக³ரஸ்ஸ ஸீஸம் சி²ந்த³தீ’தி? தமேனம் ஏவமாஹம்ஸு – ‘அம்போ⁴! அயம் புரிஸோ க³ஹபதிஸ்ஸ வா க³ஹபதிபுத்தஸ்ஸ வா முஸாவாதே³ன அத்த²ம் ப⁴ஞ்ஜி, தேன நம் ராஜானோ க³ஹேத்வா ஏவரூபம் கம்மகாரணம் காரேந்தீ’தி. தம் கிம் மஞ்ஞஸி, கா³மணி, அபி நு தே ஏவரூபம் தி³ட்ட²ம் வா ஸுதம் வா’’தி? ‘‘தி³ட்ட²ஞ்ச நோ, ப⁴ந்தே, ஸுதஞ்ச ஸுய்யிஸ்ஸதி சா’’தி. ‘‘தத்ர, கா³மணி, யே தே ஸமணப்³ராஹ்மணா ஏவம்வாதி³னோ ஏவம்தி³ட்டி²னோ – ‘யோ கோசி முஸா ப⁴ணதி, ஸப்³போ³ ஸோ தி³ட்டே²வ த⁴ம்மே து³க்க²ம் தோ³மனஸ்ஸம் படிஸம்வேத³யதீ’தி, ஸச்சம் வா தே ஆஹம்ஸு முஸா வா’’தி? ‘‘முஸா, ப⁴ந்தே’’. ‘‘யே பன தே துச்ச²ம் முஸா விலபந்தி ஸீலவந்தோ வா தே து³ஸ்ஸீலா வா’’தி? ‘‘து³ஸ்ஸீலா, ப⁴ந்தே’’. ‘‘யே பன தே து³ஸ்ஸீலா பாபத⁴ம்மா மிச்சா²படிபன்னா வா தே ஸம்மாபடிபன்னா வா’’தி? ‘‘மிச்சா²படிபன்னா, ப⁴ந்தே’’. ‘‘யே பன தே மிச்சா²படிபன்னா மிச்சா²தி³ட்டி²கா வா தே ஸம்மாதி³ட்டி²கா வா’’தி? ‘‘மிச்சா²தி³ட்டி²கா, ப⁴ந்தே’’. ‘‘யே பன தே மிச்சா²தி³ட்டி²கா கல்லம் நு தேஸு பஸீதி³து’’ந்தி? ‘‘நோ ஹேதம், ப⁴ந்தே’’.

‘‘அச்ச²ரியம், ப⁴ந்தே, அப்³பு⁴தம், ப⁴ந்தே! அத்தி² மே, ப⁴ந்தே, ஆவஸதா²கா³ரம். தத்த² அத்தி² மஞ்சகானி, அத்தி² ஆஸனானி, அத்தி² உத³கமணிகோ, அத்தி² தேலப்பதீ³போ. தத்த² யோ ஸமணோ வா ப்³ராஹ்மணோ வா வாஸம் உபேதி, தேனாஹம் யதா²ஸத்தி யதா²ப³லம் ஸம்விப⁴ஜாமி. பூ⁴தபுப்³ப³ம், ப⁴ந்தே, சத்தாரோ ஸத்தா²ரோ நானாதி³ட்டி²கா நானாக²ந்திகா நானாருசிகா, தஸ்மிம் ஆவஸதா²கா³ரே வாஸம் உபக³ச்சு²ம்’’.

‘‘ஏகோ ஸத்தா² ஏவம்வாதீ³ ஏவம்தி³ட்டி² – ‘நத்தி² தி³ன்னம், நத்தி² யிட்ட²ம், நத்தி² ஹுதம், நத்தி² ஸுகதது³க்கடானம் கம்மானம் ப²லம் விபாகோ. நத்தி² அயம் லோகோ, நத்தி² பரோ லோகோ, நத்தி² மாதா, நத்தி² பிதா, நத்தி² ஸத்தா ஓபபாதிகா, நத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’’’தி.

‘‘ஏகோ ஸத்தா² ஏவம்வாதீ³ ஏவம்தி³ட்டி² – ‘அத்தி² தி³ன்னம், அத்தி² யிட்ட²ம், அத்தி² ஹுதம், அத்தி² ஸுகதது³க்கடானம் கம்மானம் ப²லம் விபாகோ, அத்தி² அயம் லோகோ, அத்தி² பரோ லோகோ, அத்தி² மாதா, அத்தி² பிதா, அத்தி² ஸத்தா ஓபபாதிகா, அத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா, யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’’’தி.

