6. ச²க்கனிபாதோ

1. பஞ்சஸதமத்தாதே²ரீகா³தா²

127. ‘‘யஸ்ஸ மக்³க³ம் ந ஜானாஸி, ஆக³தஸ்ஸ க³தஸ்ஸ வா;

தம் குதோ சாக³தம் ஸத்தம் [ஸந்தம் (ஸீ.), புத்தம் (ஸ்யா.)], ‘மம புத்தோ’தி ரோத³ஸி.

128. ‘‘மக்³க³ஞ்ச கோ²ஸ்ஸ [கோ²’த² (ஸ்யா. க.)] ஜானாஸி, ஆக³தஸ்ஸ க³தஸ்ஸ வா;

ந நம் ஸமனுஸோசேஸி, ஏவம்த⁴ம்மா ஹி பாணினோ.

129. ‘‘அயாசிதோ ததாக³ச்சி², நானுஞ்ஞாதோ [அனனுஞ்ஞாதோ (ஸீ. ஸ்யா.)] இதோ க³தோ;

குதோசி நூன ஆக³ந்த்வா, வஸித்வா கதிபாஹகம்;

இதோபி அஞ்ஞேன க³தோ, ததோபஞ்ஞேன க³ச்ச²தி.

130. ‘‘பேதோ மனுஸ்ஸரூபேன, ஸம்ஸரந்தோ க³மிஸ்ஸதி;

யதா²க³தோ ததா² க³தோ, கா தத்த² பரிதே³வனா’’.

131. ‘‘அப்³ப³ஹீ [அப்³பு³ய்ஹம் (ஸ்யா.)] வத மே ஸல்லம், து³த்³த³ஸம் ஹத³யஸ்ஸிதம்;

யா மே ஸோகபரேதாய, புத்தஸோகம் ப்³யபானுதி³.

132. ‘‘ஸாஜ்ஜ அப்³பூ³ள்ஹஸல்லாஹம், நிச்சா²தா பரினிப்³பு³தா;

பு³த்³த⁴ம் த⁴ம்மஞ்ச ஸங்க⁴ஞ்ச, உபேமி ஸரணம் முனிம்’’.

இத்த²ம் ஸுத³ம் பஞ்சஸதமத்தா தே²ரீ பி⁴க்கு²னியோ…பே….

2. வாஸேட்டீ²தே²ரீகா³தா²

133. ‘‘புத்தஸோகேனஹம் அட்டா, கி²த்தசித்தா விஸஞ்ஞினீ;

நக்³கா³ பகிண்ணகேஸீ ச, தேன தேன விசாரிஹம்.

134. ‘‘வீதி² [வஸிம் (ஸீ.)] ஸங்காரகூடேஸு, ஸுஸானே ரதி²யாஸு ச;

அசரிம் தீணி வஸ்ஸானி, கு²ப்பிபாஸாஸமப்பிதா.

135. ‘‘அத²த்³த³ஸாஸிம் ஸுக³தம், நக³ரம் மிதி²லம் பதி [க³தம் (க.)];

அத³ந்தானம் த³மேதாரம், ஸம்பு³த்³த⁴மகுதோப⁴யம்.

136. ‘‘ஸசித்தம் படிலத்³தா⁴ன, வந்தி³த்வான உபாவிஸிம்;

ஸோ மே த⁴ம்மமதே³ஸேஸி, அனுகம்பாய கோ³தமோ.

137. ‘‘தஸ்ஸ த⁴ம்மம் ஸுணித்வான, பப்³ப³ஜிம் அனகா³ரியம்;

யுஞ்ஜந்தீ ஸத்து²வசனே, ஸச்சா²காஸிம் பத³ம் ஸிவம்.

138. ‘‘ஸப்³பே³ ஸோகா ஸமுச்சி²ன்னா, பஹீனா ஏதத³ந்திகா;

பரிஞ்ஞாதா ஹி மே வத்தூ², யதோ ஸோகான ஸம்ப⁴வோ’’தி.

… வாஸேட்டீ² தே²ரீ….

3. கே²மாதே²ரீகா³தா²

139. ‘‘த³ஹரா த்வம் ரூபவதீ, அஹம்பி த³ஹரோ யுவா;

பஞ்சங்கி³கேன துரியேன [தூரேன (க.)], ஏஹி கே²மே ரமாமஸே’’.

140. ‘‘இமினா பூதிகாயேன, ஆதுரேன பப⁴ங்கு³னா;

அட்டியாமி ஹராயாமி, காமதண்ஹா ஸமூஹதா.

141. ‘‘ஸத்திஸூலூபமா காமா, க²ந்தா⁴ஸம் அதி⁴குட்டனா;

யம் ‘த்வம் காமரதிம்’ ப்³ரூஸி, ‘அரதீ’ தா³னி ஸா மம.

142. ‘‘ஸப்³ப³த்த² விஹதா நந்தீ³, தமோக²ந்தோ⁴ பதா³லிதோ;

ஏவம் ஜானாஹி பாபிம, நிஹதோ த்வமஸி அந்தக.

