5. மஹாரத²வக்³கோ³

1. மண்டூ³கதே³வபுத்தவிமானவத்து²

857. ‘‘கோ மே வந்த³தி பாதா³னி, இத்³தி⁴யா யஸஸா ஜலம்;

அபி⁴க்கந்தேன வண்ணேன, ஸப்³பா³ ஓபா⁴ஸயம் தி³ஸா’’தி.

858. ‘‘மண்டூ³கோஹம் புரே ஆஸிம், உத³கே வாரிகோ³சரோ;

தவ த⁴ம்மம் ஸுணந்தஸ்ஸ, அவதீ⁴ வச்ச²பாலகோ.

859. ‘‘முஹுத்தம் சித்தபஸாத³ஸ்ஸ, இத்³தி⁴ம் பஸ்ஸ யஸஞ்ச மே;

ஆனுபா⁴வஞ்ச மே பஸ்ஸ, வண்ணம் பஸ்ஸ ஜுதிஞ்ச மே.

860. ‘‘யே ச தே தீ³க⁴மத்³தா⁴னம், த⁴ம்மம் அஸ்ஸோஸும் கோ³தம;

பத்தா தே அசலட்டா²னம், யத்த² க³ந்த்வா ந ஸோசரே’’தி.

மண்டூ³கதே³வபுத்தவிமானம் பட²மம்.

2. ரேவதீவிமானவத்து²

861. [த⁴. ப. 219 த⁴ம்மபதே³] ‘‘சிரப்பவாஸிம் புரிஸம், தூ³ரதோ ஸோத்தி²மாக³தம்;

ஞாதிமித்தா ஸுஹஜ்ஜா ச, அபி⁴னந்த³ந்தி ஆக³தம்;

862. [த⁴. ப. 220 த⁴ம்மபதே³] ‘‘ததே²வ கதபுஞ்ஞம்பி, அஸ்மா லோகா பரம் க³தம்;

புஞ்ஞானி படிக³ண்ஹந்தி, பியம் ஞாதீவ ஆக³தம்.

863. [பே. வ. 714]‘‘உட்டே²ஹி ரேவதே ஸுபாபத⁴ம்மே, அபாருதத்³வாரே [அபாருப⁴ம் த்³வாரம் (ஸீ. ஸ்யா.), அபாருதத்³வாரம் (பீ. க.)] அதா³னஸீலே;

நேஸ்ஸாம தம் யத்த² து²னந்தி து³க்³க³தா, ஸமப்பிதா நேரயிகா து³க்கே²னா’’தி.

864. இச்சேவ [இச்சேவம் (ஸ்யா. க.)] வத்வான யமஸ்ஸ தூ³தா, தே த்³வே யக்கா² லோஹிதக்கா² ப்³ரஹந்தா;

பச்சேகபா³ஹாஸு க³ஹேத்வா ரேவதம், பக்காமயும் தே³வக³ணஸ்ஸ ஸந்திகே.

865. ‘‘ஆதி³ச்சவண்ணம் ருசிரம் பப⁴ஸ்ஸரம், ப்³யம்ஹம் ஸுப⁴ம் கஞ்சனஜாலச²ன்னம்;

கஸ்ஸேதமாகிண்ணஜனம் விமானம், ஸூரியஸ்ஸ ரம்ஸீரிவ ஜோதமானம்.

866. ‘‘நாரீக³ணா சந்த³னஸாரலித்தா [சந்த³னஸாரானுலித்தா (ஸ்யா.)], உப⁴தோ விமானம் உபஸோப⁴யந்தி;

தம் தி³ஸ்ஸதி ஸூரியஸமானவண்ணம், கோ மோத³தி ஸக்³க³பத்தோ விமானே’’தி.

867. ‘‘பா³ராணஸியம் நந்தி³யோ நாமாஸி, உபாஸகோ அமச்ச²ரீ தா³னபதி வத³ஞ்ஞூ;

தஸ்ஸேதமாகிண்ணஜனம் விமானம், ஸூரியஸ்ஸ ரம்ஸீரிவ ஜோதமானம்.