‘‘ஏகோ ஸத்தா² ஏவம்வாதீ³ ஏவம்தி³ட்டி² – ‘கரோதோ காரயதோ, சி²ந்த³தோ சே²தா³பயதோ, பசதோ பாசாபயதோ, ஸோசயதோ ஸோசாபயதோ, கிலமதோ கிலமாபயதோ, ப²ந்த³தோ ப²ந்தா³பயதோ, பாணமதிபாதயதோ, அதி³ன்னம் ஆதி³யதோ, ஸந்தி⁴ம் சி²ந்த³தோ, நில்லோபம் ஹரதோ, ஏகாகா³ரிகம் கரோதோ, பரிபந்தே² திட்ட²தோ, பரதா³ரம் க³ச்ச²தோ, முஸா ப⁴ணதோ, கரோதோ ந கரீயதி பாபம். கு²ரபரியந்தேன சேபி சக்கேன யோ இமிஸ்ஸா பத²வியா பாணே ஏகம் மம்ஸக²லம் ஏகம் மம்ஸபுஞ்ஜம் கரேய்ய, நத்தி² ததோனிதா³னம் பாபம், நத்தி² பாபஸ்ஸ ஆக³மோ. த³க்கி²ணம் சேபி க³ங்கா³ய தீரம் க³ச்சே²ய்ய ஹனந்தோ கா⁴தேந்தோ சி²ந்த³ந்தோ சே²தா³பேந்தோ பசந்தோ பாசாபேந்தோ, நத்தி² ததோனிதா³னம் பாபம், நத்தி² பாபஸ்ஸ ஆக³மோ. உத்தரம் சேபி க³ங்கா³ய தீரம் க³ச்சே²ய்ய த³த³ந்தோ தா³பேந்தோ யஜந்தோ யஜாபேந்தோ, நத்தி² ததோனிதா³னம் புஞ்ஞம், நத்தி² புஞ்ஞஸ்ஸ ஆக³மோ. தா³னேன த³மேன ஸம்யமேன ஸச்சவஜ்ஜேன நத்தி² புஞ்ஞம், நத்தி² புஞ்ஞஸ்ஸ ஆக³மோ’’’தி.

‘‘ஏகோ ஸத்தா² ஏவம்வாதீ³ ஏவம்தி³ட்டி² – ‘கரோதோ காரயதோ, சி²ந்த³தோ சே²தா³பயதோ, பசதோ பாசாபயதோ, ஸோசயதோ ஸோசாபயதோ, கிலமதோ கிலமாபயதோ, ப²ந்த³தோ ப²ந்தா³பயதோ, பாணமதிபாதயதோ, அதி³ன்னம் ஆதி³யதோ, ஸந்தி⁴ம் சி²ந்த³தோ, நில்லோபம் ஹரதோ, ஏகாகா³ரிகம் கரோதோ, பரிபந்தே² திட்ட²தோ, பரதா³ரம் க³ச்ச²தோ, முஸா ப⁴ணதோ, கரோதோ கரீயதி பாபம். கு²ரபரியந்தேன சேபி சக்கேன யோ இமிஸ்ஸா பத²வியா பாணே ஏகம் மம்ஸக²லம் ஏகம் மம்ஸபுஞ்ஜம் கரேய்ய, அத்தி² ததோனிதா³னம் பாபம், அத்தி² பாபஸ்ஸ ஆக³மோ. த³க்கி²ணம் சேபி க³ங்கா³ய தீரம் க³ச்சே²ய்ய ஹனந்தோ கா⁴தேந்தோ சி²ந்த³ந்தோ சே²தா³பேந்தோ பசந்தோ பாசாபேந்தோ, அத்தி² ததோனிதா³னம் பாபம், அத்தி² பாபஸ்ஸ ஆக³மோ. உத்தரம் சேபி க³ங்கா³ய தீரம் க³ச்சே²ய்ய த³த³ந்தோ தா³பேந்தோ, யஜந்தோ யஜாபேந்தோ, அத்தி² ததோனிதா³னம் புஞ்ஞம், அத்தி² புஞ்ஞஸ்ஸ ஆக³மோ. தா³னேன த³மேன ஸம்யமேன ஸச்சவஜ்ஜேன அத்தி² புஞ்ஞம், அத்தி² புஞ்ஞஸ்ஸ ஆக³மோ’’’தி.

‘‘தஸ்ஸ மய்ஹம், ப⁴ந்தே, அஹுதே³வ கங்கா², அஹு விசிகிச்சா² – ‘கோஸு நாம இமேஸம் ப⁴வதம் ஸமணப்³ராஹ்மணானம் ஸச்சம் ஆஹ, கோ முஸா’’’தி?

‘‘அலஞ்ஹி தே, கா³மணி, கங்கி²தும், அலம் விசிகிச்சி²தும். கங்க²னீயே ச பன தே டா²னே விசிகிச்சா² உப்பன்னா’’தி. ‘‘ஏவம் பஸன்னோஹம், ப⁴ந்தே, ப⁴க³வதி. பஹோதி மே ப⁴க³வா ததா² த⁴ம்மம் தே³ஸேதும் யதா²ஹம் இமம் கங்கா²த⁴ம்மம் பஜஹேய்ய’’ந்தி.

