5. பி⁴க்கு²னீஸம்யுத்தம்

1. ஆளவிகாஸுத்தம்

162. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஆளவிகா பி⁴க்கு²னீ புப்³ப³ண்ஹஸமயம் நிவாஸேத்வா பத்தசீவரமாதா³ய ஸாவத்தி²ம் பிண்டா³ய பாவிஸி. ஸாவத்தி²யம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தா யேன அந்த⁴வனம் தேனுபஸங்கமி விவேகத்தி²னீ. அத² கோ² மாரோ பாபிமா ஆளவிகாய பி⁴க்கு²னியா ப⁴யம் ச²ம்பி⁴தத்தம் லோமஹம்ஸம் உப்பாதே³துகாமோ விவேகம்ஹா சாவேதுகாமோ யேன ஆளவிகா பி⁴க்கு²னீ தேனுபஸங்கமி; உபஸங்கமித்வா ஆளவிகம் பி⁴க்கு²னிம் கா³தா²ய அஜ்ஜ²பா⁴ஸி –

‘‘நத்தி² நிஸ்ஸரணம் லோகே, கிம் விவேகேன காஹஸி;

பு⁴ஞ்ஜஸ்ஸு காமரதியோ, மாஹு பச்சா²னுதாபினீ’’தி.

அத² கோ² ஆளவிகாய பி⁴க்கு²னியா ஏதத³ஹோஸி – ‘‘கோ நு க்²வாயம் மனுஸ்ஸோ வா அமனுஸ்ஸோ வா கா³த²ம் பா⁴ஸதீ’’தி? அத² கோ² ஆளவிகாய பி⁴க்கு²னியா ஏதத³ஹோஸி – ‘‘மாரோ கோ² அயம் பாபிமா மம ப⁴யம் ச²ம்பி⁴தத்தம் லோமஹம்ஸம் உப்பாதே³துகாமோ விவேகம்ஹா சாவேதுகாமோ கா³த²ம் பா⁴ஸதீ’’தி. அத² கோ² ஆளவிகா பி⁴க்கு²னீ ‘‘மாரோ அயம் பாபிமா’’ இதி விதி³த்வா மாரம் பாபிமந்தம் கா³தா²ஹி பச்சபா⁴ஸி –

‘‘அத்தி² நிஸ்ஸரணம் லோகே, பஞ்ஞாய மே ஸுபு²ஸ்ஸிதம் [ஸுப²ஸ்ஸிதம் (ஸீ. பீ.)];

பமத்தப³ந்து⁴ பாபிம, ந த்வம் ஜானாஸி தம் பத³ம்.

‘‘ஸத்திஸூலூபமா காமா, க²ந்தா⁴ஸம் அதி⁴குட்டனா;

யம் த்வம் காமரதிம் ப்³ரூஸி, அரதி மய்ஹ ஸா அஹூ’’தி.

அத² கோ² மாரோ பாபிமா ‘‘ஜானாதி மம் ஆளவிகா பி⁴க்கு²னீ’’தி து³க்கீ² து³ம்மனோ தத்தே²வந்தரதா⁴யீதி.

2. ஸோமாஸுத்தம்

163. ஸாவத்தி²னிதா³னம். அத² கோ² ஸோமா பி⁴க்கு²னீ புப்³ப³ண்ஹஸமயம் நிவாஸேத்வா பத்தசீவரமாதா³ய ஸாவத்தி²ம் பிண்டா³ய பாவிஸி. ஸாவத்தி²யம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தா யேன அந்த⁴வனம் தேனுபஸங்கமி தி³வாவிஹாராய. அந்த⁴வனம் அஜ்ஜோ²கா³ஹேத்வா அஞ்ஞதரஸ்மிம் ருக்க²மூலே தி³வாவிஹாரம் நிஸீதி³. அத² கோ² மாரோ பாபிமா ஸோமாய பி⁴க்கு²னியா ப⁴யம் ச²ம்பி⁴தத்தம் லோமஹம்ஸம் உப்பாதே³துகாமோ ஸமாதி⁴ம்ஹா சாவேதுகாமோ யேன ஸோமா பி⁴க்கு²னீ தேனுபஸங்கமி; உபஸங்கமித்வா ஸோமம் பி⁴க்கு²னிம் கா³தா²ய அஜ்ஜ²பா⁴ஸி –

