1. கிஸாகோ³தமீதே²ரீகா³தா²

213. ‘‘கல்யாணமித்ததா முனினா, லோகம் ஆதி³ஸ்ஸ வண்ணிதா;

கல்யாணமித்தே ப⁴ஜமானோ, அபி பா³லோ பண்டி³தோ அஸ்ஸ.

214. ‘‘ப⁴ஜிதப்³பா³ ஸப்புரிஸா, பஞ்ஞா ததா² வட்³ட⁴தி ப⁴ஜந்தானம்;

ப⁴ஜமானோ ஸப்புரிஸே, ஸப்³பே³ஹிபி து³க்கே²ஹி பமுச்சேய்ய.

215. ‘‘து³க்க²ஞ்ச விஜானேய்ய, து³க்க²ஸ்ஸ ச ஸமுத³யம் நிரோத⁴ம்;

அட்ட²ங்கி³கஞ்ச மக்³க³ம், சத்தாரிபி அரியஸச்சானி.

216. ‘‘து³க்கோ² இத்தி²பா⁴வோ, அக்கா²தோ புரிஸத³ம்மஸாரதி²னா;

ஸபத்திகம்பி ஹி து³க்க²ம், அப்பேகச்சா ஸகிம் விஜாதாயோ.

217. ‘‘க³லகே அபி கந்தந்தி, ஸுகு²மாலினியோ விஸானி கா²த³ந்தி;

ஜனமாரகமஜ்ஜ²க³தா, உபோ⁴பி ப்³யஸனானி அனுபோ⁴ந்தி.

218. ‘‘உபவிஜஞ்ஞா க³ச்ச²ந்தீ, அத்³த³ஸாஹம் பதிம் மதம்;

பந்த²ம்ஹி விஜாயித்வான, அப்பத்தாவ ஸகம் க⁴ரம்.

219. ‘‘த்³வே புத்தா காலகதா, பதீ ச பந்தே² மதோ கபணிகாய;

மாதா பிதா ச பா⁴தா, ட³ய்ஹந்தி ச ஏகசிதகாயம்.

220. ‘‘கீ²ணகுலீனே கபணே, அனுபூ⁴தம் தே து³க²ம் அபரிமாணம்;

அஸ்ஸூ ச தே பவத்தம், ப³ஹூனி ச ஜாதிஸஹஸ்ஸானி.

221. ‘‘வஸிதா ஸுஸானமஜ்ஜே², அதோ²பி கா²தி³தானி புத்தமம்ஸானி;

ஹதகுலிகா ஸப்³ப³க³ரஹிதா, மதபதிகா அமதமதி⁴க³ச்சி²ம்.

222. ‘‘பா⁴விதோ மே மக்³கோ³, அரியோ அட்ட²ங்கி³கோ அமதகா³மீ;

நிப்³பா³னம் ஸச்சி²கதம், த⁴ம்மாதா³ஸம் அவேக்கி²ம்ஹம் [அபேக்கி²ஹம் (ஸீ.)].

223. ‘‘அஹமம்ஹி கந்தஸல்லா, ஓஹிதபா⁴ரா கதஞ்ஹி கரணீயம்;

கிஸா கோ³தமீ தே²ரீ, விமுத்தசித்தா இமம் ப⁴ணீ’’தி.

… கிஸா கோ³தமீ தே²ரீ….

ஏகாத³ஸனிபாதோ நிட்டி²தோ.