‘‘அத்தி², கா³மணி, த⁴ம்மஸமாதி⁴. தத்ர சே த்வம் சித்தஸமாதி⁴ம் படிலபே⁴ய்யாஸி. ஏவம் த்வம் இமம் கங்கா²த⁴ம்மம் பஜஹேய்யாஸி. கதமோ ச, கா³மணி, த⁴ம்மஸமாதி⁴? இத⁴, கா³மணி, அரியஸாவகோ பாணாதிபாதம் பஹாய பாணாதிபாதா படிவிரதோ ஹோதி, அதி³ன்னாதா³னம் பஹாய அதி³ன்னாதா³னா படிவிரதோ ஹோதி, காமேஸுமிச்சா²சாரம் பஹாய காமேஸுமிச்சா²சாரா படிவிரதோ ஹோதி, முஸாவாத³ம் பஹாய முஸாவாதா³ படிவிரதோ ஹோதி, பிஸுணம் வாசம் பஹாய பிஸுணாய வாசாய படிவிரதோ ஹோதி, ப²ருஸம் வாசம் பஹாய ப²ருஸாய வாசாய படிவிரதோ ஹோதி, ஸம்ப²ப்பலாபம் பஹாய ஸம்ப²ப்பலாபா படிவிரதோ ஹோதி, அபி⁴ஜ்ஜ²ம் பஹாய அனபி⁴ஜ்ஜா²லு ஹோதி, ப்³யாபாத³பதோ³ஸம் பஹாய அப்³யாபன்னசித்தோ ஹோதி, மிச்சா²தி³ட்டி²ம் பஹாய ஸம்மாதி³ட்டி²கோ ஹோதி.

‘‘ஸ கோ² ஸோ, கா³மணி, அரியஸாவகோ ஏவம் விக³தாபி⁴ஜ்ஜோ² விக³தப்³யாபாதோ³ அஸம்மூள்ஹோ ஸம்பஜானோ படிஸ்ஸதோ மேத்தாஸஹக³தேன சேதஸா ஏகம் தி³ஸம் ப²ரித்வா விஹரதி, ததா² து³தியம், ததா² ததியம், ததா² சதுத்த²ம், இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் மேத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. ஸோ இதி படிஸஞ்சிக்க²தி – ‘ய்வாயம் ஸத்தா² ஏவம்வாதீ³ ஏவம்தி³ட்டி² – நத்தி² தி³ன்னம், நத்தி² யிட்ட²ம், நத்தி² ஹுதம், நத்தி² ஸுகதது³க்கடானம் கம்மானம் ப²லம் விபாகோ, நத்தி² அயம் லோகோ, நத்தி² பரோ லோகோ, நத்தி² மாதா, நத்தி² பிதா, நத்தி² ஸத்தா ஓபபாதிகா, நத்தி² லோகே ஸமணப்³ராஹ்மணா, ஸம்மக்³க³தா ஸம்மாபடிபன்னா யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’தி. ‘ஸசே தஸ்ஸ போ⁴தோ ஸத்து²னோ ஸச்சம் வசனம், அபண்ணகதாய மய்ஹம், ய்வாஹம் [யோஹம் (ஸீ. ஸ்யா. கம். பீ.)] ந கிஞ்சி [கஞ்சி (?)] ப்³யாபா³தே⁴மி தஸம் வா தா²வரம் வா? உப⁴யமேத்த² [உப⁴யத்த² மே (?) ம. நி. 2.95 பாளியா ஸம்ஸந்தே³தப்³ப³ம்] கடக்³கா³ஹோ, யம் சம்ஹி காயேன ஸம்வுதோ வாசாய ஸம்வுதோ மனஸா ஸம்வுதோ, யஞ்ச காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜிஸ்ஸாமீ’தி [பரம் மரணா ந உபபஜ்ஜிஸ்ஸாமீதி (?)]. தஸ்ஸ பாமோஜ்ஜம் ஜாயதி. பமுதி³தஸ்ஸ பீதி ஜாயதி. பீதிமனஸ்ஸ காயோ பஸ்ஸம்ப⁴தி. பஸ்ஸத்³த⁴காயோ ஸுக²ம் வேத³யதி. ஸுகி²னோ சித்தம் ஸமாதி⁴யதி. அயம் கோ², கா³மணி, த⁴ம்மஸமாதி⁴. தத்ர சே த்வம் சித்தஸமாதி⁴ம் படிலபே⁴ய்யாஸி, ஏவம் த்வம் இமம் கங்கா²த⁴ம்மம் பஜஹேய்யாஸி.

