9. வேரம்ப⁴ஸுத்தம்

165. ஸாவத்தி²யம் விஹரதி…பே… ‘‘தா³ருணோ, பி⁴க்க²வே, லாப⁴ஸக்காரஸிலோகோ…பே… அதி⁴க³மாய. உபரி, பி⁴க்க²வே, ஆகாஸே வேரம்பா⁴ [வேரம்பா³ (ஸீ. பீ.)] நாம வாதா வாயந்தி. தத்த² யோ பக்கீ² க³ச்ச²தி தமேனம் வேரம்பா⁴ வாதா கி²பந்தி. தஸ்ஸ வேரம்ப⁴வாதக்கி²த்தஸ்ஸ அஞ்ஞேனேவ பாதா³ க³ச்ச²ந்தி, அஞ்ஞேன பக்கா² க³ச்ச²ந்தி, அஞ்ஞேன ஸீஸம் க³ச்ச²தி, அஞ்ஞேன காயோ க³ச்ச²தி. ஏவமேவ கோ², பி⁴க்க²வே, இதே⁴கச்சோ பி⁴க்கு² லாப⁴ஸக்காரஸிலோகேன அபி⁴பூ⁴தோ பரியாதி³ண்ணசித்தோ புப்³ப³ண்ஹஸமயம் நிவாஸேத்வா பத்தசீவரமாதா³ய கா³மம் வா நிக³மம் வா பிண்டா³ய பவிஸதி அரக்கி²தேனேவ காயேன அரக்கி²தாய வாசாய அரக்கி²தேன சித்தேன, அனுபட்டி²தாய ஸதியா, அஸம்வுதேஹி இந்த்³ரியேஹி. ஸோ தத்த² பஸ்ஸதி மாதுகா³மம் து³ன்னிவத்த²ம் வா து³ப்பாருதம் வா. தஸ்ஸ மாதுகா³மம் தி³ஸ்வா து³ன்னிவத்த²ம் வா து³ப்பாருதம் வா ராகோ³ சித்தம் அனுத்³த⁴ம்ஸேதி. ஸோ ராகா³னுத்³த⁴ம்ஸிதேன சித்தேன ஸிக்க²ம் பச்சக்கா²ய ஹீனாயாவத்ததி. தஸ்ஸ அஞ்ஞே சீவரம் ஹரந்தி, அஞ்ஞே பத்தம் ஹரந்தி, அஞ்ஞே நிஸீத³னம் ஹரந்தி, அஞ்ஞே ஸூசிக⁴ரம் ஹரந்தி, வேரம்ப⁴வாதக்கி²த்தஸ்ஸேவ ஸகுணஸ்ஸ. ஏவம் தா³ருணோ கோ², பி⁴க்க²வே, லாப⁴ஸக்காரஸிலோகோ…பே… ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. நவமம்.