1. நளவக்³கோ³

1. ஓக⁴தரணஸுத்தம்

1. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² அஞ்ஞதரா தே³வதா அபி⁴க்கந்தாய ரத்தியா அபி⁴க்கந்தவண்ணா கேவலகப்பம் ஜேதவனம் ஓபா⁴ஸேத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தா கோ² ஸா தே³வதா ப⁴க³வந்தம் ஏதத³வோச – ‘‘‘கத²ம் நு த்வம், மாரிஸ, ஓக⁴மதரீ’தி? ‘அப்பதிட்ட²ம் க்²வாஹம், ஆவுஸோ, அனாயூஹம் ஓக⁴மதரி’ந்தி. ‘யதா² கத²ம் பன த்வம், மாரிஸ, அப்பதிட்ட²ம் அனாயூஹம் ஓக⁴மதரீ’தி? ‘யதா³க்²வாஹம், ஆவுஸோ, ஸந்திட்டா²மி ததா³ஸ்ஸு ஸம்ஸீதா³மி; யதா³க்²வாஹம், ஆவுஸோ, ஆயூஹாமி ததா³ஸ்ஸு நிப்³பு³ய்ஹாமி [நிவுய்ஹாமி (ஸ்யா. கம். க.)]. ஏவம் க்²வாஹம், ஆவுஸோ, அப்பதிட்ட²ம் அனாயூஹம் ஓக⁴மதரி’’’ந்தி.

‘‘சிரஸ்ஸம் வத பஸ்ஸாமி, ப்³ராஹ்மணம் பரினிப்³பு³தம்;

அப்பதிட்ட²ம் அனாயூஹம், திண்ணம் லோகே விஸத்திக’’ந்தி. –

இத³மவோச ஸா தே³வதா. ஸமனுஞ்ஞோ ஸத்தா² அஹோஸி. அத² கோ² ஸா தே³வதா – ‘‘ஸமனுஞ்ஞோ மே ஸத்தா²’’தி ப⁴க³வந்தம் அபி⁴வாதே³த்வா பத³க்கி²ணம் கத்வா தத்தே²வந்தரதா⁴யீதி.

2. நிமோக்க²ஸுத்தம்

2. ஸாவத்தி²னிதா³னம். அத² கோ² அஞ்ஞதரா தே³வதா அபி⁴க்கந்தாய ரத்தியா அபி⁴க்கந்தவண்ணா கேவலகப்பம் ஜேதவனம் ஓபா⁴ஸேத்வா யேன ப⁴க³வா தேனுபஸங்கமி; உபஸங்கமித்வா ப⁴க³வந்தம் அபி⁴வாதே³த்வா ஏகமந்தம் அட்டா²ஸி. ஏகமந்தம் டி²தா கோ² ஸா தே³வதா ப⁴க³வந்தம் ஏதத³வோச –

‘‘ஜானாஸி நோ த்வம், மாரிஸ, ஸத்தானம் நிமோக்க²ம் பமோக்க²ம் விவேக’’ந்தி?

‘‘ஜானாமி க்²வாஹம், ஆவுஸோ, ஸத்தானம் நிமோக்க²ம் பமோக்க²ம் விவேக’’ந்தி.

‘‘யதா² கத²ம் பன த்வம், மாரிஸ, ஜானாஸி ஸத்தானம் நிமோக்க²ம் பமோக்க²ம் விவேக’’ந்தி?

‘‘நந்தீ³ப⁴வபரிக்க²யா [நந்தி³ப⁴வபரிக்க²யா (ஸ்யா. கம்.)], ஸஞ்ஞாவிஞ்ஞாணஸங்க²யா, வேத³னானம் நிரோதா⁴ உபஸமா – ஏவம் க்²வாஹம், ஆவுஸோ, ஜானாமி ஸத்தானம் நிமோக்க²ம் பமோக்க²ம் விவேக’’ந்தி.