‘‘ஸ கோ² ஸோ, கா³மணி, அரியஸாவகோ ஏவம் விக³தாபி⁴ஜ்ஜோ² விக³தப்³யாபாதோ³ அஸம்மூள்ஹோ ஸம்பஜானோ படிஸ்ஸதோ மேத்தாஸஹக³தேன சேதஸா ஏகம் தி³ஸம் ப²ரித்வா விஹரதி, ததா² து³தியம், ததா² ததியம், ததா² சதுத்த²ம், இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் மேத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. ஸோ இதி படிஸஞ்சிக்க²தி – ‘ய்வாயம் ஸத்தா² ஏவம்வாதீ³ ஏவம்தி³ட்டி² – அத்தி² தி³ன்னம், அத்தி² யிட்ட²ம், அத்தி² ஹுதம், அத்தி² ஸுகதது³க்கடானம் கம்மானம் ப²லம் விபாகோ, அத்தி² அயம் லோகோ, அத்தி² பரோ லோகோ, அத்தி² மாதா, அத்தி² பிதா, அத்தி² ஸத்தா ஓபபாதிகா, அத்தி² லோகே ஸமணப்³ராஹ்மணா, ஸம்மக்³க³தா ஸம்மாபடிபன்னா யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீ’தி. ‘ஸசே தஸ்ஸ போ⁴தோ ஸத்து²னோ ஸச்சம் வசனம், அபண்ணகதாய மய்ஹம், ய்வாஹம் ந கிஞ்சி ப்³யாபா³தே⁴மி தஸம் வா தா²வரம் வா? உப⁴யமேத்த² கடக்³கா³ஹோ, யம் சம்ஹி காயேன ஸம்வுதோ வாசாய ஸம்வுதோ மனஸா ஸம்வுதோ, யஞ்ச காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜிஸ்ஸாமீ’தி. தஸ்ஸ பாமோஜ்ஜம் ஜாயதி. பமுதி³தஸ்ஸ பீதி ஜாயதி. பீதிமனஸ்ஸ காயோ பஸ்ஸம்ப⁴தி. பஸ்ஸத்³த⁴காயோ ஸுக²ம் வேத³யதி. ஸுகி²னோ சித்தம் ஸமாதி⁴யதி. அயம் கோ², கா³மணி, த⁴ம்மஸமாதி⁴. தத்ர சே த்வம் சித்தஸமாதி⁴ம் படிலபே⁴ய்யாஸி, ஏவம் த்வம் இமம் கங்கா²த⁴ம்மம் பஜஹேய்யாஸி.

‘‘ஸ கோ² ஸோ, கா³மணி, அரியஸாவகோ ஏவம் விக³தாபி⁴ஜ்ஜோ² விக³தப்³யாபாதோ³ அஸம்மூள்ஹோ ஸம்பஜானோ படிஸ்ஸதோ மேத்தாஸஹக³தேன சேதஸா ஏகம் தி³ஸம் ப²ரித்வா விஹரதி, ததா² து³தியம், ததா² ததியம், ததா² சதுத்த²ம், இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் மேத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. ஸோ இதி படிஸஞ்சிக்க²தி – ‘ய்வாயம் ஸத்தா² ஏவம்வாதீ³ ஏவம்தி³ட்டி² – கரோதோ காரயதோ, சி²ந்த³தோ சே²தா³பயதோ, பசதோ பாசாபயதோ, ஸோசயதோ ஸோசாபயதோ, கிலமதோ கிலமாபயதோ, ப²ந்த³தோ ப²ந்தா³பயதோ, பாணமதிபாதயதோ, அதி³ன்னம் ஆதி³யதோ, ஸந்தி⁴ம் சி²ந்த³தோ, நில்லோபம் ஹரதோ, ஏகாகா³ரிகம் கரோதோ, பரிபந்தே² திட்ட²தோ, பரதா³ரம் க³ச்ச²தோ, முஸா ப⁴ணதோ, கரோதோ ந கரீயதி பாபம். கு²ரபரியந்தேன சேபி சக்கேன யோ இமிஸ்ஸா பத²வியா பாணே ஏகம் மம்ஸக²லம் ஏகம் மம்ஸபுஞ்ஜம் கரேய்ய, நத்தி² ததோனிதா³னம் பாபம், நத்தி² பாபஸ்ஸ ஆக³மோ. த³க்கி²ணஞ்சேபி க³ங்கா³ய தீரம் க³ச்சே²ய்ய ஹனந்தோ கா⁴தேந்தோ சி²ந்த³ந்தோ சே²தா³பேந்தோ பசந்தோ பாசாபேந்தோ, நத்தி² ததோனிதா³னம் பாபம், நத்தி² பாபஸ்ஸ ஆக³மோ. உத்தரஞ்சேபி க³ங்கா³ய தீரம் க³ச்சே²ய்ய த³த³ந்தோ தா³பேந்தோ, யஜந்தோ யஜாபேந்தோ, நத்தி² ததோனிதா³னம் புஞ்ஞம், நத்தி² புஞ்ஞஸ்ஸ ஆக³மோ. தா³னேன த³மேன ஸம்யமேன ஸச்சவஜ்ஜேன நத்தி² புஞ்ஞம், நத்தி² புஞ்ஞஸ்ஸ ஆக³மோ’தி. ‘ஸசே தஸ்ஸ போ⁴தோ ஸத்து²னோ ஸச்சம் வசனம், அபண்ணகதாய மய்ஹம், ய்வாஹம் ந கிஞ்சி ப்³யாபா³தே⁴மி தஸம் வா தா²வரம் வா? உப⁴யமேத்த² கடக்³கா³ஹோ, யம் சம்ஹி காயேன ஸம்வுதோ வாசாய ஸம்வுதோ மனஸா ஸம்வுதோ, யஞ்ச காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜிஸ்ஸாமீ’தி [பரம் மரணா ந உபபஜ்ஜிஸ்ஸாமீதி (?)]. தஸ்ஸ பாமோஜ்ஜம் ஜாயதி. பமுதி³தஸ்ஸ பீதி ஜாயதி. பீதிமனஸ்ஸ காயோ பஸ்ஸம்ப⁴தி. பஸ்ஸத்³த⁴காயோ ஸுக²ம் வேத³யதி. ஸுகி²னோ சித்தம் ஸமாதி⁴யதி. அயம் கோ², கா³மணி, த⁴ம்மஸமாதி⁴ தத்ர சே த்வம் சித்தஸமாதி⁴ம் படிலபே⁴ய்யாஸி, ஏவம் த்வம் இமம் கங்கா²த⁴ம்மம் பஜஹேய்யாஸி.

