3. புண்ணகமாணவபுச்சா²னித்³தே³ஸோ

12. அனேஜம் மூலத³ஸ்ஸாவிம், [இச்சாயஸ்மா புண்ணகோ]

அத்தி² பஞ்ஹேன ஆக³மம்;

கிம்னிஸ்ஸிதா இஸயோ மனுஜா, க²த்தியா ப்³ராஹ்மணா தே³வதானம்;

யஞ்ஞமகப்பயிம்ஸு புதூ²த⁴ லோகே, புச்சா²மி தம் ப⁴க³வா ப்³ரூஹி மேதம்.

அனேஜம் மூலத³ஸ்ஸாவிந்தி ஏஜா வுச்சதி தண்ஹா. யோ ராகோ³ ஸாராகோ³…பே… அபி⁴ஜ்ஜா² லோபோ⁴ அகுஸலமூலம் ஸா ஏஜா தண்ஹா பு³த்³த⁴ஸ்ஸ ப⁴க³வதோ பஹீனா உச்சி²ன்னமூலா தாலாவத்து²கதா அனபா⁴வம்கதா ஆயதிம் அனுப்பாத³த⁴ம்மா. தஸ்மா பு³த்³தோ⁴ அனேஜோ. ஏஜாய பஹீனத்தா அனேஜோ. ப⁴க³வா லாபே⁴பி ந இஞ்ஜதி, அலாபே⁴பி ந இஞ்ஜதி, யஸேபி ந இஞ்ஜதி, அயஸேபி ந இஞ்ஜதி, பஸம்ஸாயபி ந இஞ்ஜதி, நிந்தா³யபி ந இஞ்ஜதி, ஸுகே²பி ந இஞ்ஜதி, து³க்கே²பி ந இஞ்ஜதி ந சலதி ந வேத⁴தி நப்பவேத⁴தீதி – அனேஜம். மூலத³ஸ்ஸாவிந்தி ப⁴க³வா மூலத³ஸ்ஸாவீ ஹேதுத³ஸ்ஸாவீ நிதா³னத³ஸ்ஸாவீ ஸம்ப⁴வத³ஸ்ஸாவீ பப⁴வத³ஸ்ஸாவீ ஸமுட்டா²னத³ஸ்ஸாவீ ஆஹாரத³ஸ்ஸாவீ ஆரம்மணத³ஸ்ஸாவீ பச்சயத³ஸ்ஸாவீ ஸமுத³யத³ஸ்ஸாவீ.

தீணி அகுஸலமூலானி – லோபோ⁴ அகுஸலமூலம், தோ³ஸோ அகுஸலமூலம், மோஹோ அகுஸலமூலம்.

வுத்தஞ்ஹேதம் ப⁴க³வதா – [பஸ்ஸ அ. நி. 3.112] ‘‘தீணிமானி, பி⁴க்க²வே, நிதா³னானி கம்மானம் ஸமுத³யாய. கதமானி தீணி? லோபோ⁴ நிதா³னம் கம்மானம் ஸமுத³யாய, தோ³ஸோ நிதா³னம் கம்மானம் ஸமுத³யாய, மோஹோ நிதா³னம் கம்மானம் ஸமுத³யாய. ந, பி⁴க்க²வே, லோப⁴ஜேன கம்மேன தோ³ஸஜேன கம்மேன மோஹஜேன கம்மேன தே³வா பஞ்ஞாயந்தி, மனுஸ்ஸா பஞ்ஞாயந்தி, யா வா பனஞ்ஞாபி காசி ஸுக³தியோ. அத² கோ², பி⁴க்க²வே, லோப⁴ஜேன கம்மேன தோ³ஸஜேன கம்மேன மோஹஜேன கம்மேன நிரயோ பஞ்ஞாயதி, திரச்சா²னயோனி பஞ்ஞாயதி, பேத்திவிஸயோ பஞ்ஞாயதி, யா வா பனஞ்ஞாபி காசி து³க்³க³தியோ நிரயே திரச்சா²னயோனியா பேத்திவிஸயே அத்தபா⁴வாபி⁴னிப்³ப³த்தியா’’. இமானி தீணி அகுஸலமூலானீதி ப⁴க³வா ஜானாதி பஸ்ஸதி. ஏவம்பி ப⁴க³வா மூலத³ஸ்ஸாவீ…பே… ஸமுத³யத³ஸ்ஸாவீ. தீணி குஸலமூலானி – அலோபோ⁴ குஸலமூலம், அதோ³ஸோ குஸலமூலம், அமோஹோ குஸலமூலம்.

