5. பட²மனோசேஅஸ்ஸாத³ஸுத்தம்

17. ‘‘நோ சேத³ம், பி⁴க்க²வே, சக்கு²ஸ்ஸ அஸ்ஸாதோ³ அப⁴விஸ்ஸ, நயித³ம் ஸத்தா சக்கு²ஸ்மிம் ஸாரஜ்ஜேய்யும். யஸ்மா ச கோ², பி⁴க்க²வே, அத்தி² சக்கு²ஸ்ஸ அஸ்ஸாதோ³ தஸ்மா ஸத்தா சக்கு²ஸ்மிம் ஸாரஜ்ஜந்தி. நோ சேத³ம், பி⁴க்க²வே, சக்கு²ஸ்ஸ ஆதீ³னவோ அப⁴விஸ்ஸ, நயித³ம் ஸத்தா சக்கு²ஸ்மிம் நிப்³பி³ந்தே³ய்யும். யஸ்மா ச கோ², பி⁴க்க²வே, அத்தி² சக்கு²ஸ்ஸ ஆதீ³னவோ தஸ்மா ஸத்தா சக்கு²ஸ்மிம் நிப்³பி³ந்த³ந்தி. நோ சேத³ம், பி⁴க்க²வே, சக்கு²ஸ்ஸ நிஸ்ஸரணம் அப⁴விஸ்ஸ, நயித³ம் ஸத்தா சக்கு²ஸ்மா நிஸ்ஸரேய்யும். யஸ்மா ச கோ², பி⁴க்க²வே, அத்தி² சக்கு²ஸ்ஸ நிஸ்ஸரணம் தஸ்மா ஸத்தா சக்கு²ஸ்மா நிஸ்ஸரந்தி. நோ சேத³ம், பி⁴க்க²வே, ஸோதஸ்ஸ அஸ்ஸாதோ³ அப⁴விஸ்ஸ… நோ சேத³ம், பி⁴க்க²வே, கா⁴னஸ்ஸ அஸ்ஸாதோ³ அப⁴விஸ்ஸ… நோ சேத³ம், பி⁴க்க²வே, ஜிவ்ஹாய அஸ்ஸாதோ³ அப⁴விஸ்ஸ, நயித³ம் ஸத்தா ஜிவ்ஹாய ஸாரஜ்ஜேய்யும். யஸ்மா ச கோ², பி⁴க்க²வே, அத்தி² ஜிவ்ஹாய அஸ்ஸாதோ³, தஸ்மா ஸத்தா ஜிவ்ஹாய ஸாரஜ்ஜந்தி. நோ சேத³ம், பி⁴க்க²வே, ஜிவ்ஹாய ஆதீ³னவோ அப⁴விஸ்ஸ, நயித³ம் ஸத்தா ஜிவ்ஹாய நிப்³பி³ந்தே³ய்யும். யஸ்மா ச கோ², பி⁴க்க²வே, அத்தி² ஜிவ்ஹாய ஆதீ³னவோ, தஸ்மா ஸத்தா ஜிவ்ஹாய நிப்³பி³ந்த³ந்தி. நோ சேத³ம், பி⁴க்க²வே, ஜிவ்ஹாய நிஸ்ஸரணம் அப⁴விஸ்ஸ, நயித³ம் ஸத்தா ஜிவ்ஹாய நிஸ்ஸரேய்யும். யஸ்மா ச கோ², பி⁴க்க²வே, அத்தி² ஜிவ்ஹாய நிஸ்ஸரணம், தஸ்மா ஸத்தா ஜிவ்ஹாய நிஸ்ஸரந்தி. நோ சேத³ம், பி⁴க்க²வே, காயஸ்ஸ அஸ்ஸாதோ³ அப⁴விஸ்ஸ… நோ சேத³ம், பி⁴க்க²வே, மனஸ்ஸ அஸ்ஸாதோ³ அப⁴விஸ்ஸ, நயித³ம் ஸத்தா மனஸ்மிம் ஸாரஜ்ஜேய்யும். யஸ்மா ச கோ², பி⁴க்க²வே, அத்தி² மனஸ்ஸ அஸ்ஸாதோ³, தஸ்மா ஸத்தா மனஸ்மிம் ஸாரஜ்ஜந்தி. நோ சேத³ம், பி⁴க்க²வே, மனஸ்ஸ ஆதீ³னவோ அப⁴விஸ்ஸ, நயித³ம் ஸத்தா மனஸ்மிம் நிப்³பி³ந்தே³ய்யும். யஸ்மா ச கோ², பி⁴க்க²வே, அத்தி² மனஸ்ஸ ஆதீ³னவோ, தஸ்மா ஸத்தா மனஸ்மிம் நிப்³பி³ந்த³ந்தி. நோ சேத³ம், பி⁴க்க²வே, மனஸ்ஸ நிஸ்ஸரணம் அப⁴விஸ்ஸ, நயித³ம் ஸத்தா மனஸ்மா நிஸ்ஸரேய்யும். யஸ்மா ச கோ², பி⁴க்க²வே, அத்தி² மனஸ்ஸ நிஸ்ஸரணம், தஸ்மா ஸத்தா மனஸ்மா நிஸ்ஸரந்தி.

‘‘யாவகீவஞ்ச, பி⁴க்க²வே, ஸத்தா இமேஸம் ச²ன்னம் அஜ்ஜ²த்திகானம் ஆயதனானம் அஸ்ஸாத³ஞ்ச அஸ்ஸாத³தோ, ஆதீ³னவஞ்ச ஆதீ³னவதோ, நிஸ்ஸரணஞ்ச நிஸ்ஸரணதோ யதா²பூ⁴தம் நாப்³ப⁴ஞ்ஞம்ஸு, நேவ தாவ, பி⁴க்க²வே, ஸத்தா ஸதே³வகா லோகா ஸமாரகா ஸப்³ரஹ்மகா ஸஸ்ஸமணப்³ராஹ்மணியா பஜாய ஸதே³வமனுஸ்ஸாய நிஸ்ஸடா விஸஞ்ஞுத்தா விப்பமுத்தா விமரியாதீ³கதேன [விபரியாதி³கதேன (ஸீ. பீ.), விபரியாதி³கதேன (ஸ்யா. கம். க.)] சேதஸா விஹரிம்ஸு. யதோ ச கோ², பி⁴க்க²வே, ஸத்தா இமேஸம் ச²ன்னம் அஜ்ஜ²த்திகானம் ஆயதனானம் அஸ்ஸாத³ஞ்ச அஸ்ஸாத³தோ, ஆதீ³னவஞ்ச ஆதீ³னவதோ, நிஸ்ஸரணஞ்ச நிஸ்ஸரணதோ யதா²பூ⁴தம் அப்³ப⁴ஞ்ஞம்ஸு, அத², பி⁴க்க²வே, ஸத்தா ஸதே³வகா லோகா ஸமாரகா ஸப்³ரஹ்மகா ஸஸ்ஸமணப்³ராஹ்மணியா பஜாய ஸதே³வமனுஸ்ஸாய நிஸ்ஸடா விஸஞ்ஞுத்தா விப்பமுத்தா விமரியாதீ³கதேன சேதஸா விஹரந்தீ’’தி. பஞ்சமம்.