8. பிண்ட³ஸுத்தம்

154. ஏகம் ஸமயம் ப⁴க³வா மக³தே⁴ஸு விஹரதி பஞ்சஸாலாயம் ப்³ராஹ்மணகா³மே. தேன கோ² பன ஸமயேன பஞ்சஸாலாயம் ப்³ராஹ்மணகா³மே குமாரிகானம் பாஹுனகானி ப⁴வந்தி. அத² கோ² ப⁴க³வா புப்³ப³ண்ஹஸமயம் நிவாஸேத்வா பத்தசீவரமாதா³ய பஞ்சஸாலம் ப்³ராஹ்மணகா³மம் பிண்டா³ய பாவிஸி. தேன கோ² பன ஸமயேன பஞ்சஸாலேய்யகா ப்³ராஹ்மணக³ஹபதிகா மாரேன பாபிமதா அன்வாவிட்டா² ப⁴வந்தி – மா ஸமணோ கோ³தமோ பிண்ட³மலத்தா²தி.

அத² கோ² ப⁴க³வா யதா²தோ⁴தேன பத்தேன பஞ்சஸாலம் ப்³ராஹ்மணகா³மம் பிண்டா³ய பாவிஸி ததா²தோ⁴தேன [யதா²தோ⁴தேன (?)] பத்தேன படிக்கமி. அத² கோ² மாரோ பாபிமா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் ஏதத³வோச – ‘‘அபி த்வம், ஸமண, பிண்ட³மலத்தா²’’தி? ‘‘ததா² நு த்வம், பாபிம, அகாஸி யதா²ஹம் பிண்ட³ம் ந லபே⁴ய்ய’’ந்தி. ‘‘தேன ஹி, ப⁴ந்தே, ப⁴க³வா து³தியம்பி பஞ்சஸாலம் ப்³ராஹ்மணகா³மம் பிண்டா³ய பவிஸது. ததா²ஹம் கரிஸ்ஸாமி யதா² ப⁴க³வா பிண்ட³ம் லச்ச²தீ’’தி.

‘‘அபுஞ்ஞம் பஸவி மாரோ, ஆஸஜ்ஜ நம் ததா²க³தம்;

கிம் நு மஞ்ஞஸி பாபிம, ந மே பாபம் விபச்சதி.

‘‘ஸுஸுக²ம் வத ஜீவாம, யேஸம் நோ நத்தி² கிஞ்சனம்;

பீதிப⁴க்கா² ப⁴விஸ்ஸாம, தே³வா ஆப⁴ஸ்ஸரா யதா²’’தி.

அத² கோ² மாரோ பாபிமா ‘‘ஜானாதி மம் ப⁴க³வா, ஜானாதி மம் ஸுக³தோ’’தி து³க்கீ² து³ம்மனோ தத்தே²வந்தரதா⁴யீதி.