‘‘ஸ கோ² ஸோ, கா³மணி, அரியஸாவகோ ஏவம் விக³தாபி⁴ஜ்ஜோ² விக³தப்³யாபாதோ³ அஸம்மூள்ஹோ ஸம்பஜானோ படிஸ்ஸதோ மேத்தாஸஹக³தே சேதஸா ஏகம் தி³ஸம் ப²ரித்வா விஹரதி, ததா² து³தியம், ததா² ததியம், ததா² சதுத்த²ம், இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் மேத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. ஸோ இதி படிஸஞ்சிக்க²தி – ‘ய்வாயம் ஸத்தா² ஏவம்வாதீ³ ஏவம்தி³ட்டி² – கரோதோ காரயதோ, சி²ந்த³தோ சே²தா³பயதோ, பசதோ பாசாபயதோ, ஸோசயதோ ஸோசாபயதோ, கிலமதோ கிலமாபயதோ, ப²ந்த³தோ ப²ந்தா³பயதோ, பாணமதிபாதயதோ, அதி³ன்னம் ஆதி³யதோ, ஸந்தி⁴ம் சி²ந்த³தோ, நில்லோபம் ஹரதோ, ஏகாகா³ரிகம் கரோதோ, பரிபந்தே² திட்ட²தோ, பரதா³ரம் க³ச்ச²தோ, முஸா ப⁴ணதோ, கரோதோ கரீயதி பாபம். கு²ரபரியந்தேன சேபி சக்கேன யோ இமிஸ்ஸா பத²வியா பாணே ஏகம் மம்ஸக²லம் ஏகம் மம்ஸபுஞ்ஜம் கரேய்ய, அத்தி² ததோனிதா³னம் பாபம், அத்தி² பாபஸ்ஸ ஆக³மோ. த³க்கி²ணஞ்சேபி க³ங்கா³ய தீரம் க³ச்சே²ய்ய ஹனந்தோ கா⁴தேந்தோ சி²ந்த³ந்தோ சே²தா³பேந்தோ பசந்தோ பாசாபேந்தோ, அத்தி² ததோனிதா³னம் பாபம், அத்தி² பாபஸ்ஸ ஆக³மோ. உத்தரஞ்சேபி க³ங்கா³ய தீரம் க³ச்சே²ய்ய த³த³ந்தோ தா³பேந்தோ, யஜந்தோ யஜாபேந்தோ, அத்தி² ததோனிதா³னம் புஞ்ஞம், அத்தி² புஞ்ஞஸ்ஸ ஆக³மோ. தா³னேன த³மேன ஸம்யமேன ஸச்சவஜ்ஜேன அத்தி² புஞ்ஞம் அத்தி² புஞ்ஞஸ்ஸ ஆக³மோதி. ஸசே தஸ்ஸ போ⁴தோ ஸத்து²னோ ஸச்சம் வசனம், அபண்ணகதாய மய்ஹம், ய்வாஹம் ந கிஞ்சி ப்³யாபா³தே⁴மி தஸம் வா தா²வரம் வா? உப⁴யமேத்த² கடக்³கா³ஹோ, யம் சம்ஹி காயேன ஸம்வுதோ வாசாய ஸம்வுதோ மனஸா ஸம்வுதோ, யஞ்ச காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜிஸ்ஸாமீ’தி. தஸ்ஸ பாமோஜ்ஜம் ஜாயதி. பமுதி³தஸ்ஸ பீதி ஜாயதி. பீதிமனஸ்ஸ காயோ பஸ்ஸம்ப⁴தி. பஸ்ஸத்³த⁴காயோ ஸுக²ம் வேத³யதி. ஸுகி²னோ சித்தம் ஸமாதி⁴யதி. அயம் கோ², கா³மணி, த⁴ம்மஸமாதி⁴. தத்ர சே த்வம் சித்தஸமாதி⁴ம் படிலபே⁴ய்யாஸி, ஏவம் த்வம் இமம் கங்கா²த⁴ம்மம் பஜஹேய்யாஸி.

