12. வச்ச²கோ³த்தஸம்யுத்தம்

1. ரூபஅஞ்ஞாணஸுத்தம்

607. ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² வச்ச²கோ³த்தோ பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² வச்ச²கோ³த்தோ பரிப்³பா³ஜகோ ப⁴க³வந்தம் ஏதத³வோச – ‘‘கோ நு கோ², போ⁴ கோ³தம, ஹேது, கோ பச்சயோ, யானிமானி [யேனிமானி (?)] அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா, அந்தவா லோகோதி வா, அனந்தவா லோகோதி வா, தம் ஜீவம் தம் ஸரீரந்தி வா, அஞ்ஞம் ஜீவம் அஞ்ஞம் ஸரீரந்தி வா, ஹோதி ததா²க³தோ பரம் மரணாதி வா, ந ஹோதி ததா²க³தோ பரம் மரணாதி வா, ஹோதி ச ந ச ஹோதி ததா²க³தோ பரம் மரணாதி வா, நேவ ஹோதி ந ந ஹோதி ததா²க³தோ பரம் மரணாதி வா’’தி? ‘‘ரூபே கோ², வச்ச², அஞ்ஞாணா, ரூபஸமுத³யே அஞ்ஞாணா, ரூபனிரோதே⁴ அஞ்ஞாணா, ரூபனிரோத⁴கா³மினியா படிபதா³ய அஞ்ஞாணா; ஏவமிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வாதி. அயம் கோ², வச்ச², ஹேது, அயம் பச்சயோ, யானிமானி [யேன (ஸீ.), யேனிமானி (?)] அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வா’’தி. பட²மம்.

2. வேத³னாஅஞ்ஞாணஸுத்தம்

608. ஸாவத்தி²னிதா³னம். ஏகமந்தம் நிஸின்னோ கோ² வச்ச²கோ³த்தோ பரிப்³பா³ஜகோ ப⁴க³வந்தம் ஏதத³வோச – ‘‘கோ நு கோ², போ⁴ கோ³தம, ஹேது, கோ பச்சயோ, யானிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வா’’தி? ‘‘வேத³னாய கோ², வச்ச², அஞ்ஞாணா, வேத³னாஸமுத³யே அஞ்ஞாணா, வேத³னானிரோதே⁴ அஞ்ஞாணா, வேத³னானிரோத⁴கா³மினியா படிபதா³ய அஞ்ஞாணா; ஏவமிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வாதி. அயம் கோ², வச்ச², ஹேது, அயம் பச்சயோ, யானிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வா’’தி. து³தியம்.

3. ஸஞ்ஞாஅஞ்ஞாணஸுத்தம்

609. ஸாவத்தி²னிதா³னம். ஏகமந்தம் நிஸின்னோ கோ² வச்ச²கோ³த்தோ பரிப்³பா³ஜகோ ப⁴க³வந்தம் ஏதத³வோச – ‘‘கோ நு கோ², போ⁴ கோ³தம, ஹேது, கோ பச்சயோ, யானிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வா’’தி? ‘‘ஸஞ்ஞாய கோ², வச்ச², அஞ்ஞாணா, ஸஞ்ஞாஸமுத³யே அஞ்ஞாணா, ஸஞ்ஞானிரோதே⁴ அஞ்ஞாணா, ஸஞ்ஞானிரோத⁴கா³மினியா படிபதா³ய அஞ்ஞாணா; ஏவமிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வாதி. அயம் கோ², வச்ச², ஹேது, அயம் பச்சயோ, யானிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வா’’தி. ததியம்.

4. ஸங்கா²ரஅஞ்ஞாணஸுத்தம்

610. ஸாவத்தி²னிதா³னம். ஏகமந்தம் நிஸின்னோ கோ² வச்ச²கோ³த்தோ பரிப்³பா³ஜகோ ப⁴க³வந்தம் ஏதத³வோச – ‘‘கோ நு கோ², போ⁴ கோ³தம, ஹேது, கோ பச்சயோ, யானிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வா’’தி? ‘‘ஸங்கா²ரேஸு கோ², வச்ச², அஞ்ஞாணா, ஸங்கா²ரஸமுத³யே அஞ்ஞாணா, ஸங்கா²ரனிரோதே⁴ அஞ்ஞாணா, ஸங்கா²ரனிரோத⁴கா³மினியா படிபதா³ய அஞ்ஞாணா; ஏவமிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வாதி. அயம் கோ², வச்ச², ஹேது, அயம் பச்சயோ, யானிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வா’’தி. சதுத்த²ம்.