3. உபனீயஸுத்தம்

3. ஸாவத்தி²னிதா³னம். ஏகமந்தம் டி²தா கோ² ஸா தே³வதா ப⁴க³வதோ ஸந்திகே இமம் கா³த²ம் அபா⁴ஸி –

‘‘உபனீயதி ஜீவிதமப்பமாயு,

ஜரூபனீதஸ்ஸ ந ஸந்தி தாணா;

ஏதம் ப⁴யம் மரணே பேக்க²மானோ,

புஞ்ஞானி கயிராத² ஸுகா²வஹானீ’’தி.

‘‘உபனீயதி ஜீவிதமப்பமாயு,

ஜரூபனீதஸ்ஸ ந ஸந்தி தாணா;

ஏதம் ப⁴யம் மரணே பேக்க²மானோ,

லோகாமிஸம் பஜஹே ஸந்திபேக்கோ²’’தி.

4. அச்சேந்திஸுத்தம்

4. ஸாவத்தி²னிதா³னம். ஏகமந்தம் டி²தா கோ² ஸா தே³வதா ப⁴க³வதோ ஸந்திகே இமம் கா³த²ம் அபா⁴ஸி –

‘‘அச்சேந்தி காலா தரயந்தி ரத்தியோ,

வயோகு³ணா அனுபுப்³ப³ம் ஜஹந்தி;

ஏதம் ப⁴யம் மரணே பேக்க²மானோ,

புஞ்ஞானி கயிராத² ஸுகா²வஹானீ’’தி.

‘‘அச்சேந்தி காலா தரயந்தி ரத்தியோ,

வயோகு³ணா அனுபுப்³ப³ம் ஜஹந்தி;

ஏதம் ப⁴யம் மரணே பேக்க²மானோ,

லோகாமிஸம் பஜஹே ஸந்திபேக்கோ²’’தி.

5. கதிசி²ந்த³ஸுத்தம்

5. ஸாவத்தி²னிதா³னம். ஏகமந்தம் டி²தா கோ² ஸா தே³வதா ப⁴க³வதோ ஸந்திகே இமம் கா³த²ம் அபா⁴ஸி –

‘‘கதி சி²ந்தே³ கதி ஜஹே, கதி சுத்தரி பா⁴வயே;

கதி ஸங்கா³திகோ³ பி⁴க்கு², ஓக⁴திண்ணோதி வுச்சதீ’’தி.

‘‘பஞ்ச சி²ந்தே³ பஞ்ச ஜஹே, பஞ்ச சுத்தரி பா⁴வயே;

பஞ்ச ஸங்கா³திகோ³ பி⁴க்கு², ஓக⁴திண்ணோதி வுச்சதீ’’தி.

6. ஜாக³ரஸுத்தம்

6. ஸாவத்தி²னிதா³னம். ஏகமந்தம் டி²தா கோ² ஸா தே³வதா ப⁴க³வதோ ஸந்திகே இமம் கா³த²ம் அபா⁴ஸி –

‘‘கதி ஜாக³ரதம் ஸுத்தா, கதி ஸுத்தேஸு ஜாக³ரா;

கதிபி⁴ [கதீஹி (ஸீ.)] ரஜமாதே³தி, கதிபி⁴ [கதீஹி (ஸீ.)] பரிஸுஜ்ஜ²தீ’’தி.

‘‘பஞ்ச ஜாக³ரதம் ஸுத்தா, பஞ்ச ஸுத்தேஸு ஜாக³ரா;

பஞ்சபி⁴ [பஞ்சஹி (ஸீ.)] ரஜமாதே³தி, பஞ்சபி⁴ [பஞ்சஹி (ஸீ.)] பரிஸுஜ்ஜ²தீ’’தி.

