2. கு³ஹட்ட²கஸுத்தம்

778. ஸத்தோ கு³ஹாயம் ப³ஹுனாபி⁴ச²ன்னோ, திட்ட²ம் நரோ மோஹனஸ்மிம் பகா³ள்ஹோ;

தூ³ரே விவேகா ஹி ததா²விதோ⁴ ஸோ, காமா ஹி லோகே ந ஹி ஸுப்பஹாயா.

779. இச்சா²னிதா³னா ப⁴வஸாதப³த்³தா⁴, தே து³ப்பமுஞ்சா ந ஹி அஞ்ஞமோக்கா²;

பச்சா² புரே வாபி அபேக்க²மானா, இமேவ காமே புரிமேவ ஜப்பம்.

780. காமேஸு கி³த்³தா⁴ பஸுதா பமூள்ஹா, அவதா³னியா தே விஸமே நிவிட்டா²;

து³க்கூ²பனீதா பரிதே³வயந்தி, கிம்ஸூ ப⁴விஸ்ஸாம இதோ சுதாஸே.

781. தஸ்மா ஹி ஸிக்கே²த² இதே⁴வ ஜந்து, யம் கிஞ்சி ஜஞ்ஞா விஸமந்தி லோகே;

ந தஸ்ஸ ஹேதூ விஸமம் சரேய்ய, அப்பஞ்ஹித³ம் ஜீவிதமாஹு தீ⁴ரா.

782. பஸ்ஸாமி லோகே பரிப²ந்த³மானம், பஜம் இமம் தண்ஹக³தம் ப⁴வேஸு;

ஹீனா நரா மச்சுமுகே² லபந்தி, அவீததண்ஹாஸே ப⁴வாப⁴வேஸு.

783. மமாயிதே பஸ்ஸத² ப²ந்த³மானே, மச்சே²வ அப்போத³கே கீ²ணஸோதே;

ஏதம்பி தி³ஸ்வா அமமோ சரேய்ய, ப⁴வேஸு ஆஸத்திமகுப்³ப³மானோ.

784. உபோ⁴ஸு அந்தேஸு வினேய்ய ச²ந்த³ம், ப²ஸ்ஸம் பரிஞ்ஞாய அனானுகி³த்³தோ⁴;

யத³த்தக³ரஹீ தத³குப்³ப³மானோ, ந லிப்பதீ [ந லிம்பதீ (ஸ்யா. க.)] தி³ட்ட²ஸுதேஸு தீ⁴ரோ.

785. ஸஞ்ஞம் பரிஞ்ஞா விதரேய்ய ஓக⁴ம், பரிக்³க³ஹேஸு முனி நோபலித்தோ;

அப்³பூ³ள்ஹஸல்லோ சரமப்பமத்தோ, நாஸீஸதீ [நாஸிம்ஸதீ (ஸீ. ஸ்யா. பீ.)] லோகமிமம் பரஞ்சாதி.

கு³ஹட்ட²கஸுத்தம் து³தியம் நிட்டி²தம்.