‘‘யம் தம் இஸீஹி பத்தப்³ப³ம், டா²னம் து³ரபி⁴ஸம்ப⁴வம்;

ந தம் த்³வங்கு³லபஞ்ஞாய, ஸக்கா பப்போதுமித்தி²யா’’தி.

அத² கோ² ஸோமாய பி⁴க்கு²னியா ஏதத³ஹோஸி – ‘‘கோ நு க்²வாயம் மனுஸ்ஸோ வா அமனுஸ்ஸோ வா கா³த²ம் பா⁴ஸதீ’’தி? அத² கோ² ஸோமாய பி⁴க்கு²னியா ஏதத³ஹோஸி – ‘‘மாரோ கோ² அயம் பாபிமா மம ப⁴யம் ச²ம்பி⁴தத்தம் லோமஹம்ஸம் உப்பாதே³துகாமோ ஸமாதி⁴ம்ஹா சாவேதுகாமோ கா³த²ம் பா⁴ஸதீ’’தி. அத² கோ² ஸோமா பி⁴க்கு²னீ ‘‘மாரோ அயம் பாபிமா’’ இதி விதி³த்வா மாரம் பாபிமந்தம் கா³தா²ஹி பச்சபா⁴ஸி –

‘‘இத்தி²பா⁴வோ கிம் கயிரா, சித்தம்ஹி ஸுஸமாஹிதே;

ஞாணம்ஹி வத்தமானம்ஹி, ஸம்மா த⁴ம்மம் விபஸ்ஸதோ.

‘‘யஸ்ஸ நூன ஸியா ஏவம், இத்தா²ஹம் புரிஸோதி வா;

கிஞ்சி வா பன அஞ்ஞஸ்மி [அஸ்மீதி (ஸ்யா. கம். பீ.)], தம் மாரோ வத்துமரஹதீ’’தி.

அத² கோ² மாரோ பாபிமா ‘‘ஜானாதி மம் ஸோமா பி⁴க்கு²னீ’’தி து³க்கீ² து³ம்மனோ தத்தே²வந்தரதா⁴யீதி.

3. கிஸாகோ³தமீஸுத்தம்

164. ஸாவத்தி²னிதா³னம். அத² கோ² கிஸாகோ³தமீ பி⁴க்கு²னீ புப்³ப³ண்ஹஸமயம் நிவாஸேத்வா பத்தசீவரமாதா³ய ஸாவத்தி²ம் பிண்டா³ய பாவிஸி. ஸாவத்தி²யம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தா யேன அந்த⁴வனம் தேனுபஸங்கமி, தி³வாவிஹாராய. அந்த⁴வனம் அஜ்ஜோ²கா³ஹேத்வா அஞ்ஞதரஸ்மிம் ருக்க²மூலே தி³வாவிஹாரம் நிஸீதி³. அத² கோ² மாரோ பாபிமா கிஸாகோ³தமியா பி⁴க்கு²னியா ப⁴யம் ச²ம்பி⁴தத்தம் லோமஹம்ஸம் உப்பாதே³துகாமோ ஸமாதி⁴ம்ஹா சாவேதுகாமோ யேன கிஸாகோ³தமீ பி⁴க்கு²னீ தேனுபஸங்கமி; உபஸங்கமித்வா கிஸாகோ³தமிம் பி⁴க்கு²னிம் கா³தா²ய அஜ்ஜ²பா⁴ஸி –

‘‘கிம் நு த்வம் மதபுத்தாவ, ஏகமாஸி ருத³ம்முகீ²;

வனமஜ்ஜ²க³தா ஏகா, புரிஸம் நு க³வேஸஸீ’’தி.

