5. கஸ்ஸபஸம்யுத்தம்

1. ஸந்துட்ட²ஸுத்தம்

144. ஸாவத்தி²யம் விஹரதி…பே… ‘‘ஸந்துட்டா²யம் [ஸந்துட்டோ²யம் (ஸீ.)], பி⁴க்க²வே, கஸ்ஸபோ இதரீதரேன சீவரேன, இதரீதரசீவரஸந்துட்டி²யா ச வண்ணவாதீ³; ந ச சீவரஹேது அனேஸனம் அப்பதிரூபம் ஆபஜ்ஜதி; அலத்³தா⁴ ச சீவரம் ந பரிதஸ்ஸதி; லத்³தா⁴ ச சீவரம் அக³தி⁴தோ [அக³தி²தோ (ஸீ.)] அமுச்சி²தோ அனஜ்ஜா²பன்னோ ஆதீ³னவத³ஸ்ஸாவீ நிஸ்ஸரணபஞ்ஞோ பரிபு⁴ஞ்ஜதி’’.

‘‘ஸந்துட்டா²யம், பி⁴க்க²வே, கஸ்ஸபோ இதரீதரேன பிண்ட³பாதேன, இதரீதரபிண்ட³பாதஸந்துட்டி²யா ச வண்ணவாதீ³; ந ச பிண்ட³பாதஹேது அனேஸனம் அப்பதிரூபம் ஆபஜ்ஜதி; அலத்³தா⁴ ச பிண்ட³பாதம் ந பரிதஸ்ஸதி; லத்³தா⁴ ச பிண்ட³பாதம் அக³தி⁴தோ அமுச்சி²தோ அனஜ்ஜா²பன்னோ ஆதீ³னவத³ஸ்ஸாவீ நிஸ்ஸரணபஞ்ஞோ பரிபு⁴ஞ்ஜதி.

‘‘ஸந்துட்டா²யம், பி⁴க்க²வே, கஸ்ஸபோ இதரீதரேன ஸேனாஸனேன, இதரீதரஸேனாஸனஸந்துட்டி²யா ச வண்ணவாதீ³; ந ச ஸேனாஸனஹேது அனேஸனம் அப்பதிரூபம் ஆபஜ்ஜதி; அலத்³தா⁴ ச ஸேனாஸனம் ந பரிதஸ்ஸதி; லத்³தா⁴ ச ஸேனாஸனம் அக³தி⁴தோ அமுச்சி²தோ அனஜ்ஜா²பன்னோ ஆதீ³னவத³ஸ்ஸாவீ நிஸ்ஸரணபஞ்ஞோ பரிபு⁴ஞ்ஜதி.

‘‘ஸந்துட்டா²யம், பி⁴க்க²வே, கஸ்ஸபோ இதரீதரேன கி³லானப்பச்சயபே⁴ஸஜ்ஜபரிக்கா²ரேன, இதரீதரகி³லானப்பச்சயபே⁴ஸஜ்ஜபரிக்கா²ரஸந்துட்டி²யா ச வண்ணவாதீ³; ந ச கி³லானப்பச்சயபே⁴ஸஜ்ஜபரிக்கா²ரஹேது அனேஸனம் அப்பதிரூபம் ஆபஜ்ஜதி; அலத்³தா⁴ ச கி³லானப்பச்சயபே⁴ஸஜ்ஜபரிக்கா²ரம் ந பரிதஸ்ஸதி; லத்³தா⁴ ச கி³லானப்பச்சயபே⁴ஸஜ்ஜபரிக்கா²ரம் அக³தி⁴தோ அமுச்சி²தோ அனஜ்ஜா²பன்னோ ஆதீ³னவத³ஸ்ஸாவீ நிஸ்ஸரணபஞ்ஞோ பரிபு⁴ஞ்ஜதி.

‘‘தஸ்மாதிஹ, பி⁴க்க²வே, ஏவம் ஸிக்கி²தப்³ப³ம் – ‘ஸந்துட்டா² ப⁴விஸ்ஸாம இதரீதரேன சீவரேன, இதரீதரசீவரஸந்துட்டி²யா ச வண்ணவாதி³னோ; ந ச சீவரஹேது அனேஸனம் அப்பதிரூபம் ஆபஜ்ஜிஸ்ஸாம; அலத்³தா⁴ ச சீவரம் ந ச பரிதஸ்ஸிஸ்ஸாம; லத்³தா⁴ ச சீவரம் அக³தி⁴தா அமுச்சி²தா அனஜ்ஜா²பன்னா ஆதீ³னவத³ஸ்ஸாவினோ நிஸ்ஸரணபஞ்ஞா பரிபு⁴ஞ்ஜிஸ்ஸாம’’’. (ஏவம் ஸப்³ப³ம் காதப்³ப³ம்).

‘‘‘ஸந்துட்டா² ப⁴விஸ்ஸாம இதரீதரேன பிண்ட³பாதேன…பே… ஸந்துட்டா² ப⁴விஸ்ஸாம இதரீதரேன ஸேனாஸனேன…பே… ஸந்துட்டா² ப⁴விஸ்ஸாம இதரீதரேன கி³லானப்பச்சயபே⁴ஸஜ்ஜபரிக்கா²ரேன, இதரீதரகி³லானப்பச்சயபே⁴ஸஜ்ஜபரிக்கா²ரஸந்துட்டி²யா ச வண்ணவாதி³னோ; ந ச கி³லானப்பச்சயபே⁴ஸஜ்ஜபரிக்கா²ரஹேது அனேஸனம் அப்பதிரூபம் ஆபஜ்ஜிஸ்ஸாம அலத்³தா⁴ ச கி³லானப்பச்சயபே⁴ஸஜ்ஜபரிக்கா²ரம் ந பரிதஸ்ஸிஸ்ஸாம; லத்³தா⁴ ச கி³லானப்பச்சயபே⁴ஸஜ்ஜபரிக்கா²ரம் அக³தி⁴தா அமுச்சி²தா அனஜ்ஜா²பன்னா ஆதீ³னவத³ஸ்ஸாவினோ நிஸ்ஸரணபஞ்ஞா பரிபு⁴ஞ்ஜிஸ்ஸாமா’தி. ஏவஞ்ஹி வோ, பி⁴க்க²வே, ஸிக்கி²தப்³ப³ம். கஸ்ஸபேன வா ஹி வோ, பி⁴க்க²வே, ஓவதி³ஸ்ஸாமி யோ வா பனஸ்ஸ [யோ வா பன (ஸீ.), யோ வா (பீ.)] கஸ்ஸபஸதி³ஸோ, ஓவதி³தேஹி ச பன வோ தத²த்தாய படிபஜ்ஜிதப்³ப³’’ந்தி. பட²மம்.

2. அனோத்தப்பீஸுத்தம்

145. ஏவம் மே ஸுதம் – ஏகம் ஸமயம் ஆயஸ்மா ச மஹாகஸ்ஸபோ ஆயஸ்மா ச ஸாரிபுத்தோ பா³ராணஸியம் விஹரந்தி இஸிபதனே மிக³தா³யே. அத² கோ² ஆயஸ்மா ஸாரிபுத்தோ ஸாயன்ஹஸமயம் படிஸல்லானா வுட்டி²தோ யேனாயஸ்மா மஹாகஸ்ஸபோ தேனுபஸங்கமி; உபஸங்கமித்வா ஆயஸ்மதா மஹாகஸ்ஸபேன ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஸாரிபுத்தோ ஆயஸ்மந்தம் மஹாகஸ்ஸபம் ஏதத³வோச – ‘‘வுச்சதி ஹித³ம், ஆவுஸோ கஸ்ஸப, அனாதாபீ அனோத்தப்பீ அப⁴ப்³போ³ ஸம்போ³தா⁴ய அப⁴ப்³போ³ நிப்³பா³னாய அப⁴ப்³போ³ அனுத்தரஸ்ஸ யோக³க்கே²மஸ்ஸ அதி⁴க³மாய; ஆதாபீ ச கோ² ஓத்தப்பீ ப⁴ப்³போ³ ஸம்போ³தா⁴ய ப⁴ப்³போ³ நிப்³பா³னாய ப⁴ப்³போ³ அனுத்தரஸ்ஸ யோக³க்கே²மஸ்ஸ அதி⁴க³மாயா’’தி.

‘‘கித்தாவதா நு கோ², ஆவுஸோ, அனாதாபீ ஹோதி அனோத்தப்பீ அப⁴ப்³போ³ ஸம்போ³தா⁴ய அப⁴ப்³போ³ நிப்³பா³னாய அப⁴ப்³போ³ அனுத்தரஸ்ஸ யோக³க்கே²மஸ்ஸ அதி⁴க³மாய; கித்தாவதா ச பனாவுஸோ, ஆதாபீ ஹோதி ஓத்தப்பீ ப⁴ப்³போ³ ஸம்போ³தா⁴ய ப⁴ப்³போ³ நிப்³பா³னாய ப⁴ப்³போ³ அனுத்தரஸ்ஸ யோக³க்கே²மஸ்ஸ அதி⁴க³மாயா’’தி? ‘‘இதா⁴வுஸோ, பி⁴க்கு² ‘அனுப்பன்னா மே பாபகா அகுஸலா த⁴ம்மா உப்பஜ்ஜமானா அனத்தா²ய ஸம்வத்தேய்யு’ந்தி ந ஆதப்பம் கரோதி, ‘உப்பன்னா மே பாபகா அகுஸலா த⁴ம்மா அப்பஹீயமானா அனத்தா²ய ஸம்வத்தேய்யு’ந்தி ந ஆதப்பம் கரோதி, ‘அனுப்பன்னா மே குஸலா த⁴ம்மானுப்பஜ்ஜமானா அனத்தா²ய ஸம்வத்தேய்யு’ந்தி ந ஆதப்பம் கரோதி, ‘உப்பன்னா மே குஸலா த⁴ம்மா நிருஜ்ஜ²மானா அனத்தா²ய ஸம்வத்தேய்யு’ந்தி ந ஆதப்பம் கரோதி. ஏவம் கோ², ஆவுஸோ, அனாதாபீ ஹோதி’’.

‘‘கத²ஞ்சாவுஸோ, அனோத்தப்பீ ஹோதி? இதா⁴வுஸோ, பி⁴க்கு² ‘அனுப்பன்னா மே பாபகா அகுஸலா த⁴ம்மா உப்பஜ்ஜமானா அனத்தா²ய ஸம்வத்தேய்யு’ந்தி ந ஓத்தப்பதி, ‘உப்பன்னா மே பாபகா அகுஸலா த⁴ம்மா அப்பஹீயமானா அனத்தா²ய ஸம்வத்தேய்யு’ந்தி ந ஓத்தப்பதி, ‘அனுப்பன்னா மே குஸலா த⁴ம்மானுப்பஜ்ஜமானா அனத்தா²ய ஸம்வத்தேய்யு’ந்தி ந ஓத்தப்பதி, ‘உப்பன்னா மே குஸலா த⁴ம்மா நிருஜ்ஜ²மானா அனத்தா²ய ஸம்வத்தேய்யு’ந்தி ந ஓத்தப்பதி. ஏவம் கோ², ஆவுஸோ, அனோத்தப்பீ ஹோதி. ஏவம் கோ², ஆவுஸோ, அனாதாபீ அனோத்தப்பீ அப⁴ப்³போ³ ஸம்போ³தா⁴ய அப⁴ப்³போ³ நிப்³பா³னாய அப⁴ப்³போ³ அனுத்தரஸ்ஸ யோக³க்கே²மஸ்ஸ அதி⁴க³மாய.

‘‘கத²ஞ்சாவுஸோ, ஆதாபீ ஹோதி? இதா⁴வுஸோ, பி⁴க்கு² ‘அனுப்பன்னா மே பாபகா அகுஸலா த⁴ம்மா உப்பஜ்ஜமானா அனத்தா²ய ஸம்வத்தேய்யு’ந்தி ஆதப்பம் கரோதி, ‘உப்பன்னா மே பாபகா அகுஸலா த⁴ம்மா அப்பஹீயமானா அனத்தா²ய ஸம்வத்தேய்யு’ந்தி ஆதப்பம் கரோதி, அனுப்பன்னா மே குஸலா த⁴ம்மா…பே… ஆதப்பம் கரோதி. ஏவம் கோ², ஆவுஸோ, ஆதாபீ ஹோதி.

‘‘கத²ஞ்சாவுஸோ, ஓத்தப்பீ ஹோதி? இதா⁴வுஸோ, பி⁴க்கு² ‘அனுப்பன்னா மே பாபகா அகுஸலா த⁴ம்மா உப்பஜ்ஜமானா அனத்தா²ய ஸம்வத்தேய்யு’ந்தி ஓத்தப்பதி, ‘உப்பன்னா மே பாபகா அகுஸலா த⁴ம்மா அப்பஹீயமானா அனத்தா²ய ஸம்வத்தேய்யு’ந்தி ஓத்தப்பதி, ‘அனுப்பன்னா மே குஸலா த⁴ம்மா அனுப்பஜ்ஜமானா அனத்தா²ய ஸம்வத்தேய்யு’ந்தி ஓத்தப்பதி, ‘உப்பன்னா மே குஸலா த⁴ம்மா நிருஜ்ஜ²மானா அனத்தா²ய ஸம்வத்தேய்யு’ந்தி ஓத்தப்பதி. ஏவம் கோ², ஆவுஸோ, ஓத்தப்பீ ஹோதி. ஏவம் கோ², ஆவுஸோ, ஆதாபீ ஓத்தப்பீ ப⁴ப்³போ³ ஸம்போ³தா⁴ய ப⁴ப்³போ³ நிப்³பா³னாய ப⁴ப்³போ³ அனுத்தரஸ்ஸ யோக³க்கே²மஸ்ஸ அதி⁴க³மாயா’’தி. து³தியம்.

3. சந்தூ³பமஸுத்தம்

146. ஸாவத்தி²யம் விஹரதி…பே… ‘‘சந்தூ³பமா, பி⁴க்க²வே, குலானி உபஸங்கமத² – அபகஸ்ஸேவ காயம், அபகஸ்ஸ சித்தம், நிச்சனவகா குலேஸு அப்பக³ப்³பா⁴ [அப்பக³ப்³பா³ (க.)]. ஸேய்யதா²பி, பி⁴க்க²வே, புரிஸோ ஜருத³பானம் வா ஓலோகேய்ய பப்³ப³தவிஸமம் வா நதீ³விது³க்³க³ம் வா – அபகஸ்ஸேவ காயம், அபகஸ்ஸ சித்தம்; ஏவமேவ கோ², பி⁴க்க²வே, சந்தூ³பமா குலானி உபஸங்கமத² – அபகஸ்ஸேவ காயம், அபகஸ்ஸ சித்தம், நிச்சனவகா குலேஸு அப்பக³ப்³பா⁴’’.

