7. மிக³லுத்³த³கபேதவத்து²

478. ‘‘நரனாரிபுரக்க²தோ யுவா, ரஜனீயேஹி காமகு³ணேஹி [காமேஹி (க.)] ஸோப⁴ஸி;

தி³வஸம் அனுபோ⁴ஸி காரணம், கிமகாஸி புரிமாய ஜாதியா’’தி.

479. ‘‘அஹம் ராஜக³ஹே ரம்மே, ரமணீயே கி³ரிப்³ப³ஜே;

மிக³லுத்³தோ³ புரே ஆஸிம், லோஹிதபாணி தா³ருணோ.

480. ‘‘அவிரோத⁴கரேஸு பாணிஸு, புது²ஸத்தேஸு பது³ட்ட²மானஸோ;

விசரிம் அதிதா³ருணோ ஸதா³ [ததா³ (ஸீ.)], பரஹிம்ஸாய ரதோ அஸஞ்ஞதோ.

481. ‘‘தஸ்ஸ மே ஸஹாயோ ஸுஹத³யோ [ஸுஹதோ³ (ஸீ.)], ஸத்³தோ⁴ ஆஸி உபாஸகோ;

ஸோபி [ஸோ ஹி (ஸ்யா.)] மம் அனுகம்பந்தோ, நிவாரேஸி புனப்புனம்.

482. ‘‘‘மாகாஸி பாபகம் கம்மம், மா தாத து³க்³க³திம் அகா³;

ஸசே இச்ச²ஸி பேச்ச ஸுக²ம், விரம பாணவதா⁴ அஸம்யமா’.

483. ‘‘தஸ்ஸாஹம் வசனம் ஸுத்வா, ஸுக²காமஸ்ஸ ஹிதானுகம்பினோ;

நாகாஸிம் ஸகலானுஸாஸனிம், சிரபாபாபி⁴ரதோ அபு³த்³தி⁴மா.

484. ‘‘ஸோ மம் புன பூ⁴ரிஸுமேத⁴ஸோ, அனுகம்பாய ஸம்யமே நிவேஸயி;

‘ஸசே தி³வா ஹனஸி பாணினோ, அத² தே ரத்திம் ப⁴வது ஸம்யமோ’.

485. ‘‘ஸ்வாஹம் தி³வா ஹனித்வா பாணினோ, விரதோ ரத்திமஹோஸி ஸஞ்ஞதோ;

ரத்தாஹம் பரிசாரேமி, தி³வா க²ஜ்ஜாமி து³க்³க³தோ.

486. ‘‘தஸ்ஸ கம்மஸ்ஸ குஸலஸ்ஸ, அனுபோ⁴மி ரத்திம் அமானுஸிம்;

தி³வா படிஹதாவ [படிஹதா ச (க.)] குக்குரா, உபதா⁴வந்தி ஸமந்தா கா²தி³தும்.

487. ‘‘யே ச தே ஸததானுயோகி³னோ, து⁴வம் பயுத்தா ஸுக³தஸ்ஸ ஸாஸனே;

மஞ்ஞாமி தே அமதமேவ கேவலம், அதி⁴க³ச்ச²ந்தி பத³ம் அஸங்க²த’’ந்தி.

மிக³லுத்³த³கபேதவத்து² ஸத்தமம்.