3. க²க்³க³விஸாணஸுத்தம்

35. ஸப்³பே³ஸு பூ⁴தேஸு நிதா⁴ய த³ண்ட³ம், அவிஹேட²யம் அஞ்ஞதரம்பி தேஸம்;

ந புத்தமிச்சே²ய்ய குதோ ஸஹாயம், ஏகோ சரே க²க்³க³விஸாணகப்போ.

36. ஸம்ஸக்³க³ஜாதஸ்ஸ ப⁴வந்தி ஸ்னேஹா, ஸ்னேஹன்வயம் து³க்க²மித³ம் பஹோதி;

ஆதீ³னவம் ஸ்னேஹஜம் பேக்க²மானோ, ஏகோ சரே க²க்³க³விஸாணகப்போ.

37. மித்தே ஸுஹஜ்ஜே அனுகம்பமானோ, ஹாபேதி அத்த²ம் படிப³த்³த⁴சித்தோ;

ஏதம் ப⁴யம் ஸந்த²வே [ஸந்த⁴வே (க.)] பேக்க²மானோ, ஏகோ சரே க²க்³க³விஸாணகப்போ.

38. வம்ஸோ விஸாலோவ யதா² விஸத்தோ, புத்தேஸு தா³ரேஸு ச யா அபேக்கா²;

வம்ஸக்களீரோவ [வம்ஸகளீரோவ (ஸீ.), வம்ஸாகளீரோவ (ஸ்யா. கம். பீ.), வம்ஸேகளீரோவ (நித்³தே³ஸ)] அஸஜ்ஜமானோ, ஏகோ சரே க²க்³க³விஸாணகப்போ.

39. மிகோ³ அரஞ்ஞம்ஹி யதா² அப³த்³தோ⁴ [அப³ந்தோ⁴ (ஸ்யா. கம்.)], யேனிச்ச²கம் க³ச்ச²தி கோ³சராய;

விஞ்ஞூ நரோ ஸேரிதம் பேக்க²மானோ, ஏகோ சரே க²க்³க³விஸாணகப்போ.

40. ஆமந்தனா ஹோதி ஸஹாயமஜ்ஜே², வாஸே டா²னே க³மனே சாரிகாய;

அனபி⁴ஜ்ஜி²தம் ஸேரிதம் பேக்க²மானோ, ஏகோ சரே க²க்³க³விஸாணகப்போ.

41. கி²ட்³டா³ ரதீ ஹோதி ஸஹாயமஜ்ஜே², புத்தேஸு ச விபுலம் ஹோதி பேமம்;

பியவிப்பயோக³ம் விஜிகு³ச்ச²மானோ, ஏகோ சரே க²க்³க³விஸாணகப்போ.

42. சாதுத்³தி³ஸோ அப்படிகோ⁴ ச ஹோதி, ஸந்துஸ்ஸமானோ இதரீதரேன;

பரிஸ்ஸயானம் ஸஹிதா அச²ம்பீ⁴, ஏகோ சரே க²க்³க³விஸாணகப்போ.

43. து³ஸ்ஸங்க³ஹா பப்³ப³ஜிதாபி ஏகே, அதோ² க³ஹட்டா² க⁴ரமாவஸந்தா;

அப்போஸ்ஸுக்கோ பரபுத்தேஸு ஹுத்வா, ஏகோ சரே க²க்³க³விஸாணகப்போ.

44. ஓரோபயித்வா கி³ஹிப்³யஞ்ஜனானி [கி³ஹிவ்யஞ்ஜனானி (ஸ்யா. கம். பீ.)], ஸஞ்சி²ன்னபத்தோ [ஸம்ஸீனபத்தோ (ஸீ.)] யதா² கோவிளாரோ;

சே²த்வான வீரோ கி³ஹிப³ந்த⁴னானி, ஏகோ சரே க²க்³க³விஸாணகப்போ.

45. ஸசே லபே⁴த² நிபகம் ஸஹாயம், ஸத்³தி⁴ம் சரம் ஸாது⁴விஹாரிதீ⁴ரம்;

அபி⁴பு⁴ய்ய ஸப்³பா³னி பரிஸ்ஸயானி, சரேய்ய தேனத்தமனோ ஸதீமா.

46. நோ சே லபே⁴த² நிபகம் ஸஹாயம், ஸத்³தி⁴ம் சரம் ஸாது⁴விஹாரிதீ⁴ரம்;

ராஜாவ ரட்ட²ம் விஜிதம் பஹாய, ஏகோ சரே மாதங்க³ரஞ்ஞேவ நாகோ³.

47. அத்³தா⁴ பஸம்ஸாம ஸஹாயஸம்பத³ம், ஸேட்டா² ஸமா ஸேவிதப்³பா³ ஸஹாயா;

ஏதே அலத்³தா⁴ அனவஜ்ஜபோ⁴ஜீ, ஏகோ சரே க²க்³க³விஸாணகப்போ.