‘‘கஸ்ஸபோ, பி⁴க்க²வே, சந்தூ³பமோ குலானி உபஸங்கமதி – அபகஸ்ஸேவ காயம், அபகஸ்ஸ சித்தம், நிச்சனவகோ குலேஸு அப்பக³ப்³போ⁴. தம் கிம் மஞ்ஞத², பி⁴க்க²வே, கத²ம்ரூபோ பி⁴க்கு² அரஹதி குலானி உபஸங்கமிது’’ந்தி? ‘‘ப⁴க³வம்மூலகா நோ, ப⁴ந்தே, த⁴ம்மா ப⁴க³வம்னேத்திகா ப⁴க³வம்படிஸரணா. ஸாது⁴ வத, ப⁴ந்தே, ப⁴க³வந்தம்யேவ படிபா⁴து ஏதஸ்ஸ பா⁴ஸிதஸ்ஸ அத்தோ². ப⁴க³வதோ ஸுத்வா பி⁴க்கூ² தா⁴ரேஸ்ஸந்தீ’’தி.

அத² கோ² ப⁴க³வா ஆகாஸே பாணிம் சாலேஸி. ‘‘ஸேய்யதா²பி, பி⁴க்க²வே, அயம் ஆகாஸே பாணி ந ஸஜ்ஜதி ந க³ய்ஹதி ந ப³ஜ்ஜ²தி; ஏவமேவ கோ², பி⁴க்க²வே, யஸ்ஸ கஸ்ஸசி பி⁴க்கு²னோ குலானி உபஸங்கமதோ குலேஸு சித்தம் ந ஸஜ்ஜதி ந க³ய்ஹதி ந ப³ஜ்ஜ²தி – ‘லப⁴ந்து லாப⁴காமா, புஞ்ஞகாமா கரோந்து புஞ்ஞானீ’தி; யதா²ஸகேன லாபே⁴ன அத்தமனோ ஹோதி ஸுமனோ, ஏவம் பரேஸம் லாபே⁴ன அத்தமனோ ஹோதி ஸுமனோ; ஏவரூபோ கோ², பி⁴க்க²வே, பி⁴க்கு² அரஹதி குலானி உபஸங்கமிதும்.

‘‘கஸ்ஸபஸ்ஸ, பி⁴க்க²வே, குலானி உபஸங்கமதோ குலேஸு சித்தம் ந ஸஜ்ஜதி ந க³ய்ஹதி ந ப³ஜ்ஜ²தி – ‘லப⁴ந்து லாப⁴காமா, புஞ்ஞகாமா கரோந்து புஞ்ஞானீ’தி; யதா²ஸகேன லாபே⁴ன அத்தமனோ ஹோதி ஸுமனோ; ஏவம் பரேஸம் லாபே⁴ன அத்தமனோ ஹோதி ஸுமனோ.

‘‘தம் கிம் மஞ்ஞத², பி⁴க்க²வே, கத²ம்ரூபஸ்ஸ பி⁴க்கு²னோ அபரிஸுத்³தா⁴ த⁴ம்மதே³ஸனா ஹோதி, கத²ம்ரூபஸ்ஸ பி⁴க்கு²னோ பரிஸுத்³தா⁴ த⁴ம்மதே³ஸனா ஹோதீ’’தி? ‘‘ப⁴க³வம்மூலகா நோ, ப⁴ந்தே, த⁴ம்மா ப⁴க³வம்னேத்திகா ப⁴க³வம்படிஸரணா. ஸாது⁴ வத, ப⁴ந்தே, ப⁴க³வந்தம்யேவ படிபா⁴து ஏதஸ்ஸ பா⁴ஸிதஸ்ஸ அத்தோ². ப⁴க³வதோ ஸுத்வா பி⁴க்கூ² தா⁴ரேஸ்ஸந்தீ’’தி. ‘‘தேன ஹி, பி⁴க்க²வே, ஸுணாத², ஸாது⁴கம் மனஸி கரோத²; பா⁴ஸிஸ்ஸாமீ’’தி. ‘‘ஏவம், ப⁴ந்தே’’தி கோ² தே பி⁴க்கூ² ப⁴க³வதோ பச்சஸ்ஸோஸும். ப⁴க³வா ஏதத³வோச –

‘‘யோ ஹி கோசி, பி⁴க்க²வே, பி⁴க்கு² ஏவம்சித்தோ பரேஸம் த⁴ம்மம் தே³ஸேதி – ‘அஹோ வத மே த⁴ம்மம் ஸுணேய்யும், ஸுத்வா ச பன த⁴ம்மம் பஸீதே³ய்யும், பஸன்னா ச மே பஸன்னாகாரம் கரேய்யு’ந்தி; ஏவரூபஸ்ஸ கோ², பி⁴க்க²வே, பி⁴க்கு²னோ அபரிஸுத்³தா⁴ த⁴ம்மதே³ஸனா ஹோதி.

‘‘யோ ச கோ², பி⁴க்க²வே, பி⁴க்கு² ஏவம்சித்தோ பரேஸம் த⁴ம்மம் தே³ஸேதி – ‘ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீதி [விஞ்ஞூஹி (?)]. அஹோ, வத மே த⁴ம்மம் ஸுணேய்யும், ஸுத்வா ச பன த⁴ம்மம் ஆஜானேய்யும், ஆஜானித்வா ச பன தத²த்தாய படிபஜ்ஜேய்யு’ந்தி. இதி த⁴ம்மஸுத⁴ம்மதம் படிச்ச பரேஸம் த⁴ம்மம் தே³ஸேதி, காருஞ்ஞம் படிச்ச அனுத்³த³யம் [அனுத³யம் (ப³ஹூஸு) த்³வித்தகாரணம் பன க³வேஸிதப்³ப³ம்] படிச்ச அனுகம்பம் உபாதா³ய பரேஸம் த⁴ம்மம் தே³ஸேதி. ஏவரூபஸ்ஸ கோ², பி⁴க்க²வே, பி⁴க்கு²னோ பரிஸுத்³தா⁴ த⁴ம்மதே³ஸனா ஹோதி.

‘‘கஸ்ஸபோ, பி⁴க்க²வே, ஏவம்சித்தோ பரேஸம் த⁴ம்மம் தே³ஸேதி – ‘ஸ்வாக்கா²தோ ப⁴க³வதா த⁴ம்மோ ஸந்தி³ட்டி²கோ அகாலிகோ ஏஹிபஸ்ஸிகோ ஓபனேய்யிகோ பச்சத்தம் வேதி³தப்³போ³ விஞ்ஞூஹீதி. அஹோ, வத மே த⁴ம்மம் ஸுணேய்யும், ஸுத்வா ச பன த⁴ம்மம் ஆஜானேய்யும், ஆஜானித்வா ச பன தத²த்தாய படிபஜ்ஜேய்யு’ந்தி. இதி த⁴ம்மஸுத⁴ம்மதம் படிச்ச பரேஸம் த⁴ம்மம் தே³ஸேதி, காருஞ்ஞம் படிச்ச அனுத்³த³யம் படிச்ச அனுகம்பம் உபாதா³ய பரேஸம் த⁴ம்மம் தே³ஸேதி. கஸ்ஸபேன வா ஹி வோ, பி⁴க்க²வே, ஓவதி³ஸ்ஸாமி யோ வா பனஸ்ஸ கஸ்ஸபஸதி³ஸோ, ஓவதி³தேஹி ச பன வோ தத²த்தாய படிபஜ்ஜிதப்³ப³’’ந்தி. ததியம்.

4. குலூபகஸுத்தம்

147. ஸாவத்தி²யம் விஹரதி…பே… ‘‘தம் கிம் மஞ்ஞத², பி⁴க்க²வே, கத²ம்ரூபோ பி⁴க்கு² அரஹதி குலூபகோ ஹோதும், கத²ம்ரூபோ பி⁴க்கு² ந அரஹதி குலூபகோ ஹோது’’ந்தி? ப⁴க³வம்மூலகா நோ, ப⁴ந்தே, த⁴ம்மா…பே… ப⁴க³வா ஏதத³வோச –

‘‘யோ ஹி கோசி, பி⁴க்க²வே, பி⁴க்கு² ஏவம்சித்தோ குலானி உபஸங்கமதி – ‘தே³ந்துயேவ மே, மா நாத³ம்ஸு; ப³ஹுகஞ்ஞேவ மே தே³ந்து, மா தோ²கம்; பணீதஞ்ஞேவ மே தே³ந்து, மா லூக²ம்; ஸீக⁴ஞ்ஞேவ மே தே³ந்து, மா த³ந்த⁴ம்; ஸக்கச்சஞ்ஞேவ மே தே³ந்து, மா அஸக்கச்ச’ந்தி. தஸ்ஸ சே, பி⁴க்க²வே, பி⁴க்கு²னோ ஏவம்சித்தஸ்ஸ குலானி உபஸங்கமதோ ந தே³ந்தி, தேன பி⁴க்கு² ஸந்தீ³யதி; ஸோ ததோனிதா³னம் து³க்க²ம் தோ³மனஸ்ஸம் படிஸம்வேத³யதி. தோ²கம் தே³ந்தி, நோ ப³ஹுகம்…பே… லூக²ம் தே³ந்தி, நோ பணீதம்… த³ந்த⁴ம் தே³ந்தி, நோ ஸீக⁴ம், தேன பி⁴க்கு² ஸந்தீ³யதி; ஸோ ததோனிதா³னம் து³க்க²ம் தோ³மனஸ்ஸம் படிஸம்வேத³யதி. அஸக்கச்சம் தே³ந்தி, நோ ஸக்கச்சம்; தேன பி⁴க்கு² ஸந்தீ³யதி; ஸோ ததோனிதா³னம் து³க்க²ம் தோ³மனஸ்ஸம் படிஸம்வேத³யதி. ஏவரூபோ கோ², பி⁴க்க²வே, பி⁴க்கு² ந அரஹதி கூலூபகோ ஹோதும்.

‘‘யோ ச கோ², பி⁴க்க²வே, பி⁴க்கு² ஏவம்சித்தோ குலானி உபஸங்கமதி – ‘தம் குதேத்த² லப்³பா⁴ பரகுலேஸு – தே³ந்துயேவ மே, மா நாத³ம்ஸு; ப³ஹுகஞ்ஞேவ மே தே³ந்து, மா தோ²கம்; பணீதஞ்ஞேவ மே தே³ந்து, மா லூக²ம்; தீ³க⁴ஞ்ஞேவ மே தே³ந்து, மா த³ந்த⁴ம்; ஸக்கச்சஞ்ஞேவ மே தே³ந்து, மா அஸக்கச்ச’ந்தி. தஸ்ஸ சே, பி⁴க்க²வே, பி⁴க்கு²னோ ஏவம்சித்தஸ்ஸ குலானி உபஸங்கமதோ ந தே³ந்தி; தேன பி⁴க்கு² ந ஸந்தீ³யதி; ஸோ ந ததோனிதா³னம் து³க்க²ம் தோ³மனஸ்ஸம் படிஸம்வேத³யதி. தோ²கம் தே³ந்தி, நோ ப³ஹுகம்; தேன பி⁴க்கு² ந ஸந்தீ³யதி; ஸோ ந ததோனிதா³னம் து³க்க²ம் தோ³மனஸ்ஸம் படிஸம்வேத³யதி. லூக²ம் தே³ந்தி, நோ பணீதம்; தேன பி⁴க்கு² ந ஸந்தீ³யதி; ஸோ ந ததோனிதா³னம் து³க்க²ம் தோ³மனஸ்ஸம் படிஸம்வேத³யதி. த³ந்த⁴ம் தே³ந்தி, நோ ஸீக⁴ம்; தேன பி⁴க்கு² ந ஸந்தீ³யதி; ஸோ ந ததோனிதா³னம் து³க்க²ம் தோ³மனஸ்ஸம் படிஸம்வேத³யதி. அஸக்கச்சம் தே³ந்தி, நோ ஸக்கச்சம்; தேன பி⁴க்கு² ந ஸந்தீ³யதி; ஸோ ந ததோனிதா³னம் து³க்க²ம் தோ³மனஸ்ஸம் படிஸம்வேத³யதி. ஏவரூபோ கோ², பி⁴க்க²வே, பி⁴க்கு² அரஹதி குலூபகோ ஹோதும்.

‘‘கஸ்ஸபோ, பி⁴க்க²வே, ஏவம்சித்தோ குலானி உபஸங்கமதி – ‘தம் குதேத்த² லப்³பா⁴ பரகுலேஸு – தே³ந்துயேவ மே, மா நாத³ம்ஸு; ப³ஹுகஞ்ஞேவ மே தே³ந்து, மா தோ²கம்; பணீதஞ்ஞேவ மே தே³ந்து, மா லூக²ம்; ஸீக⁴ஞ்ஞேவ மே தே³ந்து, மா த³ந்த⁴ம்; ஸக்கச்சஞ்ஞேவ மே தே³ந்து, மா அஸக்கச்ச’ந்தி. தஸ்ஸ சே, பி⁴க்க²வே, கஸ்ஸபஸ்ஸ ஏவம்சித்தஸ்ஸ குலானி உபஸங்கமதோ ந தே³ந்தி; தேன கஸ்ஸபோ ந ஸந்தீ³யதி; ஸோ ந ததோனிதா³னம் து³க்க²ம் தோ³மனஸ்ஸம் படிஸம்வேத³யதி. தோ²கம் தே³ந்தி, நோ ப³ஹுகம்; தேன கஸ்ஸபோ ந ஸந்தீ³யதி; ஸோ ந ததோனிதா³னம் து³க்க²ம் தோ³மனஸ்ஸம் படிஸம்வேத³யதி. லூக²ம் தே³ந்தி, நோ பணீதம்; தேன கஸ்ஸபோ ந ஸந்தீ³யதி; ஸோ ந ததோனிதா³னம் து³க்க²ம் தோ³மனஸ்ஸம் படிஸம்வேத³யதி. த³ந்த⁴ம் தே³ந்தி, நோ ஸீக⁴ம்; தேன கஸ்ஸபோ ந ஸந்தீ³யதி; ஸோ ந ததோனிதா³னம் து³க்க²ம் தோ³மனஸ்ஸம் படிஸம்வேத³யதி. அஸக்கச்சம் தே³ந்தி, நோ ஸக்கச்சம்; தேன கஸ்ஸபோ ந ஸந்தீ³யதி; ஸோ ந ததோனிதா³னம் து³க்க²ம் தோ³மனஸ்ஸம் படிஸம்வேத³யதி. கஸ்ஸபேன வா ஹி வோ, பி⁴க்க²வே, ஓவதி³ஸ்ஸாமி யோ வா பனஸ்ஸ கஸ்ஸபஸதி³ஸோ. ஓவதி³தேஹி ச பன வோ தத²த்தாய படிபஜ்ஜிதப்³ப³’’ந்தி. சதுத்த²ம்.