அத² கோ² கிஸாகோ³தமியா பி⁴க்கு²னியா ஏதத³ஹோஸி – ‘‘கோ நு க்²வாயம் மனுஸ்ஸோ வா அமனுஸ்ஸோ வா கா³த²ம் பா⁴ஸதீ’’தி? அத² கோ² கிஸாகோ³தமியா பி⁴க்கு²னியா ஏதத³ஹோஸி – ‘‘மாரோ கோ² அயம் பாபிமா மம ப⁴யம் ச²ம்பி⁴தத்தம் லோமஹம்ஸம் உப்பாதே³துகாமோ ஸமாதி⁴ம்ஹா சாவேதுகாமோ கா³த²ம் பா⁴ஸதீ’’தி.

அத² கோ² கிஸாகோ³தமீ பி⁴க்கு²னீ ‘‘மாரோ அயம் பாபிமா’’ இதி விதி³த்வா மாரம் பாபிமந்தம் கா³தா²ஹி பச்சபா⁴ஸி –

‘‘அச்சந்தம் மதபுத்தாம்ஹி, புரிஸா ஏதத³ந்திகா;

ந ஸோசாமி ந ரோதா³மி, ந தம் பா⁴யாமி ஆவுஸோ.

‘‘ஸப்³ப³த்த² விஹதா நந்தீ³, தமோக்க²ந்தோ⁴ பதா³லிதோ;

ஜேத்வான மச்சுனோ [ஜேத்வா நமுசினோ (ஸீ.)] ஸேனம், விஹராமி அனாஸவா’’தி.

அத² கோ² மாரோ பாபிமா ‘‘ஜானாதி மம் கிஸாகோ³தமீ பி⁴க்கு²னீ’’தி து³க்கீ² து³ம்மனோ தத்தே²வந்தரதா⁴யீதி.

4. விஜயாஸுத்தம்

165. ஸாவத்தி²னிதா³னம். அத² கோ² விஜயா பி⁴க்கு²னீ புப்³ப³ண்ஹஸமயம் நிவாஸேத்வா…பே… அஞ்ஞதரஸ்மிம் ருக்க²மூலே தி³வாவிஹாரம் நிஸீதி³. அத² கோ² மாரோ பாபிமா விஜயாய பி⁴க்கு²னியா ப⁴யம் ச²ம்பி⁴தத்தம் லோமஹம்ஸம் உப்பாதே³துகாமோ ஸமாதி⁴ம்ஹா சாவேதுகாமோ யேன விஜயா பி⁴க்கு²னீ தேனுபஸங்கமி; உபஸங்கமித்வா விஜயம் பி⁴க்கு²னிம் கா³தா²ய அஜ்ஜ²பா⁴ஸி –

‘‘த³ஹரா த்வம் ரூபவதீ, அஹஞ்ச த³ஹரோ ஸுஸு;

பஞ்சங்கி³கேன துரியேன, ஏஹய்யேபி⁴ரமாமஸே’’தி [ஏஹி அய்யே ரமாமஸேதி (ஸீ.)].

அத² கோ² விஜயாய பி⁴க்கு²னியா ஏதத³ஹோஸி – ‘‘கோ நு க்²வாயம் மனுஸ்ஸோ வா அமனுஸ்ஸோ வா கா³த²ம் பா⁴ஸதீ’’தி? அத² கோ² விஜயாய பி⁴க்கு²னியா ஏதத³ஹோஸி – ‘‘மாரோ கோ² அயம் பாபிமா மம ப⁴யம் ச²ம்பி⁴தத்தம் லோமஹம்ஸம் உப்பாதே³துகாமோ ஸமாதி⁴ம்ஹா சாவேதுகாமோ கா³த²ம் பா⁴ஸதீ’’தி. அத² கோ² விஜயா பி⁴க்கு²னீ ‘‘மாரோ அயம் பாபிமா’’ இதி விதி³த்வா மாரம் பாபிமந்தம் கா³தா²ஹி பச்சபா⁴ஸி –

‘‘ரூபா ஸத்³தா³ ரஸா க³ந்தா⁴, போ²ட்ட²ப்³பா³ ச மனோரமா;

நிய்யாதயாமி துய்ஹேவ, மார நாஹம் தேனத்தி²கா.

