3. பா³ளிஸிகோபமஸுத்தம்

230. ‘‘ஸேய்யதா²பி, பி⁴க்க²வே, பா³ளிஸிகோ ஆமிஸக³தப³ளிஸம் க³ம்பீ⁴ரே உத³கரஹதே³ பக்கி²பேய்ய. தமேனம் அஞ்ஞதரோ ஆமிஸசக்கு² மச்சோ² கி³லேய்ய. ஏவஞ்ஹி ஸோ, பி⁴க்க²வே, மச்சோ² கி³லிதப³ளிஸோ பா³ளிஸிகஸ்ஸ அனயம் ஆபன்னோ ப்³யஸனம் ஆபன்னோ யதா²காமகரணீயோ பா³ளிஸிகஸ்ஸ.

ஏவமேவ கோ², பி⁴க்க²வே, ச²யிமே ப³ளிஸா லோகஸ்மிம் அனயாய ஸத்தானம் வதா⁴ய [ப்³யாபா³தா⁴ய (ஸீ. பீ.)] பாணினம். கதமே ச²? ஸந்தி, பி⁴க்க²வே, சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே, பி⁴க்கு², அபி⁴னந்த³தி அபி⁴வத³தி அஜ்ஜோ²ஸாய திட்ட²தி. அயம் வுச்சதி, பி⁴க்க²வே, பி⁴க்கு² கி³லிதப³ளிஸோ, மாரஸ்ஸ அனயம் ஆபன்னோ ப்³யஸனம் ஆபன்னோ யதா²காமகரணீயோ பாபிமதோ…பே… ஸந்தி, பி⁴க்க²வே, ஜிவ்ஹாவிஞ்ஞேய்யா ரஸா…பே….

ஸந்தி, பி⁴க்க²வே, மனோவிஞ்ஞேய்யா த⁴ம்மா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே, பி⁴க்கு², அபி⁴னந்த³தி அபி⁴வத³தி அஜ்ஜோ²ஸாய திட்ட²தி. அயம் வுச்சதி, பி⁴க்க²வே, பி⁴க்கு² கி³லிதப³ளிஸோ மாரஸ்ஸ அனயம் ஆபன்னோ ப்³யஸனம் ஆபன்னோ யதா²காமகரணீயோ பாபிமதோ.

‘‘ஸந்தி ச, பி⁴க்க²வே, சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி. அயம் வுச்சதி, பி⁴க்க²வே, பி⁴க்கு² ந கி³லிதப³ளிஸோ மாரஸ்ஸ அபே⁴தி³ ப³ளிஸம் பரிபே⁴தி³ ப³ளிஸம் ந அனயம் ஆபன்னோ ந ப்³யஸனம் ஆபன்னோ ந யதா²காமகரணீயோ பாபிமதோ…பே….

‘‘ஸந்தி, பி⁴க்க²வே, ஜிவ்ஹாவிஞ்ஞேய்யா ரஸா…பே…. ஸந்தி, பி⁴க்க²வே, மனோவிஞ்ஞேய்யா த⁴ம்மா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி, அயம் வுச்சதி, பி⁴க்க²வே, பி⁴க்கு² ந கி³லிதப³ளிஸோ மாரஸ்ஸ அபே⁴தி³ ப³ளிஸம் பரிபே⁴தி³ ப³ளிஸம் ந அனயம் ஆபன்னோ ந ப்³யஸனம் ஆபன்னோ ந யதா²காமகரணீயோ பாபிமதோ’’தி. ததியம்.