5. விஞ்ஞாணஅஞ்ஞாணஸுத்தம்

611. ஸாவத்தி²னிதா³னம். ஏகமந்தம் நிஸின்னோ கோ² வச்ச²கோ³த்தோ பரிப்³பா³ஜகோ ப⁴க³வந்தம் ஏதத³வோச – ‘‘கோ நு கோ², போ⁴ கோ³தம, ஹேது, கோ பச்சயோ, யானிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா …பே… நேவ ஹோதி ந ந ஹோதி ததா²க³தோ பரம் மரணாதி வா’’தி? ‘‘விஞ்ஞாணே கோ², வச்ச², அஞ்ஞாணா, விஞ்ஞாணஸமுத³யே அஞ்ஞாணா, விஞ்ஞாணனிரோதே⁴ அஞ்ஞாணா, விஞ்ஞாணனிரோத⁴கா³மினியா படிபதா³ய அஞ்ஞாணா; ஏவமிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வாதி. அயம் கோ², வச்ச², ஹேது, அயம் பச்சயோ, யானிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வா’’தி. பஞ்சமம்.

6-10. ரூபஅத³ஸ்ஸனாதி³ஸுத்தபஞ்சகம்

612-616. ஸாவத்தி²னிதா³னம். ஏகமந்தம் நிஸின்னோ கோ² வச்ச²கோ³த்தோ பரிப்³பா³ஜகோ ப⁴க³வந்தம் ஏதத³வோச – ‘‘கோ நு கோ², போ⁴ கோ³தம, ஹேது, கோ பச்சயோ, யானிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வா’’தி? ரூபே கோ², வச்ச², அத³ஸ்ஸனா…பே… ரூபனிரோத⁴கா³மினியா படிபதா³ய அத³ஸ்ஸனா…பே… வேத³னாய … ஸஞ்ஞாய … ஸங்கா²ரேஸு கோ², வச்ச², அத³ஸ்ஸனா…பே… விஞ்ஞாணே கோ², வச்ச², அத³ஸ்ஸனா…பே… விஞ்ஞாணனிரோத⁴கா³மினியா படிபதா³ய அத³ஸ்ஸனா…பே…. த³ஸமம்.

11-15. ரூபஅனபி⁴ஸமயாதி³ஸுத்தபஞ்சகம்

617-621. ஸாவத்தி²னிதா³னம். ரூபே கோ², வச்ச², அனபி⁴ஸமயா…பே… ரூபனிரோத⁴கா³மினியா படிபதா³ய அனபி⁴ஸமயா…பே….

ஸாவத்தி²னிதா³னம். வேத³னாய கோ², வச்ச², அனபி⁴ஸமயா…பே….

ஸாவத்தி²னிதா³னம். ஸஞ்ஞாய கோ², வச்ச², அனபி⁴ஸமயா…பே….

ஸாவத்தி²னிதா³னம். ஸங்கா²ரேஸு கோ², வச்ச², அனபி⁴ஸமயா…பே….

ஸாவத்தி²னிதா³னம். விஞ்ஞாணே கோ², வச்ச², அனபி⁴ஸமயா…பே…. பன்னரஸமம்.

16-20. ரூபஅனனுபோ³தா⁴தி³ஸுத்தபஞ்சகம்

622-626. ஸாவத்தி²னிதா³னம். ஏகமந்தம் நிஸின்னோ கோ² வச்ச²கோ³த்தோ பரிப்³பா³ஜகோ ப⁴க³வந்தம் ஏதத³வோச – கோ நு கோ², போ⁴ கோ³தம, ஹேது, கோ பச்சயோ…பே… ரூபே கோ², வச்ச², அனனுபோ³தா⁴…பே… ரூபனிரோத⁴கா³மினியா படிபதா³ய அனனுபோ³தா⁴…பே….

ஸாவத்தி²னிதா³னம். வேத³னாய கோ², வச்ச²…பே….

ஸாவத்தி²னிதா³னம். ஸஞ்ஞாய கோ², வச்ச²…பே….

ஸாவத்தி²னிதா³னம். ஸங்கா²ரேஸு கோ², வச்ச²…பே….

ஸாவத்தி²னிதா³னம். விஞ்ஞாணே கோ², வச்ச² அனனுபோ³தா⁴…பே… விஞ்ஞாணனிரோத⁴கா³மினியா படிபதா³ய அனனுபோ³தா⁴. வீஸதிமம்.

21-25. ரூபஅப்படிவேதா⁴தி³ஸுத்தபஞ்சகம்

627-631. ஸாவத்தி²னிதா³னம். கோ நு கோ², போ⁴ கோ³தம, ஹேது, கோ பச்சயோ…பே…. ரூபே கோ², வச்ச², அப்படிவேதா⁴…பே… விஞ்ஞாணே கோ², வச்ச², அப்படிவேதா⁴…பே…. பஞ்சவீஸதிமம்.

26-30. ரூபஅஸல்லக்க²ணாதி³ஸுத்தபஞ்சகம்

632-636. ஸாவத்தி²னிதா³னம். ரூபே கோ², வச்ச², அஸல்லக்க²ணா…பே… விஞ்ஞாணே கோ², வச்ச², அஸல்லக்க²ணா…பே…. திம்ஸதிமம்.

31-35. ரூபஅனுபலக்க²ணாதி³ஸுத்தபஞ்சகம்

637-641. ஸாவத்தி²னிதா³னம். ரூபே கோ², வச்ச², அனுபலக்க²ணா…பே… விஞ்ஞாணே கோ², வச்ச², அனுபலக்க²ணா…பே…. பஞ்சதிம்ஸதிமம்.

