8. ஸல்லஸுத்தம்

579. அனிமித்தமனஞ்ஞாதம், மச்சானம் இத⁴ ஜீவிதம்;

கஸிரஞ்ச பரித்தஞ்ச, தஞ்ச து³க்கே²ன ஸம்யுதம்.

580. ந ஹி ஸோ உபக்கமோ அத்தி², யேன ஜாதா ந மிய்யரே;

ஜரம்பி பத்வா மரணம், ஏவம்த⁴ம்மா ஹி பாணினோ.

581. ப²லானமிவ பக்கானம், பாதோ பதனதோ [பபததோ (ஸீ. பீ. அட்ட².)] ப⁴யம்;

ஏவம் ஜாதான மச்சானம், நிச்சம் மரணதோ ப⁴யம்.

582. யதா²பி கும்ப⁴காரஸ்ஸ, கதா மத்திகபா⁴ஜனா;

ஸப்³பே³ பே⁴த³னபரியந்தா [பே⁴த³பரியந்தா (ஸ்யா.)], ஏவம் மச்சான ஜீவிதம்.

583. த³ஹரா ச மஹந்தா ச, யே பா³லா யே ச பண்டி³தா;

ஸப்³பே³ மச்சுவஸம் யந்தி, ஸப்³பே³ மச்சுபராயணா.

584. தேஸம் மச்சுபரேதானம், க³ச்ச²தம் பரலோகதோ;

ந பிதா தாயதே புத்தம், ஞாதீ வா பன ஞாதகே.

585. பேக்க²தம் யேவ ஞாதீனம், பஸ்ஸ லாலபதம் புது²;

ஏகமேகோவ மச்சானம், கோ³வஜ்ஜோ² விய நீயதி [நிய்யதி (ப³ஹூஸு)].

586. ஏவமப்³பா⁴ஹதோ லோகோ, மச்சுனா ச ஜராய ச;

தஸ்மா தீ⁴ரா ந ஸோசந்தி, விதி³த்வா லோகபரியாயம்.

587. யஸ்ஸ மக்³க³ம் ந ஜானாஸி, ஆக³தஸ்ஸ க³தஸ்ஸ வா;

உபோ⁴ அந்தே அஸம்பஸ்ஸம், நிரத்த²ம் பரிதே³வஸி.

588. பரிதே³வயமானோ சே, கிஞ்சித³த்த²ம் உத³ப்³ப³ஹே;

ஸம்மூள்ஹோ ஹிம்ஸமத்தானம், கயிரா சே நம் விசக்க²ணோ.

589. ந ஹி ருண்ணேன ஸோகேன, ஸந்திம் பப்போதி சேதஸோ;

பி⁴ய்யஸ்ஸுப்பஜ்ஜதே து³க்க²ம், ஸரீரம் சுபஹஞ்ஞதி.

590. கிஸோ விவண்ணோ ப⁴வதி, ஹிம்ஸமத்தானமத்தனா;

ந தேன பேதா பாலேந்தி, நிரத்தா² பரிதே³வனா.

591. ஸோகமப்பஜஹம் ஜந்து, பி⁴ய்யோ து³க்க²ம் நிக³ச்ச²தி;

அனுத்து²னந்தோ காலங்கதம் [காலகதம் (ஸீ. ஸ்யா.)], ஸோகஸ்ஸ வஸமன்வகூ³.

592. அஞ்ஞேபி பஸ்ஸ க³மினே, யதா²கம்மூபகே³ நரே;

மச்சுனோ வஸமாக³ம்ம, ப²ந்த³ந்தேவித⁴ பாணினோ.

593. யேன யேன ஹி மஞ்ஞந்தி, ததோ தம் ஹோதி அஞ்ஞதா²;

ஏதாதி³ஸோ வினாபா⁴வோ, பஸ்ஸ லோகஸ்ஸ பரியாயம்.

594. அபி வஸ்ஸஸதம் ஜீவே, பி⁴ய்யோ வா பன மாணவோ;

ஞாதிஸங்கா⁴ வினா ஹோதி, ஜஹாதி இத⁴ ஜீவிதம்.

595. தஸ்மா அரஹதோ ஸுத்வா, வினேய்ய பரிதே³விதம்;

பேதம் காலங்கதம் தி³ஸ்வா, நேஸோ லப்³பா⁴ மயா இதி.

596. யதா² ஸரணமாதி³த்தம், வாரினா பரினிப்³ப³யே [பரினிப்³பு³தோ (ஸீ. க.)];

ஏவம்பி தீ⁴ரோ ஸபஞ்ஞோ, பண்டி³தோ குஸலோ நரோ;

கி²ப்பமுப்பதிதம் ஸோகம், வாதோ தூலம்வ த⁴ம்ஸயே.

597. பரிதே³வம் பஜப்பஞ்ச, தோ³மனஸ்ஸஞ்ச அத்தனோ;

அத்தனோ ஸுக²மேஸானோ, அப்³ப³ஹே ஸல்லமத்தனோ.

598. அப்³பு³ள்ஹஸல்லோ அஸிதோ, ஸந்திம் பப்புய்ய சேதஸோ;

ஸப்³ப³ஸோகம் அதிக்கந்தோ, அஸோகோ ஹோதி நிப்³பு³தோதி.

ஸல்லஸுத்தம் அட்ட²மம் நிட்டி²தம்.