1. சக்கு²ஸுத்தம்

198. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி. அத² கோ² ஆயஸ்மா ராஹுலோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ஆயஸ்மந்தம் ராஹுலம் ப⁴க³வா ஏதத³வோச – ‘‘தம் கிம் மஞ்ஞஸி, ராஹுல, சக்கு²ம் நிச்சம் வா அனிச்சம் வா’’தி? ‘‘அனிச்சம், ப⁴ந்தே’’. ‘‘யம் பனானிச்சம், து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதம், ப⁴ந்தே’’. ‘‘ஸோதம்…பே… கா⁴னம்… ஜிவ்ஹா… காயோ… மனோ நிச்சோ வா அனிச்சோ வா’’தி? ‘‘அனிச்சோ, ப⁴ந்தே’’. ‘‘யம் பனானிச்சம், து³க்க²ம் வா தம் ஸுக²ம் வா’’தி? ‘‘து³க்க²ம், ப⁴ந்தே’’. ‘‘யம் பனானிச்சம் து³க்க²ம் விபரிணாமத⁴ம்மம், கல்லம் நு தம் ஸமனுபஸ்ஸிதும் – ‘ஏதம் மம, ஏஸோஹமஸ்மி, ஏஸோ மே அத்தா’’’தி? ‘‘நோ ஹேதம், ப⁴ந்தே’’. ‘‘ஏவம் பஸ்ஸம், ராஹுல, ஸுதவா அரியஸாவகோ சக்கு²ஸ்மிம்பி நிப்³பி³ந்த³தி…பே… ஸோதஸ்மிம்பி நிப்³பி³ந்த³தி… கா⁴னஸ்மிம்பி நிப்³பி³ந்த³தி … ஜிவ்ஹாயபி நிப்³பி³ந்த³தி… காயஸ்மிம்பி நிப்³பி³ந்த³தி… மனஸ்மிம்பி நிப்³பி³ந்த³தி; நிப்³பி³ந்த³ம் விரஜ்ஜதி; விராகா³ விமுச்சதி; விமுத்தஸ்மிம் விமுத்தமிதி ஞாணம் ஹோதி. ‘கீ²ணா ஜாதி, வுஸிதம் ப்³ரஹ்மசரியம், கதம் கரணீயம், நாபரம் இத்த²த்தாயா’தி பஜானாதீ’’தி. ஏதேன பேய்யாலேன த³ஸ ஸுத்தந்தா காதப்³பா³. பட²மம்.