5. ஜிண்ணஸுத்தம்

148. ஏவம் மே ஸுதம்…பே… ராஜக³ஹே வேளுவனே. அத² கோ² ஆயஸ்மா மஹாகஸ்ஸபோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ஆயஸ்மந்தம் மஹாகஸ்ஸபம் ப⁴க³வா ஏதத³வோச – ‘‘ஜிண்ணோஸி தா³னி த்வம், கஸ்ஸப, க³ருகானி ச தே இமானி ஸாணானி பம்ஸுகூலானி நிப்³ப³ஸனானி. தஸ்மாதிஹ த்வம், கஸ்ஸப, க³ஹபதானி [க³ஹபதிகானி (ஸீ.)] சேவ சீவரானி தா⁴ரேஹி, நிமந்தனானி ச பு⁴ஞ்ஜாஹி, மம ச ஸந்திகே விஹராஹீ’’தி.

‘‘அஹம் கோ², ப⁴ந்தே, தீ³க⁴ரத்தம் ஆரஞ்ஞிகோ சேவ ஆரஞ்ஞிகத்தஸ்ஸ ச வண்ணவாதீ³, பிண்ட³பாதிகோ சேவ பிண்ட³பாதிகத்தஸ்ஸ ச வண்ணவாதீ³, பம்ஸுகூலிகோ சேவ பம்ஸுகூலிகத்தஸ்ஸ ச வண்ணவாதீ³, தேசீவரிகோ சேவ தேசீவரிகத்தஸ்ஸ ச வண்ணவாதீ³, அப்பிச்சோ² சேவ அப்பிச்ச²தாய ச வண்ணவாதீ³, ஸந்துட்டோ² சேவ ஸந்துட்டி²யா ச வண்ணவாதீ³, பவிவித்தோ சேவ பவிவேகஸ்ஸ ச வண்ணவாதீ³, அஸம்ஸட்டோ² சேவ அஸம்ஸக்³க³ஸ்ஸ ச வண்ணவாதீ³, ஆரத்³த⁴வீரியோ சேவ வீரியாரம்ப⁴ஸ்ஸ [வீரியாரப்³ப⁴ஸ்ஸ (க.)] ச வண்ணவாதீ³’’தி.

‘‘கிம் [கம் (க.)] பன த்வம், கஸ்ஸப, அத்த²வஸம் ஸம்பஸ்ஸமானோ தீ³க⁴ரத்தம் ஆரஞ்ஞிகோ சேவ ஆரஞ்ஞிகத்தஸ்ஸ ச வண்ணவாதீ³, பிண்ட³பாதிகோ சேவ…பே… பம்ஸுகூலிகோ சேவ… தேசீவரிகோ சேவ… அப்பிச்சோ² சேவ… ஸந்துட்டோ² சேவ… பவிவித்தோ சேவ… அஸம்ஸட்டோ² சேவ… ஆரத்³த⁴வீரியோ சேவ வீரியாரம்ப⁴ஸ்ஸ ச வண்ணவாதீ³’’தி?

‘‘த்³வே க்²வாஹம், ப⁴ந்தே, அத்த²வஸே ஸம்பஸ்ஸமானோ தீ³க⁴ரத்தம் ஆரஞ்ஞிகோ சேவ ஆரஞ்ஞிகத்தஸ்ஸ ச வண்ணவாதீ³, பிண்ட³பாதிகோ சேவ…பே… பம்ஸுகூலிகோ சேவ… தேசீவரிகோ சேவ… அப்பிச்சோ² சேவ… ஸந்துட்டோ² சேவ… பவிவித்தோ சேவ… அஸம்ஸட்டோ² சேவ… ஆரத்³த⁴வீரியோ சேவ வீரியாரம்ப⁴ஸ்ஸ ச வண்ணவாதீ³. அத்தனோ ச தி³ட்ட²த⁴ம்மஸுக²விஹாரம் ஸம்பஸ்ஸமானோ, பச்சி²மஞ்ச ஜனதம் அனுகம்பமானோ – ‘அப்பேவ நாம பச்சி²மா ஜனதா தி³ட்டா²னுக³திம் ஆபஜ்ஜேய்யும்’ [ஆபஜ்ஜேய்ய (ஸீ. ஸ்யா. கம்.)]. ‘யே கிர தே அஹேஸும் பு³த்³தா⁴னுபு³த்³த⁴ஸாவகா தே தீ³க⁴ரத்தம் ஆரஞ்ஞிகா சேவ அஹேஸும் ஆரஞ்ஞிகத்தஸ்ஸ ச வண்ணவாதி³னோ…பே… பிண்ட³பாதிகா சேவ அஹேஸும் …பே… பம்ஸுகூலிகா சேவ அஹேஸும்… தேசீவரிகா சேவ அஹேஸும்… அப்பிச்சா² சேவ அஹேஸும்… ஸந்துட்டா² சேவ அஹேஸும்… பவிவித்தா சேவ அஹேஸும்… அஸம்ஸட்டா² சேவ அஹேஸும்… ஆரத்³த⁴வீரியா சேவ அஹேஸும் வீரியாரம்ப⁴ஸ்ஸ ச வண்ணவாதி³னோ’தி. தே தத²த்தாய படிபஜ்ஜிஸ்ஸந்தி, தேஸம் தம் ப⁴விஸ்ஸதி தீ³க⁴ரத்தம் ஹிதாய ஸுகா²ய.

‘‘இமே க்²வாஹம், ப⁴ந்தே, த்³வே அத்த²வஸே ஸம்பஸ்ஸமானோ தீ³க⁴ரத்தம் ஆரஞ்ஞிகோ சேவ ஆரஞ்ஞிகத்தஸ்ஸ ச வண்ணவாதீ³, பிண்ட³பாதிகோ சேவ…பே… பம்ஸுகூலிகோ சேவ… தேசீவரிகோ சேவ… அப்பிச்சோ² சேவ… ஸந்துட்டோ² சேவ… பவிவித்தோ சேவ… அஸம்ஸட்டோ² சேவ… ஆரத்³த⁴வீரியோ சேவ வீரியாரம்ப⁴ஸ்ஸ ச வண்ணவாதீ³’’தி.

‘‘ஸாது⁴ ஸாது⁴, கஸ்ஸப. ப³ஹுஜனஹிதாய கிர த்வம், கஸ்ஸப, படிபன்னோ ப³ஹுஜனஸுகா²ய லோகானுகம்பாய அத்தா²ய ஹிதாய ஸுகா²ய தே³வமனுஸ்ஸானம். தஸ்மாதிஹ த்வம், கஸ்ஸப, ஸாணானி சேவ பம்ஸுகூலானி தா⁴ரேஹி நிப்³ப³ஸனானி, பிண்டா³ய ச சராஹி, அரஞ்ஞே ச விஹராஹீ’’தி. பஞ்சமம்.

6. ஓவாத³ஸுத்தம்

149. ராஜக³ஹே வேளுவனே. அத² கோ² ஆயஸ்மா மஹாகஸ்ஸபோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ஆயஸ்மந்தம் மஹாகஸ்ஸபம் ப⁴க³வா ஏதத³வோச – ‘‘ஓவத³, கஸ்ஸப, பி⁴க்கூ²; கரோஹி, கஸ்ஸப, பி⁴க்கூ²னம் த⁴ம்மிம் கத²ம். அஹம் வா, கஸ்ஸப, பி⁴க்கூ² ஓவதே³ய்யம் த்வம் வா; அஹம் வா பி⁴க்கூ²னம் த⁴ம்மிம் கத²ம் கரேய்யம் த்வம் வா’’தி.

‘‘து³ப்³ப³சா கோ², ப⁴ந்தே, ஏதரஹி பி⁴க்கூ², தோ³வசஸ்ஸகரணேஹி த⁴ம்மேஹி ஸமன்னாக³தா, அக்க²மா, அப்பத³க்கி²ணக்³கா³ஹினோ அனுஸாஸனிம். இதா⁴ஹம், ப⁴ந்தே, அத்³த³ஸம் ப⁴ண்ட³ஞ்ச [ப⁴ண்டு³ஞ்ச (ஸீ.)] நாம பி⁴க்கு²ம் ஆனந்த³ஸ்ஸ ஸத்³தி⁴விஹாரிம் அபி⁴ஜிகஞ்ச [ஆபி⁴ஞ்ஜிகஞ்ச (ஸீ. க.), ஆபி⁴ஜ்ஜிகஞ்ச (ஸ்யா. கம்.)] நாம பி⁴க்கு²ம் அனுருத்³த⁴ஸ்ஸ ஸத்³தி⁴விஹாரிம் அஞ்ஞமஞ்ஞம் ஸுதேன அச்சாவத³ந்தே – ‘ஏஹி, பி⁴க்கு², கோ ப³ஹுதரம் பா⁴ஸிஸ்ஸதி, கோ ஸுந்த³ரதரம் பா⁴ஸிஸ்ஸதி, கோ சிரதரம் பா⁴ஸிஸ்ஸதீ’’’தி.

அத² கோ² ப⁴க³வா அஞ்ஞதரம் பி⁴க்கு²ம் ஆமந்தேஸி – ‘‘ஏஹி த்வம், பி⁴க்கு², மம வசனேன ப⁴ண்ட³ஞ்ச பி⁴க்கு²ம் ஆனந்த³ஸ்ஸ ஸத்³தி⁴விஹாரிம் அபி⁴ஜிகஞ்ச பி⁴க்கு²ம் அனுருத்³த⁴ஸ்ஸ ஸத்³தி⁴விஹாரிம் ஆமந்தேஹி – ‘ஸத்தா² ஆயஸ்மந்தே ஆமந்தேதீ’’’தி. ‘‘ஏவம், ப⁴ந்தே’’தி கோ² ஸோ பி⁴க்கு² ப⁴க³வதோ படிஸ்ஸுத்வா யேன தே பி⁴க்கூ² தேனுபஸங்கமி; உபஸங்கமித்வா தே பி⁴க்கூ² ஏதத³வோச – ‘‘ஸத்தா² ஆயஸ்மந்தே ஆமந்தேதீ’’தி.

‘‘ஏவமாவுஸோ’’தி கோ² தே பி⁴க்கூ² தஸ்ஸ பி⁴க்கு²னோ படிஸ்ஸுத்வா யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னே கோ² தே பி⁴க்கூ² ப⁴க³வா ஏதத³வோச – ‘‘ஸச்சம் கிர தும்ஹே, பி⁴க்க²வே, அஞ்ஞமஞ்ஞம் ஸுதேன அச்சாவத³த² – ‘ஏஹி, பி⁴க்கு², கோ ப³ஹுதரம் பா⁴ஸிஸ்ஸதி, கோ ஸுந்த³ரதரம் பா⁴ஸிஸ்ஸதி, கோ சிரதரம் பா⁴ஸிஸ்ஸதீ’’’தி? ‘‘ஏவம், ப⁴ந்தே’’. ‘‘கிம் நு கோ² மே தும்ஹே, பி⁴க்க²வே, ஏவம் த⁴ம்மம் தே³ஸிதம் ஆஜானாத² – ‘ஏத² தும்ஹே, பி⁴க்க²வே, அஞ்ஞமஞ்ஞம் ஸுதேன அச்சாவத³த² – ஏஹி, பி⁴க்கு², கோ ப³ஹுதரம் பா⁴ஸிஸ்ஸதி, கோ ஸுந்த³ரதரம் பா⁴ஸிஸ்ஸதி, கோ சிரதரம் பா⁴ஸிஸ்ஸதீ’’’தி? ‘‘நோ ஹேதம், ப⁴ந்தே’’. ‘‘நோ சே கிர மே தும்ஹே, பி⁴க்க²வே, ஏவம் த⁴ம்மம் தே³ஸிதம் ஆஜானாத², அத² கிம் சரஹி தும்ஹே, மோக⁴புரிஸா, கிம் ஜானந்தா கிம் பஸ்ஸந்தா ஏவம் ஸ்வாக்கா²தே த⁴ம்மவினயே பப்³ப³ஜிதா ஸமானா அஞ்ஞமஞ்ஞம் ஸுதேன அச்சாவத³த² – ‘ஏஹி, பி⁴க்கு², கோ ப³ஹுதரம் பா⁴ஸிஸ்ஸதி, கோ ஸுந்த³ரதரம் பா⁴ஸிஸ்ஸதி, கோ சிரதரம் பா⁴ஸிஸ்ஸதீ’’’தி.

அத² கோ² தே பி⁴க்கூ² ப⁴க³வதோ பாதே³ஸு ஸிரஸா நிபதித்வா ப⁴க³வந்தம் ஏதத³வோசும் – ‘‘அச்சயோ நோ, ப⁴ந்தே, அச்சக³மா, யதா²பா³லே யதா²மூள்ஹே யதா²அகுஸலே [யதா² பா³லே யதா² மூள்ஹே யதா² அகுஸலே (பீ.), யதா²பா³லம் யதா²மூள்ஹம் யதா²அகுஸலம் (?)], யே மயம் ஏவம் ஸ்வாக்கா²தே த⁴ம்மவினயே பப்³ப³ஜிதா ஸமானா அஞ்ஞமஞ்ஞம் ஸுதேன அச்சாவதி³ம்ஹ – ‘ஏஹி, பி⁴க்கு², கோ ப³ஹுதரம் பா⁴ஸிஸ்ஸதி, கோ ஸுந்த³ரதரம் பா⁴ஸிஸ்ஸதி, கோ சிரதரம் பா⁴ஸிஸ்ஸதீ’தி. தேஸம் நோ, ப⁴ந்தே, ப⁴க³வா அச்சயம் அச்சயதோ படிக்³க³ண்ஹாது ஆயதிம் ஸம்வராயா’’தி.

