10. ஸேரீஸகவிமானவத்து²

1228. [பே. வ. 604] ஸுணோத² யக்க²ஸ்ஸ ச வாணிஜான ச, ஸமாக³மோ யத்த² ததா³ அஹோஸி;

யதா² கத²ம் இதரிதரேன சாபி, ஸுபா⁴ஸிதம் தஞ்ச ஸுணாத² ஸப்³பே³.

1229. ‘‘யோ ஸோ அஹு ராஜா பாயாஸி நாம [நாமோ (ஸீ.)], பு⁴ம்மானம் ஸஹப்³யக³தோ யஸஸ்ஸீ;

ஸோ மோத³மானோவ ஸகே விமானே, அமானுஸோ மானுஸே அஜ்ஜ²பா⁴ஸீதி.

1230. ‘‘வங்கே அரஞ்ஞே அமனுஸ்ஸட்டா²னே, கந்தாரே அப்போத³கே அப்பப⁴க்கே²;

ஸுது³க்³க³மே வண்ணுபத²ஸ்ஸ மஜ்ஜே², வங்கம் ப⁴யா [த⁴ங்கம்ப⁴யா (க.)] நட்ட²மனா மனுஸ்ஸா.

1231. ‘‘நயித⁴ ப²லா மூலமயா ச ஸந்தி, உபாதா³னம் நத்தி² குதோத⁴ ப⁴க்கோ²;

அஞ்ஞத்ர பம்ஸூஹி ச வாலுகாஹி ச, ததாஹி உண்ஹாஹி ச தா³ருணாஹி ச.

1232. ‘‘உஜ்ஜங்க³லம் தத்தமிவம் கபாலம், அனாயஸம் பரலோகேன துல்யம்;

லுத்³தா³னமாவாஸமித³ம் புராணம், பூ⁴மிப்பதே³ஸோ அபி⁴ஸத்தரூபோ.

1233. ‘‘அத² தும்ஹே கேன [கேன நு (ஸ்யா. க.)] வண்ணேன, கிமாஸமானா இமம் பதே³ஸம் ஹி;

அனுபவிட்டா² ஸஹஸா ஸமேச்ச, லோபா⁴ ப⁴யா அத² வா ஸம்பமூள்ஹா’’தி.

1234. ‘‘மக³தே⁴ஸு அங்கே³ஸு ச ஸத்த²வாஹா, ஆரோபயித்வா பணியம் புது²த்தம்;

தே யாமஸே ஸிந்து⁴ஸோவீரபூ⁴மிம், த⁴னத்தி²கா உத்³த³யம் பத்த²யானா.

1235. ‘‘தி³வா பிபாஸம் நதி⁴வாஸயந்தா, யோக்³கா³னுகம்பஞ்ச ஸமேக்க²மானா,

ஏதேன வேகே³ன ஆயாம ஸப்³பே³ [ஸப்³பே³ தே (க.)], ரத்திம் மக்³க³ம் படிபன்னா விகாலே.

1236. ‘‘தே து³ப்பயாதா அபரத்³த⁴மக்³கா³, அந்தா⁴குலா விப்பனட்டா² அரஞ்ஞே;

ஸுது³க்³க³மே வண்ணுபத²ஸ்ஸ மஜ்ஜே², தி³ஸம் ந ஜானாம பமூள்ஹசித்தா.

1237. ‘‘இத³ஞ்ச தி³ஸ்வான அதி³ட்ட²புப்³ப³ம், விமானஸேட்ட²ஞ்ச தவஞ்ச யக்க²;

ததுத்தரிம் ஜீவிதமாஸமானா, தி³ஸ்வா பதீதா ஸுமனா உத³க்³கா³’’தி.

1238. ‘‘பாரம் ஸமுத்³த³ஸ்ஸ இமஞ்ச வண்ணும் [வனம் (ஸ்யா.), வண்ணம் (க.)], வேத்தாசரம் [வேத்தம் பரம் (ஸ்யா.), வேத்தாசாரம் (க.)] ஸங்குபத²ஞ்ச மக்³க³ம்;

நதி³யோ பன பப்³ப³தானஞ்ச து³க்³கா³, புது²த்³தி³ஸா க³ச்ச²த² போ⁴க³ஹேது.

