16. பிங்கி³யமாணவபுச்சா²

145. ‘‘ஜிண்ணோஹமஸ்மி அப³லோ வீதவண்ணோ, [இச்சாயஸ்மா பிங்கி³யோ]

நேத்தா ந ஸுத்³தா⁴ ஸவனம் ந பா²ஸு;

மாஹம் நஸ்ஸம் மோமுஹோ அந்தராவ, ஆசிக்க² த⁴ம்மம் யமஹம் விஜஞ்ஞம்;

ஜாதிஜராய இத⁴ விப்பஹானம்’’.

146. ‘‘தி³ஸ்வான ரூபேஸு விஹஞ்ஞமானே, [பிங்கி³யாதி ப⁴க³வா]

ருப்பந்தி ரூபேஸு ஜனா பமத்தா;

தஸ்மா துவம் பிங்கி³ய அப்பமத்தோ, ஜஹஸ்ஸு ரூபம் அபுனப்³ப⁴வாய’’.

147. ‘‘தி³ஸா சதஸ்ஸோ விதி³ஸா சதஸ்ஸோ, உத்³த⁴ம் அதோ⁴ த³ஸ தி³ஸா இமாயோ;

ந துய்ஹம் அதி³ட்ட²ம் அஸுதம் அமுதம் [அஸுதம் அமுதம் வா (ஸீ.), அஸுதாமுதம் வா (ஸ்யா.), அஸுதம்’முதம் வா (பீ.)], அதோ² அவிஞ்ஞாதம் கிஞ்சனமத்தி² [கஞ்சி மத்தி² (ஸ்யா.), கிஞ்சி நத்தி² (பீ.), கிஞ்சினமத்தி² (க.)] லோகே;

ஆசிக்க² த⁴ம்மம் யமஹம் விஜஞ்ஞம், ஜாதிஜராய இத⁴ விப்பஹானம்’’.

148. ‘‘தண்ஹாதி⁴பன்னே மனுஜே பேக்க²மானோ, [பிங்கி³யாதி ப⁴க³வா]

ஸந்தாபஜாதே ஜரஸா பரேதே;

தஸ்மா துவம் பிங்கி³ய அப்பமத்தோ, ஜஹஸ்ஸு தண்ஹம் அபுனப்³ப⁴வாயா’’தி.

பிங்கி³யமாணவபுச்சா² ஸோளஸமா.