‘‘இமினா பூதிகாயேன, பி⁴ந்த³னேன பப⁴ங்கு³னா;

அட்டீயாமி ஹராயாமி, காமதண்ஹா ஸமூஹதா.

‘‘யே ச ரூபூபகா³ ஸத்தா, யே ச அரூபட்டா²யினோ [ஆருப்பட்டா²யினோ (ஸீ. பீ.)];

யா ச ஸந்தா ஸமாபத்தி, ஸப்³ப³த்த² விஹதோ தமோ’’தி.

அத² கோ² மாரோ பாபிமா ‘‘ஜானாதி மம் விஜயா பி⁴க்கு²னீ’’தி து³க்கீ² து³ம்மனோ தத்தே²வந்தரதா⁴யீதி.

5. உப்பலவண்ணாஸுத்தம்

166. ஸாவத்தி²னிதா³னம். அத² கோ² உப்பலவண்ணா பி⁴க்கு²னீ புப்³ப³ண்ஹஸமயம் நிவாஸேத்வா…பே… அஞ்ஞதரஸ்மிம் ஸுபுப்பி²தஸாலருக்க²மூலே அட்டா²ஸி. அத² கோ² மாரோ பாபிமா உப்பலவண்ணாய பி⁴க்கு²னியா ப⁴யம் ச²ம்பி⁴தத்தம் லோமஹம்ஸம் உப்பாதே³துகாமோ ஸமாதி⁴ம்ஹா சாவேதுகாமோ யேன உப்பலவண்ணா பி⁴க்கு²னீ தேனுபஸங்கமி; உபஸங்கமித்வா உப்பலவண்ணம் பி⁴க்கு²னிம் கா³தா²ய அஜ்ஜ²பா⁴ஸி –

‘‘ஸுபுப்பி²தக்³க³ம் உபக³ம்ம பி⁴க்கு²னி,

ஏகா துவம் திட்ட²ஸி ஸாலமூலே;

ந சத்தி² தே து³தியா வண்ணதா⁴து,

பா³லே ந த்வம் பா⁴யஸி து⁴த்தகான’’ந்தி.

அத² கோ² உப்பலவண்ணாய பி⁴க்கு²னியா ஏதத³ஹோஸி – ‘‘கோ நு க்²வாயம் மனுஸ்ஸோ வா அமனுஸ்ஸோ வா கா³த²ம் பா⁴ஸதீ’’தி? அத² கோ² உப்பலவண்ணாய பி⁴க்கு²னியா ஏதத³ஹோஸி – ‘‘மாரோ கோ² அயம் பாபிமா மம ப⁴யம் ச²ம்பி⁴தத்தம் லோமஹம்ஸம் உப்பாதே³துகாமோ ஸமாதி⁴ம்ஹா சாவேதுகாமோ கா³த²ம் பா⁴ஸதீ’’தி. அத² கோ² உப்பலவண்ணா பி⁴க்கு²னீ ‘‘மாரோ அயம் பாபிமா’’ இதி விதி³த்வா மாரம் பாபிமந்தம் கா³தா²ஹி பச்சபா⁴ஸி –

‘‘ஸதம் ஸஹஸ்ஸானிபி து⁴த்தகானம்,

இதா⁴க³தா தாதி³ஸகா ப⁴வேய்யும்;

லோமம் ந இஞ்ஜாமி ந ஸந்தஸாமி,

ந மார பா⁴யாமி தமேகிகாபி.