868. ‘‘நாரீக³ணா சந்த³னஸாரலித்தா, உப⁴தோ விமானம் உபஸோப⁴யந்தி;

தம் தி³ஸ்ஸதி ஸூரியஸமானவண்ணம், ஸோ மோத³தி ஸக்³க³பத்தோ விமானே’’தி.

869. ‘‘நந்தி³யஸ்ஸாஹம் ப⁴ரியா, அகா³ரினீ ஸப்³ப³குலஸ்ஸ இஸ்ஸரா;

ப⁴த்து விமானே ரமிஸ்ஸாமி தா³னஹம், ந பத்த²யே நிரயம் த³ஸ்ஸனாயா’’தி.

870. ‘‘ஏஸோ தே நிரயோ ஸுபாபத⁴ம்மே, புஞ்ஞம் தயா அகதம் ஜீவலோகே;

ந ஹி மச்ச²ரீ ரோஸகோ பாபத⁴ம்மோ, ஸக்³கூ³பகா³னம் லப⁴தி ஸஹப்³யத’’ந்தி.

871. ‘‘கிம் நு கூ³த²ஞ்ச முத்தஞ்ச, அஸுசீ படிதி³ஸ்ஸதி;

து³க்³க³ந்த⁴ம் கிமித³ம் மீள்ஹம், கிமேதம் உபவாயதீ’’தி.

872. ‘‘ஏஸ ஸம்ஸவகோ நாம, க³ம்பீ⁴ரோ ஸதபோரிஸோ;

யத்த² வஸ்ஸஸஹஸ்ஸானி, துவம் பச்சஸி ரேவதே’’தி.

873. ‘‘கிம் நு காயேன வாசாய, மனஸா து³க்கடம் கதம்;

கேன ஸம்ஸவகோ லத்³தோ⁴, க³ம்பீ⁴ரோ ஸதபோரிஸோ’’தி.

874. ‘‘ஸமணே ப்³ராஹ்மணே சாபி, அஞ்ஞே வாபி வனிப்³ப³கே [வணிப்³ப³கே (ஸ்யா. க.)];

முஸாவாதே³ன வஞ்சேஸி, தம் பாபம் பகதம் தயா.

875. ‘‘தேன ஸம்ஸவகோ லத்³தோ⁴, க³ம்பீ⁴ரோ ஸதபோரிஸோ;

தத்த² வஸ்ஸஸஹஸ்ஸானி, துவம் பச்சஸி ரேவதே.

876. ‘‘ஹத்தே²பி சி²ந்த³ந்தி அதோ²பி பாதே³, கண்ணேபி சி²ந்த³ந்தி அதோ²பி நாஸம்;

அதோ²பி காகோளக³ணா ஸமேச்ச, ஸங்க³ம்ம கா²த³ந்தி விப²ந்த³மான’’ந்தி.

877. ‘‘ஸாது⁴ கோ² மம் படினேத², காஹாமி குஸலம் ப³ஹும்;

தா³னேன ஸமசரியாய, ஸம்யமேன த³மேன ச;

யம் கத்வா ஸுகி²தா ஹோந்தி, ந ச பச்சா²னுதப்பரே’’தி.

878. ‘‘புரே துவம் பமஜ்ஜித்வா, இதா³னி பரிதே³வஸி;

ஸயம் கதானம் கம்மானம், விபாகம் அனுபோ⁴ஸ்ஸஸீ’’தி.

879. ‘‘கோ தே³வலோகதோ மனுஸ்ஸலோகம், க³ந்த்வான புட்டோ² மே ஏவம் வதே³ய்ய;

‘நிக்கி²த்தத³ண்டே³ஸு த³தா³த² தா³னம், அச்சா²த³னம் ஸேய்ய [ஸயன (ஸீ.)] மத²ன்னபானம்;

நஹி மச்ச²ரீ ரோஸகோ பாபத⁴ம்மோ, ஸக்³கூ³பகா³னம் லப⁴தி ஸஹப்³யதம்’.