1239. ‘‘பக்க²ந்தி³யான விஜிதம் பரேஸம், வேரஜ்ஜகே மானுஸே பேக்க²மானா;

யம் வோ ஸுதம் வா அத² வாபி தி³ட்ட²ம், அச்சே²ரகம் தம் வோ ஸுணோம தாதா’’தி.

1240. ‘‘இதோபி அச்சே²ரதரம் குமார, ந தோ ஸுதம் வா அத² வாபி தி³ட்ட²ம்;

அதீதமானுஸ்ஸகமேவ ஸப்³ப³ம், தி³ஸ்வான தப்பாம அனோமவண்ணம்.

1241. ‘‘வேஹாயஸம் போக்க²ரஞ்ஞோ ஸவந்தி, பஹூதமல்யா [பஹூதமால்யா (ஸ்யா.)] ப³ஹுபுண்ட³ரீகா;

து³மா சிமே [து³மா ச தே (ஸ்யா. க.)] நிச்சப²லூபபன்னா, அதீவ க³ந்தா⁴ ஸுரபி⁴ம் பவாயந்தி.

1242. ‘‘வேளூரியத²ம்பா⁴ ஸதமுஸ்ஸிதாஸே, ஸிலாபவாளஸ்ஸ ச ஆயதம்ஸா;

மஸாரக³ல்லா ஸஹலோஹிதங்கா³, த²ம்பா⁴ இமே ஜோதிரஸாமயாஸே.

1243. ‘‘ஸஹஸ்ஸத²ம்ப⁴ம் அதுலானுபா⁴வம், தேஸூபரி ஸாது⁴மித³ம் விமானம்;

ரதனந்தரம் கஞ்சனவேதி³மிஸ்ஸம், தபனீயபட்டேஹி ச ஸாது⁴ச²ன்னம்.

1244. ‘‘ஜம்போ³னது³த்தத்தமித³ம் ஸுமட்டோ², பாஸாத³ஸோபாணப²லூபபன்னோ;

த³ள்ஹோ ச வக்³கு³ ச ஸுஸங்க³தோ ச [வக்³கு³ ஸுமுகோ² ஸுஸங்க³தோ (ஸீ.)], அதீவ நிஜ்ஜா²னக²மோ மனுஞ்ஞோ.

1245. ‘‘ரதனந்தரஸ்மிம் ப³ஹுஅன்னபானம், பரிவாரிதோ அச்ச²ராஸங்க³ணேன;

முரஜஆலம்ப³ரதூரியகு⁴ட்டோ², அபி⁴வந்தி³தோஸி து²திவந்த³னாய.

1246. ‘‘ஸோ மோத³ஸி நாரிக³ணப்பபோ³த⁴னோ, விமானபாஸாத³வரே மனோரமே;

அசிந்தியோ ஸப்³ப³கு³ணூபபன்னோ, ராஜா யதா² வேஸ்ஸவணோ நளின்யா [நளிஞ்ஞம் (க.)].

1247. ‘‘தே³வோ நு ஆஸி உத³வாஸி யக்கோ², உதா³ஹு தே³விந்தோ³ மனுஸ்ஸபூ⁴தோ;

புச்ச²ந்தி தம் வாணிஜா ஸத்த²வாஹா, ஆசிக்க² கோ நாம துவம்ஸி யக்கோ²’’தி.

1248. ‘‘ஸேரீஸகோ [ஸேரிஸ்ஸகோ (ஸீ. ஸ்யா.)] நாம அஹம்ஹி யக்கோ², கந்தாரியோ வண்ணுபத²ம்ஹி கு³த்தோ;

இமம் பதே³ஸம் அபி⁴பாலயாமி, வசனகரோ வேஸ்ஸவணஸ்ஸ ரஞ்ஞோ’’தி.

1249. ‘‘அதி⁴ச்சலத்³த⁴ம் பரிணாமஜம் தே, ஸயம் கதம் உதா³ஹு தே³வேஹி தி³ன்னம்;

புச்ச²ந்தி தம் வாணிஜா ஸத்த²வாஹா, கத²ம் தயா லத்³த⁴மித³ம் மனுஞ்ஞ’’ந்தி.

