1. அங்க³ணிகபா⁴ரத்³வாஜத்தே²ரகா³தா²

219. ‘‘அயோனி ஸுத்³தி⁴மன்வேஸம், அக்³கி³ம் பரிசரிம் வனே;

ஸுத்³தி⁴மக்³க³ம் அஜானந்தோ, அகாஸிம் அமரம் தபம் [அகாஸிம் அபரம் தபம் (ஸ்யா.), அகாஸிம் அமதம் தபம் (க.)].

220. ‘‘தம் ஸுகே²ன ஸுக²ம் லத்³த⁴ம், பஸ்ஸ த⁴ம்மஸுத⁴ம்மதம்;

திஸ்ஸோ விஜ்ஜா அனுப்பத்தா, கதம் பு³த்³த⁴ஸ்ஸ ஸாஸனம்.

221. ‘‘ப்³ரஹ்மப³ந்து⁴ புரே ஆஸிம், இதா³னி கோ²ம்ஹி ப்³ராஹ்மணோ;

தேவிஜ்ஜோ ந்ஹாதகோ [நஹாதகோ (ஸீ. அட்ட².)] சம்ஹி, ஸோத்தியோ சம்ஹி வேத³கூ³’’தி.

… அங்க³ணிகபா⁴ரத்³வாஜோ தே²ரோ….