880. ‘‘ஸாஹம் நூன இதோ க³ந்த்வா, யோனிம் லத்³தா⁴ன மானுஸிம்;

வத³ஞ்ஞூ ஸீலஸம்பன்னா, காஹாமி குஸலம் ப³ஹும்;

தா³னேன ஸமசரியாய, ஸம்யமேன த³மேன ச.

881. ‘‘ஆராமானி ச ரோபிஸ்ஸம், து³க்³கே³ ஸங்கமனானி ச;

பபஞ்ச உத³பானஞ்ச, விப்பஸன்னேன சேதஸா.

882. ‘‘சாதுத்³த³ஸிம் பஞ்சத³ஸிம், யா ச பக்க²ஸ்ஸ அட்ட²மீ;

பாடிஹாரியபக்க²ஞ்ச, அட்ட²ங்க³ஸுஸமாக³தம்.

883. ‘‘உபோஸத²ம் உபவஸிஸ்ஸம், ஸதா³ ஸீலேஸு ஸம்வுதா;

ந ச தா³னே பமஜ்ஜிஸ்ஸம், ஸாமம் தி³ட்ட²மித³ம் மயா’’தி;

884. இச்சேவம் விப்பலபந்திம், ப²ந்த³மானம் ததோ ததோ;

கி²பிம்ஸு நிரயே கோ⁴ரே, உத்³த⁴பாத³ம் அவம்ஸிரம்.

885. ‘‘அஹம் புரே மச்ச²ரினீ அஹோஸிம், பரிபா⁴ஸிகா ஸமணப்³ராஹ்மணானம்;

விததே²ன ச ஸாமிகம் வஞ்சயித்வா, பச்சாமஹம் நிரயே கோ⁴ரரூபே’’தி.

ரேவதீவிமானம் து³தியம்.

3. ச²த்தமாணவகவிமானவத்து²

886. ‘‘யே வத³தம் பவரோ மனுஜேஸு, ஸக்யமுனீ ப⁴க³வா கதகிச்சோ;

பாரக³தோ ப³லவீரியஸமங்கீ³ [ப³லவீரஸமங்கீ³ (க.)], தம் ஸுக³தம் ஸரணத்த²முபேஹி.

887. ‘‘ராக³விராக³மனேஜமஸோகம், த⁴ம்மமஸங்க²தமப்படிகூலம்;

மது⁴ரமிமம் பகு³ணம் ஸுவிப⁴த்தம், த⁴ம்மமிமம் ஸரணத்த²முபேஹி.

888. ‘‘யத்த² ச தி³ன்ன மஹப்ப²லமாஹு, சதூஸு ஸுசீஸு புரிஸயுகே³ஸு;

அட்ட² ச புக்³க³லத⁴ம்மத³ஸா தே, ஸங்க⁴மிமம் ஸரணத்த²முபேஹி.

889. ‘‘ந ததா² தபதி நபே⁴ ஸூரியோ, சந்தோ³ ச ந பா⁴ஸதி ந பு²ஸ்ஸோ;

யதா² அதுலமித³ம் மஹப்பபா⁴ஸம், கோ நு த்வம் திதி³வா மஹிம் உபாகா³.

890. ‘‘சி²ந்த³தி ரம்ஸீ பப⁴ங்கரஸ்ஸ, ஸாதி⁴கவீஸதியோஜனானி ஆபா⁴;

ரத்திமபி யதா² தி³வம் கரோதி, பரிஸுத்³த⁴ம் விமலம் ஸுப⁴ம் விமானம்.

891. ‘‘ப³ஹுபது³மவிசித்ரபுண்ட³ரீகம், வோகிண்ணம் குஸுமேஹி நேகசித்தம்;

அரஜவிரஜஹேமஜாலச²ன்னம், ஆகாஸே தபதி யதா²பி ஸூரியோ.

892. ‘‘ரத்தம்ப³ரபீதவஸஸாஹி, அக³ருபியங்கு³சந்த³னுஸ்ஸதா³ஹி;

கஞ்சனதனுஸன்னிப⁴த்தசாஹி, பரிபூரம் க³க³னம்வ தாரகாஹி.

