4. ஏகாஸனதா³யிகாதே²ரீஅபதா³னம்

37. ‘‘நக³ரே ஹம்ஸவதியா, அஹோஸிம் பா³லிகா [மாலிகா (ஸ்யா. பீ.)] ததா³;

மாதா ச மே பிதா சேவ, கம்மந்தம் அக³மம்ஸு தே.

38. ‘‘மஜ்ஜ²ன்ஹிகம்ஹி ஸூரியே, அத்³த³ஸம் ஸமணம் அஹம்;

வீதி²யா அனுக³ச்ச²ந்தம், ஆஸனம் பஞ்ஞபேஸஹம்.

39. ‘‘கோ³னகாவிகதிகாஹி [கோ³னகசித்தகாதீ³ஹி (ஸீ.)], பஞ்ஞபேத்வா மமாஸனம்;

பஸன்னசித்தா ஸுமனா, இத³ம் வசனமப்³ரவிம்.

40. ‘‘‘ஸந்தத்தா குதி²தா பூ⁴மி, ஸூரோ மஜ்ஜ²ன்ஹிகே டி²தோ;

மாலுதா ச ந வாயந்தி, காலோ சேவேத்த² மேஹிதி [சேத்த² உபட்டி²தோ (ஸீ.), சேவத்த²ம் ஏதி தம் (பீ.)].

41. ‘‘‘பஞ்ஞத்தமாஸனமித³ம், தவத்தா²ய மஹாமுனி;

அனுகம்பம் உபாதா³ய, நிஸீத³ மம ஆஸனே’.

42. ‘‘நிஸீதி³ தத்த² ஸமணோ, ஸுத³ந்தோ ஸுத்³த⁴மானஸோ;

தஸ்ஸ பத்தம் க³ஹேத்வான, யதா²ரந்த⁴ம் அதா³ஸஹம்.

43. ‘‘தேன கம்மேன ஸுகதேன, சேதனாபணிதீ⁴ஹி ச;

ஜஹித்வா மானுஸம் தே³ஹம், தாவதிம்ஸமக³ச்ச²ஹம்.

44. ‘‘தத்த² மே ஸுகதம் ப்³யம்ஹம், ஆஸனேன ஸுனிம்மிதம்;

ஸட்டி²யோஜனமுப்³பே³த⁴ம், திம்ஸயோஜனவித்த²தம்.

45. ‘‘ஸோண்ணமயா மணிமயா, அதோ²பி ப²லிகாமயா;

லோஹிதங்க³மயா சேவ, பல்லங்கா விவிதா⁴ மம.

46. ‘‘தூலிகா விகதிகாஹி, கட்டிஸ்ஸசித்தகாஹி ச;

உத்³த³ஏகந்தலோமீ ச, பல்லங்கா மே ஸுஸண்டி²தா [ஸுஸந்த²தா (ஸீ.)].

47. ‘‘யதா³ இச்சா²மி க³மனம், ஹாஸகி²ட்³ட³ஸமப்பிதா;

ஸஹ பல்லங்கஸேட்டே²ன, க³ச்சா²மி மம பத்தி²தம்.

48. ‘‘அஸீதி தே³வராஜூனம், மஹேஸித்தமகாரயிம்;

ஸத்ததி சக்கவத்தீனம், மஹேஸித்தமகாரயிம்.

49. ‘‘ப⁴வாப⁴வே ஸம்ஸரந்தீ, மஹாபோ⁴க³ம் லபா⁴மஹம்;

போ⁴கே³ மே ஊனதா நத்தி², ஏகாஸனஸ்ஸித³ம் ப²லம் [ஏகாஸனப²லம் இத³ம் (ஸப்³ப³த்த²) ஏவமுபரிபி].

50. ‘‘து³வே ப⁴வே ஸம்ஸராமி, தே³வத்தே அத² மானுஸே;

அஞ்ஞே ப⁴வே ந ஜானாமி, ஏகாஸனஸ்ஸித³ம் ப²லம்.

51. ‘‘து³வே குலே பஜாயாமி, க²த்தியே சாபி ப்³ராஹ்மணே;

உச்சாகுலீனா [உச்சாகுலிகா (ஸ்யா. பீ. க.)] ஸப்³ப³த்த², ஏகாஸனஸ்ஸித³ம் ப²லம்.

52. ‘‘தோ³மனஸ்ஸம் ந ஜானாமி, சித்தஸந்தாபனம் மம;

வேவண்ணியம் ந ஜானாமி, ஏகாஸனஸ்ஸித³ம் ப²லம்.

53. ‘‘தா⁴தியோ மம் உபட்ட²ந்தி, கு²ஜ்ஜா சேலாபிகா [கே²லாபிகா (ஸீ.), சேலாவிகா (பீ.)] ப³ஹூ;

அங்கேன அங்கம் க³ச்சா²மி, ஏகாஸனஸ்ஸித³ம் ப²லம்.

54. ‘‘அஞ்ஞா ந்ஹாபேந்தி போ⁴ஜேந்தி, அஞ்ஞா ரமேந்தி மம் ஸதா³;

அஞ்ஞா க³ந்த⁴ம் விலிம்பந்தி, ஏகாஸனஸ்ஸித³ம் ப²லம் [அஞ்ஞா மமேவ ந்ஹாபேந்தி, அஞ்ஞா போ⁴ஜேந்தி போ⁴ஜனம்; அஞ்ஞா மம் அலங்கரோந்தி, அஞ்ஞா ரமேந்தி மம் ஸத்³தா⁴; (ஸ்யா.)].

55. ‘‘மண்ட³பே ருக்க²மூலே வா, ஸுஞ்ஞாகா³ரே வஸந்தியா;

மம ஸங்கப்பமஞ்ஞாய, பல்லங்கோ உபதிட்ட²தி.

56. ‘‘அயம் பச்சி²மகோ மய்ஹம், சரிமோ வத்ததே ப⁴வோ;

அஜ்ஜாபி ரஜ்ஜம் ச²ட்³டே³த்வா, பப்³ப³ஜிம் அனகா³ரியம்.

57. ‘‘ஸதஸஹஸ்ஸிதோ கப்பே, யம் தா³னமத³தி³ம் ததா³;

து³க்³க³திம் நாபி⁴ஜானாமி, ஏகாஸனஸ்ஸித³ம் ப²லம்.

58. ‘‘கிலேஸா ஜா²பிதா மய்ஹம்…பே… விஹராமி அனாஸவா.

59. ‘‘ஸ்வாக³தம் வத மே ஆஸி…பே… கதம் பு³த்³த⁴ஸ்ஸ ஸாஸனம்.

60. ‘‘படிஸம்பி⁴தா³ சதஸ்ஸோ…பே… கதம் பு³த்³த⁴ஸ்ஸ ஸாஸனம்’’.

இத்த²ம் ஸுத³ம் ஏகாஸனதா³யிகா பி⁴க்கு²னீ இமா கா³தா²யோ அபா⁴ஸித்தா²தி.

ஏகாஸனதா³யிகாதே²ரியாபதா³னம் சதுத்த²ம்.