10. பாராபரியத்தே²ரகா³தா²

920. ஸமணஸ்ஸ அஹு சிந்தா, புப்பி²தம்ஹி மஹாவனே;

ஏகக்³க³ஸ்ஸ நிஸின்னஸ்ஸ, பவிவித்தஸ்ஸ ஜா²யினோ.

921. ‘‘அஞ்ஞதா² லோகனாத²ம்ஹி, திட்ட²ந்தே புரிஸுத்தமே;

இரியம் ஆஸி பி⁴க்கூ²னம், அஞ்ஞதா² தா³னி தி³ஸ்ஸதி.

922. ‘‘ஸீதவாதபரித்தானம், ஹிரிகோபீனசா²த³னம்;

மத்தட்டி²யம் அபு⁴ஞ்ஜிம்ஸு, ஸந்துட்டா² இதரீதரே.

923. ‘‘பணீதம் யதி³ வா லூக²ம், அப்பம் வா யதி³ வா ப³ஹும்;

யாபனத்த²ம் அபு⁴ஞ்ஜிம்ஸு, அகி³த்³தா⁴ நாதி⁴முச்சி²தா.

924. ‘‘ஜீவிதானம் பரிக்கா²ரே, பே⁴ஸஜ்ஜே அத² பச்சயே;

ந பா³ள்ஹம் உஸ்ஸுகா ஆஸும், யதா² தே ஆஸவக்க²யே.

925. ‘‘அரஞ்ஞே ருக்க²மூலேஸு, கந்த³ராஸு கு³ஹாஸு ச;

விவேகமனுப்³ரூஹந்தா, விஹம்ஸு தப்பராயனா.

926. ‘‘நீசா நிவிட்டா² ஸுப⁴ரா, முதூ³ அத்த²த்³த⁴மானஸா;

அப்³யாஸேகா அமுக²ரா, அத்த²சிந்தா வஸானுகா³.

927. ‘‘ததோ பாஸாதி³கம் ஆஸி, க³தம் பு⁴த்தம் நிஸேவிதம்;

ஸினித்³தா⁴ தேலதா⁴ராவ, அஹோஸி இரியாபதோ².

928. ‘‘ஸப்³பா³ஸவபரிக்கீ²ணா, மஹாஜா²யீ மஹாஹிதா;

நிப்³பு³தா தா³னி தே தே²ரா, பரித்தா தா³னி தாதி³ஸா.

929. ‘‘குஸலானஞ்ச த⁴ம்மானம், பஞ்ஞாய ச பரிக்க²யா;

ஸப்³பா³காரவரூபேதம், லுஜ்ஜதே ஜினஸாஸனம்.

930. ‘‘பாபகானஞ்ச த⁴ம்மானம், கிலேஸானஞ்ச யோ உது;

உபட்டி²தா விவேகாய, யே ச ஸத்³த⁴ம்மஸேஸகா.

931. ‘‘தே கிலேஸா பவட்³ட⁴ந்தா, ஆவிஸந்தி ப³ஹும் ஜனம்;

கீளந்தி மஞ்ஞே பா³லேஹி, உம்மத்தேஹிவ ரக்க²ஸா.

932. ‘‘கிலேஸேஹாபி⁴பூ⁴தா தே, தேன தேன விதா⁴விதா;

நரா கிலேஸவத்தூ²ஸு, ஸஸங்கா³மேவ கோ⁴ஸிதே.

933. ‘‘பரிச்சஜித்வா ஸத்³த⁴ம்மம், அஞ்ஞமஞ்ஞேஹி ப⁴ண்ட³ரே;

தி³ட்டி²க³தானி அன்வேந்தா, இத³ம் ஸேய்யோதி மஞ்ஞரே.

934. ‘‘த⁴னஞ்ச புத்தம் ப⁴ரியஞ்ச, ச²ட்³ட³யித்வான நிக்³க³தா;

கடச்சு²பி⁴க்க²ஹேதூபி, அகிச்சா²னி நிஸேவரே.

