2. ராஜஸுத்தம்

12. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஸம்ப³ஹுலானம் பி⁴க்கூ²னம் பச்சா²ப⁴த்தம் பிண்ட³பாதபடிக்கந்தானம் உபட்டா²னஸாலாயம் ஸன்னிஸின்னானம் ஸன்னிபதிதானம் அயமந்தராகதா² உத³பாதி³ – ‘‘கோ நு கோ², ஆவுஸோ, இமேஸம் த்³வின்னம் ராஜூனம் மஹத்³த⁴னதரோ வா மஹாபோ⁴க³தரோ வா மஹாகோஸதரோ வா மஹாவிஜிததரோ வா மஹாவாஹனதரோ வா மஹப்³ப³லதரோ வா மஹித்³தி⁴கதரோ வா மஹானுபா⁴வதரோ வா ராஜா வா மாக³தோ⁴ ஸேனியோ பி³ம்பி³ஸாரோ, ராஜா வா பஸேனதி³ கோஸலோ’’தி? அயஞ்சரஹி தேஸம் பி⁴க்கூ²னம் அந்தராகதா² ஹோதி விப்பகதா.

அத² கோ² ப⁴க³வா ஸாயன்ஹஸமயம் படிஸல்லானா வுட்டி²தோ யேனுபட்டா²னஸாலா தேனுபஸங்கமி; உபஸங்கமித்வா பஞ்ஞத்தே ஆஸனே நிஸீதி³. நிஸஜ்ஜ கோ² ப⁴க³வா பி⁴க்கூ² ஆமந்தேஸி – ‘‘காய நுத்த², பி⁴க்க²வே, ஏதரஹி கதா²ய ஸன்னிஸின்னா ஸன்னிபதிதா, கா ச பன வோ அந்தராகதா² விப்பகதா’’தி?

‘‘இத⁴, ப⁴ந்தே, அம்ஹாகம் பச்சா²ப⁴த்தம் பிண்ட³பாதபடிக்கந்தானம் உபட்டா²னஸாலாயம் ஸன்னிஸின்னானம் ஸன்னிபதிதானம் அயமந்தராகதா² உத³பாதி³ – ‘கோ நு கோ², ஆவுஸோ, இமேஸம் த்³வின்னம் ராஜூனம் மஹத்³த⁴னதரோ வா மஹாபோ⁴க³தரோ வா மஹாகோஸதரோ வா மஹாவிஜிததரோ வா மஹாவாஹனதரோ வா மஹப்³ப³லதரோ வா மஹித்³தி⁴கதரோ வா மஹானுபா⁴வதரோ வா ராஜா வா மாக³தோ⁴ ஸேனியோ பி³ம்பி³ஸாரோ, ராஜா வா பஸேனதி³ கோஸலோ’தி? அயம் கோ² நோ, ப⁴ந்தே, அந்தராகதா² விப்பகதா, அத² ப⁴க³வா அனுப்பத்தோ’’தி.

‘‘ந க்²வேதம், பி⁴க்க²வே, தும்ஹாகம் பதிரூபம் குலபுத்தானம் ஸத்³தா⁴ அகா³ரஸ்மா அனகா³ரியம் பப்³ப³ஜிதானம் யம் தும்ஹே ஏவரூபிம் கத²ம் கதே²ய்யாத². ஸன்னிபதிதானம் வோ, பி⁴க்க²வே, த்³வயம் கரணீயம் – த⁴ம்மீ வா கதா² அரியோ வா துண்ஹீபா⁴வோ’’தி.

அத² கோ² ப⁴க³வா ஏதமத்த²ம் விதி³த்வா தாயம் வேலாயம் இமம் உதா³னம் உதா³னேஸி –

‘‘யஞ்ச காமஸுக²ம் லோகே, யஞ்சித³ம் தி³வியம் ஸுக²ம்;

தண்ஹக்க²யஸுக²ஸ்ஸேதே, கலம் நாக்³க⁴ந்தி ஸோளஸி’’ந்தி. து³தியம்;