5. ஸூசிலோமஸுத்தம்

ஏவம் மே ஸுதம் – ஏகம் ஸமயம் ப⁴க³வா க³யாயம் விஹரதி டங்கிதமஞ்சே ஸூசிலோமஸ்ஸ யக்க²ஸ்ஸ ப⁴வனே. தேன கோ² பன ஸமயேன க²ரோ ச யக்கோ² ஸூசிலோமோ ச யக்கோ² ப⁴க³வதோ அவிதூ³ரே அதிக்கமந்தி. அத² கோ² க²ரோ யக்கோ² ஸூசிலோமம் யக்க²ம் ஏதத³வோச – ‘‘ஏஸோ ஸமணோ’’தி. ‘‘நேஸோ ஸமணோ, ஸமணகோ ஏஸோ. யாவாஹம் ஜானாமி [யாவ ஜானாமி (ஸீ. பீ.)] யதி³ வா ஸோ ஸமணோ [யதி³ வா ஸமணோ (ஸ்யா.)], யதி³ வா ஸோ ஸமணகோ’’தி [யதி³ வா ஸமணகோதி (ஸீ. ஸ்யா. பீ.)].

அத² கோ² ஸூசிலோமோ யக்கோ² யேன ப⁴க³வா தேனுபஸங்கமி; உபஸங்கமித்வா ப⁴க³வதோ காயம் உபனாமேஸி. அத² கோ² ப⁴க³வா காயம் அபனாமேஸி. அத² கோ² ஸூசிலோமோ யக்கோ² ப⁴க³வந்தம் ஏதத³வோச – ‘‘பா⁴யஸி மம், ஸமணா’’தி? ‘‘ந க்²வாஹம் தம், ஆவுஸோ, பா⁴யாமி; அபி ச தே ஸப்ப²ஸ்ஸோ பாபகோ’’தி.

‘‘பஞ்ஹம் தம், ஸமண, புச்சி²ஸ்ஸாமி. ஸசே மே ந ப்³யாகரிஸ்ஸஸி, சித்தம் வா தே கி²பிஸ்ஸாமி, ஹத³யம் வா தே பா²லேஸ்ஸாமி, பாதே³ஸு வா க³ஹேத்வா பாரக³ங்கா³ய கி²பிஸ்ஸாமீ’’தி.

‘‘ந க்²வாஹம் தம், ஆவுஸோ, பஸ்ஸாமி ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய யோ மே சித்தம் வா கி²பேய்ய ஹத³யம் வா பா²லேய்ய பாதே³ஸு வா க³ஹேத்வா பாரக³ங்கா³ய கி²பேய்ய. அபி ச த்வம், ஆவுஸோ, புச்ச² யதா³கங்க²ஸீ’’தி. அத² கோ² ஸூசிலோமோ யக்கோ² ப⁴க³வந்தம் கா³தா²ய அஜ்ஜ²பா⁴ஸி –

273. ‘‘ராகோ³ ச தோ³ஸோ ச குதோனிதா³னா, அரதீ ரதீ லோமஹம்ஸோ குதோஜா;

குதோ ஸமுட்டா²ய மனோவிதக்கா, குமாரகா த⁴ங்கமிவோஸ்ஸஜந்தி’’.

274. ‘‘ராகோ³ ச தோ³ஸோ ச இதோனிதா³னா, அரதீ ரதீ லோமஹம்ஸோ இதோஜா;

இதோ ஸமுட்டா²ய மனோவிதக்கா, குமாரகா த⁴ங்கமிவோஸ்ஸஜந்தி.

274. ‘‘ஸ்னேஹஜா அத்தஸம்பூ⁴தா, நிக்³ரோத⁴ஸ்ஸேவ க²ந்த⁴ஜா;

புதூ² விஸத்தா காமேஸு, மாலுவாவ விததாவனே.

275. ‘‘யே நம் பஜானந்தி யதோனிதா³னம், தே நம் வினோதே³ந்தி ஸுணோஹி யக்க²;

தே து³த்தரம் ஓக⁴மிமம் தரந்தி, அதிண்ணபுப்³ப³ம் அபுனப்³ப⁴வாயா’’தி.

ஸூசிலோமஸுத்தம் பஞ்சமம் நிட்டி²தம்.