1250. ‘‘நாதி⁴ச்சலத்³த⁴ம் ந பரிணாமஜம் மே, ந ஸயம் கதம் ந ஹி தே³வேஹி தி³ன்னம்;

ஸகேஹி கம்மேஹி அபாபகேஹி, புஞ்ஞேஹி மே லத்³த⁴மித³ம் மனுஞ்ஞ’’ந்தி.

1251. ‘‘கிம் தே வதம் கிம் பன ப்³ரஹ்மசரியம், கிஸ்ஸ ஸுசிண்ணஸ்ஸ அயம் விபாகோ;

புச்ச²ந்தி தம் வாணிஜா ஸத்த²வாஹா, கத²ம் தயா லத்³த⁴மித³ம் விமான’’ந்தி.

1252. ‘‘மமம் பாயாஸீதி அஹு ஸமஞ்ஞா, ரஜ்ஜம் யதா³ காரயிம் கோஸலானம்;

நத்தி²கதி³ட்டி² கத³ரியோ பாபத⁴ம்மோ, உச்சே²த³வாதீ³ ச ததா³ அஹோஸிம்.

1253. ‘‘ஸமணோ ச கோ² ஆஸி குமாரகஸ்ஸபோ, ப³ஹுஸ்ஸுதோ சித்தகதீ² உளாரோ;

ஸோ மே ததா³ த⁴ம்மகத²ம் அபா⁴ஸி [அகாஸி (ஸீ.)], தி³ட்டி²விஸூகானி வினோத³யீ மே.

1254. ‘‘தாஹம் தஸ்ஸ [தாஹம் (க.)] த⁴ம்மகத²ம் ஸுணித்வா, உபாஸகத்தம் படிவேத³யிஸ்ஸம்;

பாணாதிபாதா விரதோ அஹோஸிம், லோகே அதி³ன்னம் பரிவஜ்ஜயிஸ்ஸம்;

அமஜ்ஜபோ நோ ச முஸா அபா⁴ணிம், ஸகேன தா³ரேன ச அஹோஸி துட்டோ².

1255. ‘‘தம் மே வதம் தம் பன ப்³ரஹ்மசரியம், தஸ்ஸ ஸுசிண்ணஸ்ஸ அயம் விபாகோ;

தேஹேவ கம்மேஹி அபாபகேஹி, புஞ்ஞேஹி மே லத்³த⁴மித³ம் விமான’’ந்தி.

1256. ‘‘ஸச்சம் கிராஹம்ஸு நரா ஸபஞ்ஞா, அனஞ்ஞதா² வசனம் பண்டி³தானம்;

யஹிம் யஹிம் க³ச்ச²தி புஞ்ஞகம்மோ, தஹிம் தஹிம் மோத³தி காமகாமீ.

1257. ‘‘யஹிம் யஹிம் ஸோகபரித்³த³வோ ச, வதோ⁴ ச ப³ந்தோ⁴ ச பரிக்கிலேஸோ;

தஹிம் தஹிம் க³ச்ச²தி பாபகம்மோ, ந முச்சதி து³க்³க³தியா கதா³சீ’’தி.

1258. ‘‘ஸம்மூள்ஹரூபோவ ஜனோ அஹோஸி, அஸ்மிம் முஹுத்தே கலலீகதோவ;

ஜனஸ்ஸிமஸ்ஸ துய்ஹஞ்ச குமார, அப்பச்சயோ கேன நு கோ² அஹோஸீ’’தி.

1259. ‘‘இமே ச ஸிரீஸவனா [இமே ஸிரீஸூபவனா ச (ஸீ.), இமேபி ஸிரீஸவனா ச (பீ. க.)] தாதா, தி³ப்³பா³ [தி³ப்³பா³ ச (பீ. க.)] க³ந்தா⁴ ஸுரபீ⁴ [ஸுரபி⁴ம் (ஸீ. க.)] ஸம்பவந்தி [ஸம்பவாயந்தி (க.)];

தே ஸம்பவாயந்தி இமம் விமானம், தி³வா ச ரத்தோ ச தமம் நிஹந்த்வா.

1260. ‘‘இமேஸஞ்ச கோ² வஸ்ஸஸதச்சயேன, ஸிபாடிகா ப²லதி ஏகமேகா;

மானுஸ்ஸகம் வஸ்ஸஸதம் அதீதம், யத³க்³கே³ காயம்ஹி இதூ⁴பபன்னோ.