‘‘ஸ கோ² ஸோ, கா³மணி, அரியஸாவகோ ஏவம் விக³தாபி⁴ஜ்ஜோ² விக³தப்³யாபாதோ³ அஸம்மூள்ஹோ ஸம்பஜானோ படிஸ்ஸதோ கருணாஸஹக³தே சேதஸா ஏகம் தி³ஸம் ப²ரித்வா விஹரதி…பே… முதி³தாஸஹக³தேன சேதஸா ஏகம் தி³ஸம் ப²ரித்வா விஹரதி…பே….

‘‘ஸ கோ² ஸோ, கா³மணி, அரியஸாவகோ ஏவம் விக³தாபி⁴ஜ்ஜோ² விக³தப்³யாபாதோ³ அஸம்மூள்ஹோ ஸம்பஜானோ படிஸ்ஸதோ உபேக்கா²ஸஹக³தே சேதஸா ஏகம் தி³ஸம் ப²ரித்வா விஹரதி, ததா² து³தியம், ததா² ததியம், ததா² சதுத்த²ம், இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் உபேக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. ஸோ இதி படிஸஞ்சிக்க²தி – ‘ய்வாயம் ஸத்தா² ஏவம்வாதீ³ ஏவம்தி³ட்டி² – நத்தி² தி³ன்னம், நத்தி² யிட்ட²ம், நத்தி² ஹுதம் நத்தி² ஸுகதது³க்கடானம் கம்மானம் ப²லம் விபாகோ, நத்தி² அயம் லோகோ நத்தி² பரோ லோகோ, நத்தி² மாதா நத்தி² பிதா நத்தி² ஸத்தா ஓபபாதிகா, நத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீதி. ஸசே தஸ்ஸ போ⁴தோ ஸத்து²னோ ஸச்சம் வசனம், அபண்ணகதாய மய்ஹம், ய்வாஹம் ந கிஞ்சி ப்³யாபா³தே⁴மி தஸம் வா தா²வரம் வா? உப⁴யமேத்த² கடக்³கா³ஹோ, யம் சம்ஹி காயேன ஸம்வுதோ வாசாய ஸம்வுதோ மனஸா ஸம்வுதோ, யஞ்ச காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜிஸ்ஸாமீ’தி. தஸ்ஸ பாமோஜ்ஜம் ஜாயதி. பமுதி³தஸ்ஸ பீதி ஜாயதி. பீதிமனஸ்ஸ காயோ பஸ்ஸம்ப⁴தி. பஸ்ஸத்³த⁴காயோ ஸுக²ம் வேத³யதி. ஸுகி²னோ சித்தம் ஸமாதி⁴யதி. அயம் கோ², கா³மணி, த⁴ம்மஸமாதி⁴. தத்ர சே த்வம் சித்தஸமாதி⁴ம் படிலபே⁴ய்யாஸி, ஏவம் த்வம் இமம் கங்கா²த⁴ம்மம் பஜஹேய்யாஸி.

‘‘ஸ கோ² ஸோ, கா³மணி, அரியஸாவகோ ஏவம் விக³தாபி⁴ஜ்ஜோ² விக³தப்³யாபாதோ³ அஸம்மூள்ஹோ ஸம்பஜானோ படிஸ்ஸதோ உபேக்கா²ஸஹக³தே சேதஸா ஏகம் தி³ஸம் ப²ரித்வா விஹரதி, ததா² து³தியம், ததா² ததியம், ததா² சதுத்த²ம், இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் உபேக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. ஸோ இதி படிஸஞ்சிக்க²தி – ‘ய்வாயம் ஸத்தா² ஏவம்வாதீ³ ஏவம்தி³ட்டி² – அத்தி² தி³ன்னம், அத்தி² யிட்ட²ம், அத்தி² ஹுதம், அத்தி² ஸுகதது³க்கடானம் கம்மானம் ப²லம் விபாகோ, அத்தி² அயம் லோகோ அத்தி² பரோ லோகோ, அத்தி² மாதா அத்தி² பிதா அத்தி² ஸத்தா ஓபபாதிகா, அத்தி² லோகே ஸமணப்³ராஹ்மணா ஸம்மக்³க³தா ஸம்மாபடிபன்னா யே இமஞ்ச லோகம் பரஞ்ச லோகம் ஸயம் அபி⁴ஞ்ஞா ஸச்சி²கத்வா பவேதே³ந்தீதி. ஸசே தஸ்ஸ போ⁴தோ ஸத்து²னோ ஸச்சம் வசனம், அபண்ணகதாய மய்ஹம், ய்வாஹம் ந கிஞ்சி ப்³யாபா³தே⁴மி தஸம் வா தா²வரம் வா? உப⁴யமேத்த² கடக்³கா³ஹோ, யம் சம்ஹி காயேன ஸம்வுதோ வாசாய ஸம்வுதோ மனஸா ஸம்வுதோ, யஞ்ச காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜிஸ்ஸாமீ’தி. தஸ்ஸ பாமோஜ்ஜம் ஜாயதி. பமுதி³தஸ்ஸ பீதி ஜாயதி. பீதிமனஸ்ஸ காயோ பஸ்ஸம்ப⁴தி. பஸ்ஸத்³த⁴காயோ ஸுக²ம் வேத³யதி. ஸுகி²னோ சித்தம் ஸமாதி⁴யதி. அயம் கோ², கா³மணி, த⁴ம்மஸமாதி⁴. தத்ர சே த்வம் சித்தஸமாதி⁴ம் படிலபே⁴ய்யாஸி, ஏவம் த்வம் இமம் கங்கா²த⁴ம்மம் பஜஹேய்யாஸி.

