3. ததியவக்³கோ³

1. மாதுகா³மஸுத்தம்

170. ஸாவத்தி²யம் விஹரதி…பே… ‘‘தா³ருணோ, பி⁴க்க²வே, லாப⁴ஸக்காரஸிலோகோ…பே… ந தஸ்ஸ, பி⁴க்க²வே, மாதுகா³மோ ஏகோ ஏகஸ்ஸ சித்தம் பரியாதா³ய திட்ட²தி யஸ்ஸ லாப⁴ஸக்காரஸிலோகோ சித்தம் பரியாதா³ய திட்ட²தி. ஏவம் தா³ருணோ கோ², பி⁴க்க²வே, லாப⁴ஸக்காரஸிலோகோ …பே… ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. பட²மம்.

2. கல்யாணீஸுத்தம்

171. ஸாவத்தி²யம் விஹரதி…பே… ‘‘தா³ருணோ, பி⁴க்க²வே, லாப⁴ஸக்காரஸிலோகோ…பே… ந தஸ்ஸ, பி⁴க்க²வே, ஜனபத³கல்யாணீ ஏகா ஏகஸ்ஸ சித்தம் பரியாதா³ய திட்ட²தி யஸ்ஸ லாப⁴ஸக்காரஸிலோகோ சித்தம் பரியாதா³ய திட்ட²தி. ஏவம் தா³ருணோ கோ², பி⁴க்க²வே, லாப⁴ஸக்காரஸிலோகோ…பே… ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. து³தியம்.

3. ஏகபுத்தகஸுத்தம்

172. ஸாவத்தி²யம் விஹரதி…பே… ‘‘தா³ருணோ, பி⁴க்க²வே, லாப⁴ஸக்காரஸிலோகோ…பே… ஸத்³தா⁴, பி⁴க்க²வே, உபாஸிகா ஏகபுத்தகம் பியம் மனாபம் ஏவம் ஸம்மா ஆயாசமானா ஆயாசேய்ய – ‘தாதி³ஸோ, தாத, ப⁴வாஹி யாதி³ஸோ சித்தோ ச க³ஹபதி ஹத்த²கோ ச ஆளவகோ’தி. ஏஸா, பி⁴க்க²வே, துலா ஏதம் பமாணம் மம ஸாவகானம் உபாஸகானம், யதி³த³ம் சித்தோ ச க³ஹபதி ஹத்த²கோ ச ஆளவகோ. ஸசே கோ² த்வம், தாத, அகா³ரஸ்மா அனகா³ரியம் பப்³ப³ஜஸி; தாதி³ஸோ, தாத, ப⁴வாஹி யாதி³ஸா ஸாரிபுத்தமோக்³க³ல்லானாதி. ஏஸா, பி⁴க்க²வே, துலா ஏதம் பமாணம் மம ஸாவகானம் பி⁴க்கூ²னம், யதி³த³ம் ஸாரிபுத்தமோக்³க³லானா. மா ச கோ² த்வம், தாத, ஸேக²ம் அப்பத்தமானஸம் லாப⁴ஸக்காரஸிலோகோ அனுபாபுணாதூதி. தஞ்சே, பி⁴க்க²வே, பி⁴க்கு²ம் ஸேக²ம் அப்பத்தமானஸம் லாப⁴ஸக்காரஸிலோகோ அனுபாபுணாதி, ஸோ தஸ்ஸ ஹோதி அந்தராயாய. ஏவம் தா³ருணோ கோ², பி⁴க்க²வே, லாப⁴ஸக்காரஸிலோகோ…பே… ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. ததியம்.

4. ஏகதீ⁴துஸுத்தம்

173. ஸாவத்தி²யம் விஹரதி…பே… ‘‘தா³ருணோ, பி⁴க்க²வே, லாப⁴ஸக்காரஸிலோகோ…பே… ஸத்³தா⁴ பி⁴க்க²வே உபாஸிகா ஏகம் தீ⁴தரம் பியம் மனாபம் ஏவம் ஸம்மா ஆயாசமானா ஆயாசேய்ய – ‘தாதி³ஸா, அய்யே, ப⁴வாஹி யாதி³ஸா கு²ஜ்ஜுத்தரா ச உபாஸிகா வேளுகண்ட³கியா [வேளுகண்ட³கீ (ஸீ. ச²க்கங்கு³த்தரேபி)] ச நந்த³மாதா’தி. ஏஸா, பி⁴க்க²வே, துலா ஏதம் பமாணம் மம ஸாவிகானம் உபாஸிகானம், யதி³த³ம் கு²ஜ்ஜுத்தரா ச உபாஸிகா வேளுகண்ட³கியா ச நந்த³மாதா. ஸசே கோ² த்வம், அய்யே, அகா³ரஸ்மா அனகா³ரியம் பப்³ப³ஜஸி; தாதி³ஸா, அய்யே, ப⁴வாஹி யாதி³ஸா கே²மா ச பி⁴க்கு²னீ உப்பலவண்ணா சாதி. ஏஸா, பி⁴க்க²வே, துலா ஏதம் பமாணம் மம ஸாவிகானம் பி⁴க்கு²னீனம், யதி³த³ம் கே²மா ச பி⁴க்கு²னீ உப்பலவண்ணா ச. மா ச கோ² த்வம், அய்யே, ஸேக²ம் அப்பத்தமானஸம் லாப⁴ஸக்காரஸிலோகோ அனுபாபுணாதூதி. தம் சே, பி⁴க்க²வே, பி⁴க்கு²னிம் ஸேக²ம் அப்பத்தமானஸம் லாப⁴ஸக்காரஸிலோகோ அனுபாபுணாதி, ஸோ தஸ்ஸா ஹோதி அந்தராயாய. ஏவம் தா³ருணோ கோ², பி⁴க்க²வே, லாப⁴ஸக்காரஸிலோகோ…பே… ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. சதுத்த²ம்.

