7. கோ³த³த்தஸுத்தம்

349. ஏகம் ஸமயம் ஆயஸ்மா கோ³த³த்தோ மச்சி²காஸண்டே³ விஹரதி அம்பா³டகவனே. அத² கோ² சித்தோ க³ஹபதி யேனாயஸ்மா கோ³த³த்தோ தேனுபஸங்கமி; உபஸங்கமித்வா ஆயஸ்மந்தம் கோ³த³த்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² சித்தம் க³ஹபதிம் ஆயஸ்மா கோ³த³த்தோ ஏதத³வோச – ‘‘யா சாயம், க³ஹபதி, அப்பமாணா சேதோவிமுத்தி, யா ச ஆகிஞ்சஞ்ஞா சேதோவிமுத்தி, யா ச ஸுஞ்ஞதா சேதோவிமுத்தி, யா ச அனிமித்தா சேதோவிமுத்தி, இமே த⁴ம்மா நானத்தா² நானாப்³யஞ்ஜனா உதா³ஹு ஏகத்தா² ப்³யஞ்ஜனமேவ நான’’ந்தி? ‘‘அத்தி², ப⁴ந்தே, பரியாயோ யம் பரியாயம் ஆக³ம்ம இமே த⁴ம்மா நானத்தா² சேவ நானாப்³யஞ்ஜனா ச. அத்தி² பன, ப⁴ந்தே, பரியாயோ யம் பரியாயம் ஆக³ம்ம இமே த⁴ம்மா ஏகத்தா² ப்³யஞ்ஜனமேவ நான’’ந்தி.

‘‘கதமோ ச, ப⁴ந்தே, பரியாயோ யம் பரியாயம் ஆக³ம்ம இமே த⁴ம்மா நானத்தா² சேவ நானாப்³யஞ்ஜனா ச? இத⁴, ப⁴ந்தே, பி⁴க்கு² மேத்தாஸஹக³தேன சேதஸா ஏகம் தி³ஸம் ப²ரித்வா விஹரதி, ததா² து³தியம், ததா² ததியம், ததா² சதுத்த²ம் [சதுத்தி²ம் (?)]. இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் மேத்தாஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன [அப்³யாபஜ்ஜே²ன (ஸீ. ஸ்யா. கம். பீ.), அப்³யாப³ஜ்ஜே²ன (?)] ப²ரித்வா விஹரதி. கருணாஸஹக³தேன சேதஸா…பே… முதி³தாஸஹக³தேன சேதஸா…பே… உபேக்கா²ஸஹக³தேன சேதஸா ஏகம் தி³ஸம் ப²ரித்வா விஹரதி, ததா² து³தியம், ததா² ததியம், ததா² சதுத்த²ம். இதி உத்³த⁴மதோ⁴ திரியம் ஸப்³ப³தி⁴ ஸப்³ப³த்ததாய ஸப்³பா³வந்தம் லோகம் உபேக்கா²ஸஹக³தேன சேதஸா விபுலேன மஹக்³க³தேன அப்பமாணேன அவேரேன அப்³யாபஜ்ஜேன ப²ரித்வா விஹரதி. அயம் வுச்சதி, ப⁴ந்தே, அப்பமாணா சேதோவிமுத்தி.

‘‘கதமா ச, ப⁴ந்தே, ஆகிஞ்சஞ்ஞா சேதோவிமுத்தி? இத⁴, ப⁴ந்தே, பி⁴க்கு² ஸப்³ப³ஸோ விஞ்ஞாணஞ்சாயதனம் ஸமதிக்கம்ம, ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹரதி. அயம் வுச்சதி, ப⁴ந்தே, ஆகிஞ்சஞ்ஞா சேதோவிமுத்தி.

‘‘கதமா ச, ப⁴ந்தே, ஸுஞ்ஞதா சேதோவிமுத்தி? இத⁴, ப⁴ந்தே, பி⁴க்கு² அரஞ்ஞக³தோ வா ருக்க²மூலக³தோ வா ஸுஞ்ஞாகா³ரக³தோ வா இதி படிஸஞ்சிக்க²தி – ‘ஸுஞ்ஞமித³ம் அத்தேன வா அத்தனியேன வா’தி. அயம் வுச்சதி, ப⁴ந்தே, ஸுஞ்ஞதா சேதோவிமுத்தி.