‘‘ஸ கோ² ஸோ, கா³மணி, அரியஸாவகோ ஏவம் விக³தாபி⁴ஜ்ஜோ² விக³தப்³யாபாதோ³ அஸம்மூள்ஹோ ஸம்பஜானோ படிஸ்ஸதோ உபேக்கா²ஸஹக³தே சேதஸா ஏகம் தி³ஸம் ப²ரித்வா விஹரதி, ததா² து³தியம், ததா² ததியம், ததா² சதுத்த²ம், இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் உபேக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. ஸோ இதி படிஸஞ்சிக்க²தி – ‘ய்வாயம் ஸத்தா² ஏவம்வாதீ³ ஏவம்தி³ட்டி² – கரோதோ காரயதோ, சே²த³தோ சே²தா³பயதோ, பசதோ பாசாபயதோ, ஸோசயதோ ஸோசாபயதோ, கிலமதோ கிலமாபயதோ, ப²ந்த³தோ ப²ந்தா³பயதோ, பாணமதிபாதயதோ, அதி³ன்னம் ஆதி³யதோ, ஸந்தி⁴ம் சி²ந்த³தோ, நில்லோபம் ஹரதோ, ஏகாகா³ரிகம் கரோதோ, பரிபந்தே² திட்ட²தோ, பரதா³ரம் க³ச்ச²தோ, முஸா ப⁴ணதோ, கரோதோ ந கரீயதி பாபம். கு²ரபரியந்தேன சேபி சக்கேன யோ இமிஸ்ஸா பத²வியா பாணே ஏகம் மம்ஸக²லம் ஏகம் மம்ஸபுஞ்ஜம் கரேய்ய, நத்தி² ததோனிதா³னம் பாபம், நத்தி² பாபஸ்ஸ ஆக³மோ. த³க்கி²ணஞ்சேபி க³ங்கா³ய தீரம் க³ச்சே²ய்ய ஹனந்தோ கா⁴தேந்தோ சி²ந்த³ந்தோ சே²தா³பேந்தோ பசந்தோ பாசாபேந்தோ, நத்தி² ததோனிதா³னம் பாபம், நத்தி² பாபஸ்ஸ ஆக³மோ. உத்தரஞ்சேபி க³ங்கா³ய தீரம் க³ச்சே²ய்ய த³த³ந்தோ தா³பேந்தோ, யஜந்தோ யஜாபேந்தோ, நத்தி² ததோனிதா³னம் புஞ்ஞம், நத்தி² புஞ்ஞஸ்ஸ ஆக³மோ. தா³னேன த³மேன ஸம்யமேன ஸச்சவஜ்ஜேன நத்தி² புஞ்ஞம், நத்தி² புஞ்ஞஸ்ஸ ஆக³மோ’தி. ‘ஸசே தஸ்ஸ போ⁴தோ ஸத்து²னோ ஸச்சம் வசனம், அபண்ணகதாய மய்ஹம், ய்வாஹம் ந கிஞ்சி ப்³யாபா³தே⁴மி தஸம் வா தா²வரம் வா? உப⁴யமேத்த² கடக்³கா³ஹோ, யம் சம்ஹி காயேன ஸம்வுதோ வாசாய ஸம்வுதோ மனஸா ஸம்வுதோ, யஞ்ச காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜிஸ்ஸாமீ’தி. தஸ்ஸ பாமோஜ்ஜம் ஜாயதி. பமுதி³தஸ்ஸ பீதி ஜாயதி. பீதிமனஸ்ஸ காயோ பஸ்ஸம்ப⁴தி. பஸ்ஸத்³த⁴காயோ ஸுக²ம் வேத³யதி. ஸுகி²னோ சித்தம் ஸமாதி⁴யதி. அயம் கோ², கா³மணி, த⁴ம்மஸமாதி⁴. தத்ர சே த்வம் சித்தஸமாதி⁴ம் படிலபே⁴ய்யாஸி, ஏவம் த்வம் இமம் கங்கா²த⁴ம்மம் பஜஹேய்யாஸி.

