8. கதமோத³கதிஸ்ஸஸுத்தம்

179. ஸாவத்தி²னிதா³னம். தேன கோ² பன ஸமயேன ப⁴க³வா தி³வாவிஹாரக³தோ ஹோதி படிஸல்லீனோ. அத² கோ² ஸுப்³ரஹ்மா ச பச்சேகப்³ரஹ்மா ஸுத்³தா⁴வாஸோ ச பச்சேகப்³ரஹ்மா யேன ப⁴க³வா தேனுபஸங்கமிம்ஸு; உபஸங்கமித்வா பச்சேகம் த்³வாரபா³ஹம் நிஸ்ஸாய அட்ட²ம்ஸு. அத² கோ² ஸுத்³தா⁴வாஸோ பச்சேகப்³ரஹ்மா கதமோத³கதிஸ்ஸகம் [கதமோரகதிஸ்ஸகம் (ஸீ. ஸ்யா. கம்.)] பி⁴க்கு²ம் ஆரப்³ப⁴ ப⁴க³வதோ ஸந்திகே இமம் கா³த²ம் அபா⁴ஸி –

‘‘அப்பமேய்யம் பமினந்தோ, கோத⁴ வித்³வா விகப்பயே;

அப்பமேய்யம் பமாயினம், நிவுதம் தம் மஞ்ஞே அகிஸ்ஸவ’’ந்தி.