1. ஆஸீவிஸோபமஸுத்தம்

238. ‘‘ஸேய்யதா²பி, பி⁴க்க²வே, சத்தாரோ ஆஸீவிஸா உக்³க³தேஜா கோ⁴ரவிஸா. அத² புரிஸோ ஆக³ச்சே²ய்ய ஜீவிதுகாமோ அமரிதுகாமோ ஸுக²காமோ து³க்க²ப்படிகூலோ. தமேனம் ஏவம் வதே³ய்யும் – ‘இமே தே, அம்போ⁴ புரிஸ, சத்தாரோ ஆஸீவிஸா உக்³க³தேஜா கோ⁴ரவிஸா காலேன காலம் வுட்டா²பேதப்³பா³, காலேன காலம் ந்ஹாபேதப்³பா³, காலேன காலம் போ⁴ஜேதப்³பா³, காலேன காலம் ஸம்வேஸேதப்³பா³ [பவேஸேதப்³பா³ (ஸ்யா. கம். பீ. க.)]. யதா³ ச கோ² தே, அம்போ⁴ புரிஸ, இமேஸம் சதுன்னம் ஆஸீவிஸானம் உக்³க³தேஜானம் கோ⁴ரவிஸானம் அஞ்ஞதரோ வா அஞ்ஞதரோ வா குப்பிஸ்ஸதி, ததோ த்வம், அம்போ⁴ புரிஸ, மரணம் வா நிக³ச்ச²ஸி, மரணமத்தம் வா து³க்க²ம். யம் தே, அம்போ⁴ புரிஸ, கரணீயம் தம் கரோஹீ’’’தி.

‘‘அத² கோ² ஸோ, பி⁴க்க²வே, புரிஸோ பீ⁴தோ சதுன்னம் ஆஸீவிஸானம் உக்³க³தேஜானம் கோ⁴ரவிஸானம் யேன வா தேன வா பலாயேத². தமேனம் ஏவம் வதே³ய்யும் – ‘இமே கோ², அம்போ⁴ புரிஸ, பஞ்ச வத⁴கா பச்சத்தி²கா பிட்டி²தோ பிட்டி²தோ அனுப³ந்தா⁴, யத்தே²வ நம் பஸ்ஸிஸ்ஸாம தத்தே²வ ஜீவிதா வோரோபேஸ்ஸாமாதி. யம் தே, அம்போ⁴ புரிஸ, கரணீயம் தம் கரோஹீ’’’தி.

‘‘அத² கோ² ஸோ, பி⁴க்க²வே, புரிஸோ பீ⁴தோ சதுன்னம் ஆஸீவிஸானம் உக்³க³தேஜானம் கோ⁴ரவிஸானம், பீ⁴தோ பஞ்சன்னம் வத⁴கானம் பச்சத்தி²கானம் யேன வா தேன வா பலாயேத². தமேனம் ஏவம் வதே³ய்யும் – ‘அயம் தே, அம்போ⁴ புரிஸ, ச²ட்டோ² அந்தரசரோ வத⁴கோ உக்கி²த்தாஸிகோ பிட்டி²தோ பிட்டி²தோ அனுப³ந்தோ⁴ யத்தே²வ நம் பஸ்ஸிஸ்ஸாமி தத்தே²வ ஸிரோ பாதேஸ்ஸாமீதி. யம் தே, அம்போ⁴ புரிஸ, கரணீயம் தம் கரோஹீ’’’தி.

‘‘அத² கோ² ஸோ, பி⁴க்க²வே, புரிஸோ பீ⁴தோ சதுன்னம் ஆஸீவிஸானம் உக்³க³தேஜானம் கோ⁴ரவிஸானம், பீ⁴தோ பஞ்சன்னம் வத⁴கானம் பச்சத்தி²கானம், பீ⁴தோ ச²ட்ட²ஸ்ஸ அந்தரசரஸ்ஸ வத⁴கஸ்ஸ உக்கி²த்தாஸிகஸ்ஸ யேன வா தேன வா பலாயேத². ஸோ பஸ்ஸேய்ய ஸுஞ்ஞம் கா³மம். யஞ்ஞதே³வ க⁴ரம் பவிஸேய்ய ரித்தகஞ்ஞேவ பவிஸேய்ய துச்ச²கஞ்ஞேவ பவிஸேய்ய ஸுஞ்ஞகஞ்ஞேவ பவிஸேய்ய. யஞ்ஞதே³வ பா⁴ஜனம் பரிமஸேய்ய ரித்தகஞ்ஞேவ பரிமஸேய்ய துச்ச²கஞ்ஞேவ பரிமஸேய்ய ஸுஞ்ஞகஞ்ஞேவ பரிமஸேய்ய. தமேனம் ஏவம் வதே³ய்யும் – ‘இதா³னி, அம்போ⁴ புரிஸ, இமம் ஸுஞ்ஞம் கா³மம் சோரா கா³மகா⁴தகா பவிஸந்தி [வதி⁴ஸ்ஸந்தி (ஸீ. பீ.)]. யம் தே, அம்போ⁴ புரிஸ, கரணீயம் தம் கரோஹீ’’’தி.

