4. ஓக்கந்தஸம்யுத்தம்

1. சக்கு²ஸுத்தம்

302. ஸாவத்தி²னிதா³னம். ‘‘சக்கு²ம், பி⁴க்க²வே, அனிச்சம் விபரிணாமி அஞ்ஞதா²பா⁴வி; ஸோதம் அனிச்சம் விபரிணாமி அஞ்ஞதா²பா⁴வி; கா⁴னம் அனிச்சம் விபரிணாமி அஞ்ஞதா²பா⁴வி; ஜிவ்ஹா அனிச்சா விபரிணாமீ அஞ்ஞதா²பா⁴வீ [விபரிணாமினீ அஞ்ஞதா²பா⁴வினீ (?)]; காயோ அனிச்சோ விபரிணாமீ அஞ்ஞதா²பா⁴வீ; மனோ அனிச்சோ விபரிணாமீ அஞ்ஞதா²பா⁴வீ. யோ, பி⁴க்க²வே, இமே த⁴ம்மே ஏவம் ஸத்³த³ஹதி அதி⁴முச்சதி – அயம் வுச்சதி ஸத்³தா⁴னுஸாரீ, ஓக்கந்தோ ஸம்மத்தனியாமம், ஸப்புரிஸபூ⁴மிம் ஓக்கந்தோ, வீதிவத்தோ புது²ஜ்ஜனபூ⁴மிம்; அப⁴ப்³போ³ தம் கம்மம் காதும், யம் கம்மம் கத்வா நிரயம் வா திரச்சா²னயோனிம் வா பேத்திவிஸயம் வா உபபஜ்ஜேய்ய; அப⁴ப்³போ³ ச [அப⁴ப்³போ³வ (ஸீ. ஸ்யா. கம்.)] தாவ காலம் காதும் யாவ ந ஸோதாபத்திப²லம் ஸச்சி²கரோதி’’.

‘‘யஸ்ஸ கோ², பி⁴க்க²வே, இமே த⁴ம்மா ஏவம் பஞ்ஞாய மத்தஸோ நிஜ்ஜா²னம் க²மந்தி, அயம் வுச்சதி – ‘த⁴ம்மானுஸாரீ, ஓக்கந்தோ ஸம்மத்தனியாமம், ஸப்புரிஸபூ⁴மிம் ஓக்கந்தோ, வீதிவத்தோ புது²ஜ்ஜனபூ⁴மிம்; அப⁴ப்³போ³ தம் கம்மம் காதும், யம் கம்மம் கத்வா நிரயம் வா திரச்சா²னயோனிம் வா பேத்திவிஸயம் வா உபபஜ்ஜேய்ய; அப⁴ப்³போ³ ச தாவ காலம் காதும் யாவ ந ஸோதாபத்திப²லம் ஸச்சி²கரோதி’. யோ, பி⁴க்க²வே, இமே த⁴ம்மே ஏவம் பஜானாதி ஏவம் பஸ்ஸதி, அயம் வுச்சதி – ‘ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயனோ’’’தி. பட²மம்.

2. ரூபஸுத்தம்

303. ஸாவத்தி²னிதா³னம். ‘‘ரூபா, பி⁴க்க²வே, அனிச்சா விபரிணாமினோ அஞ்ஞதா²பா⁴வினோ; ஸத்³தா³ அனிச்சா விபரிணாமினோ அஞ்ஞதா²பா⁴வினோ; க³ந்தா⁴ அனிச்சா விபரிணாமினோ அஞ்ஞதா²பா⁴வினோ; ரஸா அனிச்சா விபரிணாமினோ அஞ்ஞதா²பா⁴வினோ; போ²ட்ட²ப்³பா³ அனிச்சா விபரிணாமினோ அஞ்ஞதா²பா⁴வினோ; த⁴ம்மா அனிச்சா விபரிணாமினோ அஞ்ஞதா²பா⁴வினோ. யோ, பி⁴க்க²வே, இமே த⁴ம்மே ஏவம் ஸத்³த³ஹதி அதி⁴முச்சதி, அயம் வுச்சதி ஸத்³தா⁴னுஸாரீ, ஓக்கந்தோ ஸம்மத்தனியாமம், ஸப்புரிஸபூ⁴மிம் ஓக்கந்தோ, வீதிவத்தோ புது²ஜ்ஜனபூ⁴மிம்; அப⁴ப்³போ³ தம் கம்மம் காதும், யம் கம்மம் கத்வா நிரயம் வா திரச்சா²னயோனிம் வா பேத்திவிஸயம் வா உபபஜ்ஜேய்ய; அப⁴ப்³போ³ ச தாவ காலம் காதும் யாவ ந ஸோதாபத்திப²லம் ஸச்சி²கரோதி’’.

