10. கோகாலிகஸுத்தம்

181. ஸாவத்தி²னிதா³னம். அத² கோ² கோகாலிகோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் நிஸீதி³. ஏகமந்தம் நிஸின்னோ கோ² கோகாலிகோ பி⁴க்கு² ப⁴க³வந்தம் ஏதத³வோச – ‘‘பாபிச்சா², ப⁴ந்தே, ஸாரிபுத்தமோக்³க³ல்லானா பாபிகானம் இச்சா²னம் வஸம் க³தா’’தி. ஏவம் வுத்தே, ப⁴க³வா கோகாலிகம் பி⁴க்கு²ம் ஏதத³வோச – ‘‘மா ஹேவம், கோகாலிக, அவச; மா ஹேவம், கோகாலிக, அவச. பஸாதே³ஹி, கோகாலிக, ஸாரிபுத்தமோக்³க³ல்லானேஸு சித்தம். பேஸலா ஸாரிபுத்தமோக்³க³ல்லானா’’தி. து³தியம்பி கோ² கோகாலிகோ பி⁴க்கு² ப⁴க³வந்தம் ஏதத³வோச – ‘‘கிஞ்சாபி மே, ப⁴ந்தே, ப⁴க³வா ஸத்³தா⁴யிகோ பச்சயிகோ; அத² கோ² பாபிச்சா²வ ப⁴ந்தே, ஸாரிபுத்தமோக்³க³ல்லானா பாபிகானம் இச்சா²னம் வஸம் க³தா’’தி. து³தியம்பி கோ² ப⁴க³வா கோகாலிகம் பி⁴க்கு²ம் ஏதத³வோச – ‘‘மா ஹேவம், கோகாலிக, அவச; மா ஹேவம், கோகாலிக, அவச. பஸாதே³ஹி, கோகாலிக, ஸாரிபுத்தமோக்³க³ல்லானேஸு சித்தம். பேஸலா ஸாரிபுத்தமோக்³க³ல்லானா’’தி. ததியம்பி கோ² கோகாலிகோ பி⁴க்கு² ப⁴க³வந்தம் ஏதத³வோச – ‘‘கிஞ்சாபி…பே… இச்சா²னம் வஸம் க³தா’’தி. ததியம்பி கோ² ப⁴க³வா கோகாலிகம் பி⁴க்கு²ம் ஏதத³வோச – ‘‘மா ஹேவம்…பே… பேஸலா ஸாரிபுத்தமோக்³க³ல்லானா’’தி.

அத² கோ² கோகாலிகோ பி⁴க்கு² உட்டா²யாஸனா ப⁴க³வந்தம் அபி⁴வாதே³த்வா பத³க்கி²ணம் கத்வா பக்காமி. அசிரபக்கந்தஸ்ஸ ச கோகாலிகஸ்ஸ பி⁴க்கு²னோ ஸாஸபமத்தீஹி பீளகாஹி [பிளகாஹி (ஸீ. பீ.)] ஸப்³போ³ காயோ பு²டோ அஹோஸி. ஸாஸபமத்தியோ ஹுத்வா முக்³க³மத்தியோ அஹேஸும், முக்³க³மத்தியோ ஹுத்வா கலாயமத்தியோ அஹேஸும், கலாயமத்தியோ ஹுத்வா கோலட்டி²மத்தியோ அஹேஸும், கோலட்டி²மத்தியோ ஹுத்வா கோலமத்தியோ அஹேஸும், கோலமத்தியோ ஹுத்வா ஆமலகமத்தியோ அஹேஸும், ஆமலகமத்தியோ ஹுத்வா பே³லுவஸலாடுகமத்தியோ அஹேஸும், பே³லுவஸலாடுகமத்தியோ ஹுத்வா பி³ல்லமத்தியோ அஹேஸும், பி³ல்லமத்தியோ ஹுத்வா பபி⁴ஜ்ஜிம்ஸு. புப்³ப³ஞ்ச லோஹிதஞ்ச பக்³க⁴ரிம்ஸு. அத² கோ² கோகாலிகோ பி⁴க்கு² தேனேவ ஆபா³தே⁴ன காலமகாஸி. காலங்கதோ ச கோகாலிகோ பி⁴க்கு² பது³மம் நிரயம் உபபஜ்ஜி ஸாரிபுத்தமோக்³க³ல்லானேஸு சித்தம் ஆகா⁴தேத்வா.

