7. பவாரணாஸுத்தம்

215. ஏகம் ஸமயம் ப⁴க³வா ஸாவத்தி²யம் விஹரதி புப்³பா³ராமே மிகா³ரமாதுபாஸாதே³ மஹதா பி⁴க்கு²ஸங்கே⁴ன ஸத்³தி⁴ம் பஞ்சமத்தேஹி பி⁴க்கு²ஸதேஹி ஸப்³பே³ஹேவ அரஹந்தேஹி. தேன கோ² பன ஸமயேன ப⁴க³வா தத³ஹுபோஸதே² பன்னரஸே பவாரணாய பி⁴க்கு²ஸங்க⁴பரிவுதோ அப்³போ⁴காஸே நிஸின்னோ ஹோதி. அத² கோ² ப⁴க³வா துண்ஹீபூ⁴தம் பி⁴க்கு²ஸங்க⁴ம் அனுவிலோகேத்வா பி⁴க்கூ² ஆமந்தேஸி – ‘‘ஹந்த³ தா³னி, பி⁴க்க²வே, பவாரேமி வோ. ந ச மே கிஞ்சி க³ரஹத² காயிகம் வா வாசஸிகம் வா’’தி.

ஏவம் வுத்தே, ஆயஸ்மா ஸாரிபுத்தோ உட்டா²யாஸனா ஏகம்ஸம் உத்தராஸங்க³ம் கரித்வா யேன ப⁴க³வா தேனஞ்ஜலிம் பணாமேத்வா ப⁴க³வந்தம் ஏதத³வோச – ‘‘ந கோ² மயம், ப⁴ந்தே, ப⁴க³வதோ கிஞ்சி க³ரஹாம காயிகம் வா வாசஸிகம் வா. ப⁴க³வா ஹி, ப⁴ந்தே, அனுப்பன்னஸ்ஸ மக்³க³ஸ்ஸ உப்பாதே³தா, அஸஞ்ஜாதஸ்ஸ மக்³க³ஸ்ஸ ஸஞ்ஜனேதா, அனக்கா²தஸ்ஸ மக்³க³ஸ்ஸ அக்கா²தா, மக்³க³ஞ்ஞூ மக்³க³விதூ³ மக்³க³கோவிதோ³. மக்³கா³னுகா³ ச, ப⁴ந்தே, ஏதரஹி ஸாவகா விஹரந்தி பச்சா² ஸமன்னாக³தா; அஹஞ்ச கோ², ப⁴ந்தே, ப⁴க³வந்தம் பவாரேமி. ந ச மே ப⁴க³வா கிஞ்சி க³ரஹதி காயிகம் வா வாசஸிகம் வா’’தி.

‘‘ந க்²வாஹம் தே, ஸாரிபுத்த, கிஞ்சி க³ரஹாமி காயிகம் வா வாசஸிகம் வா. பண்டி³தோ த்வம், ஸாரிபுத்த, மஹாபஞ்ஞோ த்வம், ஸாரிபுத்த, புது²பஞ்ஞோ த்வம், ஸாரிபுத்த, ஹாஸபஞ்ஞோ த்வம், ஸாரிபுத்த, ஜவனபஞ்ஞோ த்வம், ஸாரிபுத்த, திக்க²பஞ்ஞோ த்வம், ஸாரிபுத்த, நிப்³பே³தி⁴கபஞ்ஞோ த்வம், ஸாரிபுத்த. ஸேய்யதா²பி, ஸாரிபுத்த, ரஞ்ஞோ சக்கவத்திஸ்ஸ ஜேட்ட²புத்தோ பிதரா பவத்திதம் சக்கம் ஸம்மதே³வ அனுப்பவத்தேதி; ஏவமேவ கோ² த்வம், ஸாரிபுத்த, மயா அனுத்தரம் த⁴ம்மசக்கம் பவத்திதம் ஸம்மதே³வ அனுப்பவத்தேஸீ’’தி.

‘‘நோ சே கிர மே, ப⁴ந்தே, ப⁴க³வா கிஞ்சி க³ரஹதி காயிகம் வா வாசஸிகம் வா. இமேஸம் பன, ப⁴ந்தே, ப⁴க³வா பஞ்சன்னம் பி⁴க்கு²ஸதானம் ந கிஞ்சி க³ரஹதி காயிகம் வா வாசஸிகம் வா’’தி. ‘‘இமேஸம்பி க்²வாஹம், ஸாரிபுத்த, பஞ்சன்னம் பி⁴க்கு²ஸதானம் ந கிஞ்சி க³ரஹாமி காயிகம் வா வாசஸிகம் வா. இமேஸஞ்ஹி, ஸாரிபுத்த, பஞ்சன்னம் பி⁴க்கு²ஸதானம் ஸட்டி² பி⁴க்கூ² தேவிஜ்ஜா, ஸட்டி² பி⁴க்கூ² ச²ளபி⁴ஞ்ஞா, ஸட்டி² பி⁴க்கூ² உப⁴தோபா⁴க³விமுத்தா, அத² இதரே பஞ்ஞாவிமுத்தா’’தி.

அத² கோ² ஆயஸ்மா வங்கீ³ஸோ உட்டா²யாஸனா ஏகம்ஸம் உத்தராஸங்க³ம் கரித்வா யேன ப⁴க³வா தேனஞ்ஜலிம் பணாமேத்வா ப⁴க³வந்தம் ஏதத³வோச – ‘‘படிபா⁴தி மம் ப⁴க³வா, படிபா⁴தி மம் ஸுக³தா’’தி. ‘‘படிபா⁴து தம், வங்கீ³ஸா’’தி ப⁴க³வா அவோச. அத² கோ² ஆயஸ்மா வங்கீ³ஸோ ப⁴க³வந்தம் ஸம்முகா² ஸாருப்பாஹி கா³தா²ஹி அபி⁴த்த²வி –

‘‘அஜ்ஜ பன்னரஸே விஸுத்³தி⁴யா, பி⁴க்கூ² பஞ்சஸதா ஸமாக³தா;

ஸம்யோஜனப³ந்த⁴னச்சி²தா³, அனீகா⁴ கீ²ணபுனப்³ப⁴வா இஸீ.

‘‘சக்கவத்தீ யதா² ராஜா, அமச்சபரிவாரிதோ;

ஸமந்தா அனுபரியேதி, ஸாக³ரந்தம் மஹிம் இமம்.

‘‘ஏவம் விஜிதஸங்கா³மம், ஸத்த²வாஹம் அனுத்தரம்;

ஸாவகா பயிருபாஸந்தி, தேவிஜ்ஜா மச்சுஹாயினோ.

‘‘ஸப்³பே³ ப⁴க³வதோ புத்தா, பலாபேத்த² ந விஜ்ஜதி;

தண்ஹாஸல்லஸ்ஸ ஹந்தாரம், வந்தே³ ஆதி³ச்சப³ந்து⁴ன’’ந்தி.