8. மஹாதி³ட்டி²ஸுத்தம்

213. ஸாவத்தி²னிதா³னம். ‘‘கிஸ்மிம் நு கோ², பி⁴க்க²வே, ஸதி, கிம் உபாதா³ய, கிம் அபி⁴னிவிஸ்ஸ ஏவம் தி³ட்டி² உப்பஜ்ஜதி – ‘ஸத்திமே காயா அகடா, அகடவிதா⁴, அனிம்மிதா, அனிம்மாதா, வஞ்ஜா², கூடட்டா², ஏஸிகட்டா²யிட்டி²தா; தே ந இஞ்ஜந்தி, ந விபரிணமந்தி [ந விபரிணாமேந்தி (பீ. க.)], ந அஞ்ஞமஞ்ஞம் ப்³யாபா³தே⁴ந்தி; நாலம் அஞ்ஞமஞ்ஞஸ்ஸ ஸுகா²ய வா து³க்கா²ய வா ஸுக²து³க்கா²ய வா. கதமே ஸத்த? பத²வீகாயோ, ஆபோகாயோ, தேஜோகாயோ, வாயோகாயோ, ஸுகே², து³க்கே², ஜீவே ஸத்தமே. இமே ஸத்த [ஜீவே. ஸத்திமே (ப³ஹூஸு)] காயா அகடா, அகடவிதா⁴, அனிம்மிதா, அனிம்மாதா, வஞ்ஜா², கூடட்டா² ஏஸிகட்டா²யிட்டி²தா; தே ந இஞ்ஜந்தி, ந விபரிணமந்தி, ந அஞ்ஞமஞ்ஞம் ப்³யாபா³தே⁴ந்தி; நாலம் அஞ்ஞமஞ்ஞஸ்ஸ ஸுகா²ய வா து³க்கா²ய வா ஸுக²து³க்கா²ய வா. யோபி திண்ஹேன ஸத்தே²ன ஸீஸம் சி²ந்த³தி, ந ஸோபி கஞ்சி [ந கோசி கஞ்சி (ஸீ. ஸ்யா. கம்.), ந கோசி தம் (பீ. க.)] ஜீவிதா வோரோபேதி; ஸத்தன்னம்த்வேவ காயானமந்தரேன ஸத்த²ம் விவரமனுபவிஸதி [விவரமனுபததி (கத்த²சி) தீ³க⁴மஜ்ஜி²மேஸுபி]. சுத்³த³ஸ கோ² பனிமானி யோனிபமுக²ஸதஸஹஸ்ஸானி ஸட்டி² ச ஸதானி ச² ச ஸதானி பஞ்ச ச கம்முனோ ஸதானி பஞ்ச ச கம்மானி, தீணி ச கம்மானி, கம்மே ச அட்³ட⁴கம்மே ச த்³வட்டி²படிபதா³, த்³வட்ட²ந்தரகப்பா, ச²ளாபி⁴ஜாதியோ, அட்ட²புரிஸபூ⁴மியோ, ஏகூனபஞ்ஞாஸ ஆஜீவகஸதே, ஏகூனபஞ்ஞாஸ பரிப்³பா³ஜகஸதே, ஏகூனபஞ்ஞாஸ நாக³வாஸஸதே, வீஸே இந்த்³ரியஸதே, திம்ஸே நிரயஸதே, ச²த்திம்ஸரஜோதா⁴துயோ, ஸத்த ஸஞ்ஞீக³ப்³பா⁴, ஸத்த அஸஞ்ஞீக³ப்³பா⁴, ஸத்த நிக³ண்டி²க³ப்³பா⁴, ஸத்த தே³வா, ஸத்த மானுஸா, ஸத்த பேஸாசா, ஸத்த ஸரா, ஸத்த பவுடா [ஸபுடா (க.), பவுதா⁴ (பீ.)], ஸத்த பபாதா, ஸத்த ச பபாதஸதானி, ஸத்த ஸுபினா, ஸத்த ஸுபினஸதானி, சுல்லாஸீதி மஹாகப்பினோ [மஹாகப்புனோ (ஸீ. பீ.)] ஸதஸஹஸ்ஸானி, யானி பா³லே ச பண்டி³தே ச ஸந்தா⁴வித்வா ஸம்ஸரித்வா து³க்க²ஸ்ஸந்தம் கரிஸ்ஸந்தி. தத்த² நத்தி² இமினாஹம் ஸீலேன வா வதேன வா தபேன வா ப்³ரஹ்மசரியேன வா அபரிபக்கம் வா கம்மம் பரிபாசேஸ்ஸாமி; பரிபக்கம் வா கம்மம் பு²ஸ்ஸ பு²ஸ்ஸ ப்³யந்தீகரிஸ்ஸாமீதி ஹேவம் நத்தி² தோ³ணமிதே ஸுக²து³க்கே² பரியந்தகதே ஸம்ஸாரே, நத்தி² ஹாயனவட்³ட⁴னே, நத்தி² உக்கம்ஸாவகம்ஸே. ஸேய்யதா²பி நாம ஸுத்தகு³ளே கி²த்தே நிப்³பே³டி²யமானமேவ பலேதி; ஏவமேவ பா³லே ச பண்டி³தே ச நிப்³பே³டி²யமானா ஸுக²து³க்க²ம் பலேந்தீ’’’தி?