36-40. ரூபஅப்பச்சுபலக்க²ணாதி³ஸுத்தபஞ்சகம்

642-646. ஸாவத்தி²னிதா³னம். ரூபே கோ², வச்ச², அப்பச்சுபலக்க²ணா…பே… விஞ்ஞாணே கோ², வச்ச², அப்பச்சுபலக்க²ணா…பே…. சத்தாலீஸமம்.

41-45. ரூபஅஸமபேக்க²ணாதி³ஸுத்தபஞ்சகம்

647-651. ஸாவத்தி²னிதா³னம். ரூபே கோ², வச்ச², அஸமபேக்க²ணா…பே… விஞ்ஞாணே கோ², வச்ச², அஸமபேக்க²ணா…பே…. பஞ்சசத்தாலீஸமம்.

46-50. ரூபஅப்பச்சுபேக்க²ணாதி³ஸுத்தபஞ்சகம்

652-656. ஸாவத்தி²னிதா³னம். ரூபே கோ², வச்ச², அப்பச்சுபேக்க²ணா…பே… விஞ்ஞாணே கோ², வச்ச², அப்பச்சுபேக்க²ணா…பே…. பஞ்ஞாஸமம்.

51-54. ரூபஅப்பச்சக்க²கம்மாதி³ஸுத்தசதுக்கம்

657-660. ஸாவத்தி²னிதா³னம். அத² கோ² வச்ச²கோ³த்தோ பரிப்³பா³ஜகோ யேன ப⁴க³வா தேனுபஸங்கமி; உபஸங்கமித்வா ப⁴க³வதா ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² வச்ச²கோ³த்தோ பரிப்³பா³ஜகோ ப⁴க³வந்தம் ஏதத³வோச – ‘‘கோ நு கோ², போ⁴ கோ³தம, ஹேது, கோ பச்சயோ, யானிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வா’’தி? ரூபே கோ², வச்ச², அப்பச்சக்க²கம்மா, ரூபஸமுத³யே அப்பச்சக்க²கம்மா, ரூபனிரோதே⁴ அப்பச்சக்க²கம்மா, ரூபனிரோத⁴கா³மினியா படிபதா³ய அப்பச்சக்க²கம்மா…பே….

ஸாவத்தி²னிதா³னம். வேத³னாய கோ², வச்ச², அப்பச்சக்க²கம்மா…பே… வேத³னானிரோத⁴கா³மினியா படிபதா³ய அப்பச்சக்க²கம்மா…பே….

ஸாவத்தி²னிதா³னம். ஸஞ்ஞாய கோ², வச்ச², அப்பச்சக்க²கம்மா…பே… ஸஞ்ஞானிரோத⁴கா³மினியா படிபதா³ய அப்பச்சக்க²கம்மா…பே….

ஸாவத்தி²னிதா³னம். ஸங்கா²ரேஸு கோ², வச்ச², அப்பச்சக்க²கம்மா…பே… ஸங்கா²ரனிரோத⁴கா³மினியா படிபதா³ய அப்பச்சக்க²கம்மா…பே…. சதுபஞ்ஞாஸமம்.

55. விஞ்ஞாணஅப்பச்சக்க²கம்மஸுத்தம்

661. ஸாவத்தி²னிதா³னம். ‘‘விஞ்ஞாணே கோ², வச்ச², அப்பச்சக்க²கம்மா, விஞ்ஞாணஸமுத³யே அப்பச்சக்க²கம்மா, விஞ்ஞாணனிரோதே⁴ அப்பச்சக்க²கம்மா, விஞ்ஞாணனிரோத⁴கா³மினியா படிபதா³ய அப்பச்சக்க²கம்மா; ஏவமிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா…பே… நேவ ஹோதி ந ந ஹோதி ததா²க³தோ பரம் மரணாதி வாதி. அயம் கோ², வச்ச², ஹேது, அயம் பச்சயோ, யானிமானி அனேகவிஹிதானி தி³ட்டி²க³தானி லோகே உப்பஜ்ஜந்தி – ஸஸ்ஸதோ லோகோதி வா, அஸஸ்ஸதோ லோகோதி வா, அந்தவா லோகோதி வா, அனந்தவா லோகோதி வா, தம் ஜீவம் தம் ஸரீரந்தி வா, அஞ்ஞம் ஜீவம் அஞ்ஞம் ஸரீரந்தி வா, ஹோதி ததா²க³தோ பரம் மரணாதி வா, ந ஹோதி ததா²க³தோ பரம் மரணாதி வா, ஹோதி ச ந ச ஹோதி ததா²க³தோ பரம் மரணாதி வா, நேவ ஹோதி ந ந ஹோதி ததா²க³தோ பரம் மரணாதி வா’’தி. பஞ்சபஞ்ஞாஸமம்.

வச்ச²கோ³த்தஸம்யுத்தம் ஸமத்தம்.