‘‘அத² கோ² ஸோ, பி⁴க்க²வே, புரிஸோ பீ⁴தோ சதுன்னம் ஆஸீவிஸானம் உக்³க³தேஜானம் கோ⁴ரவிஸானம், பீ⁴தோ பஞ்சன்னம் வத⁴கானம் பச்சத்தி²கானம், பீ⁴தோ ச²ட்ட²ஸ்ஸ அந்தரசரஸ்ஸ வத⁴கஸ்ஸ உக்கி²த்தாஸிகஸ்ஸ, பீ⁴தோ சோரானம் கா³மகா⁴தகானம் யேன வா தேன வா பலாயேத². ஸோ பஸ்ஸேய்ய மஹந்தம் உத³கண்ணவம் ஓரிமம் தீரம் ஸாஸங்கம் ஸப்படிப⁴யம், பாரிமம் தீரம் கே²மம் அப்படிப⁴யம். ந சஸ்ஸ நாவா ஸந்தாரணீ உத்தரஸேது வா அபாரா பாரம் க³மனாய. அத² கோ², பி⁴க்க²வே, தஸ்ஸ புரிஸஸ்ஸ ஏவமஸ்ஸ – ‘அயம் கோ² மஹாஉத³கண்ணவோ ஓரிமம் தீரம் ஸாஸங்கம் ஸப்படிப⁴யம், பாரிமம் தீரம் கே²மம் அப்படிப⁴யம், நத்தி² ச [ந சஸ்ஸ (ஸீ. க.), நத்த²ஸ்ஸ (ஸ்யா. கம்.)] நாவா ஸந்தாரணீ உத்தரஸேது வா அபாரா பாரம் க³மனாய. யம்னூனாஹம் திணகட்ட²ஸாகா²பலாஸம் ஸம்கட்³டி⁴த்வா குல்லம் ப³ந்தி⁴த்வா தம் குல்லம் நிஸ்ஸாய ஹத்தே²ஹி ச பாதே³ஹி ச வாயமமானோ ஸோத்தி²னா பாரம் க³ச்சே²ய்ய’’’ந்தி.

‘‘அத² கோ² ஸோ, பி⁴க்க²வே, புரிஸோ திணகட்ட²ஸாகா²பலாஸம் ஸம்கட்³டி⁴த்வா குல்லம் ப³ந்தி⁴த்வா தம் குல்லம் நிஸ்ஸாய ஹத்தே²ஹி ச பாதே³ஹி ச வாயமமானோ ஸோத்தி²னா பாரம் க³ச்சே²ய்ய, திண்ணோ பாரங்க³தோ [பாரக³தோ (ஸீ. ஸ்யா. கம்.)] த²லே திட்ட²தி ப்³ராஹ்மணோ.

‘‘உபமா கோ² ம்யாயம், பி⁴க்க²வே, கதா அத்த²ஸ்ஸ விஞ்ஞாபனாய. அயஞ்சேத்த² [அயம் சேவேத்த² (ஸீ.)] அத்தோ² – சத்தாரோ ஆஸீவிஸா உக்³க³தேஜா கோ⁴ரவிஸாதி கோ², பி⁴க்க²வே, சதுன்னேதம் மஹாபூ⁴தானம் அதி⁴வசனம் – பத²வீதா⁴துயா, ஆபோதா⁴துயா, தேஜோதா⁴துயா, வாயோதா⁴துயா.

