8. ஸமுக்³கா⁴தஸாருப்பஸுத்தம்

30. ‘‘ஸப்³ப³மஞ்ஞிதஸமுக்³கா⁴தஸாருப்பம் வோ, பி⁴க்க²வே, படிபத³ம் தே³ஸேஸ்ஸாமி. தம் ஸுணாத², ஸாது⁴கம் மனஸி கரோத²; பா⁴ஸிஸ்ஸாமீதி. கதமா ச ஸா, பி⁴க்க²வே, ஸப்³ப³மஞ்ஞிதஸமுக்³கா⁴தஸாருப்பா படிபதா³? இத⁴, பி⁴க்க²வே, பி⁴க்கு² சக்கு²ம் ந மஞ்ஞதி, சக்கு²ஸ்மிம் ந மஞ்ஞதி, சக்கு²தோ ந மஞ்ஞதி, சக்கு²ம் மேதி ந மஞ்ஞதி. ரூபே ந மஞ்ஞதி, ரூபேஸு ந மஞ்ஞதி, ரூபதோ ந மஞ்ஞதி, ரூபா மேதி ந மஞ்ஞதி. சக்கு²விஞ்ஞாணம் ந மஞ்ஞதி, சக்கு²விஞ்ஞாணஸ்மிம் ந மஞ்ஞதி, சக்கு²விஞ்ஞாணதோ ந மஞ்ஞதி, சக்கு²விஞ்ஞாணம் மேதி ந மஞ்ஞதி. சக்கு²ஸம்ப²ஸ்ஸம் ந மஞ்ஞதி, சக்கு²ஸம்ப²ஸ்ஸஸ்மிம் ந மஞ்ஞதி, சக்கு²ஸம்ப²ஸ்ஸதோ ந மஞ்ஞதி, சக்கு²ஸம்ப²ஸ்ஸோ மேதி ந மஞ்ஞதி. யம்பித³ம் சக்கு²ஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி ந மஞ்ஞதி, தஸ்மிம்பி ந மஞ்ஞதி, ததோபி ந மஞ்ஞதி, தம் மேதி ந மஞ்ஞதி…பே… ஜிவ்ஹம் ந மஞ்ஞதி, ஜிவ்ஹாய ந மஞ்ஞதி, ஜிவ்ஹாதோ ந மஞ்ஞதி, ஜிவ்ஹா மேதி ந மஞ்ஞதி. ரஸே ந மஞ்ஞதி, ரஸேஸு ந மஞ்ஞதி, ரஸதோ ந மஞ்ஞதி, ரஸா மேதி ந மஞ்ஞதி. ஜிவ்ஹாவிஞ்ஞாணம் ந மஞ்ஞதி, ஜிவ்ஹாவிஞ்ஞாணஸ்மிம் ந மஞ்ஞதி, ஜிவ்ஹாவிஞ்ஞாணதோ ந மஞ்ஞதி, ஜிவ்ஹாவிஞ்ஞாணம் மேதி ந மஞ்ஞதி. ஜிவ்ஹாஸம்ப²ஸ்ஸம் ந மஞ்ஞதி, ஜிவ்ஹாஸம்ப²ஸ்ஸஸ்மிம் ந மஞ்ஞதி, ஜிவ்ஹாஸம்ப²ஸ்ஸதோ ந மஞ்ஞதி, ஜிவ்ஹாஸம்ப²ஸ்ஸோ மேதி ந மஞ்ஞதி. யம்பித³ம் ஜிவ்ஹாஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி ந மஞ்ஞதி, தஸ்மிம்பி ந மஞ்ஞதி, ததோபி ந மஞ்ஞதி, தம் மேதி ந மஞ்ஞதி…பே… மனம் ந மஞ்ஞதி, மனஸ்மிம் ந மஞ்ஞதி, மனதோ ந மஞ்ஞதி, மனோ மேதி ந மஞ்ஞதி. த⁴ம்மே ந மஞ்ஞதி, த⁴ம்மேஸு ந மஞ்ஞதி, த⁴ம்மதோ ந மஞ்ஞதி, த⁴ம்மா மேதி ந மஞ்ஞதி. மனோவிஞ்ஞாணம் ந மஞ்ஞதி, மனோவிஞ்ஞாணஸ்மிம் ந மஞ்ஞதி, மனோவிஞ்ஞாணதோ ந மஞ்ஞதி, மனோவிஞ்ஞாணம் மேதி ந மஞ்ஞதி. மனோஸம்ப²ஸ்ஸம் ந மஞ்ஞதி, மனோஸம்ப²ஸ்ஸஸ்மிம் ந மஞ்ஞதி, மனோஸம்ப²ஸ்ஸதோ ந மஞ்ஞதி, மனோஸம்ப²ஸ்ஸோ மேதி ந மஞ்ஞதி. யம்பித³ம் மனோஸம்ப²ஸ்ஸபச்சயா உப்பஜ்ஜதி வேத³யிதம் ஸுக²ம் வா து³க்க²ம் வா அது³க்க²மஸுக²ம் வா தம்பி ந மஞ்ஞதி, தஸ்மிம்பி ந மஞ்ஞதி, ததோபி ந மஞ்ஞதி, தம் மேதி ந மஞ்ஞதி. ஸப்³ப³ம் ந மஞ்ஞதி, ஸப்³ப³ஸ்மிம் ந மஞ்ஞதி, ஸப்³ப³தோ ந மஞ்ஞதி, ஸப்³ப³ம் மேதி ந மஞ்ஞதி. ஸோ ஏவம் அமஞ்ஞமானோ ந ச கிஞ்சி லோகே உபாதி³யதி. அனுபாதி³யம் ந பரிதஸ்ஸதி. அபரிதஸ்ஸம் பச்சத்தஞ்ஞேவ பரினிப்³பா³யதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதி. அயம் கோ² ஸா, பி⁴க்க²வே, ஸப்³ப³மஞ்ஞிதஸமுக்³கா⁴தஸாருப்பா படிபதா³’’தி. அட்ட²மம்.