893. ‘‘நரனாரியோ [நரனாரீ (க.), நாரியோ (?)] ப³ஹுகேத்த²னேகவண்ணா, குஸுமவிபூ⁴ஸிதாப⁴ரணேத்த² ஸுமனா;

அனிலபமுஞ்சிதா பவந்தி [பவாயந்தி (க.)] ஸுரபி⁴ம், தபனியவிததா ஸுவண்ணச²ன்னா [ஸுவண்ணச்சா²த³னா (ஸீ.)].

894. ‘‘கிஸ்ஸ ஸம்யமஸ்ஸ [ஸமத³மஸ்ஸ (ஸீ.)] அயம் விபாகோ, கேனாஸி கம்மப²லேனிதூ⁴பபன்னோ;

யதா² ச தே அதி⁴க³தமித³ம் விமானம், தத³னுபத³ம் அவசாஸி இங்க⁴ புட்டோ²’’தி.

895. ‘‘ஸயமித⁴ [யமித⁴ (ஸீ. ஸ்யா. பீ.)] பதே² ஸமேச்ச மாணவேன, ஸத்தா²னுஸாஸி அனுகம்பமானோ;

தவ ரதனவரஸ்ஸ த⁴ம்மம் ஸுத்வா, கரிஸ்ஸாமீதி ச ப்³ரவித்த² ச²த்தோ.

896. ‘‘ஜினவரபவரம் [ஜினபவரம் (ஸ்யா. க.)] உபேஹி [உபேமி (ப³ஹூஸு)] ஸரணம், த⁴ம்மஞ்சாபி ததே²வ பி⁴க்கு²ஸங்க⁴ம்;

நோதி பட²மம் அவோசஹம் [அவோசாஹம் (ஸீ. ஸ்யா. க.)] ப⁴ந்தே, பச்சா² தே வசனம் ததே²வகாஸிம்.

897. ‘‘மா ச பாணவத⁴ம் விவித⁴ம் சரஸ்ஸு அஸுசிம்,

ந ஹி பாணேஸு அஸஞ்ஞதம் அவண்ணயிம்ஸு ஸப்பஞ்ஞா;

நோதி பட²மம் அவோசஹம் ப⁴ந்தே,

பச்சா² தே வசனம் ததே²வகாஸிம்.

898. ‘‘மா ச பரஜனஸ்ஸ ரக்கி²தம்பி, ஆதா³தப்³ப³மமஞ்ஞிதோ² [மமஞ்ஞித்த² (ஸீ. பீ.)] அதி³ன்னம்;

நோதி பட²மம் அவோசஹம் ப⁴ந்தே, பச்சா² வசனம் ததே²வகாஸிம்.

899. ‘‘மா ச பரஜனஸ்ஸ ரக்கி²தாயோ, பரப⁴ரியா அக³மா அனரியமேதம்;

நோதி பட²மம் அவோசஹம் ப⁴ந்தே, பச்சா² தே வசனம் ததே²வகாஸிம்;

900. ‘‘மா ச விதத²ம் அஞ்ஞதா² அபா⁴ணி,

ந ஹி முஸாவாத³ம் அவண்ணயிம்ஸு ஸப்பஞ்ஞா;

நோதி பட²மம் அவோசஹம் ப⁴ந்தே, பச்சா² தே வசனம் ததே²வகாஸிம்.

901. ‘‘யேன ச புரிஸஸ்ஸ அபேதி ஸஞ்ஞா, தம் மஜ்ஜம் பரிவஜ்ஜயஸ்ஸு ஸப்³ப³ம்;

நோதி பட²மம் அவோசஹம் ப⁴ந்தே, பச்சா² தே வசனம் ததே²வகாஸிம்.