‘‘பஞ்ச வத⁴கா பச்சத்தி²காதி கோ², பி⁴க்க²வே, பஞ்சன்னேதம் உபாதா³னக்க²ந்தா⁴னம் அதி⁴வசனம், ஸேய்யதி²த³ம் – ரூபுபாதா³னக்க²ந்த⁴ஸ்ஸ, வேத³னுபாதா³னக்க²ந்த⁴ஸ்ஸ, ஸஞ்ஞுபாதா³னக்க²ந்த⁴ஸ்ஸ, ஸங்கா²ருபாதா³னக்க²ந்த⁴ஸ்ஸ, விஞ்ஞாணுபாதா³னக்க²ந்த⁴ஸ்ஸ.

‘‘ச²ட்டோ² அந்தரசரோ வத⁴கோ உக்கி²த்தாஸிகோதி கோ², பி⁴க்க²வே, நந்தீ³ராக³ஸ்ஸேதம் அதி⁴வசனம்.

‘‘ஸுஞ்ஞோ கா³மோதி கோ², பி⁴க்க²வே, ச²ன்னேதம் அஜ்ஜ²த்திகானம் ஆயதனானம் அதி⁴வசனம். சக்கு²தோ சேபி நம், பி⁴க்க²வே, பண்டி³தோ ப்³யத்தோ மேதா⁴வீ உபபரிக்க²தி ரித்தகஞ்ஞேவ கா²யதி, துச்ச²கஞ்ஞேவ கா²யதி, ஸுஞ்ஞகஞ்ஞேவ கா²யதி…பே… ஜிவ்ஹாதோ சேபி நம், பி⁴க்க²வே…பே… மனதோ சேபி நம், பி⁴க்க²வே, பண்டி³தோ ப்³யத்தோ மேதா⁴வீ உபபரிக்க²தி ரித்தகஞ்ஞேவ கா²யதி, துச்ச²கஞ்ஞேவ கா²யதி, ஸுஞ்ஞகஞ்ஞேவ கா²யதி.

‘‘சோரா கா³மகா⁴தகாதி கோ², பி⁴க்க²வே, ச²ன்னேதம் பா³ஹிரானம் ஆயதனானம் அதி⁴வசனம். சக்கு², பி⁴க்க²வே, ஹஞ்ஞதி மனாபாமனாபேஸு ரூபேஸு; ஸோதம், பி⁴க்க²வே…பே… கா⁴னம், பி⁴க்க²வே…பே… ஜிவ்ஹா, பி⁴க்க²வே, ஹஞ்ஞதி மனாபாமனாபேஸு ரஸேஸு; காயோ, பி⁴க்க²வே…பே… மனோ, பி⁴க்க²வே, ஹஞ்ஞதி மனாபாமனாபேஸு த⁴ம்மேஸு.

‘‘மஹா உத³கண்ணவோதி கோ², பி⁴க்க²வே, சதுன்னேதம் ஓகா⁴னம் அதி⁴வசனம் – காமோக⁴ஸ்ஸ, ப⁴வோக⁴ஸ்ஸ, தி³ட்டோ²க⁴ஸ்ஸ, அவிஜ்ஜோக⁴ஸ்ஸ.

‘‘ஓரிமம் தீரம் ஸாஸங்கம் ஸப்படிப⁴யந்தி கோ², பி⁴க்க²வே, ஸக்காயஸ்ஸேதம் அதி⁴வசனம்.

‘‘பாரிமம் தீரம் கே²மம் அப்படிப⁴யந்தி கோ², பி⁴க்க²வே, நிப்³பா³னஸ்ஸேதம் அதி⁴வசனம்.

‘‘குல்லந்தி கோ², பி⁴க்க²வே, அரியஸ்ஸேதம் அட்ட²ங்கி³கஸ்ஸ மக்³க³ஸ்ஸ அதி⁴வசனம், ஸேய்யதி²த³ம் – ஸம்மாதி³ட்டி²…பே… ஸம்மாஸமாதி⁴.

‘‘தஸ்ஸ ஹத்தே²ஹி ச பாதே³ஹி ச வாயாமோதி கோ², பி⁴க்க²வே, வீரியாரம்ப⁴ஸ்ஸேதம் அதி⁴வசனம்.

‘‘திண்ணோ பாரங்க³தோ த²லே திட்ட²தி ப்³ராஹ்மணோதி கோ², பி⁴க்க²வே, அரஹதோ ஏதம் அதி⁴வசன’’ந்தி. பட²மம்.