5. ஸமணப்³ராஹ்மணஸுத்தம்

174. ஸாவத்தி²யம் விஹரதி…பே… ‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா லாப⁴ஸக்காரஸிலோகஸ்ஸ அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானந்தி, ந மே தே, பி⁴க்க²வே, ஸமணா வா ப்³ராஹ்மணா வா ஸமணேஸு வா ஸமணஸம்மதா ப்³ராஹ்மணேஸு வா ப்³ராஹ்மணஸம்மதா, ந ச பன தே ஆயஸ்மந்தா ஸாமஞ்ஞத்த²ம் வா ப்³ரஹ்மஞ்ஞத்த²ம் வா தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தி. யே ச கோ² கேசி, பி⁴க்க²வே, ஸமணா வா ப்³ராஹ்மணா வா லாப⁴ஸக்காரஸிலோகஸ்ஸ அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் பஜானந்தி, தே ச கோ² மே, பி⁴க்க²வே, ஸமணா வா ப்³ராஹ்மணா வா ஸமணேஸு சேவ ஸமணஸம்மதா ப்³ராஹ்மணேஸு ச ப்³ராஹ்மணஸம்மதா, தே ச பனாயஸ்மந்தோ ஸாமஞ்ஞத்த²ஞ்ச ப்³ரஹ்மஞ்ஞத்த²ஞ்ச தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. பஞ்சமம்.

6. து³தியஸமணப்³ராஹ்மணஸுத்தம்

175. ஸாவத்தி²யம் விஹரதி…பே… ‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா லாப⁴ஸக்காரஸிலோகஸ்ஸ ஸமுத³யஞ்ச அத்த²ங்க³மஞ்ச அஸ்ஸாத³ஞ்ச ஆதீ³னவஞ்ச நிஸ்ஸரணஞ்ச யதா²பூ⁴தம் நப்பஜானந்தி…பே… பஜானந்தி…பே… ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. ச²ட்ட²ம்.

7. ததியஸமணப்³ராஹ்மணஸுத்தம்

176. ஸாவத்தி²யம் விஹரதி…பே… ‘‘யே ஹி கேசி, பி⁴க்க²வே, ஸமணா வா ப்³ராஹ்மணா வா லாப⁴ஸக்காரஸிலோகம் யதா²பூ⁴தம் நப்பஜானந்தி, லாப⁴ஸக்காரஸிலோகஸமுத³யம் நப்பஜானந்தி, லாப⁴ஸக்காரஸிலோகனிரோத⁴ம் நப்பஜானந்தி, லாப⁴ஸக்காரஸிலோகனிரோத⁴கா³மினிம் படிபத³ம் நப்பஜானந்தி …பே… பஜானந்தி…பே… ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரந்தீ’’தி. ஸத்தமம்.

8. ச²விஸுத்தம்

177. ஸாவத்தி²யம் விஹரதி…பே… ‘‘தா³ருணோ, பி⁴க்க²வே, லாப⁴ஸக்காரஸிலோகோ. லாப⁴ஸக்காரஸிலோகோ, பி⁴க்க²வே, ச²விம் சி²ந்த³தி, ச²விம் சே²த்வா சம்மம் சி²ந்த³தி, சம்மம் சே²த்வா மம்ஸம் சி²ந்த³தி, மம்ஸம் சே²த்வா ந்ஹாரும் சி²ந்த³தி, ந்ஹாரும் சே²த்வா அட்டி²ம் சி²ந்த³தி, அட்டி²ம் சே²த்வா அட்டி²மிஞ்ஜம் ஆஹச்ச திட்ட²தி. ஏவம் தா³ருணோ கோ², பி⁴க்க²வே, லாப⁴ஸக்காரஸிலோகோ…பே… ஏவஞ்ஹி வோ பி⁴க்க²வே, ஸிக்கி²தப்³ப³’’ந்தி. அட்ட²மம்.

