2. ப³ளிஸஸுத்தம்

158. ஸாவத்தி²யம் விஹரதி…பே… ‘‘தா³ருணோ, பி⁴க்க²வே, லாப⁴ஸக்காரஸிலோகோ கடுகோ ப²ருஸோ அந்தராயிகோ அனுத்தரஸ்ஸ யோக³க்கே²மஸ்ஸ அதி⁴க³மாய. ஸேய்யதா²பி, பி⁴க்க²வே, பா³ளிஸிகோ ஆமிஸக³தம் ப³ளிஸம் க³ம்பீ⁴ரே உத³கரஹதே³ பக்கி²பேய்ய. தமேனம் அஞ்ஞதரோ ஆமிஸசக்கு² மச்சோ² கி³லேய்ய. ஏவஞ்ஹி ஸோ, பி⁴க்க²வே, மச்சோ² கி³லப³ளிஸோ பா³ளிஸிகஸ்ஸ அனயம் ஆபன்னோ ப்³யஸனம் ஆபன்னோ யதா²காமகரணீயோ பா³ளிஸிகஸ்ஸ’’.

‘‘பா³ளிஸிகோதி கோ², பி⁴க்க²வே, மாரஸ்ஸேதம் பாபிமதோ அதி⁴வசனம். ப³ளிஸந்தி கோ², பி⁴க்க²வே, லாப⁴ஸக்காரஸிலோகஸ்ஸேதம் அதி⁴வசனம். யோ ஹி கோசி, பி⁴க்க²வே, பி⁴க்கு² உப்பன்னம் லாப⁴ஸக்காரஸிலோகம் அஸ்ஸாதே³தி நிகாமேதி, அயம் வுச்சதி, பி⁴க்க²வே, பி⁴க்கு² கி³லப³ளிஸோ மாரஸ்ஸ அனயம் ஆபன்னோ ப்³யஸனம் ஆபன்னோ யதா²காமகரணீயோ பாபிமதோ. ஏவம் தா³ருணோ கோ², பி⁴க்க²வே, லாப⁴ஸக்காரஸிலோகோ கடுகோ ப²ருஸோ அந்தராயிகோ அனுத்தரஸ்ஸ யோக³க்கே²மஸ்ஸ அதி⁴க³மாய. தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘உப்பன்னம் லாப⁴ஸக்காரஸிலோகம் பஜஹிஸ்ஸாம, ந ச நோ உப்பன்னோ லாப⁴ஸக்காரஸிலோகோ சித்தம் பரியாதா³ய ட²ஸ்ஸதீ’தி. ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி. து³தியம்.