‘‘தக்³க⁴ தும்ஹே, பி⁴க்க²வே, அச்சயோ அச்சக³மா யதா²பா³லே யதா²மூள்ஹே யதா²அகுஸலே, யே தும்ஹே ஏவம் ஸ்வாக்கா²தே த⁴ம்மவினயே பப்³ப³ஜிதா ஸமானா அஞ்ஞமஞ்ஞம் ஸுதேன அச்சாவதி³த்த² – ‘ஏஹி, பி⁴க்கு², கோ ப³ஹுதரம் பா⁴ஸிஸ்ஸதி, கோ ஸுந்த³ரதரம் பா⁴ஸிஸ்ஸதி, கோ சிரதரம் பா⁴ஸிஸ்ஸதீ’தி. யதோ ச கோ² தும்ஹே, பி⁴க்க²வே, அச்சயம் அச்சயதோ தி³ஸ்வா யதா²த⁴ம்மம் படிகரோத², தம் வோ மயம் [மயம் அச்சயம் (ஸீ.)] படிக்³க³ண்ஹாம. வுத்³தி⁴ ஹேஸா, பி⁴க்க²வே, அரியஸ்ஸ வினயே யோ அச்சயம் அச்சயதோ தி³ஸ்வா யதா²த⁴ம்மம் படிகரோதி ஆயதிஞ்ச ஸம்வரம் ஆபஜ்ஜதீ’’தி. ச²ட்ட²ம்.

7. து³தியஓவாத³ஸுத்தம்

150. ராஜக³ஹே விஹரதி வேளுவனே [ஸாவத்தி², தத்ர-ஏதத³வோச (ஸீ.)]. அத² கோ² ஆயஸ்மா மஹாகஸ்ஸபோ யேன ப⁴க³வா தேனுபஸங்கமி…பே… ஏகமந்தம் நிஸின்னம் கோ² ஆயஸ்மந்தம் மஹாகஸ்ஸபம் ப⁴க³வா ஏதத³வோச – ‘‘ஓவத³, கஸ்ஸப, பி⁴க்கூ²; கரோஹி, கஸ்ஸப, பி⁴க்கூ²னம் த⁴ம்மிம் கத²ம். அஹம் வா, கஸ்ஸப, பி⁴க்கூ² ஓவதே³ய்யம் த்வம் வா; அஹம் வா பி⁴க்கூ²னம் த⁴ம்மிம் கத²ம் கரேய்யம் த்வம் வா’’தி.

‘‘து³ப்³ப³சா கோ², ப⁴ந்தே, ஏதரஹி பி⁴க்கூ², தோ³வசஸ்ஸகரணேஹி த⁴ம்மேஹி ஸமன்னாக³தா அக்க²மா அப்பத³க்கி²ணக்³கா³ஹினோ அனுஸாஸனிம். யஸ்ஸ கஸ்ஸசி, ப⁴ந்தே, ஸத்³தா⁴ நத்தி² குஸலேஸு த⁴ம்மேஸு, ஹிரீ [ஹிரி (ஸப்³ப³த்த²)] நத்தி² குஸலேஸு த⁴ம்மேஸு, ஓத்தப்பம் நத்தி² குஸலேஸு த⁴ம்மேஸு, வீரியம் நத்தி² குஸலேஸு த⁴ம்மேஸு, பஞ்ஞா நத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி [ஆக³ச்ச²ந்தி (ஸீ.)], ஹானியேவ பாடிகங்கா² குஸலேஸு த⁴ம்மேஸு, நோ வுத்³தி⁴.

‘‘ஸேய்யதா²பி, ப⁴ந்தே, காளபக்கே² சந்த³ஸ்ஸ யா ரத்தி வா தி³வஸோ வா ஆக³ச்ச²தி, ஹாயதேவ வண்ணேன, ஹாயதி மண்ட³லேன, ஹாயதி ஆபா⁴ய, ஹாயதி ஆரோஹபரிணாஹேன. ஏவமேவ கோ², ப⁴ந்தே, யஸ்ஸ கஸ்ஸசி ஸத்³தா⁴ நத்தி² குஸலேஸு த⁴ம்மேஸு…பே… ஹிரீ நத்தி²… ஓத்தப்பம் நத்தி² … வீரியம் நத்தி²… பஞ்ஞா நத்தி²… குஸலேஸு த⁴ம்மேஸு தஸ்ஸ யா ரத்தி வா தி³வஸோ வா ஆக³ச்ச²தி, ஹானியேவ பாடிகங்கா² குஸலேஸு த⁴ம்மேஸு, நோ வுத்³தி⁴.

‘‘‘அஸ்ஸத்³தோ⁴ புரிஸபுக்³க³லோ’தி, ப⁴ந்தே, பரிஹானமேதம்; ‘அஹிரிகோ புரிஸபுக்³க³லோ’தி, ப⁴ந்தே, பரிஹானமேதம்; ‘அனோத்தப்பீ புரிஸபுக்³க³லோ’தி, ப⁴ந்தே, பரிஹானமேதம்; ‘குஸீதோ புரிஸபுக்³க³லோ’தி, ப⁴ந்தே, பரிஹானமேதம்; ‘து³ப்பஞ்ஞோ புரிஸபுக்³க³லோ’தி, ப⁴ந்தே, பரிஹானமேதம்; ‘கோத⁴னோ புரிஸபுக்³க³லோ’தி, ப⁴ந்தே, பரிஹானமேதம்; ‘உபனாஹீ புரிஸபுக்³க³லோ’தி, ப⁴ந்தே, பரிஹானமேதம்; ‘ந ஸந்தி பி⁴க்கூ² ஓவாத³கா’தி, ப⁴ந்தே, பரிஹானமேதம்.

‘‘யஸ்ஸ கஸ்ஸசி, ப⁴ந்தே, ஸத்³தா⁴ அத்தி² குஸலேஸு த⁴ம்மேஸு, ஹிரீ அத்தி² குஸலேஸு த⁴ம்மேஸு, ஓத்தப்பம் அத்தி² குஸலேஸு த⁴ம்மேஸு, வீரியம் அத்தி² குஸலேஸு த⁴ம்மேஸு, பஞ்ஞா அத்தி² குஸலேஸு த⁴ம்மேஸு, தஸ்ஸ யா ரத்தி வா தி³வஸோ வா ஆக³ச்ச²தி, வுத்³தி⁴யேவ பாடிகங்கா² குஸலேஸு த⁴ம்மேஸு, நோ பரிஹானி.

‘‘ஸேய்யதா²பி, ப⁴ந்தே, ஜுண்ஹபக்கே² சந்த³ஸ்ஸ யா ரத்தி வா தி³வஸோ வா ஆக³ச்ச²தி, வட்³ட⁴தேவ வண்ணேன, வட்³ட⁴தி மண்ட³லேன, வட்³ட⁴தி ஆபா⁴ய, வட்³ட⁴தி ஆரோஹபரிணாஹேன. ஏவமேவ கோ², ப⁴ந்தே, யஸ்ஸ கஸ்ஸசி ஸத்³தா⁴ அத்தி² குஸலேஸு த⁴ம்மேஸு… ஹிரீ அத்தி²…பே… ஓத்தப்பம் அத்தி²… வீரியம் அத்தி²… பஞ்ஞா அத்தி² குஸலேஸு த⁴ம்மேஸு தஸ்ஸ யா ரத்தி வா தி³வஸோ வா ஆக³ச்ச²தி, வுத்³தி⁴யேவ பாடிகங்கா² குஸலேஸு த⁴ம்மேஸு, நோ பரிஹானி.

‘‘‘ஸத்³தோ⁴ புரிஸபுக்³க³லோ’தி, ப⁴ந்தே, அபரிஹானமேதம்; ‘ஹிரிமா புரிஸபுக்³க³லோ’தி, ப⁴ந்தே, அபரிஹானமேதம்; ‘ஓத்தப்பீ புரிஸபுக்³க³லோ’தி, ப⁴ந்தே, அபரிஹானமேதம்; ‘ஆரத்³த⁴வீரியோ புரிஸபுக்³க³லோ’தி, ப⁴ந்தே, அபரிஹானமேதம்; ‘பஞ்ஞவா புரிஸபுக்³க³லோ’தி, ப⁴ந்தே, அபரிஹானமேதம்; ‘அக்கோத⁴னோ புரிஸபுக்³க³லோ’தி, ப⁴ந்தே, அபரிஹானமேதம்; ‘அனுபனாஹீ புரிஸபுக்³க³லோ’தி, ப⁴ந்தே, அபரிஹானமேதம்; ‘ஸந்தி பி⁴க்கூ² ஓவாத³கா’தி, ப⁴ந்தே, அபரிஹானமேத’’ந்தி.

‘‘ஸாது⁴ ஸாது⁴, கஸ்ஸப. யஸ்ஸ கஸ்ஸசி, கஸ்ஸப, ஸத்³தா⁴ நத்தி² குஸலேஸு த⁴ம்மேஸு…பே… ஹிரீ நத்தி²… ஓத்தப்பம் நத்தி²… வீரியம் நத்தி²… பஞ்ஞா நத்தி² குஸலேஸு த⁴ம்மேஸு தஸ்ஸ யா ரத்தி வா தி³வஸோ வா ஆக³ச்ச²தி, ஹானியேவ பாடிகங்கா² குஸலேஸு த⁴ம்மேஸு, நோ வுத்³தி⁴.

‘‘ஸேய்யதா²பி, கஸ்ஸப, காளபக்கே² சந்த³ஸ்ஸ யா ரத்தி வா தி³வஸோ வா ஆக³ச்ச²தி, ஹாயதேவ வண்ணேன…பே… ஹாயதி ஆரோஹபரிணாஹேன. ஏவமேவ கோ², கஸ்ஸப, யஸ்ஸ கஸ்ஸசி ஸத்³தா⁴ நத்தி² குஸலேஸு த⁴ம்மேஸு…பே… ஹிரீ நத்தி²… ஓத்தப்பம் நத்தி²… வீரியம் நத்தி²… பஞ்ஞா நத்தி² குஸலேஸு த⁴ம்மேஸு தஸ்ஸ யா ரத்தி வா தி³வஸோ வா ஆக³ச்ச²தி, ஹானியேவ பாடிகங்கா² குஸலேஸு த⁴ம்மேஸு, நோ வுத்³தி⁴. ‘அஸ்ஸத்³தோ⁴ புரிஸபுக்³க³லோ’தி, கஸ்ஸப, பரிஹானமேதம்; அஹிரிகோ…பே… அனோத்தப்பீ… குஸீதோ… து³ப்பஞ்ஞோ… கோத⁴னோ… ‘உபனாஹீ புரிஸபுக்³க³லோ’தி, கஸ்ஸப, பரிஹானமேதம்; ‘ந ஸந்தி பி⁴க்கூ² ஓவாத³கா’தி, கஸ்ஸப, பரிஹானமேதம்.

‘‘யஸ்ஸ கஸ்ஸசி, கஸ்ஸப, ஸத்³தா⁴ அத்தி² குஸலேஸு த⁴ம்மேஸு…பே… ஹிரீ அத்தி²… ஓத்தப்பம் அத்தி²… வீரியம் அத்தி²… பஞ்ஞா அத்தி² குஸலேஸு த⁴ம்மேஸு தஸ்ஸ யா ரத்தி வா தி³வஸோ வா ஆக³ச்ச²தி, வுத்³தி⁴யேவ பாடிகங்கா² குஸலேஸு த⁴ம்மேஸு, நோ பரிஹானி.

‘‘ஸேய்யதா²பி, கஸ்ஸப, ஜுண்ஹபக்கே² சந்த³ஸ்ஸ யா ரத்தி வா தி³வஸோ வா ஆக³ச்ச²தி, வட்³ட⁴தேவ வண்ணேன, வட்³ட⁴தி மண்ட³லேன, வட்³ட⁴தி ஆபா⁴ய, வட்³ட⁴தி ஆரோஹபரிணாஹேன. ஏவமேவ கோ², கஸ்ஸப, யஸ்ஸ கஸ்ஸசி ஸத்³தா⁴ அத்தி² குஸலேஸு த⁴ம்மேஸு ஹிரீ அத்தி²… ஓத்தப்பம் அத்தி²… வீரியம் அத்தி²… பஞ்ஞா அத்தி² குஸலேஸு த⁴ம்மேஸு தஸ்ஸ யா ரத்தி வா தி³வஸோ வா ஆக³ச்ச²தி, வுத்³தி⁴யேவ பாடிகங்கா² குஸலேஸு த⁴ம்மேஸு, நோ பரிஹானி.

‘‘‘ஸத்³தோ⁴ புரிஸபுக்³க³லோ’தி, கஸ்ஸப, அபரிஹானமேதம்; ஹிரிமா…பே… ஓத்தப்பீ… ஆரத்³த⁴வீரியோ… பஞ்ஞவா… அக்கோத⁴னோ… ‘அனுபனாஹீ புரிஸபுக்³க³லோ’தி, கஸ்ஸப, அபரிஹானமேதம்; ‘ஸந்தி பி⁴க்கூ² ஓவாத³கா’தி, கஸ்ஸப, அபரிஹானமேத’’ந்தி. ஸத்தமம்.

8. ததியஓவாத³ஸுத்தம்

151. ராஜக³ஹே கலந்த³கனிவாபே [ஸாவத்தி², ஆராமே (ஸீ.)]. அத² கோ² ஆயஸ்மா மஹாகஸ்ஸபோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ஆயஸ்மந்தம் மஹாகஸ்ஸபம் ப⁴க³வா ஏதத³வோச – ‘‘ஓவத³, கஸ்ஸப, பி⁴க்கூ²; கரோஹி, கஸ்ஸப, பி⁴க்கூ²னம் த⁴ம்மிம் கத²ம். அஹம் வா, கஸ்ஸப, பி⁴க்கூ²னம் ஓவதே³ய்யம் த்வம் வா; அஹம் வா பி⁴க்கூ²னம் த⁴ம்மிம் கத²ம் கரேய்யம் த்வம் வா’’தி.

‘‘து³ப்³ப³சா கோ², ப⁴ந்தே, ஏதரஹி பி⁴க்கூ², தோ³வசஸ்ஸகரணேஹி த⁴ம்மேஹி ஸமன்னாக³தா, அக்க²மா, அப்பத³க்கி²ணக்³கா³ஹினோ அனுஸாஸனீ’’ந்தி. ‘‘ததா² ஹி பன, கஸ்ஸப, புப்³பே³ தே²ரா பி⁴க்கூ² ஆரஞ்ஞிகா சேவ அஹேஸும் ஆரஞ்ஞிகத்தஸ்ஸ ச வண்ணவாதி³னோ, பிண்ட³பாதிகா சேவ அஹேஸும் பிண்ட³பாதிகத்தஸ்ஸ ச வண்ணவாதி³னோ, பம்ஸுகூலிகா சேவ அஹேஸும் பம்ஸுகூலிகத்தஸ்ஸ ச வண்ணவாதி³னோ, தேசீவரிகா சேவ அஹேஸும் தேசீவரிகத்தஸ்ஸ ச வண்ணவாதி³னோ, அப்பிச்சா² சேவ அஹேஸும் அப்பிச்ச²தாய ச வண்ணவாதி³னோ, ஸந்துட்டா² சேவ அஹேஸும் ஸந்துட்டி²யா ச வண்ணவாதி³னோ, பவிவித்தா சேவ அஹேஸும் பவிவேகஸ்ஸ ச வண்ணவாதி³னோ, அஸம்ஸட்டா² சேவ அஹேஸும் அஸம்ஸக்³க³ஸ்ஸ ச வண்ணவாதி³னோ, ஆரத்³த⁴வீரியா சேவ அஹேஸும் வீரியாரம்ப⁴ஸ்ஸ ச வண்ணவாதி³னோ.

