4. நோசமேஸியாஸுத்தம்

209. ஸாவத்தி²னிதா³னம். ‘‘கிஸ்மிம் நு கோ², பி⁴க்க²வே, ஸதி, கிம் உபாதா³ய, கிம் அபி⁴னிவிஸ்ஸ ஏவம் தி³ட்டி² உப்பஜ்ஜதி – ‘நோ சஸ்ஸம், நோ ச மே ஸியா, நாப⁴விஸ்ஸ, ந மே ப⁴விஸ்ஸதீ’’’தி? ப⁴க³வம்மூலகா நோ, ப⁴ந்தே, த⁴ம்மா…பே….

‘‘ரூபே கோ², பி⁴க்க²வே, ஸதி, ரூபம் உபாதா³ய, ரூபம் அபி⁴னிவிஸ்ஸ ஏவம் தி³ட்டி² உப்பஜ்ஜதி – ‘நோ சஸ்ஸம், நோ ச மே ஸியா, நாப⁴விஸ்ஸ, ந மே ப⁴விஸ்ஸதீ’தி. வேத³னாய ஸதி… ஸஞ்ஞாய ஸதி… ஸங்கா²ரேஸு ஸதி… விஞ்ஞாணே ஸதி, விஞ்ஞாணம் உபாதா³ய, விஞ்ஞாணம் அபி⁴னிவிஸ்ஸ ஏவம் தி³ட்டி² உப்பஜ்ஜதி – ‘நோ சஸ்ஸம், நோ ச மே ஸியா, நாப⁴விஸ்ஸ, ந மே ப⁴விஸ்ஸதீ’’’தி.

‘‘தம் கிம் மஞ்ஞத², பி⁴க்க²வே, ரூபம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’…பே… அபி நு தம் அனுபாதா³ய ஏவம் தி³ட்டி² உப்பஜ்ஜேய்ய – ‘நோ சஸ்ஸம், நோ ச மே ஸியா, நாப⁴விஸ்ஸ, ந மே ப⁴விஸ்ஸதீ’தி? ‘‘நோ ஹேதம், ப⁴ந்தே’’. ‘‘வேத³னா… ஸஞ்ஞா… ஸங்கா²ரா… விஞ்ஞாணம் நிச்சம் வா அனிச்சம் வா’’தி? ‘‘அனிச்சம், ப⁴ந்தே…பே… அபி நு தம் அனுபாதா³ய ஏவம் தி³ட்டி² உப்பஜ்ஜேய்ய – ‘நோ சஸ்ஸம், நோ ச மே ஸியா, நாப⁴விஸ்ஸ, ந மே ப⁴விஸ்ஸதீ’’’தி? ‘‘நோ ஹேதம், ப⁴ந்தே’’. ‘‘யம்பித³ம் தி³ட்ட²ம் ஸுதம் முதம் விஞ்ஞாதம் பத்தம் பரியேஸிதம் அனுவிசரிதம் மனஸா தம்பி நிச்சம் வா அனிச்சம் வா’’தி? ‘‘அனிச்சம், ப⁴ந்தே…பே… அபி நு தம் அனுபாதா³ய ஏவம் தி³ட்டி² உப்பஜ்ஜேய்ய – ‘நோ சஸ்ஸம், நோ ச மே ஸியா, நாப⁴விஸ்ஸ, ந மே ப⁴விஸ்ஸதீ’’தி? ‘‘நோ ஹேதம், ப⁴ந்தே’’.

‘‘யதோ கோ², பி⁴க்க²வே, அரியஸாவகஸ்ஸ இமேஸு ச டா²னேஸு கங்கா² பஹீனா ஹோதி, து³க்கே²பிஸ்ஸ கங்கா² பஹீனா ஹோதி…பே… து³க்க²னிரோத⁴கா³மினியா படிபதா³யபிஸ்ஸ கங்கா² பஹீனா ஹோதி – அயம் வுச்சதி, பி⁴க்க²வே, அரியஸாவகோ ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயனோ’’தி. சதுத்த²ம்.