‘‘யஸ்ஸ கோ², பி⁴க்க²வே, இமே த⁴ம்மா ஏவம் பஞ்ஞாய மத்தஸோ நிஜ்ஜா²னம் க²மந்தி, அயம் வுச்சதி – ‘த⁴ம்மானுஸாரீ, ஓக்கந்தோ ஸம்மத்தனியாமம், ஸப்புரிஸபூ⁴மிம் ஓக்கந்தோ, வீதிவத்தோ புது²ஜ்ஜனபூ⁴மிம்; அப⁴ப்³போ³ தம் கம்மம் காதும், யம் கம்மம் கத்வா நிரயம் வா திரச்சா²னயோனிம் வா பேத்திவிஸயம் வா உபபஜ்ஜேய்ய; அப⁴ப்³போ³ ச தாவ காலம் காதும் யாவ ந ஸோதாபத்திப²லம் ஸச்சி²கரோதி’. யோ, பி⁴க்க²வே, இமே த⁴ம்மே ஏவம் பஜானாதி ஏவம் பஸ்ஸதி, அயம் வுச்சதி – ‘ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயனோ’’’தி. து³தியம்.

3. விஞ்ஞாணஸுத்தம்

304. ஸாவத்தி²னிதா³னம். ‘‘சக்கு²விஞ்ஞாணம், பி⁴க்க²வே, அனிச்சம் விபரிணாமி அஞ்ஞதா²பா⁴வி; ஸோதவிஞ்ஞாணம்… கா⁴னவிஞ்ஞாணம்… ஜிவ்ஹாவிஞ்ஞாணம்… காயவிஞ்ஞாணம்… மனோவிஞ்ஞாணம் அனிச்சம் விபரிணாமி அஞ்ஞதா²பா⁴வி. யோ பி⁴க்க²வே…பே… ஸம்போ³தி⁴பராயனோ’’தி. ததியம்.

4. ஸம்ப²ஸ்ஸஸுத்தம்

305. ஸாவத்தி²னிதா³னம். ‘‘சக்கு²ஸம்ப²ஸ்ஸோ, பி⁴க்க²வே, அனிச்சோ விபரிணாமீ அஞ்ஞதா²பா⁴வீ; ஸோதஸம்ப²ஸ்ஸோ… கா⁴னஸம்ப²ஸ்ஸோ… ஜிவ்ஹாஸம்ப²ஸ்ஸோ… காயஸம்ப²ஸ்ஸோ… மனோஸம்ப²ஸ்ஸோ அனிச்சோ விபரிணாமீ அஞ்ஞதா²பா⁴வீ. யோ, பி⁴க்க²வே, இமே த⁴ம்மே ஏவம் ஸத்³த³ஹதி அதி⁴முச்சதி, அயம் வுச்சதி ‘ஸத்³தா⁴னுஸாரீ…பே… ஸம்போ³தி⁴பராயனோ’’’தி. சதுத்த²ம்.

5. ஸம்ப²ஸ்ஸஜாஸுத்தம்

306. ஸாவத்தி²னிதா³னம். ‘‘சக்கு²ஸம்ப²ஸ்ஸஜா, பி⁴க்க²வே, வேத³னா அனிச்சா விபரிணாமீ அஞ்ஞதா²பா⁴வீ; ஸோதஸம்ப²ஸ்ஸஜா வேத³னா…பே… கா⁴னஸம்ப²ஸ்ஸஜா வேத³னா…பே… ஜிவ்ஹாஸம்ப²ஸ்ஸஜா வேத³னா…பே… காயஸம்ப²ஸ்ஸஜா வேத³னா…பே… மனோஸம்ப²ஸ்ஸஜா வேத³னா அனிச்சா விபரிணாமீ அஞ்ஞதா²பா⁴வீ. யோ, பி⁴க்க²வே, இமே த⁴ம்மே ஏவம் ஸத்³த³ஹதி அதி⁴முச்சதி, அயம் வுச்சதி ‘ஸத்³தா⁴னுஸாரீ…பே… ஸம்போ³தி⁴பராயனோ’’’தி. பஞ்சமம்.

6. ரூபஸஞ்ஞாஸுத்தம்

307. ஸாவத்தி²னிதா³னம். ‘‘ரூபஸஞ்ஞா, பி⁴க்க²வே, அனிச்சா விபரிணாமீ அஞ்ஞதா²பா⁴வீ; ஸத்³த³ஸஞ்ஞா… க³ந்த⁴ஸஞ்ஞா… ரஸஸஞ்ஞா… போ²ட்ட²ப்³ப³ஸஞ்ஞா… த⁴ம்மஸஞ்ஞா அனிச்சா விபரிணாமீ அஞ்ஞதா²பா⁴வீ. யோ, பி⁴க்க²வே, இமே த⁴ம்மே ஏவம் ஸத்³த³ஹதி அதி⁴முச்சதி, அயம் வுச்சதி ‘ஸத்³தா⁴னுஸாரீ…பே… ஸம்போ³தி⁴பராயனோ’’’தி. ச²ட்ட²ம்.