ப⁴க³வம்மூலகா நோ, ப⁴ந்தே, த⁴ம்மா…பே… ‘‘ரூபே கோ², பி⁴க்க²வே, ஸதி, ரூபம் உபாதா³ய, ரூபம் அபி⁴னிவிஸ்ஸ ஏவம் தி³ட்டி² உப்பஜ்ஜதி – ‘ஸத்திமே காயா அகடா, அகடவிதா⁴…பே… ஸுக²து³க்க²ம் பலேந்தீ’தி. வேத³னாய ஸதி…பே… ஸஞ்ஞாய ஸதி… ஸங்கா²ரேஸு ஸதி… விஞ்ஞாணே ஸதி, விஞ்ஞாணம் உபாதா³ய, விஞ்ஞாணம் அபி⁴னிவிஸ்ஸ ஏவம் தி³ட்டி² உப்பஜ்ஜதி – ‘ஸத்திமே காயா அகடா, அகடவிதா⁴…பே… ஸுக²து³க்க²ம் பலேந்தீ’’’தி. ‘‘தம் கிம் மஞ்ஞத², பி⁴க்க²வே, ரூபம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’…பே… ‘‘யம் பனானிச்சம் து³க்க²ம் விபரிணாமத⁴ம்மம், அபி நு தம் அனுபாதா³ய ஏவம் தி³ட்டி² உப்பஜ்ஜேய்ய – ‘ஸத்திமே காயா அகடா அகடவிதா⁴…பே… ஸுக²து³க்க²ம் பலேந்தீ’’’தி? ‘‘நோ ஹேதம், ப⁴ந்தே’’. ‘‘யம்பித³ம் தி³ட்ட²ம் ஸுதம் முதம் விஞ்ஞாதம் பத்தம் பரியேஸிதம் அனுவிசரிதம் மனஸா தம்பி நிச்சம் வா அனிச்சம் வா’’தி? ‘‘அனிச்சம், ப⁴ந்தே…பே… அபி நு தம் அனுபாதா³ய ஏவம் தி³ட்டி² உப்பஜ்ஜேய்ய – ‘ஸத்திமே காயா அகடா அகடவிதா⁴…பே… நிப்³பே³டி²யமானா ஸுக²து³க்க²ம் பலேந்தீ’’’தி? ‘‘நோ ஹேதம், ப⁴ந்தே’’.

‘‘யதோ கோ², பி⁴க்க²வே, அரியஸாவகஸ்ஸ இமேஸு ச டா²னேஸு கங்கா² பஹீனா ஹோதி, து³க்கே²பிஸ்ஸ கங்கா² பஹீனா ஹோதி…பே… து³க்க²னிரோத⁴கா³மினியா படிபதா³யபிஸ்ஸ கங்கா² பஹீனா ஹோதி – அயம் வுச்சதி, பி⁴க்க²வே, அரியஸாவகோ ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயனோ’’தி. அட்ட²மம்.