11. நாக³பேதவத்து²

73. ‘‘புரதோவ [புரதோ ச (ஸ்யா.)] ஸேதேன பலேதி ஹத்தி²னா, மஜ்ஜே² பன அஸ்ஸதரீரதே²ன;

பச்சா² ச கஞ்ஞா ஸிவிகாய நீயதி, ஓபா⁴ஸயந்தீ த³ஸ ஸப்³ப³தோ [ஸப்³ப³தோ (க.)] தி³ஸா.

74. ‘‘தும்ஹே பன முக்³க³ரஹத்த²பாணினோ, ருத³ம்முகா² சி²ன்னபபி⁴ன்னக³த்தா;

மனுஸ்ஸபூ⁴தா கிமகத்த² பாபம், யேனஞ்ஞமஞ்ஞஸ்ஸ பிவாத² லோஹித’’ந்தி.

75. ‘‘புரதோவ யோ க³ச்ச²தி குஞ்ஜரேன, ஸேதேன நாகே³ன சதுக்கமேன;

அம்ஹாக புத்தோ அஹு ஜேட்ட²கோ ஸோ [ஸோவ ஜேட்டோ² (க.)], தா³னானி த³த்வான ஸுகீ² பமோத³தி.

76. ‘‘யோ ஸோ மஜ்ஜே² அஸ்ஸதரீரதே²ன, சதுப்³பி⁴ யுத்தேன ஸுவக்³கி³தேன;

அம்ஹாக புத்தோ அஹு மஜ்ஜி²மோ ஸோ, அமச்ச²ரீ தா³னவதீ விரோசதி.

77. ‘‘யா ஸா ச பச்சா² ஸிவிகாய நீயதி, நாரீ ஸபஞ்ஞா மிக³மந்த³லோசனா;

அம்ஹாக தீ⁴தா அஹு ஸா கனிட்டி²கா, பா⁴க³ட்³ட⁴பா⁴கே³ன ஸுகீ² பமோத³தி.

78. ‘‘ஏதே ச தா³னானி அத³ம்ஸு புப்³பே³, பஸன்னசித்தா ஸமணப்³ராஹ்மணானம்;

மயம் பன மச்ச²ரினோ அஹும்ஹ, பரிபா⁴ஸகா ஸமணப்³ராஹ்மணானம்;

ஏதே ச த³த்வா பரிசாரயந்தி, மயஞ்ச ஸுஸ்ஸாம நளோவ சி²ன்னோ’’தி [கி²த்தோதி (ஸீ.)].

79. ‘‘கிம் தும்ஹாகம் போ⁴ஜனம் கிம் ஸயானம், கத²ஞ்ச யாபேத² ஸுபாபத⁴ம்மினோ;

பஹூதபோ⁴கே³ஸு அனப்பகேஸு, ஸுக²ம் விராதா⁴ய [விராகா³ய (ஸ்யா. க.)] து³க்க²ஜ்ஜ பத்தா’’தி.

80. ‘‘அஞ்ஞமஞ்ஞம் வதி⁴த்வான, பிவாம புப்³ப³லோஹிதம்;

ப³ஹும் பித்வா ந தா⁴தா ஹோம, நச்சா²தி³ம்ஹஸே [நருச்சாதி³ம்ஹஸே (க.)] மயம்.

81. ‘‘இச்சேவ மச்சா பரிதே³வயந்தி, அதா³யகா பேச்ச [மச்ச²ரினோ (க.)] யமஸ்ஸ டா²யினோ;

யே தே விதி³ச்ச [விதி³த்வா (ஸீ.)] அதி⁴க³ம்ம போ⁴கே³, ந பு⁴ஞ்ஜரே நாபி கரோந்தி புஞ்ஞம்.

82. ‘‘தே கு²ப்பிபாஸூபக³தா பரத்த², பச்சா² [பேதா (ஸீ.)] சிரம் ஜா²யரே ட³ய்ஹமானா;

கம்மானி கத்வான து³கு²த்³ரானி, அனுபோ⁴ந்தி து³க்க²ம் கடுகப்ப²லானி.

83. ‘‘இத்தரம் ஹி த⁴னம் த⁴ஞ்ஞம், இத்தரம் இத⁴ ஜீவிதம்;

இத்தரம் இத்தரதோ ஞத்வா, தீ³பம் கயிராத² பண்டி³தோ.

84. ‘‘யே தே ஏவம் பஜானந்தி, நரா த⁴ம்மஸ்ஸ கோவிதா³;

தே தா³னே நப்பமஜ்ஜந்தி, ஸுத்வா அரஹதம் வசோ’’தி.

நாக³பேதவத்து² ஏகாத³ஸமம்.