7. ப்³ராஹ்மணத⁴ம்மிகஸுத்தம்

ஏவம் மே ஸுதம் – ஏகம் ஸமயம் ப⁴க³வா ஸாவத்தி²யம் விஹரதி ஜேதவனே அனாத²பிண்டி³கஸ்ஸ ஆராமே. அத² கோ² ஸம்ப³ஹுலா கோஸலகா ப்³ராஹ்மணமஹாஸாலா ஜிண்ணா வுட்³டா⁴ மஹல்லகா அத்³த⁴க³தா வயோஅனுப்பத்தா யேன ப⁴க³வா தேனுபஸங்கமிம்ஸு; உபஸங்கமித்வா ப⁴க³வதா ஸத்³தி⁴ம் ஸம்மோதி³ம்ஸு. ஸம்மோத³னீயம் கத²ம் ஸாரணீயம் வீதிஸாரேத்வா ஏகமந்தம் நிஸீதி³ம்ஸு. ஏகமந்தம் நிஸின்னா கோ² தே ப்³ராஹ்மணமஹாஸாலா ப⁴க³வந்தம் ஏதத³வோசும் – ‘‘ஸந்தி³ஸ்ஸந்தி நு கோ², போ⁴ கோ³தம, ஏதரஹி ப்³ராஹ்மணா போராணானம் ப்³ராஹ்மணானம் ப்³ராஹ்மணத⁴ம்மே’’தி? ‘‘ந கோ², ப்³ராஹ்மணா, ஸந்தி³ஸ்ஸந்தி ஏதரஹி ப்³ராஹ்மணா போராணானம் ப்³ராஹ்மணானம் ப்³ராஹ்மணத⁴ம்மே’’தி. ‘‘ஸாது⁴ நோ ப⁴வம் கோ³தமோ போராணானம் ப்³ராஹ்மணானம் ப்³ராஹ்மணத⁴ம்மம் பா⁴ஸது, ஸசே போ⁴தோ கோ³தமஸ்ஸ அக³ரூ’’தி. ‘‘தேன ஹி, ப்³ராஹ்மணா, ஸுணாத², ஸாது⁴கம் மனஸி கரோத², பா⁴ஸிஸ்ஸாமீ’’தி. ‘‘ஏவம், போ⁴’’தி கோ² தே ப்³ராஹ்மணமஹாஸாலா ப⁴க³வதோ பச்சஸ்ஸோஸும். ப⁴க³வா ஏதத³வோச –

286. ‘‘இஸயோ புப்³ப³கா ஆஸும், ஸஞ்ஞதத்தா தபஸ்ஸினோ;

பஞ்ச காமகு³ணே ஹித்வா, அத்தத³த்த²மசாரிஸும்.

287. ‘‘ந பஸூ ப்³ராஹ்மணானாஸும், ந ஹிரஞ்ஞம் ந தா⁴னியம்;

ஸஜ்ஜா²யத⁴னத⁴ஞ்ஞாஸும், ப்³ரஹ்மம் நிதி⁴மபாலயும்.

288. ‘‘யம் நேஸம் பகதம் ஆஸி, த்³வாரப⁴த்தம் உபட்டி²தம்;

ஸத்³தா⁴பகதமேஸானம், தா³தவே தத³மஞ்ஞிஸும்.

289. ‘‘நானாரத்தேஹி வத்தே²ஹி, ஸயனேஹாவஸதே²ஹி ச;

பீ²தா ஜனபதா³ ரட்டா², தே நமஸ்ஸிம்ஸு ப்³ராஹ்மணே.

290. ‘‘அவஜ்ஜா² ப்³ராஹ்மணா ஆஸும், அஜேய்யா த⁴ம்மரக்கி²தா;

ந நே கோசி நிவாரேஸி, குலத்³வாரேஸு ஸப்³ப³ஸோ.

291. ‘‘அட்ட²சத்தாலீஸம் வஸ்ஸானி, (கோமார) ப்³ரஹ்மசரியம் சரிம்ஸு தே;

விஜ்ஜாசரணபரியேட்டி²ம், அசரும் ப்³ராஹ்மணா புரே.

292. ‘‘ந ப்³ராஹ்மணா அஞ்ஞமக³மும், நபி ப⁴ரியம் கிணிம்ஸு தே;

ஸம்பியேனேவ ஸம்வாஸம், ஸங்க³ந்த்வா ஸமரோசயும்.