‘‘தத்ர யோ ஹோதி பி⁴க்கு² ஆரஞ்ஞிகோ சேவ ஆரஞ்ஞிகத்தஸ்ஸ ச வண்ணவாதீ³, பிண்ட³பாதிகோ சேவ பிண்ட³பாதிகத்தஸ்ஸ ச வண்ணவாதீ³, பம்ஸுகூலிகோ சேவ பம்ஸுகூலிகத்தஸ்ஸ ச வண்ணவாதீ³, தேசீவரிகோ சேவ தேசீவரிகத்தஸ்ஸ ச வண்ணவாதீ³, அப்பிச்சோ² சேவ அப்பிச்ச²தாய ச வண்ணவாதீ³, ஸந்துட்டோ² சேவ ஸந்துட்டி²யா ச வண்ணவாதீ³, பவிவித்தோ சேவ பவிவேகஸ்ஸ ச வண்ணவாதீ³, அஸம்ஸட்டோ² சேவ அஸம்ஸக்³க³ஸ்ஸ ச வண்ணவாதீ³, ஆரத்³த⁴வீரியோ சேவ வீரியாரம்ப⁴ஸ்ஸ ச வண்ணவாதீ³, தம் தே²ரா பி⁴க்கூ² ஆஸனேன நிமந்தேந்தி – ‘ஏஹி, பி⁴க்கு², கோ நாமாயம் பி⁴க்கு², ப⁴த்³த³கோ வதாயம் பி⁴க்கு², ஸிக்கா²காமோ வதாயம் பி⁴க்கு²; ஏஹி, பி⁴க்கு², இத³ம் ஆஸனம் நிஸீதா³ஹீ’’’தி.

‘‘தத்ர, கஸ்ஸப, நவானம் பி⁴க்கூ²னம் ஏவம் ஹோதி – ‘யோ கிர ஸோ ஹோதி பி⁴க்கு² ஆரஞ்ஞிகோ சேவ ஆரஞ்ஞிகத்தஸ்ஸ ச வண்ணவாதீ³, பிண்ட³பாதிகோ சேவ…பே… பம்ஸுகூலிகோ சேவ… தேசீவரிகோ சேவ… அப்பிச்சோ² சேவ… ஸந்துட்டோ² சேவ… பவிவித்தோ சேவ… அஸம்ஸட்டோ² சேவ… ஆரத்³த⁴வீரியோ சேவ வீரியாரம்ப⁴ஸ்ஸ ச வண்ணவாதீ³, தம் தே²ரா பி⁴க்கூ² ஆஸனேன நிமந்தேந்தி – ஏஹி, பி⁴க்கு², கோ நாமாயம் பி⁴க்கு², ப⁴த்³த³கோ வதாயம் பி⁴க்கு², ஸிக்கா²காமோ வதாயம் பி⁴க்கு²; ஏஹி, பி⁴க்கு², இத³ம் ஆஸனம் நிஸீதா³ஹீ’தி. தே தத²த்தாய படிபஜ்ஜந்தி; தேஸம் தம் ஹோதி தீ³க⁴ரத்தம் ஹிதாய ஸுகா²ய.

‘‘ஏதரஹி பன, கஸ்ஸப, தே²ரா பி⁴க்கூ² ந சேவ ஆரஞ்ஞிகா ந ச ஆரஞ்ஞிகத்தஸ்ஸ வண்ணவாதி³னோ, ந சேவ பிண்ட³பாதிகா ந ச பிண்ட³பாதிகத்தஸ்ஸ வண்ணவாதி³னோ, ந சேவ பம்ஸுகூலிகா ந ச பம்ஸுகூலிகத்தஸ்ஸ வண்ணவாதி³னோ, ந சேவ தேசீவரிகா ந ச தேசீவரிகத்தஸ்ஸ வண்ணவாதி³னோ, ந சேவ அப்பிச்சா² ந ச அப்பிச்ச²தாய வண்ணவாதி³னோ, ந சேவ ஸந்துட்டா² ந ச ஸந்துட்டி²யா வண்ணவாதி³னோ, ந சேவ பவிவித்தா ந ச பவிவேகஸ்ஸ வண்ணவாதி³னோ, ந சேவ அஸம்ஸட்டா² ந ச அஸம்ஸக்³க³ஸ்ஸ வண்ணவாதி³னோ, ந சேவ ஆரத்³த⁴வீரியா ந ச வீரியாரம்ப⁴ஸ்ஸ வண்ணவாதி³னோ.

‘‘தத்ர யோ ஹோதி பி⁴க்கு² ஞாதோ யஸஸ்ஸீ லாபீ⁴ சீவர-பிண்ட³பாத-ஸேனாஸனகி³லானப்பச்சயபே⁴ஸஜ்ஜபரிக்கா²ரானம் தம் தே²ரா பி⁴க்கூ² ஆஸனேன நிமந்தேந்தி – ‘ஏஹி, பி⁴க்கு², கோ நாமாயம் பி⁴க்கு², ப⁴த்³த³கோ வதாயம் பி⁴க்கு², ஸப்³ரஹ்மசாரிகாமோ வதாயம் பி⁴க்கு²; ஏஹி, பி⁴க்கு², இத³ம் ஆஸனம் நிஸீதா³ஹீ’’’தி.

‘‘தத்ர, கஸ்ஸப, நவானம் பி⁴க்கூ²னம் ஏவம் ஹோதி – ‘யோ கிர ஸோ ஹோதி பி⁴க்கு² ஞாதோ யஸஸ்ஸீ லாபீ⁴ சீவர-பிண்ட³பாத-ஸேனாஸன-கி³லானப்பச்சயபே⁴ஸஜ்ஜபரிக்கா²ரானம் தம் தே²ரா பி⁴க்கூ² ஆஸனேன நிமந்தேந்தி – ஏஹி, பி⁴க்கு², கோ நாமாயம் பி⁴க்கு², ப⁴த்³த³கோ வதாயம் பி⁴க்கு², ஸப்³ரஹ்மசாரிகாமோ வதாயம் பி⁴க்கு²; ஏஹி, பி⁴க்கு², இத³ம் ஆஸனம் நிஸீதா³ஹீ’தி. தே தத²த்தாய படிபஜ்ஜந்தி. தேஸம் தம் ஹோதி தீ³க⁴ரத்தம் அஹிதாய து³க்கா²ய. யஞ்ஹி தம், கஸ்ஸப, ஸம்மா வத³மானோ வதே³ய்ய – ‘உபத்³து³தா ப்³ரஹ்மசாரீ ப்³ரஹ்மசாரூபத்³த³வேன அபி⁴பத்த²னா [அபி⁴ப⁴வனா (ஸீ.)] ப்³ரஹ்மசாரீ ப்³ரஹ்மசாரிஅபி⁴பத்த²னேனா’தி [ப்³ரஹ்மசாரிஅபி⁴ப⁴வனேனாதி (ஸீ.)], ஏதரஹி தம், கஸ்ஸப, ஸம்மா வத³மானோ வதே³ய்ய – ‘உபத்³து³தா ப்³ரஹ்மசாரீ ப்³ரஹ்மசாரூபத்³த³வேன அபி⁴பத்த²னா ப்³ரஹ்மசாரீ ப்³ரஹ்மசாரிஅபி⁴பத்த²னேனா’’’தி. அட்ட²மம்.

9. ஜா²னாபி⁴ஞ்ஞஸுத்தம்

152. ஸாவத்தி²யம் விஹரதி…பே… ‘‘அஹம், பி⁴க்க²வே, யாவதே³வ ஆகங்கா²மி விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹராமி. கஸ்ஸபோபி, பி⁴க்க²வே, யாவதே³வ ஆகங்க²தி விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதி’’.

‘‘அஹம், பி⁴க்க²வே, யாவதே³வ ஆகங்கா²மி விதக்கவிசாரானம் வூபஸமா அஜ்ஜ²த்தம் ஸம்பஸாத³னம் சேதஸோ ஏகோதி³பா⁴வம் அவிதக்கம் அவிசாரம் ஸமாதி⁴ஜம் பீதிஸுக²ம் து³தியம் ஜா²னம் உபஸம்பஜ்ஜ விஹராமி. கஸ்ஸபோபி, பி⁴க்க²வே, யாவதே³வ ஆகங்க²தி விதக்கவிசாரானம் வூபஸமா…பே… து³தியம் ஜா²னம் உபஸம்பஜ்ஜ விஹரதி.

‘‘அஹம், பி⁴க்க²வே, யாவதே³வ ஆகங்கா²மி பீதியா ச விராகா³ உபேக்க²கோ ச விஹராமி ஸதோ ச ஸம்பஜானோ ஸுக²ஞ்ச காயேன படிஸம்வேதே³மி, யம் தம் அரியா ஆசிக்க²ந்தி – ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹராமி. கஸ்ஸபோபி, பி⁴க்க²வே, யாவதே³வ ஆகங்க²தி பீதியா ச விராகா³ உபேக்க²கோ ச விஹரதி ஸதோ ச ஸம்பஜானோ, ஸுக²ஞ்ச காயேன படிஸம்வேதே³தி, யம் தம் அரியா ஆசிக்க²ந்தி – ‘உபேக்க²கோ ஸதிமா ஸுக²விஹாரீ’தி ததியம் ஜா²னம் உபஸம்பஜ்ஜ விஹரதி.

‘‘அஹம், பி⁴க்க²வே, யாவதே³வ ஆகங்கா²மி ஸுக²ஸ்ஸ ச பஹானா து³க்க²ஸ்ஸ ச பஹானா புப்³பே³வ ஸோமனஸ்ஸதோ³மனஸ்ஸானம் அத்த²ங்க³மா அது³க்க²மஸுக²ம் உபேக்கா²ஸதிபாரிஸுத்³தி⁴ம் சதுத்த²ம் ஜா²னம் உபஸம்பஜ்ஜ விஹராமி. கஸ்ஸபோபி, பி⁴க்க²வே, யாவதே³வ ஆகங்க²தி ஸுக²ஸ்ஸ ச பஹானா …பே… சதுத்த²ம் ஜா²னம் உபஸம்பஜ்ஜ விஹரதி.

‘‘அஹம், பி⁴க்க²வே, யாவதே³வ ஆகங்கா²மி ஸப்³ப³ஸோ ரூபஸஞ்ஞானம் ஸமதிக்கமா படிக⁴ஸஞ்ஞானம் அத்த²ங்க³மா நானத்தஸஞ்ஞானம் அமனஸிகாரா அனந்தோ ஆகாஸோதி ஆகாஸானஞ்சாயதனம் உபஸம்பஜ்ஜ விஹராமி. கஸ்ஸபோபி, பி⁴க்க²வே, யாவதே³வ ஆகங்க²தி ஸப்³ப³ஸோ ரூபஸஞ்ஞானம் ஸமதிக்கமா…பே… ஆகாஸானஞ்சாயதனம் உபஸம்பஜ்ஜ விஹரதி.

‘‘அஹம், பி⁴க்க²வே, யாவதே³வ ஆகங்கா²மி ஸப்³ப³ஸோ ஆகாஸானஞ்சாயதனம் ஸமதிக்கம்ம அனந்தம் விஞ்ஞாணந்தி விஞ்ஞாணஞ்சாயதனம் உபஸம்பஜ்ஜ விஹராமி. கஸ்ஸபோபி, பி⁴க்க²வே, யாவதே³வ ஆகங்க²தி ஸப்³ப³ஸோ ஆகாஸானஞ்சாயதனம் ஸமதிக்கம்ம அனந்தம் விஞ்ஞாணந்தி விஞ்ஞாணஞ்சாயதனம் உபஸம்பஜ்ஜ விஹரதி.

‘‘அஹம், பி⁴க்க²வே, யாவதே³வ ஆகங்கா²மி ஸப்³ப³ஸோ விஞ்ஞாணஞ்சாயதனம் ஸமதிக்கம்ம ‘நத்தி² கிஞ்சீ’தி ஆகிஞ்சஞ்ஞாயதனம் உபஸம்பஜ்ஜ விஹராமி. கஸ்ஸபோபி, பி⁴க்க²வே, யாவதே³வ ஆகங்க²தி…பே… ஆகிஞ்சஞ்ஞாயதனம் உபஸம்பஜ்ஜ விஹரதி.

‘‘அஹம், பி⁴க்க²வே, யாவதே³வ ஆகங்கா²மி ஸப்³ப³ஸோ ஆகிஞ்சஞ்ஞாயதனம் ஸமதிக்கம்ம நேவஸஞ்ஞானாஸஞ்ஞாயதனம் உபஸம்பஜ்ஜ விஹராமி. கஸ்ஸபோபி, பி⁴க்க²வே, யாவதே³வ ஆகங்க²தி…பே… நேவஸஞ்ஞானாஸஞ்ஞாயதனம் உபஸம்பஜ்ஜ விஹரதி.

‘‘அஹம், பி⁴க்க²வே, யாவதே³வ ஆகங்கா²மி ஸப்³ப³ஸோ நேவஸஞ்ஞானாஸஞ்ஞாயதனம் ஸமதிக்கம்ம ஸஞ்ஞாவேத³யிதனிரோத⁴ம் உபஸம்பஜ்ஜ விஹராமி. கஸ்ஸபோபி, பி⁴க்க²வே…பே… ஸஞ்ஞாவேத³யிதனிரோத⁴ம் உபஸம்பஜ்ஜ விஹரதி.

