3. ததியஜா²னபஞ்ஹாஸுத்தம்

334. ‘‘‘ததியம் ஜா²னம், ததியம் ஜா²ன’ந்தி வுச்சதி. கதமம் நு கோ² ததியம் ஜா²னந்தி? தஸ்ஸ மய்ஹம், ஆவுஸோ, ஏதத³ஹோஸி – இத⁴ பி⁴க்கு² பீதியா ச விராகா³ உபேக்க²கோ ச விஹரதி ஸதோ ச ஸம்பஜானோ ஸுக²ஞ்ச காயேன படிஸம்வேதே³தி, யம் தம் அரியா ஆசிக்க²ந்தி – ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹரதி. இத³ம் வுச்சதி ததியம் ஜா²னந்தி. ஸோ க்²வாஹம், ஆவுஸோ, பீதியா ச விராகா³ உபேக்க²கோ ச விஹராமி ஸதோ ச ஸம்பஜானோ ஸுக²ஞ்ச காயேன படிஸம்வேதே³மி. யம் தம் அரியா ஆசிக்க²ந்தி – ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹராமி. தஸ்ஸ மய்ஹம், ஆவுஸோ, இமினா விஹாரேன விஹரதோ பீதிஸஹக³தா ஸஞ்ஞாமனஸிகாரா ஸமுதா³சரந்தி.

‘‘அத² கோ² மம், ஆவுஸோ, ப⁴க³வா இத்³தி⁴யா உபஸங்கமித்வா ஏதத³வோச – ‘மோக்³க³ல்லான, மோக்³க³ல்லான! மா, ப்³ராஹ்மண, ததியம் ஜா²னம் பமாதோ³, ததியே ஜா²னே சித்தம் ஸண்ட²பேஹி, ததியே ஜா²னே சித்தம் ஏகோதி³ம் கரோஹி, ததியே ஜா²னே சித்தம் ஸமாத³ஹா’தி. ஸோ க்²வாஹம், ஆவுஸோ, அபரேன ஸமயேன பீதியா ச விராகா³ உபேக்க²கோ ச விஹராமி ஸதோ ச ஸம்பஜானோ ஸுக²ஞ்ச காயேன படிஸம்வேதே³மி, யம் தம் அரியா ஆசிக்க²ந்தி – ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹாஸிம். யஞ்ஹி தம் ஆவுஸோ ஸம்மா வத³மானோ வதே³ய்ய…பே… மஹாபி⁴ஞ்ஞதம் பத்தோ’’தி. ததியம்.