‘‘ஸ கோ² ஸோ, கா³மணி, அரியஸாவகோ ஏவம் விக³தாபி⁴ஜ்ஜோ² விக³தப்³யாபாதோ³ அஸம்மூள்ஹோ ஸம்பஜானோ படிஸ்ஸதோ உபேக்கா²ஸஹக³தே சேதஸா ஏகம் தி³ஸம் ப²ரித்வா விஹரதி, ததா² து³தியம், ததா² ததியம், ததா² சதுத்த²ம், இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் உபேக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. ஸோ இதி படிஸஞ்சிக்க²தி – ‘ய்வாயம் ஸத்தா² ஏவம்வாதீ³ ஏவம்தி³ட்டி² – கரோதோ காரயதோ, சி²ந்த³தோ சே²தா³பயதோ, பசதோ பாசாபயதோ, ஸோசயதோ ஸோசாபயதோ, கிலமதோ கிலமாபயதோ, ப²ந்த³தோ ப²ந்தா³பயதோ, பாணமதிபாதயதோ, அதி³ன்னம் ஆதி³யதோ, ஸந்தி⁴ம் சி²ந்த³தோ, நில்லோபம் ஹரதோ, ஏகாகா³ரிகம் கரோதோ, பரிபந்தே² திட்ட²தோ, பரதா³ரம் க³ச்ச²தோ, முஸா ப⁴ணதோ, கரோதோ கரீயதி பாபம். கு²ரபரியந்தேன சேபி சக்கேன யோ இமிஸ்ஸா பத²வியா பாணே ஏகம் மம்ஸக²லம் ஏகம் மம்ஸபுஞ்ஜம் கரேய்ய, அத்தி² ததோனிதா³னம் பாபம், அத்தி² பாபஸ்ஸ ஆக³மோ. த³க்கி²ணஞ்சேபி க³ங்கா³ய தீரம் க³ச்சே²ய்ய ஹனந்தோ கா⁴தேந்தோ சி²ந்த³ந்தோ சே²தா³பேந்தோ பசந்தோ பாசாபேந்தோ, அத்தி² ததோனிதா³னம் பாபம், அத்தி² பாபஸ்ஸ ஆக³மோ. உத்தரஞ்சேபி க³ங்கா³ய தீரம் க³ச்சே²ய்ய த³த³ந்தோ தா³பேந்தோ, யஜந்தோ யஜாபேந்தோ, அத்தி² ததோனிதா³னம் புஞ்ஞம், அத்தி² புஞ்ஞஸ்ஸ ஆக³மோ. தா³னேன த³மேன ஸம்யமேன ஸச்சவஜ்ஜேன அத்தி² புஞ்ஞம், அத்தி² புஞ்ஞஸ்ஸ ஆக³மோ’தி. ‘ஸசே தஸ்ஸ போ⁴தோ ஸத்து²னோ ஸச்சம் வசனம், அபண்ணகதாய மய்ஹம், ய்வாஹம் ந கிஞ்சி ப்³யாபா³தே⁴மி தஸம் வா தா²வரம் வா? உப⁴யமேத்த² கடக்³கா³ஹோ, யம் சம்ஹி காயேன ஸம்வுதோ வாசாய ஸம்வுதோ மனஸா ஸம்வுதோ, யஞ்ச காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபஜ்ஜிஸ்ஸாமீ’தி. தஸ்ஸ பாமோஜ்ஜம் ஜாயதி. பமுதி³தஸ்ஸ பீதி ஜாயதி. பீதிமனஸ்ஸ காயோ பஸ்ஸம்ப⁴தி. பஸ்ஸத்³த⁴காயோ ஸுக²ம் வேத³யதி. ஸுகி²னோ சித்தம் ஸமாதி⁴யதி. அயம் கோ², கா³மணி, த⁴ம்மஸமாதி⁴. தத்ர சே த்வம் சித்தஸமாதி⁴ம் படிலபே⁴ய்யாஸி, ஏவம் த்வம் இமம் கங்கா²த⁴ம்மம் பஜஹேய்யாஸீ’’தி.

ஏவம் வுத்தே, பாடலியோ கா³மணி ப⁴க³வந்தம் ஏதத³வோச – ‘‘அபி⁴க்கந்தம், ப⁴ந்தே, அபி⁴க்கந்தம், ப⁴ந்தே…பே… அஜ்ஜதக்³கே³ பாணுபேதம் ஸரணம் க³த’’ந்தி. தேரஸமம்.

கா³மணிஸம்யுத்தம் ஸமத்தம்.