‘‘அஹம், பி⁴க்க²வே, யாவதே³வ ஆகங்கா²மி அனேகவிஹிதம் இத்³தி⁴வித⁴ம் பச்சனுபோ⁴மி – ஏகோபி ஹுத்வா ப³ஹுதா⁴ ஹோமி, ப³ஹுதா⁴பி ஹுத்வா ஏகோ ஹோமி; ஆவிபா⁴வம், திரோபா⁴வம், திரோகுட்டம், திரோபாகாரம், திரோபப்³ப³தம், அஸஜ்ஜமானோ க³ச்சா²மி, ஸேய்யதா²பி ஆகாஸே; பத²வியாபி உம்முஜ்ஜனிமுஜ்ஜம் கரோமி, ஸேய்யதா²பி உத³கே; உத³கேபி அபி⁴ஜ்ஜமானே க³ச்சா²மி, ஸேய்யதா²பி பத²வியம்; ஆகாஸேபி பல்லங்கேன கமாமி, ஸேய்யதா²பி பக்கீ² ஸகுணோ; இமேபி சந்தி³மஸூரியே ஏவம்மஹித்³தி⁴கே ஏவம்மஹானுபா⁴வே பாணினா பரிமஸாமி பரிமஜ்ஜாமி; யாவ ப்³ரஹ்மலோகாபி காயேன வஸம் வத்தேமி. கஸ்ஸபோபி, பி⁴க்க²வே, யாவதே³வ ஆகங்க²தி அனேகவிஹிதம் இத்³தி⁴வித⁴ம் பச்சனுபோ⁴தி…பே… யாவ ப்³ரஹ்மலோகாபி காயேன வஸம் வத்தேதி.

‘‘அஹம், பி⁴க்க²வே, யாவதே³வ ஆகங்கா²மி தி³ப்³பா³ய ஸோததா⁴துயா விஸுத்³தா⁴ய அதிக்கந்தமானுஸிகாய உபோ⁴ ஸத்³தே³ ஸுணாமி, தி³ப்³பே³ ச மானுஸே ச, யே தூ³ரே ஸந்திகே ச. கஸ்ஸபோபி, பி⁴க்க²வே, யாவதே³வ ஆகங்க²தி தி³ப்³பா³ய ஸோததா⁴துயா…பே… தூ³ரே ஸந்திகே ச.

‘‘அஹம், பி⁴க்க²வே, யாவதே³வ ஆகங்கா²மி பரஸத்தானம் பரபுக்³க³லானம் சேதஸா சேதோ பரிச்ச பஜானாமி – ஸராக³ம் வா சித்தம் ஸராக³ம் சித்தந்தி பஜானாமி, வீதராக³ம் வா சித்தம் வீதராக³ம் சித்தந்தி பஜானாமி, ஸதோ³ஸம் வா சித்தம்…பே… வீததோ³ஸம் வா சித்தம்… ஸமோஹம் வா சித்தம்… வீதமோஹம் வா சித்தம்… ஸம்கி²த்தம் வா சித்தம்… விக்கி²த்தம் வா சித்தம்… மஹக்³க³தம் வா சித்தம்… அமஹக்³க³தம் வா சித்தம்… ஸஉத்தரம் வா சித்தம்… அனுத்தரம் வா சித்தம்… ஸமாஹிதம் வா சித்தம்… அஸமாஹிதம் வா சித்தம்… விமுத்தம் வா சித்தம்… அவிமுத்தம் வா சித்தம் அவிமுத்தம் சித்தந்தி பஜானாமி. கஸ்ஸபோபி, பி⁴க்க²வே, யாவதே³வ ஆகங்க²தி பரஸத்தானம் பரபுக்³க³லானம் சேதஸா சேதோ பரிச்ச பஜானாதி – ஸராக³ம் வா சித்தம் ஸராக³ம் சித்தந்தி பஜானாதி…பே… அவிமுத்தம் வா சித்தம் அவிமுத்தம் சித்தந்தி பஜானாதி.

‘‘அஹம், பி⁴க்க²வே, யாவதே³வ ஆகங்கா²மி அனேகவிஹிதம் புப்³பே³னிவாஸம் அனுஸ்ஸராமி, ஸேய்யதி²த³ம் – ஏகம்பி ஜாதிம் த்³வேபி ஜாதியோ திஸ்ஸோபி ஜாதியோ சதஸ்ஸோபி ஜாதியோ பஞ்சபி ஜாதியோ த³ஸபி ஜாதியோ வீஸம்பி ஜாதியோ திம்ஸம்பி ஜாதியோ சத்தாலீஸம்பி ஜாதியோ பஞ்ஞாஸம்பி ஜாதியோ ஜாதிஸதம்பி ஜாதிஸஹஸ்ஸம்பி ஜாதிஸதஸஹஸ்ஸம்பி, அனேகேபி ஸம்வட்டகப்பே அனேகேபி விவட்டகப்பே அனேகேபி ஸம்வட்டவிவட்டகப்பே – ‘அமுத்ராஸிம் ஏவம்னாமோ ஏவம்கோ³த்தோ ஏவம்வண்ணோ ஏவமாஹாரோ ஏவம்ஸுக²து³க்க²ப்படிஸம்வேதீ³ ஏவமாயுபரியந்தோ, ஸோ ததோ சுதோ அமுத்ர உத³பாதி³ம்; தத்ராபாஸிம் ஏவம்னாமோ ஏவம்கோ³த்தோ ஏவம்வண்ணோ ஏவமாஹாரோ ஏவம்ஸுக²து³க்க²ப்படிஸம்வேதீ³ ஏவமாயுபரியந்தோ, ஸோ ததோ சுதோ இதூ⁴பபன்னோ’தி. இதி ஸாகாரம் ஸஉத்³தே³ஸம் அனேகவிஹிதம் புப்³பே³னிவாஸம் அனுஸ்ஸராமி. கஸ்ஸபோபி, பி⁴க்க²வே, யாவதே³வ ஆகங்க²தி அனேகவிஹிதம் புப்³பே³னிவாஸம் அனுஸ்ஸரதி, ஸேய்யதி²த³ம் – ஏகம்பி ஜாதிம்…பே… இதி ஸாகாரம் ஸஉத்³தே³ஸம் அனேகவிஹிதம் புப்³பே³னிவாஸம் அனுஸ்ஸரதி.

‘‘அஹம், பி⁴க்க²வே, யாவதே³வ ஆகங்கா²மி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸாமி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே, ஸுக³தே து³க்³க³தே யதா²கம்மூபகே³ ஸத்தே பஜானாமி – ‘இமே வத, போ⁴ந்தோ, ஸத்தா காயது³ச்சரிதேன ஸமன்னாக³தா வசீது³ச்சரிதேன ஸமன்னாக³தா மனோது³ச்சரிதேன ஸமன்னாக³தா அரியானம் உபவாத³கா மிச்சா²தி³ட்டி²கா மிச்சா²தி³ட்டி²கம்மஸமாதா³னா; தே காயஸ்ஸ பே⁴தா³ பரம் மரணா அபாயம் து³க்³க³திம் வினிபாதம் நிரயம் உபபன்னா, இமே வா பன, போ⁴ந்தோ, ஸத்தா காயஸுசரிதேன ஸமன்னாக³தா வசீஸுசரிதேன ஸமன்னாக³தா மனோஸுசரிதேன ஸமன்னாக³தா அரியானம் அனுபவாத³கா ஸம்மாதி³ட்டி²கா ஸம்மாதி³ட்டி²கம்மஸமாதா³னா; தே காயஸ்ஸ பே⁴தா³ பரம் மரணா ஸுக³திம் ஸக்³க³ம் லோகம் உபபன்னா’தி. இதி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸாமி சவமானே உபபஜ்ஜமானே ஹீனே பணீதே ஸுவண்ணே து³ப்³ப³ண்ணே, ஸுக³தே து³க்³க³தே யதா²கம்மூபகே³ ஸத்தே பஜானாமி. கஸ்ஸபோபி, பி⁴க்க²வே, யாவதே³வ ஆகங்க²தி தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஸத்தே பஸ்ஸதி சவமானே…பே… யதா²கம்மூபகே³ ஸத்தே பஜானாதி.

‘‘அஹம், பி⁴க்க²வே, ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹராமி. கஸ்ஸபோபி, பி⁴க்க²வே, ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’தி. நவமம்.

10. உபஸ்ஸயஸுத்தம்

153. ஏவம் மே ஸுதம் – ஏகம் ஸமயம் ஆயஸ்மா மஹாகஸ்ஸபோ ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஆயஸ்மா ஆனந்தோ³ புப்³ப³ண்ஹஸமயம் நிவாஸேத்வா பத்தசீவரமாதா³ய யேனாயஸ்மா மஹாகஸ்ஸபோ தேனுபஸங்கமி; உபஸங்கமித்வா ஆயஸ்மந்தம் மஹாகஸ்ஸபம் ஏதத³வோச – ‘‘ஆயாம, ப⁴ந்தே கஸ்ஸப, யேன அஞ்ஞதரோ பி⁴க்கு²னுபஸ்ஸயோ தேனுபஸங்கமிஸ்ஸாமா’’தி. ‘‘க³ச்ச² த்வம், ஆவுஸோ ஆனந்த³, ப³ஹுகிச்சோ த்வம் ப³ஹுகரணீயோ’’தி. து³தியம்பி கோ² ஆயஸ்மா ஆனந்தோ³ ஆயஸ்மந்தம் மஹாகஸ்ஸபம் ஏதத³வோச – ‘‘ஆயாம, ப⁴ந்தே கஸ்ஸப, யேன அஞ்ஞதரோ பி⁴க்கு²னுபஸ்ஸயோ தேனுபஸங்கமிஸ்ஸாமா’’தி. ‘‘க³ச்ச² த்வம், ஆவுஸோ ஆனந்த³, ப³ஹுகிச்சோ த்வம் ப³ஹுகரணீயோ’’தி. ததியம்பி கோ² ஆயஸ்மா ஆனந்தோ³ ஆயஸ்மந்தம் மஹாகஸ்ஸபம் ஏதத³வோச – ‘‘ஆயாம, ப⁴ந்தே கஸ்ஸப, யேன அஞ்ஞதரோ பி⁴க்கு²னுபஸ்ஸயோ தேனுபஸங்கமிஸ்ஸாமா’’தி.

அத² கோ² ஆயஸ்மா மஹாகஸ்ஸபோ புப்³ப³ண்ஹஸமயம் நிவாஸேத்வா பத்தசீவரமாதா³ய ஆயஸ்மதா ஆனந்தே³ன பச்சா²ஸமணேன யேன அஞ்ஞதரோ பி⁴க்கு²னுபஸ்ஸயோ தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. அத² கோ² ஸம்ப³ஹுலா பி⁴க்கு²னியோ யேனாயஸ்மா மஹாகஸ்ஸபோ தேனுபஸங்கமிம்ஸு; உபஸங்கமித்வா ஆயஸ்மந்தம் மஹாகஸ்ஸபம் அபி⁴வாதே³த்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தா பி⁴க்கு²னியோ ஆயஸ்மா மஹாகஸ்ஸபோ த⁴ம்மியா கதா²ய ஸந்த³ஸ்ஸேஸி ஸமாத³பேஸி ஸமுத்தேஜேஸி ஸம்பஹம்ஸேஸி. அத² கோ² ஆயஸ்மா மஹாகஸ்ஸபோ தா பி⁴க்கு²னியோ த⁴ம்மியா கதா²ய ஸந்த³ஸ்ஸேத்வா ஸமாத³பேத்வா ஸமுத்தேஜேத்வா ஸம்பஹம்ஸேத்வா உட்டா²யாஸனா பக்காமி.

அத² கோ² து²ல்லதிஸ்ஸா பி⁴க்கு²னீ அனத்தமனா அனத்தமனவாசம் நிச்சா²ரேஸி – ‘‘கிம் பன அய்யோ மஹாகஸ்ஸபோ, அய்யஸ்ஸ ஆனந்த³ஸ்ஸ வேதே³ஹமுனினோ ஸம்முகா² த⁴ம்மம் பா⁴ஸிதப்³ப³ம் மஞ்ஞதி? ஸேய்யதா²பி நாம ஸூசிவாணிஜகோ ஸூசிகாரஸ்ஸ ஸந்திகே ஸூசிம் விக்கேதப்³ப³ம் மஞ்ஞேய்ய; ஏவமேவ அய்யோ மஹாகஸ்ஸபோ அய்யஸ்ஸ ஆனந்த³ஸ்ஸ வேதே³ஹமுனினோ ஸம்முகா² த⁴ம்மம் பா⁴ஸிதப்³ப³ம் மஞ்ஞதீ’’தி.

அஸ்ஸோஸி கோ² ஆயஸ்மா மஹாகஸ்ஸபோ து²ல்லதிஸ்ஸாய பி⁴க்கு²னியா இமம் வாசம் பா⁴ஸமானாய. அத² கோ² ஆயஸ்மா மஹாகஸ்ஸபோ ஆயஸ்மந்தம் ஆனந்த³ம் ஏதத³வோச – ‘‘கிம் நு கோ², ஆவுஸோ ஆனந்த³, அஹம் ஸூசிவாணிஜகோ, த்வம் ஸூசிகாரோ; உதா³ஹு அஹம் ஸூசிகாரோ, த்வம் ஸூசிவாணிஜகோ’’தி? ‘‘க²ம, ப⁴ந்தே கஸ்ஸப, பா³லோ மாதுகா³மோ’’தி. ‘‘ஆக³மேஹி த்வம், ஆவுஸோ ஆனந்த³, மா தே ஸங்கோ⁴ உத்தரி உபபரிக்கி²’’.

‘‘தம் கிம் மஞ்ஞஸி, ஆவுஸோ ஆனந்த³, அபி நு த்வம் ப⁴க³வதோ ஸம்முகா² பி⁴க்கு²ஸங்கே⁴ உபனீதோ – ‘அஹம், பி⁴க்க²வே, யாவதே³வ ஆகங்கா²மி விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹராமி. ஆனந்தோ³பி, பி⁴க்க²வே, யாவதே³வ ஆகங்க²தி விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹரதீ’’’தி? ‘‘நோ ஹேதம், ப⁴ந்தே’’.

‘‘அஹம் கோ², ஆவுஸோ, ப⁴க³வதோ ஸம்முகா² பி⁴க்கு²ஸங்கே⁴ உபனீதோ – ‘அஹம், பி⁴க்க²வே, யாவதே³வ ஆகங்கா²மி விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹராமி. கஸ்ஸபோபி, பி⁴க்க²வே, யாவதே³வ ஆகங்க²தி விவிச்சேவ காமேஹி விவிச்ச அகுஸலேஹி த⁴ம்மேஹி…பே… பட²மம் ஜா²னம் உபஸம்பஜ்ஜ விஹரதீ’தி…பே…. (நவன்னம் அனுபுப்³ப³விஹாரஸமாபத்தீனம் பஞ்சன்னஞ்ச அபி⁴ஞ்ஞானம் ஏவம் வித்தா²ரோ வேதி³தப்³போ³.)

‘‘தம் கிம் மஞ்ஞஸி, ஆவுஸோ ஆனந்த³, அபி நு த்வம் ப⁴க³வதோ ஸம்முகா² பி⁴க்கு²ஸங்கே⁴ உபனீதோ – ‘அஹம், பி⁴க்க²வே, ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹராமி. ஆனந்தோ³பி, பி⁴க்க²வே, ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’’தி? ‘‘நோ ஹேதம், ப⁴ந்தே’’.

