5. மீள்ஹகஸுத்தம்

161. ஸாவத்தி²யம் விஹரதி…பே… ‘‘தா³ருணோ, பி⁴க்க²வே, லாப⁴ஸக்காரஸிலோகோ…பே… அதி⁴க³மாய. ஸேய்யதா²பி, பி⁴க்க²வே, மீள்ஹகா கூ³தா²தீ³ கூ³த²பூரா புண்ணா கூ³த²ஸ்ஸ. புரதோ சஸ்ஸ மஹாகூ³த²புஞ்ஜோ. ஸா தேன அஞ்ஞா மீள்ஹகா அதிமஞ்ஞேய்ய – ‘அஹம்ஹி கூ³தா²தீ³ கூ³த²பூரா புண்ணா கூ³த²ஸ்ஸ, புரதோ ச ம்யாயம் மஹாகூ³த²புஞ்ஜோ’தி. ஏவமேவ கோ², பி⁴க்க²வே, இதே⁴கச்சோ பி⁴க்கு² லாப⁴ஸக்காரஸிலோகேன அபி⁴பூ⁴தோ பரியாதி³ண்ணசித்தோ புப்³ப³ண்ஹஸமயம் நிவாஸேத்வா பத்தசீவரமாதா³ய கா³மம் வா நிக³மம் வா பிண்டா³ய பவிஸதி. ஸோ தத்த² பு⁴த்தாவீ ச ஹோதி யாவத³த்தோ², நிமந்திதோ ச ஸ்வாதனாய, பிண்ட³பாதோ சஸ்ஸ பூரோ. ஸோ ஆராமம் க³ந்த்வா பி⁴க்கு²க³ணஸ்ஸ மஜ்ஜே² விகத்த²தி – ‘பு⁴த்தாவீ சம்ஹி யாவத³த்தோ², நிமந்திதோ சம்ஹி ஸ்வாதனாய, பிண்ட³பாதோ ச ம்யாயம் பூரோ, லாபீ⁴ சம்ஹி சீவர-பிண்ட³பாத-ஸேனாஸன-கி³லானப்பச்சய-பே⁴ஸஜ்ஜபரிக்கா²ரானம், இமே பனஞ்ஞே பி⁴க்கூ² அப்பபுஞ்ஞா அப்பேஸக்கா² ந லாபி⁴னோ சீவர-பிண்ட³பாதஸேனாஸன-கி³லானப்பச்சய-பே⁴ஸஜ்ஜ-பரிக்கா²ரான’ந்தி. ஸோ தேன லாப⁴ஸக்காரஸிலோகேன அபி⁴பூ⁴தோ பரியாதி³ண்ணசித்தோ அஞ்ஞே பேஸலே பி⁴க்கூ² அதிமஞ்ஞதி. தஞ்ஹி தஸ்ஸ, பி⁴க்க²வே, மோக⁴புரிஸஸ்ஸ ஹோதி தீ³க⁴ரத்தம் அஹிதாய து³க்கா²ய. ஏவம் தா³ருணோ கோ², பி⁴க்க²வே, லாப⁴ஸக்காரஸிலோகோ…பே… ஏவஞ்ஹி வோ பி⁴க்க²வே, ஸிக்கி²தப்³ப³’’ந்தி. பஞ்சமம்.