‘‘ஏஸா அந்தரதா⁴யாமி, குச்சி²ம் வா பவிஸாமி தே;

பகு²மந்தரிகாயம்பி, திட்ட²ந்திம் மம் ந த³க்க²ஸி.

‘‘சித்தஸ்மிம் வஸீபூ⁴தாம்ஹி, இத்³தி⁴பாதா³ ஸுபா⁴விதா;

ஸப்³ப³ப³ந்த⁴னமுத்தாம்ஹி, ந தம் பா⁴யாமி ஆவுஸோ’’தி.

அத² கோ² மாரோ பாபிமா ‘‘ஜானாதி மம் உப்பலவண்ணா பி⁴க்கு²னீ’’தி து³க்கீ² து³ம்மனோ தத்தே²வந்தரதா⁴யீதி.

6. சாலாஸுத்தம்

167. ஸாவத்தி²னிதா³னம். அத² கோ² சாலா பி⁴க்கு²னீ புப்³ப³ண்ஹஸமயம் நிவாஸேத்வா…பே… அஞ்ஞதரஸ்மிம் ருக்க²மூலே தி³வாவிஹாரம் நிஸீதி³. அத² கோ² மாரோ பாபிமா யேன சாலா பி⁴க்கு²னீ தேனுபஸங்கமி; உபஸங்கமித்வா சாலம் பி⁴க்கு²னிம் ஏதத³வோச – ‘‘கிம் நு த்வம், பி⁴க்கு²னி, ந ரோசேஸீ’’தி? ‘‘ஜாதிம் க்²வாஹம், ஆவுஸோ, ந ரோசேமீ’’தி.

‘‘கிம் நு ஜாதிம் ந ரோசேஸி, ஜாதோ காமானி பு⁴ஞ்ஜதி;

கோ நு தம் இத³மாத³பயி, ஜாதிம் மா ரோச [மா ரோசேஸி (ஸீ. பீ.)] பி⁴க்கு²னீ’’தி.

‘‘ஜாதஸ்ஸ மரணம் ஹோதி, ஜாதோ து³க்கா²னி பு²ஸ்ஸதி [பஸ்ஸதி (ஸீ. பீ.)];

ப³ந்த⁴ம் வத⁴ம் பரிக்லேஸம், தஸ்மா ஜாதிம் ந ரோசயே.

‘‘பு³த்³தோ⁴ த⁴ம்மமதே³ஸேஸி, ஜாதியா ஸமதிக்கமம்;

ஸப்³ப³து³க்க²ப்பஹானாய, ஸோ மம் ஸச்சே நிவேஸயி.

‘‘யே ச ரூபூபகா³ ஸத்தா, யே ச அரூபட்டா²யினோ;

நிரோத⁴ம் அப்பஜானந்தா, ஆக³ந்தாரோ புனப்³ப⁴வ’’ந்தி.

அத² கோ² மாரோ பாபிமா ‘‘ஜானாதி மம் சாலா பி⁴க்கு²னீ’’தி து³க்கீ² து³ம்மனோ தத்தே²வந்தரதா⁴யீதி.

7. உபசாலாஸுத்தம்

168. ஸாவத்தி²னிதா³னம். அத² கோ² உபசாலா பி⁴க்கு²னீ புப்³ப³ண்ஹஸமயம் நிவாஸேத்வா…பே… அஞ்ஞதரஸ்மிம் ருக்க²மூலே தி³வாவிஹாரம் நிஸீதி³. அத² கோ² மாரோ பாபிமா யேன உபசாலா பி⁴க்கு²னீ தேனுபஸங்கமி; உபஸங்கமித்வா உபசாலம் பி⁴க்கு²னிம் ஏதத³வோச – ‘‘கத்த² நு த்வம், பி⁴க்கு²னி, உப்பஜ்ஜிதுகாமா’’தி? ‘‘ந க்²வாஹம், ஆவுஸோ, கத்த²சி உப்பஜ்ஜிதுகாமா’’தி.