‘‘அஹம் கோ², ஆவுஸோ, ப⁴க³வதோ ஸம்முகா² பி⁴க்கு²ஸங்கே⁴ உபனீதோ – ‘அஹம், பி⁴க்க²வே, ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹராமி. கஸ்ஸபோபி, பி⁴க்க²வே, ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹரதீ’’’தி.

‘‘ஸத்தரதனம் வா, ஆவுஸோ, நாக³ம் அட்³ட⁴ட்ட²மரதனம் வா தாலபத்திகாய சா²தே³தப்³ப³ம் மஞ்ஞேய்ய, யோ மே ச² அபி⁴ஞ்ஞா சா²தே³தப்³ப³ம் மஞ்ஞேய்யா’’தி.

சவித்த² ச பன து²ல்லதிஸ்ஸா பி⁴க்கு²னீ ப்³ரஹ்மசரியம்ஹாதி. த³ஸமம்.

11. சீவரஸுத்தம்

154. ஏகம் ஸமயம் ஆயஸ்மா மஹாகஸ்ஸபோ ராஜக³ஹே விஹரதி வேளுவனே கலந்த³கனிவாபே. தேன கோ² பன ஸமயேன ஆயஸ்மா ஆனந்தோ³ த³க்கி²ணகி³ரிஸ்மிம் சாரிகம் சரதி மஹதா பி⁴க்கு²ஸங்கே⁴ன ஸத்³தி⁴ம்.

தேன கோ² பன ஸமயேன ஆயஸ்மதோ ஆனந்த³ஸ்ஸ திம்ஸமத்தா ஸத்³தி⁴விஹாரினோ பி⁴க்கூ² ஸிக்க²ம் பச்சக்கா²ய ஹீனாயாவத்தா ப⁴வந்தி யேபு⁴ய்யேன குமாரபூ⁴தா. அத² கோ² ஆயஸ்மா ஆனந்தோ³ த³க்கி²ணகி³ரிஸ்மிம் யதா²பி⁴ரந்தம் சாரிகம் சரித்வா யேன ராஜக³ஹம் வேளுவனம் கலந்த³கனிவாபோ யேனாயஸ்மா மஹாகஸ்ஸபோ தேனுபஸங்கமி; உபஸங்கமித்வா ஆயஸ்மந்தம் மஹாகஸ்ஸபம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னம் கோ² ஆயஸ்மந்தம் ஆனந்த³ம் ஆயஸ்மா மஹாகஸ்ஸபோ ஏதத³வோச – ‘‘கதி நு கோ², ஆவுஸோ ஆனந்த³, அத்த²வஸே படிச்ச ப⁴க³வதா குலேஸு திகபோ⁴ஜனம் பஞ்ஞத்த’’ந்தி?

‘‘தயோ கோ², ப⁴ந்தே கஸ்ஸப, அத்த²வஸே படிச்ச ப⁴க³வதா குலேஸு திகபோ⁴ஜனம் பஞ்ஞத்தம் – து³ம்மங்கூனம் புக்³க³லானம் நிக்³க³ஹாய பேஸலானம் பி⁴க்கூ²னம் பா²ஸுவிஹாராய, மா பாபிச்சா² பக்க²ம் நிஸ்ஸாய ஸங்க⁴ம் பி⁴ந்தே³ய்யும் [வினயபிடகே சூளவக்³கே³ ஸம்க⁴பே⁴த³கக்க²ந்த⁴கே வஜிரபு³த்³தி⁴யம் அஞ்ஞதா² ஸம்ப³ந்தோ⁴ த³ஸ்ஸிதோ], குலானுத்³த³யதாய ச. இமே கோ², ப⁴ந்தே கஸ்ஸப, தயோ அத்த²வஸே படிச்ச ப⁴க³வதா குலேஸு திகபோ⁴ஜனம் பஞ்ஞத்த’’ந்தி.

‘‘அத² கிஞ்சரஹி த்வம், ஆவுஸோ ஆனந்த³, இமேஹி நவேஹி பி⁴க்கூ²ஹி இந்த்³ரியேஸு அகு³த்தத்³வாரேஹி போ⁴ஜனே அமத்தஞ்ஞூஹி ஜாக³ரியம் அனனுயுத்தேஹி ஸத்³தி⁴ம் சாரிகம் சரஸி? ஸஸ்ஸகா⁴தம் மஞ்ஞே சரஸி, குலூபகா⁴தம் மஞ்ஞே சரஸி. ஓலுஜ்ஜதி [உல்லுஜ்ஜதி (ஸீ. அட்ட²கதா²ஸு ச)] கோ² தே, ஆவுஸோ ஆனந்த³, பரிஸா; பலுஜ்ஜந்தி கோ² தே, ஆவுஸோ, நவப்பாயா. ந வாயம் குமாரகோ மத்தமஞ்ஞாஸீ’’தி.

‘‘அபி மே, ப⁴ந்தே கஸ்ஸப, ஸிரஸ்மிம் பலிதானி ஜாதானி. அத² ச பன மயம் அஜ்ஜாபி ஆயஸ்மதோ மஹாகஸ்ஸபஸ்ஸ குமாரகவாதா³ ந முச்சாமா’’தி. ‘‘ததா² ஹி பன த்வம், ஆவுஸோ ஆனந்த³, இமேஹி நவேஹி பி⁴க்கூ²ஹி இந்த்³ரியேஸு அகு³த்தத்³வாரேஹி போ⁴ஜனே அமத்தஞ்ஞூஹி ஜாக³ரியம் அனனுயுத்தேஹி ஸத்³தி⁴ம் சாரிகம் சரஸி, ஸஸ்ஸகா⁴தம் மஞ்ஞே சரஸி, குலூபகா⁴தம் மஞ்ஞே சரஸி. ஓலுஜ்ஜதி கோ² தே, ஆவுஸோ ஆனந்த³, பரிஸா; பலுஜ்ஜந்தி கோ² தே, ஆவுஸோ, நவப்பாயா. [பலுஜ்ஜதி கோ² தே ஆவுஸோ ஆனந்த³ பரிஸா (க. ஸீ.)] ந வாயம் குமாரகோ மத்தமஞ்ஞாஸீ’’தி.

அஸ்ஸோஸி கோ² து²ல்லனந்தா³ பி⁴க்கு²னீ – ‘‘அய்யேன கிர மஹாகஸ்ஸபேன அய்யோ ஆனந்தோ³ வேதே³ஹமுனி குமாரகவாதே³ன அபஸாதி³தோ’’தி.

அத² கோ² து²ல்லனந்தா³ பி⁴க்கு²னீ அனத்தமனா அனத்தமனவாசம் நிச்சா²ரேஸி – ‘‘கிம் பன அய்யோ மஹாகஸ்ஸபோ அஞ்ஞதித்தி²யபுப்³போ³ ஸமானோ அய்யம் ஆனந்த³ம் வேதே³ஹமுனிம் குமாரகவாதே³ன அபஸாதே³தப்³ப³ம் மஞ்ஞதீ’’தி! அஸ்ஸோஸி கோ² ஆயஸ்மா மஹாகஸ்ஸபோ து²ல்லனந்தா³ய பி⁴க்கு²னியா இமம் வாசம் பா⁴ஸமானாய.

அத² கோ² ஆயஸ்மா மஹாகஸ்ஸபோ ஆயஸ்மந்தம் ஆனந்த³ம் ஏதத³வோச – ‘‘தக்³கா⁴வுஸோ ஆனந்த³, து²ல்லனந்தா³ய பி⁴க்கு²னியா ஸஹஸா அப்படிஸங்கா² வாசா பா⁴ஸிதா. யத்வாஹம், ஆவுஸோ, கேஸமஸ்ஸும் ஓஹாரேத்வா காஸாயானி வத்தா²னி அச்சா²தே³த்வா அகா³ரஸ்மா அனகா³ரியம் பப்³ப³ஜிதோ, நாபி⁴ஜானாமி அஞ்ஞம் ஸத்தா²ரம் உத்³தி³ஸிதா [உத்³தி³ஸிதும் (ஸீ. பீ. க.)], அஞ்ஞத்ர தேன ப⁴க³வதா அரஹதா ஸம்மாஸம்பு³த்³தே⁴ன. புப்³பே³ மே, ஆவுஸோ, அகா³ரிகபூ⁴தஸ்ஸ ஸதோ ஏதத³ஹோஸி – ‘ஸம்பா³தோ⁴ க⁴ராவாஸோ ரஜாபதோ² [ரஜோபதோ² (ஸீ.)], அப்³போ⁴காஸோ பப்³ப³ஜ்ஜா. நயித³ம் ஸுகரம் அகா³ரம் அஜ்ஜா²வஸதா ஏகந்தபரிபுண்ணம் ஏகந்தபரிஸுத்³த⁴ம் ஸங்க²லிகி²தம் ப்³ரஹ்மசரியம் சரிதும். யம்னூனாஹம் கேஸமஸ்ஸும் ஓஹாரேத்வா காஸாயானி வத்தா²னி அச்சா²தே³த்வா அகா³ரஸ்மா அனகா³ரியம் பப்³ப³ஜேய்ய’ந்தி. ஸோ க்²வாஹம், ஆவுஸோ, அபரேன ஸமயேன படபிலோதிகானம் ஸங்கா⁴டிம் காரேத்வா [கரித்வா (ஸீ. ஸ்யா. கம். பீ.)] யே லோகே அரஹந்தோ தே உத்³தி³ஸ்ஸ கேஸமஸ்ஸும் ஓஹாரேத்வா காஸாயானி வத்தா²னி அச்சா²தே³த்வா அகா³ரஸ்மா அனகா³ரியம் பப்³ப³ஜிம்.

ஸோ ஏவம் பப்³ப³ஜிதோ ஸமானோ அத்³தா⁴னமக்³க³ப்படிபன்னோ அத்³த³ஸம் ப⁴க³வந்தம் அந்தரா ச ராஜக³ஹம் அந்தரா ச நாளந்த³ம் ப³ஹுபுத்தே சேதியே நிஸின்னம். தி³ஸ்வான மே ஏதத³ஹோஸி – ‘ஸத்தா²ரஞ்ச வதாஹம் பஸ்ஸேய்யம், ப⁴க³வந்தமேவ பஸ்ஸேய்யம்; ஸுக³தஞ்ச வதாஹம் பஸ்ஸேய்யம், ப⁴க³வந்தமேவ பஸ்ஸேய்யம்; ஸம்மாஸம்பு³த்³த⁴ஞ்ச வதாஹம் பஸ்ஸேய்யம்; ப⁴க³வந்தமேவ பஸ்ஸேய்ய’ந்தி. ஸோ க்²வாஹம், ஆவுஸோ, தத்தே²வ ப⁴க³வதோ பாதே³ஸு ஸிரஸா நிபதித்வா ப⁴க³வந்தம் ஏதத³வோசம் – ‘ஸத்தா² மே, ப⁴ந்தே, ப⁴க³வா, ஸாவகோஹமஸ்மி; ஸத்தா² மே, ப⁴ந்தே, ப⁴க³வா, ஸாவகோஹமஸ்மீ’தி. ஏவம் வுத்தே மம், ஆவுஸோ, ப⁴க³வா ஏதத³வோச – ‘யோ கோ², கஸ்ஸப, ஏவம் ஸப்³ப³சேதஸா ஸமன்னாக³தம் ஸாவகம் அஜானஞ்ஞேவ வதே³ய்ய ஜானாமீதி, அபஸ்ஸஞ்ஞேவ வதே³ய்ய பஸ்ஸாமீதி, முத்³தா⁴பி தஸ்ஸ விபதேய்ய. அஹம் கோ² பன, கஸ்ஸப, ஜானஞ்ஞேவ வதா³மி ஜானாமீதி, பஸ்ஸஞ்ஞேவ வதா³மி பஸ்ஸாமீ’தி.

தஸ்மாதிஹ தே, கஸ்ஸப, ஏவம் ஸிக்கி²தப்³ப³ம் – ‘திப்³ப³ம் மே ஹிரோத்தப்பம் பச்சுபட்டி²தம் ப⁴விஸ்ஸதி தே²ரேஸு நவேஸு மஜ்ஜி²மேஸூ’தி. ஏவஞ்ஹி தே, கஸ்ஸப, ஸிக்கி²தப்³ப³ம்.

தஸ்மாதிஹ தே, கஸ்ஸப, ஏவம் ஸிக்கி²தப்³ப³ம் – ‘யம் கிஞ்சி த⁴ம்மம் ஸுணிஸ்ஸாமி குஸலூபஸம்ஹிதம் ஸப்³ப³ம் தம் அட்டி²ம் கத்வா மனஸி கரித்வா ஸப்³ப³சேதஸா ஸமன்னாஹரித்வா ஓஹிதஸோதோ த⁴ம்மம் ஸுணிஸ்ஸாமீ’தி. ஏவஞ்ஹி தே, கஸ்ஸப, ஸிக்கி²தப்³ப³ம்.

தஸ்மாதிஹ தே, கஸ்ஸப, ஏவம் ஸிக்கி²தப்³ப³ம் – ‘ஸாதஸஹக³தா ச மே காயக³தாஸதி ந விஜஹிஸ்ஸதீ’தி. ஏவஞ்ஹி தே, கஸ்ஸப, ஸிக்கி²தப்³ப³ந்தி.

‘‘அத² கோ² மம், ஆவுஸோ, ப⁴க³வா இமினா ஓவாதே³ன ஓவதி³த்வா உட்டா²யாஸனா பக்காமி. ஸத்தாஹமேவ க்²வாஹம், ஆவுஸோ, ஸரணோ [ஸாணோ (ஸீ.)] ரட்ட²பிண்ட³ம் பு⁴ஞ்ஜிம்’’. அட்ட²மியா அஞ்ஞா உத³பாதி³.