வுத்தஞ்ஹேதம் ப⁴க³வதா – ‘‘தீணிமானி…பே… ந, பி⁴க்க²வே, அலோப⁴ஜேன கம்மேன அதோ³ஸஜேன கம்மேன அமோஹஜேன கம்மேன நிரயோ பஞ்ஞாயதி, திரச்சா²னயோனி பஞ்ஞாயதி, பேத்திவிஸயோ பஞ்ஞாயதி, யா வா பனஞ்ஞாபி காசி து³க்³க³தியோ. அத² கோ², பி⁴க்க²வே, அலோப⁴ஜேன கம்மேன அதோ³ஸஜேன கம்மேன அமோஹஜேன கம்மேன தே³வா பஞ்ஞாயந்தி, மனுஸ்ஸா பஞ்ஞாயந்தி, யா வா பனஞ்ஞாபி காசி ஸுக³தியோ தே³வே ச மனுஸ்ஸே ச அத்தபா⁴வாபி⁴னிப்³ப³த்தியா’’. இமானி தீணி குஸலமூலானீதி ப⁴க³வா ஜானாதி பஸ்ஸதி. ஏவம்பி ப⁴க³வா மூலத³ஸ்ஸாவீ…பே… ஸமுத³யத³ஸ்ஸாவீ.

வுத்தஞ்ஹேதம் ப⁴க³வதா – ‘‘யே கேசி, பி⁴க்க²வே, த⁴ம்மா அகுஸலா அகுஸலபா⁴கி³யா அகுஸலபக்கி²கா ஸப்³பே³ தே அவிஜ்ஜாமூலகா அவிஜ்ஜாஸமோஸரணா அவிஜ்ஜாஸமுக்³கா⁴தா’’. ஸப்³பே³ தே ஸமுக்³கா⁴தம் க³ச்ச²ந்தீதி ப⁴க³வா ஜானாதி பஸ்ஸதி. ஏவம்பி ப⁴க³வா மூலத³ஸ்ஸாவீ…பே… ஸமுத³யத³ஸ்ஸாவீ.

வுத்தஞ்ஹேதம் ப⁴க³வதா – ‘‘யே கேசி, பி⁴க்க²வே, த⁴ம்மா குஸலா குஸலபா⁴கி³யா குஸலபக்கி²கா, ஸப்³பே³ தே அப்பமாத³மூலகா அப்பமாத³ஸமோஸரணா. அப்பமாதோ³ தேஸம் த⁴ம்மானம் அக்³க³மக்கா²யதீ’’தி ப⁴க³வா ஜானாதி பஸ்ஸதி. ஏவம்பி ப⁴க³வா மூலத³ஸ்ஸாவீ…பே… ஸமுத³யத³ஸ்ஸாவீ.

அத² வா, ப⁴க³வா ஜானாதி பஸ்ஸதி. ‘‘அவிஜ்ஜா மூலம் ஸங்கா²ரானம், ஸங்கா²ரா மூலம் விஞ்ஞாணஸ்ஸ, விஞ்ஞாணம் மூலம் நாமரூபஸ்ஸ, நாமரூபம் மூலம் ஸளாயதனஸ்ஸ, ஸளாயதனம் மூலம் ப²ஸ்ஸஸ்ஸ, ப²ஸ்ஸோ மூலம் வேத³னாய, வேத³னா மூலம் தண்ஹாய, தண்ஹா மூலம் உபாதா³னஸ்ஸ, உபாதா³னம் மூலம் ப⁴வஸ்ஸ, ப⁴வோ மூலம் ஜாதியா, ஜாதி மூலம் ஜராமரணஸ்ஸா’’தி – ப⁴க³வா ஜானாதி பஸ்ஸதி. ஏவம்பி ப⁴க³வா மூலத³ஸ்ஸாவீ…பே… ஸமுத³யத³ஸ்ஸாவீ.

அத² வா, ப⁴க³வா ஜானாதி பஸ்ஸதி. ‘‘சக்கு² மூலம் சக்கு²ரோகா³னம், ஸோதம் மூலம் ஸோதரோகா³னம், கா⁴னம் மூலம் கா⁴னரோகா³னம், ஜிவ்ஹா மூலம் ஜிவ்ஹாரோகா³னம், காயோ மூலம் காயரோகா³னம், மனோ மூலம் சேதஸிகானம் து³க்கா²ன’’ந்தி – ப⁴க³வா ஜானாதி பஸ்ஸதி. ஏவம்பி ப⁴க³வா மூலத³ஸ்ஸாவீ ஹேதுத³ஸ்ஸாவீ நிதா³னத³ஸ்ஸாவீ ஸம்ப⁴வத³ஸ்ஸாவீ பப⁴வத³ஸ்ஸாவீ ஸமுட்டா²னத³ஸ்ஸாவீ ஆஹாரத³ஸ்ஸாவீ ஆரம்மணத³ஸ்ஸாவீ பச்சயத³ஸ்ஸாவீ ஸமுத³யத³ஸ்ஸாவீதி – அனேஜம் மூலத³ஸ்ஸாவீ.

இச்சாயஸ்மா புண்ணகோதி இச்சாதி பத³ஸந்தி⁴…பே… ஆயஸ்மா புண்ணகோ.