9. ரஜ்ஜுஸுத்தம்

178. ஸாவத்தி²யம் விஹரதி…பே… ‘‘தா³ருணோ, பி⁴க்க²வே, லாப⁴ஸக்காரஸிலோகோ. லாப⁴ஸக்காரஸிலோகோ, பி⁴க்க²வே, ச²விம் சி²ந்த³தி, ச²விம் சே²த்வா சம்மம் சி²ந்த³தி, சம்மம் சே²த்வா மம்ஸம் சி²ந்த³தி, மம்ஸம் சே²த்வா ந்ஹாரும் சி²ந்த³தி, ந்ஹாரும் சே²த்வா அட்டி²ம் சி²ந்த³தி, அட்டி²ம் சே²த்வா அட்டி²மிஞ்ஜம் ஆஹச்ச திட்ட²தி’’.

‘‘ஸேய்யதா²பி, பி⁴க்க²வே, ப³லவா புரிஸோ த³ள்ஹாய வாளரஜ்ஜுயா ஜங்க⁴ம் வேடே²த்வா க⁴ம்ஸேய்ய. ஸா ச²விம் சி²ந்தே³ய்ய, ச²விம் சே²த்வா சம்மம் சி²ந்தே³ய்ய, சம்மம் சே²த்வா மம்ஸம் சி²ந்தே³ய்ய, மம்ஸம் சே²த்வா ந்ஹாரும் சி²ந்தே³ய்ய, ந்ஹாரும் சே²த்வா அட்டி²ம் சி²ந்தே³ய்ய, அட்டி²ம் சே²த்வா அட்டி²மிஞ்ஜம் ஆஹச்ச திட்டே²ய்ய. ஏவமேவ கோ², பி⁴க்க²வே, லாப⁴ஸக்காரஸிலோகோ ச²விம் சி²ந்த³தி, ச²விம் சே²த்வா சம்மம் சி²ந்த³தி, சம்மம் சே²த்வா மம்ஸம் சி²ந்த³தி, மம்ஸம் சே²த்வா ந்ஹாரும் சி²ந்த³தி, ந்ஹாரும் சே²த்வா அட்டி²ம் சி²ந்த³தி, அட்டி²ம் சே²த்வா அட்டி²ம்மிஞ்ஜம் ஆஹச்ச திட்ட²தி. ஏவம் தா³ருணோ கோ², பி⁴க்க²வே, லாப⁴ஸக்காரஸிலோகோ…பே… ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. நவமம்.

10. பி⁴க்கு²ஸுத்தம்

179. ஸாவத்தி²யம் விஹரதி…பே… ‘‘யோபி ஸோ, பி⁴க்க²வே, பி⁴க்கு² அரஹம் கீ²ணாஸவோ தஸ்ஸபாஹம் லாப⁴ஸக்காரஸிலோகோ அந்தராயாய வதா³மீ’’தி. ஏவம் வுத்தே, ஆயஸ்மா ஆனந்தோ³ ப⁴க³வந்தம் ஏதத³வோச – ‘‘கிஸ்ஸ பன, ப⁴ந்தே, கீ²ணாஸவஸ்ஸ பி⁴க்கு²னோ லாப⁴ஸக்காரஸிலோகோ அந்தராயாயா’’தி? ‘‘யா ஹிஸ்ஸ ஸா, ஆனந்த³, அகுப்பா சேதோவிமுத்தி நாஹம் தஸ்ஸா லாப⁴ஸக்காரஸிலோகம் அந்தராயாய வதா³மி. யே ச க்²வஸ்ஸ, ஆனந்த³, அப்பமத்தஸ்ஸ ஆதாபினோ பஹிதத்தஸ்ஸ விஹரதோ தி³ட்ட²த⁴ம்மஸுக²விஹாரா அதி⁴க³தா தேஸாஹமஸ்ஸ லாப⁴ஸக்காரஸிலோகம் அந்தராயாய வதா³மி. ஏவம் தா³ருணோ கோ², ஆனந்த³, லாப⁴ஸக்காரஸிலோகோ கடுகோ ப²ருஸோ அந்தராயிகோ அனுத்தரஸ்ஸ யோக³க்கே²மஸ்ஸ அதி⁴க³மாய. தஸ்மாதிஹானந்த³, ஏவம் ஸிக்கி²தப்³ப³ம் – ‘உப்பன்னம் லாப⁴ஸக்காரஸிலோகம் பஜஹிஸ்ஸாம, ந ச நோ உப்பன்னோ லாப⁴ஸக்காரஸிலோகோ சித்தம் பரியாதா³ய ட²ஸ்ஸதீ’தி. ஏவஞ்ஹி வோ, ஆனந்த³, ஸிக்கி²தப்³ப³’’ந்தி. த³ஸமம்.

ததியோ வக்³கோ³.

தஸ்ஸுத்³தா³னம் –

மாதுகா³மோ ச கல்யாணீ, புத்தோ ச ஏகதீ⁴து ச;

ஸமணப்³ராஹ்மணா தீணி, ச²வி ரஜ்ஜு ச பி⁴க்கு²னாதி.