143. ‘‘நக்க²த்தானி நமஸ்ஸந்தா, அக்³கி³ம் பரிசரம் வனே;

யதா²பு⁴ச்சமஜானந்தா, பா³லா ஸுத்³தி⁴மமஞ்ஞத².

144. ‘‘அஹஞ்ச கோ² நமஸ்ஸந்தீ, ஸம்பு³த்³த⁴ம் புரிஸுத்தமம்;

பமுத்தா [பரிமுத்தா (ஸீ. ஸ்யா.)] ஸப்³ப³து³க்கே²ஹி, ஸத்து²ஸாஸனகாரிகா’’தி.

… கே²மா தே²ரீ….

4. ஸுஜாதாதே²ரீகா³தா²

145. ‘‘அலங்கதா ஸுவஸனா, மாலினீ சந்த³னோக்கி²தா;

ஸப்³பா³ப⁴ரணஸஞ்ச²ன்னா, தா³ஸீக³ணபுரக்க²தா.

146. ‘‘அன்னம் பானஞ்ச ஆதா³ய, க²ஜ்ஜம் போ⁴ஜ்ஜம் அனப்பகம்;

கே³ஹதோ நிக்க²மித்வான, உய்யானமபி⁴ஹாரயிம்.

147. ‘‘தத்த² ரமித்வா கீளித்வா, ஆக³ச்ச²ந்தீ ஸகம் க⁴ரம்;

விஹாரம் த³ட்டு²ம் பாவிஸிம், ஸாகேதே அஞ்ஜனம் வனம்.

148. ‘‘தி³ஸ்வான லோகபஜ்ஜோதம், வந்தி³த்வான உபாவிஸிம்;

ஸோ மே த⁴ம்மமதே³ஸேஸி, அனுகம்பாய சக்கு²மா.

149. ‘‘ஸுத்வா ச கோ² மஹேஸிஸ்ஸ, ஸச்சம் ஸம்படிவிஜ்ஜ²ஹம்;

தத்தே²வ விரஜம் த⁴ம்மம், பு²ஸயிம் அமதம் பத³ம்.

150. ‘‘ததோ விஞ்ஞாதஸத்³த⁴ம்மா, பப்³ப³ஜிம் அனகா³ரியம்;

திஸ்ஸோ விஜ்ஜா அனுப்பத்தா, அமோக⁴ம் பு³த்³த⁴ஸாஸன’’ந்தி.

… ஸுஜாதா தே²ரீ….

5. அனோபமாதே²ரீகா³தா²

151. ‘‘உச்சே குலே அஹம் ஜாதா, ப³ஹுவித்தே மஹத்³த⁴னே;

வண்ணரூபேன ஸம்பன்னா, தீ⁴தா மஜ்ஜ²ஸ்ஸ [மேக⁴ஸ்ஸ (ஸீ.), மேகி⁴ஸ்ஸ (ஸ்யா.)] அத்ரஜா.

152. ‘‘பத்தி²தா ராஜபுத்தேஹி, ஸேட்டி²புத்தேஹி கி³ஜ்ஜி²தா [ஸேட்டி²புத்தேஹி பி⁴ஜ்ஜி²தா (ஸீ.)];

பிது மே பேஸயீ தூ³தம், தே³த² மய்ஹம் அனோபமம்.

153. ‘‘யத்தகம் துலிதா ஏஸா, துய்ஹம் தீ⁴தா அனோபமா;

ததோ அட்ட²கு³ணம் த³ஸ்ஸம், ஹிரஞ்ஞம் ரதனானி ச.

154. ‘‘ஸாஹம் தி³ஸ்வான ஸம்பு³த்³த⁴ம், லோகஜேட்ட²ம் அனுத்தரம்;

தஸ்ஸ பாதா³னி வந்தி³த்வா, ஏகமந்தம் உபாவிஸிம்.

155. ‘‘ஸோ மே த⁴ம்மமதே³ஸேஸி, அனுகம்பாய கோ³தமோ;

நிஸின்னா ஆஸனே தஸ்மிம், பு²ஸயிம் ததியம் ப²லம்.

156. ‘‘ததோ கேஸானி சே²த்வான, பப்³ப³ஜிம் அனகா³ரியம்;

அஜ்ஜ மே ஸத்தமீ ரத்தி, யதோ தண்ஹா விஸோஸிதா’’தி.

… அனோபமா தே²ரீ….

6. மஹாபஜாபதிகோ³தமீதே²ரீகா³தா²

157. ‘‘பு³த்³த⁴ வீர நமோ த்யத்து², ஸப்³ப³ஸத்தானமுத்தம;

யோ மம் து³க்கா² பமோசேஸி, அஞ்ஞஞ்ச ப³ஹுகம் ஜனம்.