‘‘கதமா ச, ப⁴ந்தே, அனிமித்தா சேதோவிமுத்தி? இத⁴, ப⁴ந்தே, பி⁴க்கு² ஸப்³ப³னிமித்தானம் அமனஸிகாரா அனிமித்தம் சேதோஸமாதி⁴ம் உபஸம்பஜ்ஜ விஹரதி. அயம் வுச்சதி, ப⁴ந்தே, அனிமித்தா சேதோவிமுத்தி. அயம் கோ², ப⁴ந்தே, பரியாயோ யம் பரியாயம் ஆக³ம்ம இமே த⁴ம்மா நானத்தா² சேவ நானாப்³யஞ்ஜனா ச.

‘‘கதமோ ச, ப⁴ந்தே, பரியாயோ யம் பரியாயம் ஆக³ம்ம இமே த⁴ம்மா ஏகத்தா² ப்³யஞ்ஜனமேவ நானம்? ராகோ³, ப⁴ந்தே, பமாணகரணோ, தோ³ஸோ பமாணகரணோ, மோஹோ பமாணகரணோ. தே கீ²ணாஸவஸ்ஸ பி⁴க்கு²னோ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிம் அனுப்பாத³த⁴ம்மா. யாவதா கோ², ப⁴ந்தே, அப்பமாணா சேதோவிமுத்தியோ, அகுப்பா தாஸம் சேதோவிமுத்தி அக்³க³மக்கா²யதி. ஸா கோ² பன அகுப்பா சேதோவிமுத்தி ஸுஞ்ஞா ராகே³ன, ஸுஞ்ஞா தோ³ஸேன, ஸுஞ்ஞா மோஹேன. ராகோ³ கோ², ப⁴ந்தே, கிஞ்சனம், தோ³ஸோ கிஞ்சனம், மோஹோ கிஞ்சனம். தே கீ²ணாஸவஸ்ஸ பி⁴க்கு²னோ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிம் அனுப்பாத³த⁴ம்மா. யாவதா கோ², ப⁴ந்தே, ஆகிஞ்சஞ்ஞா சேதோவிமுத்தியோ, அகுப்பா தாஸம் சேதோவிமுத்தி அக்³க³மக்கா²யதி. ஸா கோ² பன அகுப்பா சேதோவிமுத்தி ஸுஞ்ஞா ராகே³ன, ஸுஞ்ஞா தோ³ஸேன, ஸுஞ்ஞா மோஹேன. ராகோ³ கோ², ப⁴ந்தே, நிமித்தகரணோ, தோ³ஸோ நிமித்தகரணோ, மோஹோ நிமித்தகரணோ. தே கீ²ணாஸவஸ்ஸ பி⁴க்கு²னோ பஹீனா உச்சி²ன்னமூலா தாலாவத்து²கதா அனபா⁴வங்கதா ஆயதிம் அனுப்பாத³த⁴ம்மா. யாவதா கோ², ப⁴ந்தே, அனிமித்தா சேதோவிமுத்தியோ, அகுப்பா தாஸம் சேதோவிமுத்தி அக்³க³மக்கா²யதி. ஸா கோ² பன அகுப்பா சேதோவிமுத்தி ஸுஞ்ஞா ராகே³ன, ஸுஞ்ஞா தோ³ஸேன, ஸுஞ்ஞா மோஹேன. அயம் கோ², ப⁴ந்தே, பரியாயோ யம் பரியாயம் ஆக³ம்ம இமே த⁴ம்மா ஏகத்தா² ப்³யஞ்ஜனமேவ நான’’ந்தி. ‘‘லாபா⁴ தே, க³ஹபதி, ஸுலத்³த⁴ம் தே, க³ஹபதி! யஸ்ஸ தே க³ம்பீ⁴ரே பு³த்³த⁴வசனே பஞ்ஞாசக்கு² கமதீ’’தி. ஸத்தமம்.