5. திரோகுட்டபேதவத்து²

14. [கு². பா. 7.1 கு²த்³த³கபாடே²] ‘‘திரோகுட்டேஸு [திரோகுட்³டே³ஸு (ஸீ. ஸ்யா. பீ.)] திட்ட²ந்தி, ஸந்தி⁴ஸிங்கா⁴டகேஸு ச;

த்³வாரபா³ஹாஸு திட்ட²ந்தி, ஆக³ந்த்வான ஸகம் க⁴ரம்.

15. ‘‘பஹூதே அன்னபானம்ஹி, க²ஜ்ஜபோ⁴ஜ்ஜே உபட்டி²தே;

ந தேஸம் கோசி ஸரதி, ஸத்தானம் கம்மபச்சயா.

16. ‘‘ஏவம் த³த³ந்தி ஞாதீனம், யே ஹோந்தி அனுகம்பகா;

ஸுசிம் பணீதம் காலேன, கப்பியம் பானபோ⁴ஜனம்;

‘இத³ம் வோ ஞாதீனம் ஹோது, ஸுகி²தா ஹோந்து ஞாதயோ’.

17. ‘‘தே ச தத்த² ஸமாக³ந்த்வா, ஞாதிபேதா ஸமாக³தா;

பஹூதே அன்னபானம்ஹி, ஸக்கச்சம் அனுமோத³ரே.

18. ‘‘‘சிரம் ஜீவந்து நோ ஞாதீ, யேஸம் ஹேது லபா⁴மஸே;

அம்ஹாகஞ்ச கதா பூஜா, தா³யகா ச அனிப்ப²லா’.

19. ‘‘‘ந ஹி தத்த² கஸி அத்தி², கோ³ரக்கே²த்த² ந விஜ்ஜதி;

வணிஜ்ஜா தாதி³ஸீ நத்தி², ஹிரஞ்ஞேன கயாகயம் [கயோக்கயம் (ஸீ. க.) கயோகயம் (கு². பா. 7.6)];

இதோ தி³ன்னேன யாபேந்தி, பேதா காலக³தா [காலகதா (ஸீ. ஸ்யா. பீ.)] தஹிம்’.

20. ‘‘‘உன்னமே உத³கம் வுட்ட²ம், யதா² நின்னம் பவத்ததி;

ஏவமேவ இதோ தி³ன்னம், பேதானம் உபகப்பதி’.

21. ‘‘‘யதா² வாரிவஹா பூரா, பரிபூரேந்தி ஸாக³ரம்;

ஏவமேவ இதோ தி³ன்னம், பேதானம் உபகப்பதி’.

22. ‘‘‘அதா³ஸி மே அகாஸி மே, ஞாதி மித்தா [ஞாதி மித்தோ (?)] ஸகா² ச மே;

பேதானம் த³க்கி²ணம் த³ஜ்ஜா, புப்³பே³ கதமனுஸ்ஸரம்’.

23. ‘‘‘ந ஹி ருண்ணம் வா ஸோகோ வா, யா சஞ்ஞா பரிதே³வனா;

ந தம் பேதானமத்தா²ய, ஏவம் திட்ட²ந்தி ஞாதயோ’.

24. ‘‘‘அயஞ்ச கோ² த³க்கி²ணா தி³ன்னா, ஸங்க⁴ம்ஹி ஸுப்பதிட்டி²தா;

தீ³க⁴ரத்தம் ஹிதாயஸ்ஸ, டா²னஸோ உபகப்பதி’.

25. ‘‘ஸோ ஞாதித⁴ம்மோ ச அயம் நித³ஸ்ஸிதோ, பேதான பூஜா ச கதா உளாரா;

ப³லஞ்ச பி⁴க்கூ²னமனுப்பதி³ன்னம், தும்ஹேஹி புஞ்ஞம் பஸுதம் அனப்பக’’ந்தி.

திரோகுட்டபேதவத்து² பஞ்சமம்.