‘‘தாவதிம்ஸா ச யாமா ச, துஸிதா சாபி தே³வதா;

நிம்மானரதினோ தே³வா, யே தே³வா வஸவத்தினோ;

தத்த² சித்தம் பணிதே⁴ஹி, ரதிம் பச்சனுபோ⁴ஸ்ஸஸீ’’தி.

‘‘தாவதிம்ஸா ச யாமா ச, துஸிதா சாபி தே³வதா;

நிம்மானரதினோ தே³வா, யே தே³வா வஸவத்தினோ;

காமப³ந்த⁴னப³த்³தா⁴ தே, ஏந்தி மாரவஸம் புன.

‘‘ஸப்³போ³ ஆதீ³பிதோ [ஸப்³போ³வ ஆதி³த்தோ (ஸ்யா. கம்.)] லோகோ, ஸப்³போ³ லோகோ பதூ⁴பிதோ;

ஸப்³போ³ பஜ்ஜலிதோ [பஜ்ஜலிதோ (ஸப்³ப³த்த²)] லோகோ, ஸப்³போ³ லோகோ பகம்பிதோ.

‘‘அகம்பிதம் அபஜ்ஜலிதம் [அசலிதம் (ஸீ. ஸ்யா. கம். பீ.)], அபுது²ஜ்ஜனஸேவிதம்;

அக³தி யத்த² மாரஸ்ஸ, தத்த² மே நிரதோ மனோ’’தி.

அத² கோ² மாரோ பாபிமா ‘‘ஜானாதி மம் உபசாலா பி⁴க்கு²னீ’’தி து³க்கீ² து³ம்மனோ தத்தே²வந்தரதா⁴யீதி.

8. ஸீஸுபசாலாஸுத்தம்

169. ஸாவத்தி²னிதா³னம். அத² கோ² ஸீஸுபசாலா [ஸீஸூபசாலா (ஸீ.)] பி⁴க்கு²னீ புப்³ப³ண்ஹஸமயம் நிவாஸேத்வா …பே… அஞ்ஞதரஸ்மிம் ருக்க²மூலே தி³வாவிஹாரம் நிஸீதி³. அத² கோ² மாரோ பாபிமா யேன ஸீஸுபசாலா பி⁴க்கு²னீ தேனுபஸங்கமி; உபஸங்கமித்வா ஸீஸுபசாலம் பி⁴க்கு²னிம் ஏதத³வோச – ‘‘கஸ்ஸ நு த்வம், பி⁴க்கு²னி, பாஸண்ட³ம் ரோசேஸீ’’தி? ‘‘ந க்²வாஹம், ஆவுஸோ, கஸ்ஸசி பாஸண்ட³ம் ரோசேமீ’’தி.

‘‘கம் நு உத்³தி³ஸ்ஸ முண்டா³ஸி, ஸமணீ விய தி³ஸ்ஸஸி;

ந ச ரோசேஸி பாஸண்ட³ம், கிமிவ சரஸி மோமூஹா’’தி.

‘‘இதோ ப³ஹித்³தா⁴ பாஸண்டா³, தி³ட்டீ²ஸு பஸீத³ந்தி தே;

ந தேஸம் த⁴ம்மம் ரோசேமி, தே த⁴ம்மஸ்ஸ அகோவிதா³.

‘‘அத்தி² ஸக்யகுலே ஜாதோ, பு³த்³தோ⁴ அப்படிபுக்³க³லோ;

ஸப்³பா³பி⁴பூ⁴ மாரனுதோ³, ஸப்³ப³த்த²மபராஜிதோ.

