3. கும்மோபமஸுத்தம்

240. ‘‘பூ⁴தபுப்³ப³ம், பி⁴க்க²வே, கும்மோ கச்ச²போ ஸாயன்ஹஸமயம் அனுனதீ³தீரே கோ³சரபஸுதோ அஹோஸி. ஸிங்கா³லோபி [ஸிகா³லோபி (ஸீ. ஸ்யா. கம். பீ.)] கோ², பி⁴க்க²வே, ஸாயன்ஹஸமயம் அனுனதீ³தீரே கோ³சரபஸுதோ அஹோஸி. அத்³த³ஸா கோ², பி⁴க்க²வே, கும்மோ கச்ச²போ ஸிங்கா³லம் தூ³ரதோவ கோ³சரபஸுதம். தி³ஸ்வான ஸோண்டி³பஞ்சமானி அங்கா³னி ஸகே கபாலே ஸமோத³ஹித்வா அப்போஸ்ஸுக்கோ துண்ஹீபூ⁴தோ ஸங்கஸாயதி. ஸிங்கா³லோபி கோ², பி⁴க்க²வே, அத்³த³ஸ கும்மம் கச்ச²பம் தூ³ரதோவ கோ³சரபஸுதம். தி³ஸ்வான யேன கும்மோ கச்ச²போ தேனுபஸங்கமி; உபஸங்கமித்வா கும்மம் கச்ச²பம் பச்சுபட்டி²தோ அஹோஸி – ‘யதா³யம் கும்மோ கச்ச²போ ஸோண்டி³பஞ்சமானம் அங்கா³னம் அஞ்ஞதரம் வா அஞ்ஞதரம் வா அங்க³ம் அபி⁴னின்னாமேஸ்ஸதி, தத்தே²வ நம் க³ஹேத்வா உத்³தா³லித்வா கா²தி³ஸ்ஸாமீ’தி. யதா³ கோ², பி⁴க்க²வே, கும்மோ கச்ச²போ ஸோண்டி³பஞ்சமானம் அங்கா³னம் அஞ்ஞதரம் வா அஞ்ஞதரம் வா அங்க³ம் ந அபி⁴னின்னாமி, அத² ஸிங்கா³லோ கும்மம்ஹா நிப்³பி³ஜ்ஜ பக்காமி, ஓதாரம் அலப⁴மானோ.

‘‘ஏவமேவ கோ², பி⁴க்க²வே, தும்ஹேபி மாரோ பாபிமா ஸததம் ஸமிதம் பச்சுபட்டி²தோ – ‘அப்பேவ நாமாஹம் இமேஸம் சக்கு²தோ வா ஓதாரம் லபே⁴ய்யம்…பே… ஜிவ்ஹாதோ வா ஓதாரம் லபே⁴ய்யம்…பே… மனதோ வா ஓதாரம் லபே⁴ய்ய’ந்தி. தஸ்மாதிஹ, பி⁴க்க²வே, இந்த்³ரியேஸு கு³த்தத்³வாரா விஹரத². சக்கு²னா ரூபம் தி³ஸ்வா மா நிமித்தக்³கா³ஹினோ அஹுவத்த², மா அனுப்³யஞ்ஜனக்³கா³ஹினோ. யத்வாதி⁴கரணமேனம் சக்கு²ந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜத², ரக்க²த² சக்கு²ந்த்³ரியம், சக்கு²ந்த்³ரியே ஸம்வரம் ஆபஜ்ஜத². ஸோதேன ஸத்³த³ம் ஸுத்வா… கா⁴னேன க³ந்த⁴ம் கா⁴யித்வா… ஜிவ்ஹாய ரஸம் ஸாயித்வா… காயேன போ²ட்ட²ப்³ப³ம் பு²ஸித்வா… மனஸா த⁴ம்மம் விஞ்ஞாய மா நிமித்தக்³கா³ஹினோ அஹுவத்த², மா அனுப்³யஞ்ஜனக்³கா³ஹினோ. யத்வாதி⁴கரணமேனம் மனிந்த்³ரியம் அஸம்வுதம் விஹரந்தம் அபி⁴ஜ்ஜா²தோ³மனஸ்ஸா பாபகா அகுஸலா த⁴ம்மா அன்வாஸ்ஸவேய்யும், தஸ்ஸ ஸம்வராய படிபஜ்ஜத², ரக்க²த² மனிந்த்³ரியம், மனிந்த்³ரியே ஸம்வரம் ஆபஜ்ஜத². யதோ தும்ஹே, பி⁴க்க²வே, இந்த்³ரியேஸு கு³த்தத்³வாரா விஹரிஸ்ஸத², அத² தும்ஹேஹிபி மாரோ பாபிமா நிப்³பி³ஜ்ஜ பக்கமிஸ்ஸதி, ஓதாரம் அலப⁴மானோ – கும்மம்ஹாவ ஸிங்கா³லோ’’தி.

‘‘கும்மோ அங்கா³னி ஸகே கபாலே,

ஸமோத³ஹம் பி⁴க்கு² மனோவிதக்கே;

அனிஸ்ஸிதோ அஞ்ஞமஹேட²யானோ,

பரினிப்³பு³தோ நூபவதே³ய்ய கஞ்சீ’’தி. ததியம்;