48. தி³ஸ்வா ஸுவண்ணஸ்ஸ பப⁴ஸ்ஸரானி, கம்மாரபுத்தேன ஸுனிட்டி²தானி;

ஸங்க⁴ட்டமானானி து³வே பு⁴ஜஸ்மிம், ஏகோ சரே க²க்³க³விஸாணகப்போ.

49. ஏவம் து³தியேன [து³தியேன (ஸப்³ப³த்த²)] ஸஹா மமஸ்ஸ, வாசாபி⁴லாபோ அபி⁴ஸஜ்ஜனா வா;

ஏதம் ப⁴யம் ஆயதிம் பேக்க²மானோ, ஏகோ சரே க²க்³க³விஸாணகப்போ.

50. காமா ஹி சித்ரா மது⁴ரா மனோரமா, விரூபரூபேன மதே²ந்தி சித்தம்;

ஆதீ³னவம் காமகு³ணேஸு தி³ஸ்வா, ஏகோ சரே க²க்³க³விஸாணகப்போ.

51. ஈதீ ச க³ண்டோ³ ச உபத்³த³வோ ச, ரோகோ³ ச ஸல்லஞ்ச ப⁴யஞ்ச மேதம்;

ஏதம் ப⁴யம் காமகு³ணேஸு தி³ஸ்வா, ஏகோ சரே க²க்³க³விஸாணகப்போ.

52. ஸீதஞ்ச உண்ஹஞ்ச கு²த³ம் பிபாஸம், வாதாதபே ட³ம்ஸஸரீஸபே [ட³ம்ஸஸிரிம்ஸபே (ஸீ. ஸ்யா. கம். பீ.)] ச;

ஸப்³பா³னிபேதானி அபி⁴ஸம்ப⁴வித்வா, ஏகோ சரே க²க்³க³விஸாணகப்போ.

53. நாகோ³வ யூதா²னி விவஜ்ஜயித்வா, ஸஞ்ஜாதக²ந்தோ⁴ பது³மீ உளாரோ;

யதா²பி⁴ரந்தம் விஹரம் [விஹரே (ஸீ. பீ. நித்³தே³ஸ)] அரஞ்ஞே, ஏகோ சரே க²க்³க³விஸாணகப்போ.

54. அட்டா²னதம் ஸங்க³ணிகாரதஸ்ஸ, யம் ப²ஸ்ஸயே [பு²ஸ்ஸயே (ஸ்யா.)] ஸாமயிகம் விமுத்திம்;

ஆதி³ச்சப³ந்து⁴ஸ்ஸ வசோ நிஸம்ம, ஏகோ சரே க²க்³க³விஸாணகப்போ.

55. தி³ட்டீ²விஸூகானி உபாதிவத்தோ, பத்தோ நியாமம் படிலத்³த⁴மக்³கோ³;

உப்பன்னஞாணோம்ஹி அனஞ்ஞனேய்யோ, ஏகோ சரே க²க்³க³விஸாணகப்போ.

56. நில்லோலுபோ நிக்குஹோ நிப்பிபாஸோ, நிம்மக்கோ² நித்³த⁴ந்தகஸாவமோஹோ;

நிராஸயோ [நிராஸாஸோ (க.)] ஸப்³ப³லோகே ப⁴வித்வா, ஏகோ சரே க²க்³க³விஸாணகப்போ.

57. பாபம் ஸஹாயம் பரிவஜ்ஜயேத², அனத்த²த³ஸ்ஸிம் விஸமே நிவிட்ட²ம்;

ஸயம் ந ஸேவே பஸுதம் பமத்தம், ஏகோ சரே க²க்³க³விஸாணகப்போ.

58. ப³ஹுஸ்ஸுதம் த⁴ம்மத⁴ரம் ப⁴ஜேத², மித்தம் உளாரம் படிபா⁴னவந்தம்;

அஞ்ஞாய அத்தா²னி வினேய்ய கங்க²ம், ஏகோ சரே க²க்³க³விஸாணகப்போ.

59. கி²ட்³ட³ம் ரதிம் காமஸுக²ஞ்ச லோகே, அனலங்கரித்வா அனபேக்க²மானோ;

விபூ⁴ஸனட்டா²னா விரதோ ஸச்சவாதீ³, ஏகோ சரே க²க்³க³விஸாணகப்போ.

60. புத்தஞ்ச தா³ரம் பிதரஞ்ச மாதரம், த⁴னானி த⁴ஞ்ஞானி ச ப³ந்த⁴வானி [ப³ந்த⁴வானி ச (பீ.)];

ஹித்வான காமானி யதோ²தி⁴கானி, ஏகோ சரே க²க்³க³விஸாணகப்போ.

61. ஸங்கோ³ ஏஸோ பரித்தமேத்த² ஸோக்²யம், அப்பஸ்ஸாதோ³ து³க்க²மேத்த² பி⁴ய்யோ;

க³ளோ ஏஸோ இதி ஞத்வா முதீமா [மதீமா (ஸ்யா. க.)], ஏகோ சரே க²க்³க³விஸாணகப்போ.

