7. ஸத்தபுத்தகா²த³பேதிவத்து²

35. ‘‘நக்³கா³ து³ப்³ப³ண்ணரூபாஸி, து³க்³க³ந்தா⁴ பூதி வாயஸி;

மக்கி²காஹி பரிகிண்ணா, கா நு த்வம் இத⁴ திட்ட²ஸீ’’தி.

36. ‘‘அஹம் ப⁴த³ந்தே பேதீம்ஹி, து³க்³க³தா யமலோகிகா;

பாபகம்மம் கரித்வான, பேதலோகம் இதோ க³தா.

37. ‘‘காலேன ஸத்த புத்தானி, ஸாயம் ஸத்த புனாபரே;

விஜாயித்வான கா²தா³மி, தேபி நா ஹோந்தி மே அலம்.

38. ‘‘பரிட³ய்ஹதி தூ⁴மாயதி, கு²தா³ய ஹத³யம் மம;

நிப்³பு³திம் நாதி⁴க³ச்சா²மி, அக்³கி³த³ட்³டா⁴வ ஆதபே’’தி.

39. ‘‘கிம் நு காயேன வாசாய, மனஸா து³க்கடம் கதம்;

கிஸ்ஸ கம்மவிபாகேன, புத்தமம்ஸானி கா²த³ஸீ’’தி.

40. ‘‘அஹூ மய்ஹம் து³வே புத்தா, உபோ⁴ ஸம்பத்தயோப்³ப³னா;

ஸாஹம் புத்தப³லூபேதா, ஸாமிகம் அதிமஞ்ஞிஸம்.

41. ‘‘ததோ மே ஸாமிகோ குத்³தோ⁴, ஸபத்திம் மய்ஹமானயி;

ஸா ச க³ப்³ப⁴ம் அலபி⁴த்த², தஸ்ஸா பாபம் அசேதயிம்.

42. ‘‘ஸாஹம் பது³ட்ட²மனஸா, அகரிம் க³ப்³ப⁴பாதனம்;

தஸ்ஸா தேமாஸிகோ க³ப்³போ⁴, புப்³ப³லோஹிதகோ [புப்³ப³லோஹிதகோ (க.)] பதி.

43. ‘‘தத³ஸ்ஸா மாதா குபிதா, மய்ஹம் ஞாதீ ஸமானயி;

ஸபத²ஞ்ச மம் காரேஸி, பரிபா⁴ஸாபயீ ச மம்.

44. ‘‘ஸாஹம் கோ⁴ரஞ்ச ஸபத²ம், முஸாவாத³ம் அபா⁴ஸிஸம்;

‘புத்தமம்ஸானி கா²தா³மி, ஸசே தம் பகதம் மயா’.

45. ‘‘தஸ்ஸ கம்மஸ்ஸ விபாகேன, முஸாவாத³ஸ்ஸ சூப⁴யம்;

புத்தமம்ஸானி கா²தா³மி, புப்³ப³லோஹிதமக்கி²தா’’தி.

ஸத்தபுத்தகா²த³பேதிவத்து² ஸத்தமம்.