902. ‘‘ஸ்வாஹம் இத⁴ பஞ்ச ஸிக்கா² கரித்வா, படிபஜ்ஜித்வா ததா²க³தஸ்ஸ த⁴ம்மே;

த்³வேபத²மக³மாஸிம் சோரமஜ்ஜே², தே மம் தத்த² வதி⁴ம்ஸு போ⁴க³ஹேது.

903. ‘‘ஏத்தகமித³ம் அனுஸ்ஸராமி குஸலம், ததோ பரம் ந மே விஜ்ஜதி அஞ்ஞம்;

தேன ஸுசரிதேன கம்முனாஹம் [கம்மனாஹம் (ஸீ.)], உப்பன்னோ [உபபன்னோ (ப³ஹூஸு)] திதி³வேஸு காமகாமீ.

904. ‘‘பஸ்ஸ க²ணமுஹுத்தஸஞ்ஞமஸ்ஸ, அனுத⁴ம்மப்படிபத்தியா விபாகம்;

ஜலமிவ யஸஸா ஸமேக்க²மானா, ப³ஹுகா மம் பிஹயந்தி ஹீனகம்மா.

905. ‘‘பஸ்ஸ கதிபயாய தே³ஸனாய, ஸுக³திஞ்சம்ஹி க³தோ ஸுக²ஞ்ச பத்தோ;

யே ச தே ஸததம் ஸுணந்தி த⁴ம்மம், மஞ்ஞே தே அமதம் பு²ஸந்தி கே²மம்.

906. ‘‘அப்பம்பி கதம் மஹாவிபாகம், விபுலம் ஹோதி [விபுலப²லம் (க.)] ததா²க³தஸ்ஸ த⁴ம்மே;

பஸ்ஸ கதபுஞ்ஞதாய ச²த்தோ, ஓபா⁴ஸேதி பத²விம் யதா²பி ஸூரியோ.

907. ‘‘கிமித³ம் குஸலம் கிமாசரேம, இச்சேகே ஹி ஸமேச்ச மந்தயந்தி;

தே மயம் புனரேவ [புனபி (?)] லத்³த⁴ மானுஸத்தம், படிபன்னா விஹரேமு ஸீலவந்தோ.

908. ‘‘ப³ஹுகாரோ அனுகம்பகோ ச ஸத்தா², இதி மே ஸதி அக³மா தி³வா தி³வஸ்ஸ;

ஸ்வாஹம் உபக³தோம்ஹி ஸச்சனாமம், அனுகம்பஸ்ஸு புனபி ஸுணேமு [ஸுணோம (ஸீ.), ஸுணோமி (ஸ்யா.)] த⁴ம்மம்.

909. ‘‘யே சித⁴ [யேத⁴ (ஸீ. ஸ்யா. பீ.), யே இத⁴ (க.)] பஜஹந்தி காமராக³ம், ப⁴வராகா³னுஸயஞ்ச பஹாய மோஹம்;

ந ச தே புனமுபேந்தி க³ப்³ப⁴ஸேய்யம், பரினிப்³பா³னக³தா ஹி ஸீதிபூ⁴தா’’தி.

ச²த்தமாணவகவிமானம் ததியம்.

4. கக்கடகரஸதா³யகவிமானவத்து²

910. ‘‘உச்சமித³ம் மணிதூ²ணம் விமானம், ஸமந்ததோ த்³வாத³ஸ யோஜனானி;

கூடாகா³ரா ஸத்தஸதா உளாரா, வேளுரியத²ம்பா⁴ ருசகத்த²தா [ருசிரத்த²தா (ஸ்யா. க.) 646 கா³தா²யம் ‘‘ருசகுபகிண்ணம்’’தி பத³ஸ்ஸ ஸம்வண்ணனா பஸ்ஸிதப்³பா³] ஸுபா⁴.

911. ‘‘தத்த²ச்ச²ஸி பிவஸி கா²த³ஸி ச, தி³ப்³பா³ ச வீணா பவத³ந்தி வக்³கு³ம் [வக்³கு³ (ஸீ. க.), வக்³கூ³ (ஸ்யா.)];

தி³ப்³பா³ ரஸா காமகு³ணேத்த² பஞ்ச, நாரியோ ச நச்சந்தி ஸுவண்ணச²ன்னா.

