1. வாதஸுத்தம்

206. ஏகம் ஸமயம் ப⁴க³வா ஸாவத்தி²யம் விஹரதி ஜேதவனே. ப⁴க³வா ஏதத³வோச – ‘‘கிஸ்மிம் நு கோ², பி⁴க்க²வே, ஸதி, கிம் உபாதா³ய, கிம் அபி⁴னிவிஸ்ஸ ஏவம் தி³ட்டி² உப்பஜ்ஜதி – ‘ந வாதா வாயந்தி, ந நஜ்ஜோ ஸந்த³ந்தி, ந க³ப்³பி⁴னியோ விஜாயந்தி, ந சந்தி³மஸூரியா உதே³ந்தி வா அபேந்தி வா ஏஸிகட்டா²யிட்டி²தா’’’தி?

‘‘ப⁴க³வம்மூலகா நோ, ப⁴ந்தே, த⁴ம்மா ப⁴க³வம்னேத்திகா ப⁴க³வம்படிஸரணா. ஸாது⁴ வத, ப⁴ந்தே, ப⁴க³வந்தஞ்ஞேவ படிபா⁴து ஏதஸ்ஸ பா⁴ஸிதஸ்ஸ அத்தோ². ப⁴க³வதோ ஸுத்வா பி⁴க்கூ² தா⁴ரேஸ்ஸந்தீ’’தி. ‘‘தேன ஹி, பி⁴க்க²வே, ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘ரூபே கோ², பி⁴க்க²வே, ஸதி, ரூபம் உபாதா³ய, ரூபம் அபி⁴னிவிஸ்ஸ ஏவம் தி³ட்டி² உப்பஜ்ஜதி – ‘ந வாதா வாயந்தி, ந நஜ்ஜோ ஸந்த³ந்தி, ந க³ப்³பி⁴னியோ விஜாயந்தி, ந சந்தி³மஸூரியா உதே³ந்தி வா அபேந்தி வா ஏஸிகட்டா²யிட்டி²தா’தி. வேத³னாய ஸதி…பே… ஸஞ்ஞாய ஸதி… ஸங்கா²ரேஸு ஸதி… விஞ்ஞாணே ஸதி, விஞ்ஞாணம் உபாதா³ய, விஞ்ஞாணம் அபி⁴னிவிஸ்ஸ ஏவம் தி³ட்டி² உப்பஜ்ஜதி – ‘ந வாதா வாயந்தி, ந நஜ்ஜோ ஸந்த³ந்தி, ந க³ப்³பி⁴னியோ விஜாயந்தி, ந சந்தி³மஸூரியா உதே³ந்தி வா அபேந்தி வா ஏஸிகட்டா²யிட்டி²தா’தி. தம் கிம் மஞ்ஞத², பி⁴க்க²வே, ரூபம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘யம் பனானிச்சம், து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம், து³க்க²ம் விபரிணாமத⁴ம்மம், அபி நு தம் அனுபாதா³ய ஏவம் தி³ட்டி² உப்பஜ்ஜேய்ய – ‘ந வாதா வாயந்தி, ந நஜ்ஜோ ஸந்த³ந்தி, ந க³ப்³பி⁴னியோ விஜாயந்தி, ந சந்தி³மஸூரியா உதே³ந்தி வா அபேந்தி வா ஏஸிகட்டா²யிட்டி²தா’’’தி? ‘‘நோ ஹேதம், ப⁴ந்தே’’.

‘‘வேத³னா நிச்சா வா அனிச்சா வா’’தி… ‘‘ஸஞ்ஞா… ஸங்கா²ரா… விஞ்ஞாணம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘யம் பனானிச்சம் து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம் து³க்க²ம் விபரிணாமத⁴ம்மம், அபி நு தம் அனுபாதா³ய ஏவம் தி³ட்டி² உப்பஜ்ஜேய்ய – ‘ந வாதா வாயந்தி, ந நஜ்ஜோ ஸந்த³ந்தி, ந க³ப்³பி⁴னியோ விஜாயந்தி, ந சந்தி³மஸூரியா உதே³ந்தி வா அபேந்தி வா ஏஸிகட்டா²யிட்டி²தா’’’தி? ‘‘நோ ஹேதம், ப⁴ந்தே’’. ‘‘யம்பித³ம் [யமித³ம் (அஞ்ஞத்த²)] தி³ட்ட²ம் ஸுதம் முதம் விஞ்ஞாதம் பத்தம் பரியேஸிதம் அனுவிசரிதம் மனஸா தம்பி நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘யம் பனானிச்சம் து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம் து³க்க²ம் விபரிணாமத⁴ம்மம், அபி நு தம் அனுபாதா³ய ஏவம் தி³ட்டி² உப்பஜ்ஜேய்ய – ‘ந வாதா வாயந்தி, ந நஜ்ஜோ ஸந்த³ந்தி, ந க³ப்³பி⁴னியோ விஜாயந்தி, ந சந்தி³மஸூரியா உதே³ந்தி வா அபேந்தி வா ஏஸிகட்டா²யிட்டி²தா’’’தி? ‘‘நோ ஹேதம், ப⁴ந்தே’’.

‘‘யதோ கோ², பி⁴க்க²வே, அரியஸாவகஸ்ஸ இமேஸு ச [இமேஸு ச²ஸு (ஸீ. ஸ்யா. கம். பீ.) ஏவமுபரிபி] டா²னேஸு கங்கா² பஹீனா ஹோதி, து³க்கே²பிஸ்ஸ கங்கா² பஹீனா ஹோதி, து³க்க²ஸமுத³யேபிஸ்ஸ கங்கா² பஹீனா ஹோதி, து³க்க²னிரோதே⁴பிஸ்ஸ கங்கா² பஹீனா ஹோதி, து³க்க²னிரோத⁴கா³மினியா படிபதா³யபிஸ்ஸ கங்கா² பஹீனா ஹோதி – அயம் வுச்சதி, பி⁴க்க²வே, அரியஸாவகோ ஸோதாபன்னோ அவினிபாதத⁴ம்மோ நியதோ ஸம்போ³தி⁴பராயனோ’’தி. பட²மம்.