293. ‘‘அஞ்ஞத்ர தம்ஹா ஸமயா, உதுவேரமணிம் பதி;

அந்தரா மேது²னம் த⁴ம்மம், நாஸ்ஸு க³ச்ச²ந்தி ப்³ராஹ்மணா.

294. ‘‘ப்³ரஹ்மசரியஞ்ச ஸீலஞ்ச, அஜ்ஜவம் மத்³த³வம் தபம்;

ஸோரச்சம் அவிஹிம்ஸஞ்ச, க²ந்திஞ்சாபி அவண்ணயும்.

295. ‘‘யோ நேஸம் பரமோ ஆஸி, ப்³ரஹ்மா த³ள்ஹபரக்கமோ;

ஸ வாபி மேது²னம் த⁴ம்மம், ஸுபினந்தேபி நாக³மா.

296. ‘‘தஸ்ஸ வத்தமனுஸிக்க²ந்தா, இதே⁴கே விஞ்ஞுஜாதிகா;

ப்³ரஹ்மசரியஞ்ச ஸீலஞ்ச, க²ந்திஞ்சாபி அவண்ணயும்.

297. ‘‘தண்டு³லம் ஸயனம் வத்த²ம், ஸப்பிதேலஞ்ச யாசிய;

த⁴ம்மேன ஸமோதா⁴னேத்வா, ததோ யஞ்ஞமகப்பயும்.

298. ‘‘உபட்டி²தஸ்மிம் யஞ்ஞஸ்மிம், நாஸ்ஸு கா³வோ ஹனிம்ஸு தே;

யதா² மாதா பிதா பா⁴தா, அஞ்ஞே வாபி ச ஞாதகா;

கா³வோ நோ பரமா மித்தா, யாஸு ஜாயந்தி ஓஸதா⁴.

299. ‘‘அன்னதா³ ப³லதா³ சேதா, வண்ணதா³ ஸுக²தா³ ததா² [ஸுக²தா³ ச தா (க.)];

ஏதமத்த²வஸம் ஞத்வா, நாஸ்ஸு கா³வோ ஹனிம்ஸு தே.

300. ‘‘ஸுகு²மாலா மஹாகாயா, வண்ணவந்தோ யஸஸ்ஸினோ;

ப்³ராஹ்மணா ஸேஹி த⁴ம்மேஹி, கிச்சாகிச்சேஸு உஸ்ஸுகா;

யாவ லோகே அவத்திம்ஸு, ஸுக²மேதி⁴த்த²யம் பஜா.

301. ‘‘தேஸம் ஆஸி விபல்லாஸோ, தி³ஸ்வான அணுதோ அணும்;

ராஜினோ ச வியாகாரம், நாரியோ ஸமலங்கதா.

302. ‘‘ரதே² சாஜஞ்ஞஸம்யுத்தே, ஸுகதே சித்தஸிப்³ப³னே;

நிவேஸனே நிவேஸே ச, விப⁴த்தே பா⁴க³ஸோ மிதே.

303. ‘‘கோ³மண்ட³லபரிப்³யூள்ஹம், நாரீவரக³ணாயுதம்;

உளாரம் மானுஸம் போ⁴க³ம், அபி⁴ஜ்ஜா²யிம்ஸு ப்³ராஹ்மணா.

304. ‘‘தே தத்த² மந்தே க³ந்தே²த்வா, ஓக்காகம் தது³பாக³மும்;

பஹூதத⁴னத⁴ஞ்ஞோஸி, யஜஸ்ஸு ப³ஹு தே வித்தம்;

யஜஸ்ஸு ப³ஹு தே த⁴னம்.

305. ‘‘ததோ ச ராஜா ஸஞ்ஞத்தோ, ப்³ராஹ்மணேஹி ரதே²ஸபோ⁴;

அஸ்ஸமேத⁴ம் புரிஸமேத⁴ம், ஸம்மாபாஸம் வாஜபேய்யம் நிரக்³க³ளம்;

ஏதே யாகே³ யஜித்வான, ப்³ராஹ்மணானமதா³ த⁴னம்.

306. ‘‘கா³வோ ஸயனஞ்ச வத்த²ஞ்ச, நாரியோ ஸமலங்கதா;

ரதே² சாஜஞ்ஞஸம்யுத்தே, ஸுகதே சித்தஸிப்³ப³னே.