‘‘ஸப்³ப³த்த² முத்தோ அஸிதோ, ஸப்³ப³ம் பஸ்ஸதி சக்கு²மா;

ஸப்³ப³கம்மக்க²யம் பத்தோ, விமுத்தோ உபதி⁴ஸங்க²யே;

ஸோ மய்ஹம் ப⁴க³வா ஸத்தா², தஸ்ஸ ரோசேமி ஸாஸன’’ந்தி.

அத² கோ² மாரோ பாபிமா ‘‘ஜானாதி மம் ஸீஸுபசாலா பி⁴க்கு²னீ’’தி து³க்கீ² து³ம்மனோ தத்தே²வந்தரதா⁴யீதி.

9. ஸேலாஸுத்தம்

170. ஸாவத்தி²னிதா³னம். அத² கோ² ஸேலா பி⁴க்கு²னீ புப்³ப³ண்ஹஸமயம் நிவாஸேத்வா…பே… அஞ்ஞதரஸ்மிம் ருக்க²மூலே தி³வாவிஹாரம் நிஸீதி³. அத² கோ² மாரோ பாபிமா ஸேலாய பி⁴க்கு²னியா ப⁴யம் ச²ம்பி⁴தத்தம் லோமஹம்ஸம் உப்பாதே³துகாமோ…பே… ஸேலம் பி⁴க்கு²னிம் கா³தா²ய அஜ்ஜ²பா⁴ஸி –

‘‘கேனித³ம் பகதம் பி³ம்ப³ம், க்வனு [க்வன்னு (ஸீ. பீ.), க்வசி (ஸ்யா. கம். க.)] பி³ம்ப³ஸ்ஸ காரகோ;

க்வனு பி³ம்ப³ம் ஸமுப்பன்னம், க்வனு பி³ம்ப³ம் நிருஜ்ஜ²தீ’’தி.

அத² கோ² ஸேலாய பி⁴க்கு²னியா ஏதத³ஹோஸி – ‘‘கோ நு க்²வாயம் மனுஸ்ஸோ வா அமனுஸ்ஸோ வா கா³த²ம் பா⁴ஸதீ’’தி? அத² கோ² ஸேலாய பி⁴க்கு²னியா ஏதத³ஹோஸி – ‘‘மாரோ கோ² அயம் பாபிமா மம ப⁴யம் ச²ம்பி⁴தத்தம் லோமஹம்ஸம் உப்பாதே³துகாமோ ஸமாதி⁴ம்ஹா சாவேதுகாமோ கா³த²ம் பா⁴ஸதீ’’தி. அத² கோ² ஸேலா பி⁴க்கு²னீ ‘‘மாரோ அயம் பாபிமா’’ இதி விதி³த்வா மாரம் பாபிமந்தம் கா³தா²ஹி பச்சபா⁴ஸி –

‘‘நயித³ம் அத்தகதம் [நயித³ம் பகதம் (ஸ்யா. கம்.)] பி³ம்ப³ம், நயித³ம் பரகதம் [நயித³ம் பகதம் (ஸ்யா. கம்.)] அக⁴ம்;

ஹேதும் படிச்ச ஸம்பூ⁴தம், ஹேதுப⁴ங்கா³ நிருஜ்ஜ²தி.

‘‘யதா² அஞ்ஞதரம் பீ³ஜம், கே²த்தே வுத்தம் விரூஹதி;

பத²வீரஸஞ்சாக³ம்ம, ஸினேஹஞ்ச ததூ³ப⁴யம்.

‘‘ஏவம் க²ந்தா⁴ ச தா⁴துயோ, ச² ச ஆயதனா இமே;

ஹேதும் படிச்ச ஸம்பூ⁴தா, ஹேதுப⁴ங்கா³ நிருஜ்ஜ²ரே’’தி.

அத² கோ² மாரோ பாபிமா ‘‘ஜானாதி மம் ஸேலா பி⁴க்கு²னீ’’தி து³க்கீ² து³ம்மனோ தத்தே²வந்தரதா⁴யீதி.