அத² கோ² ப்³ரஹ்மா ஸஹம்பதி அபி⁴க்கந்தாய ரத்தியா அபி⁴க்கந்தவண்ணோ கேவலகப்பம் ஜேதவனம் ஓபா⁴ஸேத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தோ கோ² ப்³ரஹ்மா ஸஹம்பதி ப⁴க³வந்தம் ஏதத³வோச – ‘‘கோகாலிகோ, ப⁴ந்தே, பி⁴க்கு² காலங்கதோ. காலங்கதோ ச, ப⁴ந்தே, கோகாலிகோ பி⁴க்கு² பது³மம் நிரயம் உபபன்னோ ஸாரிபுத்தமோக்³க³ல்லானேஸு சித்தம் ஆகா⁴தேத்வா’’தி. இத³மவோச ப்³ரஹ்மா ஸஹம்பதி, இத³ம் வத்வா ப⁴க³வந்தம் அபி⁴வாதே³த்வா பத³க்கி²ணம் கத்வா தத்தே²வந்தரதா⁴யீதி.

அத² கோ² ப⁴க³வா தஸ்ஸா ரத்தியா அச்சயேன பி⁴க்கூ² ஆமந்தேஸி – ‘‘இமம், பி⁴க்க²வே, ரத்திம் ப்³ரஹ்மா ஸஹம்பதி அபி⁴க்கந்தாய ரத்தியா அபி⁴க்கந்தவண்ணோ கேவலகப்பம் ஜேதவனம் ஓபா⁴ஸேத்வா யேனாஹம் தேனுபஸங்கமி; உபஸங்கமித்வா மம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தோ கோ², பி⁴க்க²வே, ப்³ரஹ்மா ஸஹம்பதி மம் ஏதத³வோச – ‘கோகாலிகோ, ப⁴ந்தே, பி⁴க்கு² காலங்கதோ. காலங்கதோ ச, ப⁴ந்தே, கோகாலிகோ பி⁴க்கு² பது³மம் நிரயம் உபபன்னோ ஸாரிபுத்தமோக்³க³ல்லானேஸு சித்தம் ஆகா⁴தேத்வா’தி. இத³மவோச, பி⁴க்க²வே, ப்³ரஹ்மா ஸஹம்பதி, இத³ம் வத்வா மம் அபி⁴வாதே³த்வா பத³க்கி²ணம் கத்வா தத்தே²வந்தரதா⁴யீ’’தி.

ஏவம் வுத்தே, அஞ்ஞதரோ பி⁴க்கு² ப⁴க³வந்தம் ஏதத³வோச – ‘‘கீவதீ³க⁴ம் நு கோ², ப⁴ந்தே, பது³மே நிரயே ஆயுப்பமாண’’ந்தி? ‘‘தீ³க⁴ம் கோ², பி⁴க்கு², பது³மே நிரயே ஆயுப்பமாணம். தம் ந ஸுகரம் ஸங்கா²தும் – ஏத்தகானி வஸ்ஸானி இதி வா, ஏத்தகானி வஸ்ஸஸதானி இதி வா, ஏத்தகானி வஸ்ஸஸஹஸ்ஸானி இதி வா, ஏத்தகானி வஸ்ஸஸதஸஹஸ்ஸானி இதி வா’’தி. ‘‘ஸக்கா பன, ப⁴ந்தே, உபமம் காது’’ந்தி? ‘‘ஸக்கா, பி⁴க்கூ²’’தி ப⁴க³வா அவோச –

