6. பட²மஅவிஜ்ஜாபஹானஸுத்தம்

79. அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி…பே… ஏகமந்தம் நிஸின்னோ கோ² ஸோ பி⁴க்கு² ப⁴க³வந்தம் ஏதத³வோச – ‘‘அத்தி² நு கோ², ப⁴ந்தே, ஏகோ த⁴ம்மோ யஸ்ஸ பஹானா பி⁴க்கு²னோ அவிஜ்ஜா பஹீயதி, விஜ்ஜா உப்பஜ்ஜதீ’’தி?

‘‘அத்தி² கோ², பி⁴க்கு², ஏகோ த⁴ம்மோ யஸ்ஸ பஹானா பி⁴க்கு²னோ அவிஜ்ஜா பஹீயதி, விஜ்ஜா உப்பஜ்ஜதீ’’தி.

‘‘கதமோ பன, ப⁴ந்தே, ஏகோ த⁴ம்மோ யஸ்ஸ பஹானா பி⁴க்கு²னோ அவிஜ்ஜா பஹீயதி, விஜ்ஜா உப்பஜ்ஜதீ’’தி?

‘‘அவிஜ்ஜா கோ², பி⁴க்கு², ஏகோ த⁴ம்மோ யஸ்ஸ பஹானா பி⁴க்கு²னோ அவிஜ்ஜா பஹீயதி, விஜ்ஜா உப்பஜ்ஜதீ’’தி.

‘‘கத²ம் பன, ப⁴ந்தே, ஜானதோ, கத²ம் பஸ்ஸதோ பி⁴க்கு²னோ அவிஜ்ஜா பஹீயதி, விஜ்ஜா உப்பஜ்ஜதீ’’தி?

‘‘சக்கு²ம் கோ², பி⁴க்கு², அனிச்சதோ ஜானதோ பஸ்ஸதோ பி⁴க்கு²னோ அவிஜ்ஜா பஹீயதி, விஜ்ஜா உப்பஜ்ஜதி. ரூபே… சக்கு²விஞ்ஞாணம்… சக்கு²ஸம்ப²ஸ்ஸம்… யம்பித³ம், சக்கு²ஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சதோ ஜானதோ பஸ்ஸதோ பி⁴க்கு²னோ அவிஜ்ஜா பஹீயதி, விஜ்ஜா உப்பஜ்ஜதி…பே… மனம் அனிச்சதோ ஜானதோ பஸ்ஸதோ பி⁴க்கு²னோ அவிஜ்ஜா பஹீயதி, விஜ்ஜா உப்பஜ்ஜதி. த⁴ம்மே… மனோவிஞ்ஞாணம்… மனோஸம்ப²ஸ்ஸம்… யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி அனிச்சதோ ஜானதோ பஸ்ஸதோ பி⁴க்கு²னோ அவிஜ்ஜா பஹீயதி, விஜ்ஜா உப்பஜ்ஜதி. ஏவம் கோ², பி⁴க்கு², ஜானதோ ஏவம் பஸ்ஸதோ பி⁴க்கு²னோ அவிஜ்ஜா பஹீயதி, விஜ்ஜா உப்பஜ்ஜதீ’’தி. ச²ட்ட²ம்.