10. வஜிராஸுத்தம்

171. ஸாவத்தி²னிதா³னம். அத² கோ² வஜிரா பி⁴க்கு²னீ புப்³ப³ண்ஹஸமயம் நிவாஸேத்வா பத்தசீவரமாதா³ய ஸாவத்தி²ம் பிண்டா³ய பாவிஸி. ஸாவத்தி²யம் பிண்டா³ய சரித்வா பச்சா²ப⁴த்தம் பிண்ட³பாதபடிக்கந்தா யேன அந்த⁴வனம் தேனுபஸங்கமி தி³வாவிஹாராய. அந்த⁴வனம் அஜ்ஜோ²கா³ஹேத்வா அஞ்ஞதரஸ்மிம் ருக்க²மூலே தி³வாவிஹாரம் நிஸீதி³. அத² கோ² மாரோ பாபிமா வஜிராய பி⁴க்கு²னியா ப⁴யம் ச²ம்பி⁴தத்தம் லோமஹம்ஸம் உப்பாதே³துகாமோ ஸமாதி⁴ம்ஹா சாவேதுகாமோ யேன வஜிரா பி⁴க்கு²னீ தேனுபஸங்கமி; உபஸங்கமித்வா வஜிரம் பி⁴க்கு²னிம் கா³தா²ய அஜ்ஜ²பா⁴ஸி –

‘‘கேனாயம் பகதோ ஸத்தோ, குவம் ஸத்தஸ்ஸ காரகோ;

குவம் ஸத்தோ ஸமுப்பன்னோ, குவம் ஸத்தோ நிருஜ்ஜ²தீ’’தி.

அத² கோ² வஜிராய பி⁴க்கு²னியா ஏதத³ஹோஸி – ‘‘கோ நு க்²வாயம் மனுஸ்ஸோ வா அமனுஸ்ஸோ வா கா³த²ம் பா⁴ஸதீ’’தி? அத² கோ² வஜிராய பி⁴க்கு²னியா ஏதத³ஹோஸி – ‘‘மாரோ கோ² அயம் பாபிமா மம ப⁴யம் ச²ம்பி⁴தத்தம் லோமஹம்ஸம் உப்பாதே³துகாமோ ஸமாதி⁴ம்ஹா சாவேதுகாமோ கா³த²ம் பா⁴ஸதீ’’தி. அத² கோ² வஜிரா பி⁴க்கு²னீ ‘‘மாரோ அயம் பாபிமா’’ இதி விதி³த்வா, மாரம் பாபிமந்தம் கா³தா²ஹி பச்சபா⁴ஸி –

‘‘கிம் நு ஸத்தோதி பச்சேஸி, மார தி³ட்டி²க³தம் நு தே;

ஸுத்³த⁴ஸங்கா²ரபுஞ்ஜோயம், நயித⁴ ஸத்துபலப்³ப⁴தி.

‘‘யதா² ஹி அங்க³ஸம்பா⁴ரா, ஹோதி ஸத்³தோ³ ரதோ² இதி;

ஏவம் க²ந்தே⁴ஸு ஸந்தேஸு, ஹோதி ஸத்தோதி ஸம்முதி [ஸம்மதி (ஸ்யா. கம்.)].

‘‘து³க்க²மேவ ஹி ஸம்போ⁴தி, து³க்க²ம் திட்ட²தி வேதி ச;

நாஞ்ஞத்ர து³க்கா² ஸம்போ⁴தி, நாஞ்ஞம் து³க்கா² நிருஜ்ஜ²தீ’’தி.

அத² கோ² மாரோ பாபிமா ‘‘ஜானாதி மம் வஜிரா பி⁴க்கு²னீ’’தி து³க்கீ² து³ம்மனோ தத்தே²வந்தரதா⁴யீதி.

பி⁴க்கு²னீஸம்யுத்தம் ஸமத்தம்.