5. ஸம்வரஸுத்தம்

98. ‘‘ஸம்வரஞ்ச வோ, பி⁴க்க²வே, தே³ஸேஸ்ஸாமி, அஸம்வரஞ்ச. தம் ஸுணாத². கத²ஞ்ச, பி⁴க்க²வே, அஸம்வரோ ஹோதி? ஸந்தி, பி⁴க்க²வே, சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே பி⁴க்கு² அபி⁴னந்த³தி அபி⁴வத³தி அஜ்ஜோ²ஸாய திட்ட²தி, வேதி³தப்³ப³மேதம், பி⁴க்க²வே, பி⁴க்கு²னா – ‘பரிஹாயாமி குஸலேஹி த⁴ம்மேஹி’. பரிஹானஞ்ஹேதம் வுத்தம் ப⁴க³வதாதி…பே… ஸந்தி, பி⁴க்க²வே, ஜிவ்ஹாவிஞ்ஞேய்யா ரஸா…பே… ஸந்தி, பி⁴க்க²வே, மனோவிஞ்ஞேய்யா த⁴ம்மா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே பி⁴க்கு² அபி⁴னந்த³தி அபி⁴வத³தி அஜ்ஜோ²ஸாய திட்ட²தி, வேதி³தப்³ப³மேதம், பி⁴க்க²வே, பி⁴க்கு²னா – ‘பரிஹாயாமி குஸலேஹி த⁴ம்மேஹி’. பரிஹானஞ்ஹேதம் வுத்தம் ப⁴க³வதாதி. ஏவம் கோ², பி⁴க்க²வே, அஸம்வரோ ஹோதி.

‘‘கத²ஞ்ச, பி⁴க்க²வே, ஸம்வரோ ஹோதி? ஸந்தி, பி⁴க்க²வே, சக்கு²விஞ்ஞேய்யா ரூபா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி, வேதி³தப்³ப³மேதம், பி⁴க்க²வே, பி⁴க்கு²னா – ‘ந பரிஹாயாமி குஸலேஹி த⁴ம்மேஹி’. அபரிஹானஞ்ஹேதம் வுத்தம் ப⁴க³வதாதி …பே… ஸந்தி, பி⁴க்க²வே, ஜிவ்ஹாவிஞ்ஞேய்யா ரஸா…பே… ஸந்தி, பி⁴க்க²வே, மனோவிஞ்ஞேய்யா த⁴ம்மா இட்டா² கந்தா மனாபா பியரூபா காமூபஸம்ஹிதா ரஜனீயா. தஞ்சே பி⁴க்கு² நாபி⁴னந்த³தி நாபி⁴வத³தி நாஜ்ஜோ²ஸாய திட்ட²தி, வேதி³தப்³ப³மேதம் பி⁴க்கு²னா – ‘ந பரிஹாயாமி குஸலேஹி த⁴ம்மேஹி’. அபரிஹானஞ்ஹேதம் வுத்தம் ப⁴க³வதாதி. ஏவம் கோ², பி⁴க்க²வே, ஸம்வரோ ஹோதீ’’தி. பஞ்சமம்.