307. ‘‘நிவேஸனானி ரம்மானி, ஸுவிப⁴த்தானி பா⁴க³ஸோ;

நானாத⁴ஞ்ஞஸ்ஸ பூரேத்வா, ப்³ராஹ்மணானமதா³ த⁴னம்.

308. ‘‘தே ச தத்த² த⁴னம் லத்³தா⁴, ஸன்னிதி⁴ம் ஸமரோசயும்;

தேஸம் இச்சா²வதிண்ணானம், பி⁴ய்யோ தண்ஹா பவட்³ட⁴த²;

தே தத்த² மந்தே க³ந்தே²த்வா, ஓக்காகம் புனமுபாக³மும்.

309. ‘‘யதா² ஆபோ ச பத²வீ ச, ஹிரஞ்ஞம் த⁴னதா⁴னியம்;

ஏவம் கா³வோ மனுஸ்ஸானம், பரிக்கா²ரோ ஸோ ஹி பாணினம்;

யஜஸ்ஸு ப³ஹு தே வித்தம், யஜஸ்ஸு ப³ஹு தே த⁴னம்.

310. ‘‘ததோ ச ராஜா ஸஞ்ஞத்தோ, ப்³ராஹ்மணேஹி ரதே²ஸபோ⁴;

நேகா ஸதஸஹஸ்ஸியோ, கா³வோ யஞ்ஞே அகா⁴தயி.

311. ‘‘ந பாதா³ ந விஸாணேன, நாஸ்ஸு ஹிம்ஸந்தி கேனசி;

கா³வோ ஏளகஸமானா, ஸோரதா கும்ப⁴தூ³ஹனா;

தா விஸாணே க³ஹேத்வான, ராஜா ஸத்தே²ன கா⁴தயி.

312. ‘‘ததோ தே³வா பிதரோ ச [ததோ ச தே³வா பிதரோ (ஸீ. ஸ்யா.)], இந்தோ³ அஸுரரக்க²ஸா;

அத⁴ம்மோ இதி பக்கந்து³ம், யம் ஸத்த²ம் நிபதீ க³வே.

313. ‘‘தயோ ரோகா³ புரே ஆஸும், இச்சா² அனஸனம் ஜரா;

பஸூனஞ்ச ஸமாரம்பா⁴, அட்டா²னவுதிமாக³மும்.

314. ‘‘ஏஸோ அத⁴ம்மோ த³ண்டா³னம், ஓக்கந்தோ புராணோ அஹு;

அதூ³ஸிகாயோ ஹஞ்ஞந்தி, த⁴ம்மா த⁴ம்ஸந்தி [த⁴ம்ஸேந்தி (ஸீ. பீ.)] யாஜகா.

315. ‘‘ஏவமேஸோ அணுத⁴ம்மோ, போராணோ விஞ்ஞுக³ரஹிதோ;

யத்த² ஏதி³ஸகம் பஸ்ஸதி, யாஜகம் க³ரஹதீ [க³ரஹீ (க.)] ஜனோ.

316. ‘‘ஏவம் த⁴ம்மே வியாபன்னே, விபி⁴ன்னா ஸுத்³த³வேஸ்ஸிகா;

புதூ² விபி⁴ன்னா க²த்தியா, பதிம் ப⁴ரியாவமஞ்ஞத².

317. ‘‘க²த்தியா ப்³ரஹ்மப³ந்தூ⁴ ச, யே சஞ்ஞே கோ³த்தரக்கி²தா;

ஜாதிவாத³ம் நிரம்கத்வா [நிராகத்வா (?) யதா² அனிராகதஜ்ஜா²னோதி], காமானம் வஸமன்வகு³’’ந்தி.

ஏவம் வுத்தே, தே ப்³ராஹ்மணமஹாஸாலா ப⁴க³வந்தம் ஏதத³வோசும் – ‘‘அபி⁴க்கந்தம், போ⁴ கோ³தம…பே. … உபாஸகே நோ ப⁴வம் கோ³தமோ தா⁴ரேது அஜ்ஜதக்³கே³ பாணுபேதே ஸரணம் க³தே’’தி.

ப்³ராஹ்மணத⁴ம்மிகஸுத்தம் ஸத்தமம் நிட்டி²தம்.