7. அப்படிவிதி³தஸுத்தம்

7. ஸாவத்தி²னிதா³னம். ஏகமந்தம் டி²தா கோ² ஸா தே³வதா ப⁴க³வதோ ஸந்திகே இமம் கா³த²ம் அபா⁴ஸி –

‘‘யேஸம் த⁴ம்மா அப்படிவிதி³தா, பரவாதே³ஸு நீயரே [நிய்யரே (க.)];

ஸுத்தா தே நப்பபு³ஜ்ஜ²ந்தி, காலோ தேஸம் பபு³ஜ்ஜி²து’’ந்தி.

‘‘யேஸம் த⁴ம்மா ஸுப்படிவிதி³தா, பரவாதே³ஸு ந நீயரே;

தே ஸம்பு³த்³தா⁴ ஸம்மத³ஞ்ஞா, சரந்தி விஸமே ஸம’’ந்தி.

8. ஸுஸம்முட்ட²ஸுத்தம்

8. ஸாவத்தி²னிதா³னம். ஏகமந்தம் டி²தா கோ² ஸா தே³வதா ப⁴க³வதோ ஸந்திகே இமம் கா³த²ம் அபா⁴ஸி –

‘‘யேஸம் த⁴ம்மா ஸுஸம்முட்டா², பரவாதே³ஸு நீயரே;

ஸுத்தா தே நப்பபு³ஜ்ஜ²ந்தி, காலோ தேஸம் பபு³ஜ்ஜி²து’’ந்தி.

‘‘யேஸம் த⁴ம்மா அஸம்முட்டா², பரவாதே³ஸு ந நீயரே;

தே ஸம்பு³த்³தா⁴ ஸம்மத³ஞ்ஞா, சரந்தி விஸமே ஸம’’ந்தி.

9. மானகாமஸுத்தம்

9. ஸாவத்தி²னிதா³னம். ஏகமந்தம் டி²தா கோ² ஸா தே³வதா ப⁴க³வதோ ஸந்திகே இமம் கா³த²ம் அபா⁴ஸி –

‘‘ந மானகாமஸ்ஸ த³மோ இத⁴த்தி²,

ந மோனமத்தி² அஸமாஹிதஸ்ஸ;

ஏகோ அரஞ்ஞே விஹரம் பமத்தோ,

ந மச்சுதே⁴ய்யஸ்ஸ தரேய்ய பார’’ந்தி.

‘‘மானம் பஹாய ஸுஸமாஹிதத்தோ,

ஸுசேதஸோ ஸப்³ப³தி⁴ விப்பமுத்தோ;

ஏகோ அரஞ்ஞே விஹரம் அப்பமத்தோ,

ஸ மச்சுதே⁴ய்யஸ்ஸ தரேய்ய பார’’ந்தி.

10. அரஞ்ஞஸுத்தம்

10. ஸாவத்தி²னிதா³னம். ஏகமந்தம் டி²தா கோ² ஸா தே³வதா ப⁴க³வந்தம் கா³தா²ய அஜ்ஜ²பா⁴ஸி –

‘‘அரஞ்ஞே விஹரந்தானம், ஸந்தானம் ப்³ரஹ்மசாரினம்;

ஏகப⁴த்தம் பு⁴ஞ்ஜமானானம், கேன வண்ணோ பஸீத³தீ’’தி.

‘‘அதீதம் நானுஸோசந்தி, நப்பஜப்பந்தி நாக³தம்;

பச்சுப்பன்னேன யாபேந்தி, தேன வண்ணோ பஸீத³தி’’.

‘‘அனாக³தப்பஜப்பாய, அதீதஸ்ஸானுஸோசனா;

ஏதேன பா³லா ஸுஸ்ஸந்தி, நளோவ ஹரிதோ லுதோ’’தி.

நளவக்³கோ³ பட²மோ.

தஸ்ஸுத்³தா³னம் –

ஓக⁴ம் நிமோக்க²ம் உபனேய்யம், அச்சேந்தி கதிசி²ந்தி³ ச;

ஜாக³ரம் அப்படிவிதி³தா, ஸுஸம்முட்டா² மானகாமினா;

அரஞ்ஞே த³ஸமோ வுத்தோ, வக்³கோ³ தேன பவுச்சதி.