1261. ‘‘தி³ஸ்வானஹம் வஸ்ஸஸதானி பஞ்ச, அஸ்மிம் விமானே ட²த்வான தாதா;

ஆயுக்க²யா புஞ்ஞக்க²யா சவிஸ்ஸம், தேனேவ ஸோகேன பமுச்சி²தோஸ்மீ’’தி [ஸமுச்சி²தோஸ்மீதி (பீ. க.)].

1262. ‘‘கத²ம் நு ஸோசேய்ய ததா²விதோ⁴ ஸோ, லத்³தா⁴ விமானம் அதுலம் சிராய;

யே சாபி கோ² இத்தரமுபபன்னா, தே நூன ஸோசேய்யும் பரித்தபுஞ்ஞா’’தி.

1263. ‘‘அனுச்ச²விம் ஓவதி³யஞ்ச மே தம், யம் மம் தும்ஹே பேய்யவாசம் வதே³த²;

தும்ஹே ச கோ² தாதா மயானுகு³த்தா, யேனிச்ச²கம் தேன பலேத² ஸோத்தி²’’ந்தி.

1264. ‘‘க³ந்த்வா மயம் ஸிந்து⁴ஸோவீரபூ⁴மிம், த⁴னத்தி²கா உத்³த³யம் பத்த²யானா;

யதா²பயோகா³ பரிபுண்ணசாகா³, காஹாம ஸேரீஸமஹம் உளார’’ந்தி.

1265. ‘‘மா சேவ ஸேரீஸமஹம் அகத்த², ஸப்³ப³ஞ்ச வோ ப⁴விஸ்ஸதி யம் வதே³த²;

பாபானி கம்மானி விவஜ்ஜயாத², த⁴ம்மானுயோக³ஞ்ச அதி⁴ட்ட²ஹாத².

1266. ‘‘உபாஸகோ அத்தி² இமம்ஹி ஸங்கே⁴, ப³ஹுஸ்ஸுதோ ஸீலவதூபபன்னோ;

ஸத்³தோ⁴ ச சாகீ³ ச ஸுபேஸலோ ச, விசக்க²ணோ ஸந்துஸிதோ முதீமா.

1267. ‘‘ஸஞ்ஜானமானோ ந முஸா ப⁴ணேய்ய, பரூபகா⁴தாய ந சேதயேய்ய;

வேபூ⁴திகம் பேஸுணம் நோ கரேய்ய, ஸண்ஹஞ்ச வாசம் ஸகி²லம் ப⁴ணேய்ய.

1268. ‘‘ஸகா³ரவோ ஸப்படிஸ்ஸோ வினீதோ, அபாபகோ அதி⁴ஸீலே விஸுத்³தோ⁴;

ஸோ மாதரம் பிதரஞ்சாபி ஜந்து, த⁴ம்மேன போஸேதி அரியவுத்தி.

1269. ‘‘மஞ்ஞே ஸோ மாதாபிதூனம் காரணா, போ⁴கா³னி பரியேஸதி ந அத்தஹேது;

மாதாபிதூனஞ்ச யோ [ஸோ (?)] அச்சயேன, நேக்க²ம்மபோணோ சரிஸ்ஸதி ப்³ரஹ்மசரியம்.

1270. ‘‘உஜூ அவங்கோ அஸடோ² அமாயோ, ந லேஸகப்பேன ச வோஹரேய்ய;

ஸோ தாதி³ஸோ ஸுகதகம்மகாரீ, த⁴ம்மே டி²தோ கிந்தி லபே⁴த² து³க்க²ம்.

1271. ‘‘தம் காரணா பாதுகதோம்ஹி அத்தனா, தஸ்மா த⁴ம்மம் பஸ்ஸத² வாணிஜாஸே;

அஞ்ஞத்ர தேனிஹ ப⁴ஸ்மீ [ப⁴ஸ்மி (ஸ்யா.), ப⁴ஸ்ம (க.)] ப⁴வேத², அந்தா⁴குலா விப்பனட்டா² அரஞ்ஞே;

தம் கி²ப்பமானேன லஹும் பரேன, ஸுகோ² ஹவே ஸப்புரிஸேன ஸங்க³மோ’’தி.