912. ‘‘கேன தேதாதி³ஸோ வண்ணோ, கேன தே இத⁴ மிஜ்ஜ²தி;

உப்பஜ்ஜந்தி ச தே போ⁴கா³, யே கேசி மனஸோ பியா.

913. ‘‘புச்சா²மி தம் தே³வ மஹானுபா⁴வ, மனுஸ்ஸபூ⁴தோ கிமகாஸி புஞ்ஞம்;

கேனாஸி ஏவம் ஜலிதானுபா⁴வோ, வண்ணோ ச தே ஸப்³ப³தி³ஸா பபா⁴ஸதீ’’தி.

914. ஸோ தே³வபுத்தோ அத்தமனோ, மோக்³க³ல்லானேன புச்சி²தோ;

பஞ்ஹம் புட்டோ² வியாகாஸி, யஸ்ஸ கம்மஸ்ஸித³ம் ப²லம்.

915. ‘‘ஸதிஸமுப்பாத³கரோ, த்³வாரே கக்கடகோ டி²தோ;

நிட்டி²தோ ஜாதரூபஸ்ஸ, ஸோப⁴தி த³ஸபாத³கோ.

916. ‘‘தேன மேதாதி³ஸோ வண்ணோ, தேன மே இத⁴ மிஜ்ஜ²தி;

உப்பஜ்ஜந்தி ச மே போ⁴கா³, யே கேசி மனஸோ பியா.

917. ‘‘அக்கா²மி தே பி⁴க்கு² மஹானுபா⁴வ, மனுஸ்ஸபூ⁴தோ யமகாஸி புஞ்ஞம்;

தேனம்ஹி ஏவம் ஜலிதானுபா⁴வோ, வண்ணோ ச மே ஸப்³ப³தி³ஸா பபா⁴ஸதீ’’தி.

கக்கடகரஸதா³யகவிமானம் சதுத்த²ம்.

(அனந்தரம் பஞ்சவிமானம் யதா² கக்கடகரஸதா³யகவிமானம் ததா² வித்தா²ரேதப்³ப³ம்)

5. த்³வாரபாலவிமானவத்து²

918. ‘‘உச்சமித³ம் மணிதூ²ணம் விமானம், ஸமந்ததோ த்³வாத³ஸ யோஜனானி;

கூடாகா³ரா ஸத்தஸதா உளாரா, வேளுரியத²ம்பா⁴ ருசகத்த²தா ஸுபா⁴.

919. ‘‘தத்த²ச்ச²ஸி பிவஸி கா²த³ஸி ச, தி³ப்³பா³ ச வீணா பவத³ந்தி வக்³கு³ம்;

தி³ப்³பா³ ரஸா காமகு³ணேத்த² பஞ்ச, நாரியோ ச நச்சந்தி ஸுவண்ணச²ன்னா.

920. ‘‘கேன தேதாதி³ஸோ வண்ணோ…பே… வண்ணோ ச தே ஸப்³ப³தி³ஸா பபா⁴ஸதீ’’தி.

922. ஸோ தே³வபுத்தோ அத்தமனோ, மோக்³க³ல்லானேன புச்சி²தோ;

பஞ்ஹம் புட்டோ² வியாகாஸி, யஸ்ஸ கம்மஸ்ஸித³ம் ப²லம்.

923. ‘‘தி³ப்³ப³ம் மமம் வஸ்ஸஸஹஸ்ஸமாயு, வாசாபி⁴கீ³தம் மனஸா பவத்திதம்;

ஏத்தாவதா ட²ஸ்ஸதி புஞ்ஞகம்மோ, தி³ப்³பே³ஹி காமேஹி ஸமங்கி³பூ⁴தோ.

924. ‘‘தேன மேதாதி³ஸோ வண்ணோ…பே…வண்ணோ ச மே ஸப்³ப³தி³ஸா பபா⁴ஸதீ’’தி.

த்³வாரபாலவிமானம் பஞ்சமம்.