62. ஸந்தா³லயித்வான [பதா³லயித்வான (க.)] ஸம்யோஜனானி, ஜாலம்வ பே⁴த்வா ஸலிலம்பு³சாரீ;

அக்³கீ³வ த³ட்³ட⁴ம் அனிவத்தமானோ, ஏகோ சரே க²க்³க³விஸாணகப்போ.

63. ஓக்கி²த்தசக்கூ² ந ச பாத³லோலோ, கு³த்திந்த்³ரியோ ரக்கி²தமானஸானோ;

அனவஸ்ஸுதோ அபரிட³ய்ஹமானோ, ஏகோ சரே க²க்³க³விஸாணகப்போ.

64. ஓஹாரயித்வா கி³ஹிப்³யஞ்ஜனானி, ஸஞ்ச²ன்னபத்தோ [ஸஞ்சி²ன்னபத்தோ (ஸ்யா. பீ.), பச்சி²ன்னபத்தோ (க.)] யதா² பாரிச²த்தோ;

காஸாயவத்தோ² அபி⁴னிக்க²மித்வா, ஏகோ சரே க²க்³க³விஸாணகப்போ.

65. ரஸேஸு கே³த⁴ம் அகரம் அலோலோ, அனஞ்ஞபோஸீ ஸபதா³னசாரீ;

குலே குலே அப்படிப³த்³த⁴சித்தோ [அப்படிப³ந்த⁴சித்தோ (க.)], ஏகோ சரே க²க்³க³விஸாணகப்போ.

66. பஹாய பஞ்சாவரணானி சேதஸோ, உபக்கிலேஸே ப்³யபனுஜ்ஜ ஸப்³பே³;

அனிஸ்ஸிதோ சே²த்வ [சே²த்வா (ஸ்யா. பீ. க.)] ஸினேஹதோ³ஸம் [ஸ்னேஹதோ³ஸம் (க.)], ஏகோ சரே க²க்³க³விஸாணகப்போ.

67. விபிட்டி²கத்வான ஸுக²ம் து³க²ஞ்ச, புப்³பே³வ ச ஸோமனஸ்ஸதோ³மனஸ்ஸம்;

லத்³தா⁴னுபேக்க²ம் ஸமத²ம் விஸுத்³த⁴ம், ஏகோ சரே க²க்³க³விஸாணகப்போ.

68. ஆரத்³த⁴வீரியோ பரமத்த²பத்தியா, அலீனசித்தோ அகுஸீதவுத்தி;

த³ள்ஹனிக்கமோ தா²மப³லூபபன்னோ, ஏகோ சரே க²க்³க³விஸாணகப்போ.

69. படிஸல்லானம் ஜா²னமரிஞ்சமானோ, த⁴ம்மேஸு நிச்சம் அனுத⁴ம்மசாரீ;

ஆதீ³னவம் ஸம்மஸிதா ப⁴வேஸு, ஏகோ சரே க²க்³க³விஸாணகப்போ.

70. தண்ஹக்க²யம் பத்த²யமப்பமத்தோ, அனேளமூகோ³ [அனேலமூகோ³ (ஸ்யா. பீ. க.)] ஸுதவா ஸதீமா;

ஸங்கா²தத⁴ம்மோ நியதோ பதா⁴னவா, ஏகோ சரே க²க்³க³விஸாணகப்போ.

71. ஸீஹோவ ஸத்³தே³ஸு அஸந்தஸந்தோ, வாதோவ ஜாலம்ஹி அஸஜ்ஜமானோ;

பது³மம்வ தோயேன அலிப்பமானோ [அலிம்பமானோ (ஸீ. ஸ்யா. க.)], ஏகோ சரே க²க்³க³விஸாணகப்போ.

72. ஸீஹோ யதா² தா³ட²ப³லீ பஸய்ஹ, ராஜா மிகா³னம் அபி⁴பு⁴ய்ய சாரீ;

ஸேவேத² பந்தானி ஸேனாஸனானி, ஏகோ சரே க²க்³க³விஸாணகப்போ.

73. மேத்தம் உபேக்க²ம் கருணம் விமுத்திம், ஆஸேவமானோ முதி³தஞ்ச காலே;

ஸப்³பே³ன லோகேன அவிருஜ்ஜ²மானோ, ஏகோ சரே க²க்³க³விஸாணகப்போ.

74. ராக³ஞ்ச தோ³ஸஞ்ச பஹாய மோஹம், ஸந்தா³லயித்வான ஸம்யோஜனானி;

அஸந்தஸம் ஜீவிதஸங்க²யம்ஹி, ஏகோ சரே க²க்³க³விஸாணகப்போ.

75. ப⁴ஜந்தி ஸேவந்தி ச காரணத்தா², நிக்காரணா து³ல்லபா⁴ அஜ்ஜ மித்தா;

அத்தட்ட²பஞ்ஞா அஸுசீ மனுஸ்ஸா, ஏகோ சரே க²க்³க³விஸாணகப்போ.

க²க்³க³விஸாணஸுத்தம் ததியம் நிட்டி²தம்.