8. ஸங்கா³மஜிஸுத்தம்

8. ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. தேன கோ² பன ஸமயேன ஆயஸ்மா ஸங்கா³மஜி ஸாவத்தி²ம் அனுப்பத்தோ ஹோதி ப⁴க³வந்தம் த³ஸ்ஸனாய. அஸ்ஸோஸி கோ² ஆயஸ்மதோ ஸங்கா³மஜிஸ்ஸ புராணது³தியிகா – ‘‘அய்யோ கிர ஸங்கா³மஜி ஸாவத்தி²ம் அனுப்பத்தோ’’தி. ஸா தா³ரகம் ஆதா³ய ஜேதவனம் அக³மாஸி.

தேன கோ² பன ஸமயேன ஆயஸ்மா ஸங்கா³மஜி அஞ்ஞதரஸ்மிம் ருக்க²மூலே தி³வாவிஹாரம் நிஸின்னோ ஹோதி. அத² கோ² ஆயஸ்மதோ ஸங்கா³மஜிஸ்ஸ புராணது³தியிகா யேனாயஸ்மா ஸங்கா³மஜி தேனுபஸங்கமி; உபஸங்கமித்வா ஆயஸ்மந்தம் ஸங்கா³மஜிம் ஏதத³வோச – ‘‘கு²த்³த³புத்தஞ்ஹி [கு²த்³த³புத்தாம்ஹி (ஸீ.)], ஸமண, போஸ ம’’ந்தி. ஏவம் வுத்தே, ஆயஸ்மா ஸங்கா³மஜி துண்ஹீ அஹோஸி.

து³தியம்பி கோ² ஆயஸ்மதோ ஸங்கா³மஜிஸ்ஸ புராணது³தியிகா ஆயஸ்மந்தம் ஸங்கா³மஜிம் ஏதத³வோச – ‘‘கு²த்³த³புத்தஞ்ஹி, ஸமண, போஸ ம’’ந்தி. து³தியம்பி கோ² ஆயஸ்மா ஸங்கா³மஜி துண்ஹீ அஹோஸி.

ததியம்பி கோ² ஆயஸ்மதோ ஸங்கா³மஜிஸ்ஸ புராணது³தியிகா ஆயஸ்மந்தம் ஸங்கா³மஜிம் ஏதத³வோச – ‘‘கு²த்³த³புத்தஞ்ஹி, ஸமண, போஸ ம’’ந்தி. ததியம்பி கோ² ஆயஸ்மா ஸங்கா³மஜி துண்ஹீ அஹோஸி.

அத² கோ² ஆயஸ்மதோ ஸங்கா³மஜிஸ்ஸ புராணது³தியிகா தம் தா³ரகம் ஆயஸ்மதோ ஸங்கா³மஜிஸ்ஸ புரதோ நிக்கி²பித்வா பக்காமி [பக்கமி (க.) ஏவமுபரிபி] – ‘‘ஏஸோ [ஏஸ (ஸீ. க.)] தே, ஸமண, புத்தோ; போஸ ந’’ந்தி.

அத² கோ² ஆயஸ்மா ஸங்கா³மஜி தம் தா³ரகம் நேவ ஓலோகேஸி நாபி ஆலபி. அத² கோ² ஆயஸ்மதோ ஸங்கா³மஜிஸ்ஸ புராணது³தியிகா அவிதூ³ரம் [அவிதூ³ரே (ஸ்யா. பீ.)] க³ந்த்வா அபலோகேந்தீ அத்³த³ஸ ஆயஸ்மந்தம் ஸங்கா³மஜிம் தம் தா³ரகம் நேவ ஓலோகேந்தம் நாபி ஆலபந்தம், தி³ஸ்வானஸ்ஸா ஏதத³ஹோஸி – ‘‘ந சாயம் ஸமணோ புத்தேனபி அத்தி²கோ’’தி. ததோ படினிவத்தித்வா தா³ரகம் ஆதா³ய பக்காமி. அத்³த³ஸா கோ² ப⁴க³வா தி³ப்³பே³ன சக்கு²னா விஸுத்³தே⁴ன அதிக்கந்தமானுஸகேன ஆயஸ்மதோ ஸங்கா³மஜிஸ்ஸ புராணது³தியிகாய ஏவரூபம் விப்பகாரம்.

அத² கோ² ப⁴க³வா ஏதமத்த²ம் விதி³த்வா தாயம் வேலாயம் இமம் உதா³னம் உதா³னேஸி –

‘‘ஆயந்திம் நாபி⁴னந்த³தி, பக்கமந்திம் ந ஸோசதி;

ஸங்கா³ ஸங்கா³மஜிம் முத்தம், தமஹம் ப்³ரூமி ப்³ராஹ்மண’’ந்தி. அட்ட²மம்;