3. பரிஹானத⁴ம்மஸுத்தம்

96. ‘‘பரிஹானத⁴ம்மஞ்ச வோ, பி⁴க்க²வே, தே³ஸேஸ்ஸாமி அபரிஹானத⁴ம்மஞ்ச ச² ச அபி⁴பா⁴யதனானி. தம் ஸுணாத². கத²ஞ்ச, பி⁴க்க²வே, பரிஹானத⁴ம்மோ ஹோதி? இத⁴, பி⁴க்க²வே, பி⁴க்கு²னோ சக்கு²னா ரூபம் தி³ஸ்வா உப்பஜ்ஜந்தி பாபகா அகுஸலா ஸரஸங்கப்பா [அகுஸலா த⁴ம்மா ஸரஸங்கப்பா (ஸ்யா. கம். பீ. க.) உபரி ஆஸீவிஸவக்³கே³ ஸத்தமஸுத்தே பன ‘‘ஆகுஸலா ஸரஸங்கப்பா’’ த்வேவ ஸப்³ப³த்த² தி³ஸ்ஸதி] ஸம்யோஜனியா. தஞ்சே பி⁴க்கு² அதி⁴வாஸேதி நப்பஜஹதி ந வினோதே³தி ந ப்³யந்தீகரோதி [ப்³யந்திகரோதி (பீ.) ப்³யந்திம் கரோதி (க.)] ந அனபா⁴வம் க³மேதி, வேதி³தப்³ப³மேதம், பி⁴க்க²வே, பி⁴க்கு²னா – ‘பரிஹாயாமி குஸலேஹி த⁴ம்மேஹி’. பரிஹானஞ்ஹேதம் வுத்தம் ப⁴க³வதாதி…பே….

‘‘புன சபரம், பி⁴க்க²வே, பி⁴க்கு²னோ ஜிவ்ஹாய ரஸம் ஸாயித்வா உப்பஜ்ஜந்தி…பே… புன சபரம், பி⁴க்க²வே, பி⁴க்கு²னோ மனஸா த⁴ம்மம் விஞ்ஞாய உப்பஜ்ஜந்தி பாபகா அகுஸலா ஸரஸங்கப்பா ஸம்யோஜனியா. தஞ்சே பி⁴க்கு² அதி⁴வாஸேதி நப்பஜஹதி ந வினோதே³தி ந ப்³யந்தீகரோதி ந அனபா⁴வம் க³மேதி, வேதி³தப்³ப³மேதம், பி⁴க்க²வே, பி⁴க்கு²னா – ‘பரிஹாயாமி குஸலேஹி த⁴ம்மேஹி’. பரிஹானஞ்ஹேதம் வுத்தம் ப⁴க³வதாதி. ஏவம் கோ², பி⁴க்க²வே, பரிஹானத⁴ம்மோ ஹோதி.

‘‘கத²ஞ்ச, பி⁴க்க²வே, அபரிஹானத⁴ம்மோ ஹோதி? இத⁴, பி⁴க்க²வே, பி⁴க்கு²னோ சக்கு²னா ரூபம் தி³ஸ்வா உப்பஜ்ஜந்தி பாபகா அகுஸலா ஸரஸங்கப்பா ஸம்யோஜனியா. தஞ்சே பி⁴க்கு² நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வம் க³மேதி, வேதி³தப்³ப³மேதம், பி⁴க்க²வே, பி⁴க்கு²னா – ‘ந பரிஹாயாமி குஸலேஹி த⁴ம்மேஹி’. அபரிஹானஞ்ஹேதம் வுத்தம் ப⁴க³வதாதி…பே….

‘‘புன சபரம், பி⁴க்க²வே, பி⁴க்கு²னோ ஜிவ்ஹாய ரஸம் ஸாயித்வா உப்பஜ்ஜந்தி…பே… புன சபரம், பி⁴க்க²வே, பி⁴க்கு²னோ மனஸா த⁴ம்மம் விஞ்ஞாய உப்பஜ்ஜந்தி பாபகா அகுஸலா ஸரஸங்கப்பா ஸம்யோஜனியா. தஞ்சே பி⁴க்கு² நாதி⁴வாஸேதி பஜஹதி வினோதே³தி ப்³யந்தீகரோதி அனபா⁴வம் க³மேதி, வேதி³தப்³ப³மேதம், பி⁴க்க²வே, பி⁴க்கு²னா – ‘ந பரிஹாயாமி குஸலேஹி த⁴ம்மேஹி’. அபரிஹானஞ்ஹேதம் வுத்தம் ப⁴க³வதாதி. ஏவம் கோ², பி⁴க்க²வே, அபரிஹானத⁴ம்மோ ஹோதி.

‘‘கதமானி ச, பி⁴க்க²வே, ச² அபி⁴பா⁴யதனானி? இத⁴, பி⁴க்க²வே, பி⁴க்கு²னோ சக்கு²னா ரூபம் தி³ஸ்வா நுப்பஜ்ஜந்தி பாபகா அகுஸலா ஸரஸங்கப்பா ஸம்யோஜனியா. வேதி³தப்³ப³மேதம், பி⁴க்க²வே, பி⁴க்கு²னா – ‘அபி⁴பூ⁴தமேதம் ஆயதனம்’. அபி⁴பா⁴யதனஞ்ஹேதம் வுத்தம் ப⁴க³வதாதி…பே… புன சபரம், பி⁴க்க²வே, பி⁴க்கு²னோ மனஸா த⁴ம்மம் விஞ்ஞாய நுப்பஜ்ஜந்தி பாபகா அகுஸலா த⁴ம்மா ஸரஸங்கப்பா ஸம்யோஜனியா. வேதி³தப்³ப³மேதம், பி⁴க்க²வே, பி⁴க்கு²னா – ‘அபி⁴பூ⁴தமேதம் ஆயதனம்’. அபி⁴பா⁴யதனஞ்ஹேதம் வுத்தம் ப⁴க³வதாதி. இமானி வுச்சந்தி, பி⁴க்க²வே, ச² அபி⁴பா⁴யதனானீ’’தி. ததியம்.