‘‘ஸேய்யதா²பி, பி⁴க்கு² வீஸதிகா²ரிகோ கோஸலகோ திலவாஹோ. ததோ புரிஸோ வஸ்ஸஸதஸ்ஸ வஸ்ஸஸதஸ்ஸ அச்சயேன ஏகமேகம் திலம் உத்³த⁴ரேய்ய; கி²ப்பதரம் கோ² ஸோ, பி⁴க்கு², வீஸதிகா²ரிகோ கோஸலகோ திலவாஹோ இமினா உபக்கமேன பரிக்க²யம் பரியாதா³னம் க³ச்சே²ய்ய, ந த்வேவ ஏகோ அப்³பு³தோ³ நிரயோ. ஸேய்யதா²பி, பி⁴க்கு², வீஸதி அப்³பு³தா³ நிரயா, ஏவமேகோ நிரப்³பு³த³னிரயோ. ஸேய்யதா²பி, பி⁴க்கு², வீஸதி நிரப்³பு³தா³ நிரயா, ஏவமேகோ அப³போ³ நிரயோ. ஸேய்யதா²பி, பி⁴க்கு², வீஸதி அப³பா³ நிரயா, ஏவமேகோ அடடோ நிரயோ. ஸேய்யதா²பி, பி⁴க்கு², வீஸதி அடடா நிரயா, ஏவமேகோ அஹஹோ நிரயோ. ஸேய்யதா²பி, பி⁴க்கு², வீஸதி அஹஹா நிரயா, ஏவமேகோ குமுதோ³ நிரயோ. ஸேய்யதா²பி, பி⁴க்கு², வீஸதி குமுதா³ நிரயா, ஏவமேகோ ஸோக³ந்தி⁴கோ நிரயோ. ஸேய்யதா²பி, பி⁴க்கு², வீஸதி ஸோக³ந்தி⁴கா நிரயா, ஏவமேகோ உப்பலனிரயோ. ஸேய்யதா²பி, பி⁴க்கு², வீஸதி உப்பலா நிரயா, ஏவமேகோ புண்ட³ரிகோ நிரயோ. ஸேய்யதா²பி, பி⁴க்கு², வீஸதி புண்ட³ரிகா நிரயா, ஏவமேகோ பது³மோ நிரயோ. பது³மே பன, பி⁴க்கு², நிரயே கோகாலிகோ பி⁴க்கு² உபபன்னோ ஸாரிபுத்தமோக்³க³ல்லானேஸு சித்தம் ஆகா⁴தேத்வா’’தி. இத³மவோச ப⁴க³வா, இத³ம் வத்வான ஸுக³தோ அதா²பரம் ஏதத³வோச ஸத்தா² –

‘‘புரிஸஸ்ஸ ஹி ஜாதஸ்ஸ,

குடா²ரீ ஜாயதே முகே²;

யாய சி²ந்த³தி அத்தானம்,

பா³லோ து³ப்³பா⁴ஸிதம் ப⁴ணம்.

‘‘யோ நிந்தி³யம் பஸம்ஸதி,

தம் வா நிந்த³தி யோ பஸம்ஸியோ;

விசினாதி முகே²ன ஸோ கலிம்,

கலினா தேன ஸுக²ம் ந விந்த³தி.

‘‘அப்பமத்தகோ அயம் கலி,

யோ அக்கே²ஸு த⁴னபராஜயோ;

ஸப்³ப³ஸ்ஸாபி ஸஹாபி அத்தனா,

அயமேவ மஹந்தரோ கலி;

யோ ஸுக³தேஸு மனம் பதோ³ஸயே.

‘‘ஸதம் ஸஹஸ்ஸானம் நிரப்³பு³தா³னம்,

ச²த்திம்ஸதி பஞ்ச ச அப்³பு³தா³னி;

யமரியக³ரஹீ நிரயம் உபேதி,

வாசம் மனஞ்ச பணிதா⁴ய பாபக’’ந்தி.

பட²மோ வக்³கோ³.

தஸ்ஸுத்³தா³னம் –

ஆயாசனம் கா³ரவோ ப்³ரஹ்மதே³வோ,

ப³கோ ச ப்³ரஹ்மா அபரா ச தி³ட்டி²;

பமாத³கோகாலிகதிஸ்ஸகோ ச,

துரூ ச ப்³ரஹ்மா அபரோ ச கோகாலிகோதி.