1272. ‘‘கிம் நாம ஸோ கிஞ்ச கரோதி கம்மம்,

கிம் நாமதே⁴ய்யம் கிம் பன தஸ்ஸ கோ³த்தம்;

மயம்பி நம் த³ட்டு²காமம்ஹ யக்க², யஸ்ஸானுகம்பாய இதா⁴க³தோஸி;

லாபா⁴ ஹி தஸ்ஸ, யஸ்ஸ துவம் பிஹேஸீ’’தி.

1273. ‘‘யோ கப்பகோ ஸம்ப⁴வனாமதே⁴ய்யோ,

உபாஸகோ கோச்ச²ப²லூபஜீவீ;

ஜானாத² நம் தும்ஹாகம் பேஸியோ ஸோ,

மா கோ² நம் ஹீளித்த² ஸுபேஸலோ ஸோ’’தி.

1274. ‘‘ஜானாமஸே யம் த்வம் பவதே³ஸி [வதே³ஸி (ஸீ.)] யக்க²,

ந கோ² நம் ஜானாம ஸ ஏதி³ஸோதி;

மயம்பி நம் பூஜயிஸ்ஸாம யக்க²,

ஸுத்வான துய்ஹம் வசனம் உளார’’ந்தி.

1275. ‘‘யே கேசி இமஸ்மிம் ஸத்தே² மனுஸ்ஸா,

த³ஹரா மஹந்தா அத²வாபி மஜ்ஜி²மா;

ஸப்³பே³வ தே ஆலம்ப³ந்து விமானம்,

பஸ்ஸந்து புஞ்ஞானம் ப²லம் கத³ரியா’’தி.

1276. தே தத்த² ஸப்³பே³வ ‘அஹம் புரே’தி,

தம் கப்பகம் தத்த² புரக்க²த்வா [புரக்கி²பித்வா (ஸீ.)];

ஸப்³பே³வ தே ஆலம்பி³ம்ஸு விமானம்,

மஸக்கஸாரம் விய வாஸவஸ்ஸ.

1277. தே தத்த² ஸப்³பே³வ ‘அஹம் புரே’தி, உபாஸகத்தம் படிவேத³யிம்ஸு;

பாணாதிபாதா விரதா அஹேஸும், லோகே அதி³ன்னம் பரிவஜ்ஜயிம்ஸு;

அமஜ்ஜபா நோ ச முஸா ப⁴ணிம்ஸு, ஸகேன தா³ரேன ச அஹேஸும் துட்டா².

1278. தே தத்த² ஸப்³பே³வ ‘அஹம் புரே’தி, உபாஸகத்தம் படிவேத³யித்வா;

பக்காமி ஸத்தோ² அனுமோத³மானோ, யக்கி²த்³தி⁴யா அனுமதோ புனப்புனம்.

1279. ‘‘க³ந்த்வான தே ஸிந்து⁴ஸோவீரபூ⁴மிம், த⁴னத்தி²கா உத்³த³யம் [உத³ய (பீ. க.)] பத்த²யானா;

யதா²பயோகா³ பரிபுண்ணலாபா⁴, பச்சாக³மும் பாடலிபுத்தமக்க²தம்.

1280. ‘‘க³ந்த்வான தே ஸங்க⁴ரம் ஸோத்தி²வந்தோ,

புத்தேஹி தா³ரேஹி ஸமங்கி³பூ⁴தா;

ஆனந்தீ³ வித்தா [ஆனந்த³சித்தா (ஸ்யா.), ஆனந்தீ³சித்தா (க.)] ஸுமனா பதீதா,

அகம்ஸு ஸேரீஸமஹம் உளாரம்;

ஸேரீஸகம் தே பரிவேணம் மாபயிம்ஸு.

1281. ஏதாதி³ஸா ஸப்புரிஸான ஸேவனா,

மஹத்தி²கா த⁴ம்மகு³ணான ஸேவனா;

ஏகஸ்ஸ அத்தா²ய உபாஸகஸ்ஸ,

ஸப்³பே³வ ஸத்தா ஸுகி²தா [ஸுகி²னோ (பீ. க.)] அஹேஸுந்தி.

ஸேரீஸகவிமானம் த³ஸமம்.