7. ரூபஸஞ்சேதனாஸுத்தம்

308. ஸாவத்தி²னிதா³னம். ‘‘ரூபஸஞ்சேதனா, பி⁴க்க²வே, அனிச்சா விபரிணாமீ அஞ்ஞதா²பா⁴வீ; ஸத்³த³ஸஞ்சேதனா… க³ந்த⁴ஸஞ்சேதனா… ரஸஸஞ்சேதனா… போ²ட்ட²ப்³ப³ஸஞ்சேதனா… த⁴ம்மஸஞ்சேதனா அனிச்சா விபரிணாமீ அஞ்ஞதா²பா⁴வீ. யோ, பி⁴க்க²வே, இமே த⁴ம்மே ஏவம் ஸத்³த³ஹதி அதி⁴முச்சதி, அயம் வுச்சதி ‘ஸத்³தா⁴னுஸாரீ…பே… ஸம்போ³தி⁴பராயனோ’’’தி. ஸத்தமம்.

8. ரூபதண்ஹாஸுத்தம்

309. ஸாவத்தி²னிதா³னம். ‘‘ரூபதண்ஹா, பி⁴க்க²வே, அனிச்சா விபரிணாமீ அஞ்ஞதா²பா⁴வீ; ஸத்³த³தண்ஹா… க³ந்த⁴தண்ஹா… ரஸதண்ஹா… போ²ட்ட²ப்³ப³தண்ஹா… த⁴ம்மதண்ஹா அனிச்சா விபரிணாமீ அஞ்ஞதா²பா⁴வீ. யோ, பி⁴க்க²வே, இமே த⁴ம்மே ஏவம் ஸத்³த³ஹதி அதி⁴முச்சதி, அயம் வுச்சதி ‘ஸத்³தா⁴னுஸாரீ…பே… ஸம்போ³தி⁴பராயனோ’’’தி. அட்ட²மம்.

9. பத²வீதா⁴துஸுத்தம்

310. ஸாவத்தி²னிதா³னம். ‘‘பத²வீதா⁴து, பி⁴க்க²வே, அனிச்சா விபரிணாமீ அஞ்ஞதா²பா⁴வீ; ஆபோதா⁴து… தேஜோதா⁴து… வாயோதா⁴து… ஆகாஸதா⁴து… விஞ்ஞாணதா⁴து அனிச்சா விபரிணாமீ அஞ்ஞதா²பா⁴வீ. யோ, பி⁴க்க²வே, இமே த⁴ம்மே ஏவம் ஸத்³த³ஹதி அதி⁴முச்சதி, அயம் வுச்சதி ‘ஸத்³தா⁴னுஸாரீ…பே… ஸம்போ³தி⁴பராயனோ’’’தி. நவமம்.

10. க²ந்த⁴ஸுத்தம்

311. ஸாவத்தி²னிதா³னம். ‘‘ரூபம், பி⁴க்க²வே, அனிச்சம் விபரிணாமி அஞ்ஞதா²பா⁴வி; வேத³னா அனிச்சா விபரிணாமீ அஞ்ஞதா²பா⁴வீ; ஸஞ்ஞா… ஸங்கா²ரா அனிச்சா விபரிணாமினோ அஞ்ஞதா²பா⁴வினோ; விஞ்ஞாணம் அனிச்சம் விபரிணாமி அஞ்ஞதா²பா⁴வி. யோ, பி⁴க்க²வே, இமே த⁴ம்மே ஏவம் ஸத்³த³ஹதி அதி⁴முச்சதி, அயம் வுச்சதி ஸத்³தா⁴னுஸாரீ, ஓக்கந்தோ ஸம்மத்தனியாமம், ஸப்புரிஸபூ⁴மிம் ஓக்கந்தோ, வீதிவத்தோ புது²ஜ்ஜனபூ⁴மிம்; அப⁴ப்³போ³ தம் கம்மம் காதும், யம் கம்மம் கத்வா நிரயம் வா திரச்சா²னயோனிம் வா பேத்திவிஸயம் வா உபபஜ்ஜேய்ய; அப⁴ப்³போ³ ச தாவ காலம் காதும் யாவ ந ஸோதாபத்திப²லம் ஸச்சி²கரோதி’’.

‘‘யஸ்ஸ கோ², பி⁴க்க²வே, இமே த⁴ம்மா ஏவம் பஞ்ஞாய மத்தஸோ நிஜ்ஜா²னம் க²மந்தி, அயம் வுச்சதி – ‘த⁴ம்மானுஸாரீ, ஓக்கந்தோ ஸம்மத்தனியாமம், ஸப்புரிஸபூ⁴மிம் ஓக்கந்தோ, வீதிவத்தோ புது²ஜ்ஜனபூ⁴மிம்; அப⁴ப்³போ³ தம் கம்மம் காதும், யம் கம்மம் கத்வா நிரயம் வா திரச்சா²னயோனிம் வா பேத்திவிஸயம் வா உபபஜ்ஜேய்ய; அப⁴ப்³போ³ ச தாவ காலம் காதும் யாவ ந ஸோதாபத்திப²லம் ஸச்சி²கரோதி’. யோ, பி⁴க்க²வே, இமே த⁴ம்மே ஏவம் பஜானாதி ஏவம் பஸ்ஸதி, அயம் வுச்சதி – ‘ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயனோ’’’தி. த³ஸமம்.

ஓக்கந்தஸம்யுத்தம் [ஓக்கந்திகஸம்யுத்தம் (பீ. க.)] ஸமத்தம்.