935. ‘‘உத³ராவதே³ஹகம் பு⁴த்வா, ஸயந்துத்தானஸேய்யகா;

கத²ம் வத்தேந்தி [கதா² வட்³டே⁴ந்தி (ஸீ. க.)] படிபு³த்³தா⁴, யா கதா² ஸத்து²க³ரஹிதா.

936. ‘‘ஸப்³ப³காருகஸிப்பானி, சித்திம் கத்வான [சித்தீகத்வான (ஸீ.), சித்தம் கத்வான (ஸ்யா.)] ஸிக்க²ரே;

அவூபஸந்தா அஜ்ஜ²த்தம், ஸாமஞ்ஞத்தோ²தி அச்ச²தி [திரிஞ்சதி (?)].

937. ‘‘மத்திகம் தேலசுண்ணஞ்ச, உத³காஸனபோ⁴ஜனம்;

கி³ஹீனம் உபனாமேந்தி, ஆகங்க²ந்தா ப³ஹுத்தரம்.

938. ‘‘த³ந்தபோனம் கபித்த²ஞ்ச, புப்ப²ம் கா²த³னியானி ச;

பிண்ட³பாதே ச ஸம்பன்னே, அம்பே³ ஆமலகானி ச.

939. ‘‘பே⁴ஸஜ்ஜேஸு யதா² வேஜ்ஜா, கிச்சாகிச்சே யதா² கி³ஹீ;

க³ணிகாவ விபூ⁴ஸாயம், இஸ்ஸரே க²த்தியா யதா².

940. ‘‘நேகதிகா வஞ்சனிகா, கூடஸக்கீ² அபாடுகா;

ப³ஹூஹி பரிகப்பேஹி, ஆமிஸம் பரிபு⁴ஞ்ஜரே.

941. ‘‘லேஸகப்பே பரியாயே, பரிகப்பேனுதா⁴விதா;

ஜீவிகத்தா² உபாயேன, ஸங்கட்³ட⁴ந்தி ப³ஹும் த⁴னம்.

942. ‘‘உபட்டா²பேந்தி பரிஸம், கம்மதோ நோ ச த⁴ம்மதோ;

த⁴ம்மம் பரேஸம் தே³ஸேந்தி, லாப⁴தோ நோ ச அத்த²தோ.

943. ‘‘ஸங்க⁴லாப⁴ஸ்ஸ ப⁴ண்ட³ந்தி, ஸங்க⁴தோ பரிபா³ஹிரா;

பரலாபோ⁴பஜீவந்தா, அஹிரீகா ந லஜ்ஜரே.

944. ‘‘நானுயுத்தா ததா² ஏகே, முண்டா³ ஸங்கா⁴டிபாருதா;

ஸம்பா⁴வனம்யேவிச்ச²ந்தி, லாப⁴ஸக்காரமுச்சி²தா.

945. ‘‘ஏவம் நானப்பயாதம்ஹி, ந தா³னி ஸுகரம் ததா²;

அபு²ஸிதம் வா பு²ஸிதும், பு²ஸிதம் வானுரக்கி²தும்.

946. ‘‘யதா² கண்டகட்டா²னம்ஹி, சரேய்ய அனுபாஹனோ;

ஸதிம் உபட்ட²பேத்வான, ஏவம் கா³மே முனீ சரே.

947. ‘‘ஸரித்வா புப்³ப³கே யோகீ³, தேஸம் வத்தமனுஸ்ஸரம்;

கிஞ்சாபி பச்சி²மோ காலோ, பு²ஸேய்ய அமதம் பத³ம்.

948. ‘‘இத³ம் வத்வா ஸாலவனே, ஸமணோ பா⁴விதிந்த்³ரியோ;

ப்³ராஹ்மணோ பரினிப்³பா³யீ, இஸி கீ²ணபுனப்³ப⁴வோ’’தி.

… பாராபரியோ [பாராஸரியோ (ஸ்யா.)] தே²ரோ….

வீஸதினிபாதோ நிட்டி²தோ.