‘‘அத² கோ², ஆவுஸோ, ப⁴க³வா மக்³கா³ ஓக்கம்ம யேன அஞ்ஞதரம் ருக்க²மூலம் தேனுபஸங்கமி. அத² க்²வாஹம், ஆவுஸோ, படபிலோதிகானம் ஸங்கா⁴டிம் சதுக்³கு³ணம் பஞ்ஞபேத்வா ப⁴க³வந்தம் ஏதத³வோசம் – ‘இத⁴, ப⁴ந்தே, ப⁴க³வா நிஸீத³து, யம் மமஸ்ஸ தீ³க⁴ரத்தம் ஹிதாய ஸுகா²யா’தி. நிஸீதி³ கோ², ஆவுஸோ, ப⁴க³வா பஞ்ஞத்தே ஆஸனே. நிஸஜ்ஜ கோ² மம், ஆவுஸோ, ப⁴க³வா ஏதத³வோச – ‘முது³கா கோ² த்யாயம், கஸ்ஸப, படபிலோதிகானம் ஸங்கா⁴டீ’தி. ‘படிக்³க³ண்ஹாது மே, ப⁴ந்தே, ப⁴க³வா படபிலோதிகானம் ஸங்கா⁴டிம் அனுகம்பம் உபாதா³யா’தி. ‘தா⁴ரேஸ்ஸஸி பன மே த்வம், கஸ்ஸப, ஸாணானி பம்ஸுகூலானி நிப்³ப³ஸனானீ’தி. ‘தா⁴ரேஸ்ஸாமஹம், ப⁴ந்தே, ப⁴க³வதோ ஸாணானி பம்ஸுகூலானி நிப்³ப³ஸனானீ’தி. ‘‘ஸோ க்²வாஹம், ஆவுஸோ, படபிலோதிகானம் ஸங்கா⁴டிம் ப⁴க³வதோ பாதா³ஸிம். அஹம் பன ப⁴க³வதோ ஸாணானி பம்ஸுகூலானி நிப்³ப³ஸனானி படிபஜ்ஜிம்’’.

‘‘யஞ்ஹி தம், ஆவுஸோ, ஸம்மா வத³மானோ வதே³ய்ய – ‘ப⁴க³வதோ புத்தோ ஓரஸோ முக²தோ ஜாதோ த⁴ம்மஜோ த⁴ம்மனிம்மிதோ த⁴ம்மதா³யாதோ³, படிக்³க³ஹிதானி [படிக்³க³ஹேதா (ஸீ.)] ஸாணானி பம்ஸுகூலானி நிப்³ப³ஸனானீ’தி, மமம் தம் ஸம்மா வத³மானோ வதே³ய்ய – ‘ப⁴க³வதோ புத்தோ ஓரஸோ முக²தோ ஜாதோ த⁴ம்மஜோ த⁴ம்மனிம்மிதோ த⁴ம்மதா³யாதோ³, படிக்³க³ஹிதானி ஸாணானி பம்ஸுகூலானி நிப்³ப³ஸனானீ’’’தி.

‘‘அஹம் கோ², ஆவுஸோ, யாவதே³வ ஆகங்கா²மி விவிச்சேவ காமேஹி விவிச்ச அகுஸலேஹி த⁴ம்மேஹி ஸவிதக்கம் ஸவிசாரம் விவேகஜம் பீதிஸுக²ம் பட²மம் ஜா²னம் உபஸம்பஜ்ஜ விஹராமி. அஹம் கோ², ஆவுஸோ, யாவதே³ ஆகங்கா²மி…பே… (நவன்னம் அனுபுப்³ப³விஹாரஸமாபத்தினம் பஞ்சன்னஞ்ச அபி⁴ஞ்ஞானம் ஏவம் வித்தா²ரோ வேதி³தப்³போ³).

‘‘அஹம் கோ², ஆவுஸோ, ஆஸவானம் க²யா அனாஸவம் சேதோவிமுத்திம் பஞ்ஞாவிமுத்திம் தி³ட்டே²வ த⁴ம்மே ஸயம் அபி⁴ஞ்ஞா ஸச்சி²கத்வா உபஸம்பஜ்ஜ விஹராமி; ஸத்தரதனம் வா, ஆவுஸோ, நாக³ம் அட்³ட⁴ட்ட²மரதனம் வா தாலபத்திகாய சா²தே³தப்³ப³ம் மஞ்ஞேய்ய, யோ மே ச² அபி⁴ஞ்ஞா சா²தே³தப்³ப³ம் மஞ்ஞேய்யா’’தி.

சவித்த² ச பன து²ல்லனந்தா³ பி⁴க்கு²னீ ப்³ரஹ்மசரியம்ஹாதி. ஏகாத³ஸமம்.

12. பரம்மரணஸுத்தம்

155. ஏகம் ஸமயம் ஆயஸ்மா ச மஹாகஸ்ஸபோ ஆயஸ்மா ச ஸாரிபுத்தோ பா³ராணஸியம் விஹரந்தி இஸிபதனே மிக³தா³யே. அத² கோ² ஆயஸ்மா ஸாரிபுத்தோ ஸாயன்ஹஸமயம் படிஸல்லானா வுட்டி²தோ யேனாயஸ்மா மஹாகஸ்ஸபோ தேனுபஸங்கமி; உபஸங்கமித்வா ஆயஸ்மதா மஹாகஸ்ஸபேன ஸத்³தி⁴ம் ஸம்மோதி³. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா ஸாரிபுத்தோ ஆயஸ்மந்தம் மஹாகஸ்ஸபம் ஏதத³வோச – ‘‘கிம் நு கோ², ஆவுஸோ கஸ்ஸப, ஹோதி ததா²க³தோ பரம் மரணா’’தி? ‘‘அப்³யாகதம் கோ² ஏதம், ஆவுஸோ, ப⁴க³வதா – ‘ஹோதி ததா²க³தோ பரம் மரணா’’’தி. ‘‘கிம் பனாவுஸோ, ந ஹோதி ததா²க³தோ பரம் மரணா’’தி? ‘‘ஏவம்பி கோ², ஆவுஸோ, அப்³யாகதம் ப⁴க³வதா – ‘ந ஹோதி ததா²க³தோ பரம் மரணா’’’தி. ‘‘கிம் நு கோ², ஆவுஸோ, ஹோதி ச ந ச ஹோதி ததா²க³தோ பரம் மரணா’’தி? ‘‘அப்³யாகதம் கோ² ஏதம், ஆவுஸோ, ப⁴க³வதா – ‘ஹோதி ச ந ச ஹோதி ததா²க³தோ பரம் மரணா’’’தி. ‘‘கிம் பனாவுஸோ, நேவ ஹோதி, ந ந ஹோதி ததா²க³தோ பரம் மரணா’’தி? ‘‘ஏவம்பி கோ², ஆவுஸோ, அப்³யாகதம் ப⁴க³வதா – ‘நேவ ஹோதி ந ந ஹோதி ததா²க³தோ பரம் மரணா’’’தி. ‘‘கஸ்மா சேதம், ஆவுஸோ, அப்³யாகதம் ப⁴க³வதா’’தி? ‘‘ந ஹேதம், ஆவுஸோ, அத்த²ஸம்ஹிதம் நாதி³ப்³ரஹ்மசரியகம் ந நிப்³பி³தா³ய ந விராகா³ய ந நிரோதா⁴ய ந உபஸமாய ந அபி⁴ஞ்ஞாய ந ஸம்போ³தா⁴ய ந நிப்³பா³னாய ஸம்வத்ததி. தஸ்மா தம் அப்³யாகதம் ப⁴க³வதா’’தி.

‘‘அத² கிஞ்சரஹாவுஸோ, ப்³யாகதம் ப⁴க³வதா’’தி? ‘‘இத³ம் ‘து³க்க²’ந்தி கோ², ஆவுஸோ, ப்³யாகதம் ப⁴க³வதா; அயம் ‘து³க்க²ஸமுத³யோ’தி ப்³யாகதம் ப⁴க³வதா; அயம் ‘து³க்க²னிரோதோ⁴’தி ப்³யாகதம் ப⁴க³வதா; அயம் ‘து³க்க²னிரோத⁴கா³மினீ படிபதா³’தி ப்³யாகதம் ப⁴க³வதா’’தி. ‘‘கஸ்மா சேதம், ஆவுஸோ, ப்³யாகதம் ப⁴க³வதா’’தி? ‘‘ஏதஞ்ஹி, ஆவுஸோ, அத்த²ஸம்ஹிதம் ஏதம் ஆதி³ப்³ரஹ்மசரியகம் ஏதம் நிப்³பி³தா³ய விராகா³ய நிரோதா⁴ய உபஸமாய அபி⁴ஞ்ஞாய ஸம்போ³தா⁴ய நிப்³பா³னாய ஸம்வத்ததி. தஸ்மா தம் ப்³யாகதம் ப⁴க³வதா’’தி. த்³வாத³ஸமம்.

13. ஸத்³த⁴ம்மப்பதிரூபகஸுத்தம்

156. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஆயஸ்மா மஹாகஸ்ஸபோ யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² ஆயஸ்மா மஹாகஸ்ஸபோ ப⁴க³வந்தம் ஏதத³வோச – ‘‘கோ நு கோ², ப⁴ந்தே, ஹேது கோ பச்சயோ, யேன புப்³பே³ அப்பதரானி சேவ ஸிக்கா²பதா³னி அஹேஸும் ப³ஹுதரா ச பி⁴க்கூ² அஞ்ஞாய ஸண்ட²ஹிம்ஸு? கோ பன, ப⁴ந்தே, ஹேது கோ பச்சயோ, யேனேதரஹி ப³ஹுதரானி சேவ ஸிக்கா²பதா³னி அப்பதரா ச பி⁴க்கூ² அஞ்ஞாய ஸண்ட²ஹந்தீ’’தி? ‘‘ஏவஞ்சேதம், கஸ்ஸப, ஹோதி ஸத்தேஸு ஹாயமானேஸு ஸத்³த⁴ம்மே அந்தரதா⁴யமானே, ப³ஹுதரானி சேவ ஸிக்கா²பதா³னி ஹோந்தி அப்பதரா ச பி⁴க்கூ² அஞ்ஞாய ஸண்ட²ஹந்தி. ந தாவ, கஸ்ஸப, ஸத்³த⁴ம்மஸ்ஸ அந்தரதா⁴னம் ஹோதி யாவ ந ஸத்³த⁴ம்மப்பதிரூபகம் லோகே உப்பஜ்ஜதி. யதோ ச கோ², கஸ்ஸப, ஸத்³த⁴ம்மப்பதிரூபகம் லோகே உப்பஜ்ஜதி, அத² ஸத்³த⁴ம்மஸ்ஸ அந்தரதா⁴னம் ஹோதி’’.

‘‘ஸேய்யதா²பி, கஸ்ஸப, ந தாவ ஜாதரூபஸ்ஸ அந்தரதா⁴னம் ஹோதி யாவ ந ஜாதரூபப்பதிரூபகம் லோகே உப்பஜ்ஜதி. யதோ ச கோ², கஸ்ஸப, ஜாதரூபப்பதிரூபகம் லோகே உப்பஜ்ஜதி, அத² ஜாதரூபஸ்ஸ அந்தரதா⁴னம் ஹோதி. ஏவமேவ கோ², கஸ்ஸப, ந தாவ ஸத்³த⁴ம்மஸ்ஸ அந்தரதா⁴னம் ஹோதி யாவ ந ஸத்³த⁴ம்மப்பதிரூபகம் லோகே உப்பஜ்ஜதி. யதோ ச கோ², கஸ்ஸப, ஸத்³த⁴ம்மப்பதிரூபகம் லோகே உப்பஜ்ஜதி, அத² ஸத்³த⁴ம்மஸ்ஸ அந்தரதா⁴னம் ஹோதி.

‘‘ந கோ², கஸ்ஸப, பத²வீதா⁴து ஸத்³த⁴ம்மம் அந்தரதா⁴பேதி, ந ஆபோதா⁴து ஸத்³த⁴ம்மம் அந்தரதா⁴பேதி, ந தேஜோதா⁴து ஸத்³த⁴ம்மம் அந்தரதா⁴பேதி, ந வாயோதா⁴து ஸத்³த⁴ம்மம் அந்தரதா⁴பேதி; அத² கோ² இதே⁴வ தே உப்பஜ்ஜந்தி மோக⁴புரிஸா யே இமம் ஸத்³த⁴ம்மம் அந்தரதா⁴பேந்தி. ஸேய்யதா²பி, கஸ்ஸப, நாவா ஆதி³கேனேவ ஓபிலவதி; ந கோ², கஸ்ஸப, ஏவம் ஸத்³த⁴ம்மஸ்ஸ அந்தரதா⁴னம் ஹோதி.

‘‘பஞ்ச கோ²மே, கஸ்ஸப, ஓக்கமனியா த⁴ம்மா ஸத்³த⁴ம்மஸ்ஸ ஸம்மோஸாய அந்தரதா⁴னாய ஸம்வத்தந்தி. கதமே பஞ்ச? இத⁴, கஸ்ஸப, பி⁴க்கூ² பி⁴க்கு²னியோ உபாஸகா உபாஸிகாயோ ஸத்த²ரி அகா³ரவா விஹரந்தி அப்பதிஸ்ஸா, த⁴ம்மே அகா³ரவா விஹரந்தி அப்பதிஸ்ஸா, ஸங்கே⁴ அகா³ரவா விஹரந்தி அப்பதிஸ்ஸா, ஸிக்கா²ய அகா³ரவா விஹரந்தி அப்பதிஸ்ஸா, ஸமாதி⁴ஸ்மிம் அகா³ரவா விஹரந்தி அப்பதிஸ்ஸா – இமே கோ², கஸ்ஸப, பஞ்ச ஓக்கமனியா த⁴ம்மா ஸத்³த⁴ம்மஸ்ஸ ஸம்மோஸாய அந்தரதா⁴னாய ஸம்வத்தந்தி.

‘‘பஞ்ச கோ²மே, கஸ்ஸப, த⁴ம்மா ஸத்³த⁴ம்மஸ்ஸ டி²தியா அஸம்மோஸாய அனந்தரதா⁴னாய ஸம்வத்தந்தி. கதமே பஞ்ச? இத⁴, கஸ்ஸப, பி⁴க்கூ² பி⁴க்கு²னியோ உபாஸகா உபாஸிகாயோ ஸத்த²ரி ஸகா³ரவா விஹரந்தி ஸப்பதிஸ்ஸா, த⁴ம்மே ஸகா³ரவா விஹரந்தி ஸப்பதிஸ்ஸா, ஸங்கே⁴ ஸகா³ரவா விஹரந்தி ஸப்பதிஸ்ஸா, ஸிக்கா²ய ஸகா³ரவா விஹரந்தி ஸப்பதிஸ்ஸா, ஸமாதி⁴ஸ்மிம் ஸகா³ரவா விஹரந்தி ஸப்பதிஸ்ஸா – இமே கோ², கஸ்ஸப, பஞ்ச த⁴ம்மா ஸத்³த⁴ம்மஸ்ஸ டி²தியா அஸம்மோஸாய அனந்தரதா⁴னாய ஸம்வத்தந்தீ’’தி. தேரஸமம்.

கஸ்ஸபஸம்யுத்தம் ஸமத்தம்.