158. ‘‘ஸப்³ப³து³க்க²ம் பரிஞ்ஞாதம், ஹேதுதண்ஹா விஸோஸிதா;

பா⁴விதோ அட்ட²ங்கி³கோ [அரியட்ட²ங்கி³கோ (ஸீ. க.), பா⁴விதட்ட²ங்கி³கோ (ஸ்யா.)] மக்³கோ³, நிரோதோ⁴ பு²ஸிதோ மயா.

159. ‘‘மாதா புத்தோ பிதா பா⁴தா, அய்யகா ச புரே அஹும்;

யதா²பு⁴ச்சமஜானந்தீ, ஸம்ஸரிம்ஹம் அனிப்³பி³ஸம்.

160. ‘‘தி³ட்டோ² ஹி மே ஸோ ப⁴க³வா, அந்திமோயம் ஸமுஸ்ஸயோ;

விக்கீ²ணோ ஜாதிஸம்ஸாரோ, நத்தி² தா³னி புனப்³ப⁴வோ.

161. ‘‘ஆரத்³த⁴வீரியே பஹிதத்தே, நிச்சம் த³ள்ஹபரக்கமே;

ஸமக்³கே³ ஸாவகே பஸ்ஸே, ஏஸா பு³த்³தா⁴ன வந்த³னா.

162. ‘‘ப³ஹூனம் [ப³ஹுன்னம் (ஸீ. ஸ்யா.)] வத அத்தா²ய, மாயா ஜனயி கோ³தமம்;

ப்³யாதி⁴மரணதுன்னானம், து³க்க²க்க²ந்த⁴ம் ப்³யபானுதீ³’’தி.

… மஹாபஜாபதிகோ³தமீ தே²ரீ….

7. கு³த்தாதே²ரீகா³தா²

163. ‘‘கு³த்தே யத³த்த²ம் பப்³ப³ஜ்ஜா, ஹித்வா புத்தம் வஸும் பியம்;

தமேவ அனுப்³ரூஹேஹி, மா சித்தஸ்ஸ வஸம் க³மி.

164. ‘‘சித்தேன வஞ்சிதா ஸத்தா, மாரஸ்ஸ விஸயே ரதா;

அனேகஜாதிஸம்ஸாரம், ஸந்தா⁴வந்தி அவித்³த³ஸூ.

165. ‘‘காமச்ச²ந்த³ஞ்ச ப்³யாபாத³ம், ஸக்காயதி³ட்டி²மேவ ச;

ஸீலப்³ப³தபராமாஸம், விசிகிச்ச²ஞ்ச பஞ்சமம்.

166. ‘‘ஸம்யோஜனானி ஏதானி, பஜஹித்வான பி⁴க்கு²னீ;

ஓரம்பா⁴க³மனீயானி, நயித³ம் புனரேஹிஸி.

167. ‘‘ராக³ம் மானம் அவிஜ்ஜஞ்ச, உத்³த⁴ச்சஞ்ச விவஜ்ஜிய;

ஸம்யோஜனானி சே²த்வான, து³க்க²ஸ்ஸந்தம் கரிஸ்ஸஸி.

168. ‘‘கே²பேத்வா ஜாதிஸம்ஸாரம், பரிஞ்ஞாய புனப்³ப⁴வம்;

தி³ட்டே²வ த⁴ம்மே நிச்சா²தா, உபஸந்தா சரிஸ்ஸதீ’’தி.

… கு³த்தா தே²ரீ….

8. விஜயாதே²ரீகா³தா²

169. ‘‘சதுக்க²த்தும் பஞ்சக்க²த்தும், விஹாரா உபனிக்க²மிம்;

அலத்³தா⁴ சேதஸோ ஸந்திம், சித்தே அவஸவத்தினீ.

170. ‘‘பி⁴க்கு²னிம் உபஸங்கம்ம, ஸக்கச்சம் பரிபுச்ச²ஹம்;

ஸா மே த⁴ம்மமதே³ஸேஸி, தா⁴துஆயதனானி ச.

171. ‘‘சத்தாரி அரியஸச்சானி, இந்த்³ரியானி ப³லானி ச;

போ³ஜ்ஜ²ங்க³ட்ட²ங்கி³கம் மக்³க³ம், உத்தமத்த²ஸ்ஸ பத்தியா.

172. ‘‘தஸ்ஸாஹம் வசனம் ஸுத்வா, கரோந்தீ அனுஸாஸனிம்;

ரத்தியா புரிமே யாமே, புப்³ப³ஜாதிமனுஸ்ஸரிம்.

173. ‘‘ரத்தியா மஜ்ஜி²மே யாமே, தி³ப்³ப³சக்கு²ம் விஸோத⁴யிம்;

ரத்தியா பச்சி²மே யாமே, தமோக²ந்த⁴ம் பதா³லயிம்.

174. ‘‘பீதிஸுகே²ன ச காயம், ப²ரித்வா விஹரிம் ததா³;

ஸத்தமியா பாதே³ பஸாரேஸிம், தமோக²ந்த⁴ம் பதா³லியா’’தி.

… விஜயா தே²ரீ….

ச²க்கனிபாதோ நிட்டி²தோ.