அத்தி² பஞ்ஹேன ஆக³மந்தி பஞ்ஹேன அத்தி²கோ ஆக³தோம்ஹி, [பஞ்ஹத்தி²காம்ஹ ஆக³தா (ப³ஹூஸு) பஸ்ஸ மஹானி. 192] பஞ்ஹம் புச்சி²துகாமோ ஆக³தோம்ஹி, பஞ்ஹம் ஸோதுகாமோ ஆக³தோம்ஹீதி – ஏவம்பி அத்தி² பஞ்ஹேன ஆக³மம். அத² வா, பஞ்ஹத்தி²கானம் பஞ்ஹம் புச்சி²துகாமானம் பஞ்ஹம் ஸோதுகாமானம் ஆக³மனம் அபி⁴க்கமனம் உபஸங்கமனம் பயிருபாஸனம் அத்தீ²தி – ஏவம்பி அத்தி² பஞ்ஹேன ஆக³மம். அத² வா, பஞ்ஹாக³மோ துய்ஹம் அத்தி², த்வம்பி பஹு த்வமஸி அலமத்தோ. மயா புச்சி²தம் கதே²தும் விஸஜ்ஜேதும் வஹஸ்ஸேதம் பா⁴ரந்தி [விஸஜ்ஜேதும் ஸந்த³ஸ்ஸேதும் ப⁴ணிதுந்தி (ஸ்யா.) வஹஸ்ஸு + ஏதம்] – ஏவம்பி அத்தி² பஞ்ஹேன ஆக³மம்.

கிம் நிஸ்ஸிதா இஸயோ மனுஜாதி கிம் நிஸ்ஸிதா ஆஸிதா அல்லீனா உபக³தா அஜ்ஜோ²ஸிதா அதி⁴முத்தா. இஸயோதி இஸினாமகா யே கேசி இஸிபப்³ப³ஜ்ஜம் பப்³ப³ஜிதா ஆஜீவகா நிக³ண்டா² ஜடிலா தாபஸா. மனுஜாதி மனுஸ்ஸா வுச்சந்தீதி – கிம் நிஸ்ஸிதா இஸயோ மனுஜா.

க²த்தியா ப்³ராஹ்மணா தே³வதானந்தி. க²த்தியாதி யே கேசி க²த்தியஜாதிகா. ப்³ராஹ்மணாதி யே கேசி போ⁴வாதி³கா. தே³வதானந்தி ஆஜீவகஸாவகானம் ஆஜீவகா தே³வதா, நிக³ண்ட²ஸாவகானம் நிக³ண்டா² தே³வதா, ஜடிலஸாவகானம் ஜடிலா தே³வதா, பரிப்³பா³ஜகஸாவகானம் பரிப்³பா³ஜகா தே³வதா, அவிருத்³த⁴கஸாவகானம் அவிருத்³த⁴கா [அவருத்³த⁴கஸாவகானம் அவருத்³த⁴கா (ஸ்யா.)] தே³வதா, ஹத்தி²வதிகானம் ஹத்தீ² தே³வதா, அஸ்ஸவதிகானம் அஸ்ஸா தே³வதா, கோ³வதிகானம் கா³வோ தே³வதா, குக்குரவதிகானம் குக்குரா தே³வதா, காகவதிகானம் காகா தே³வதா, வாஸுதே³வவதிகானம் வாஸுதே³வோ தே³வதா, ப³லதே³வவதிகானம் ப³லதே³வோ தே³வதா, புண்ணப⁴த்³த³வதிகானம் புண்ணப⁴த்³தோ³ தே³வதா, மணிப⁴த்³த³வதிகானம் மணிப⁴த்³தோ³ தே³வதா, அக்³கி³வதிகானம் அக்³கி³ தே³வதா, நாக³வதிகானம் நாகா³ தே³வதா, ஸுபண்ணவதிகானம் ஸுபண்ணா தே³வதா, யக்க²வதிகானம் யக்கா² தே³வதா, அஸுரவதிகானம் அஸுரா தே³வதா, க³ந்த⁴ப்³ப³வதிகானம் க³ந்த⁴ப்³பா³ தே³வதா, மஹாராஜவதிகானம் மஹாராஜானோ தே³வதா, சந்த³வதிகானம் சந்தோ³ தே³வதா, ஸூரியவதிகானம் ஸூரியோ தே³வதா, இந்த³வதிகானம் இந்தோ³ தே³வதா, ப்³ரஹ்மவதிகானம் ப்³ரஹ்மா தே³வதா, தே³வவதிகானம் தே³வோ தே³வதா, தி³ஸாவதிகானம் தி³ஸா தே³வதா, யே யேஸம் த³க்கி²ணேய்யா தே தேஸம் தே³வதாதி – க²த்தியப்³ராஹ்மணா தே³வதானம்.

யஞ்ஞமகப்பயிம்ஸு புதூ²த⁴ லோகேதி யஞ்ஞம் வுச்சதி தே³ய்யத⁴ம்மோ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம் அன்னம் பானம் வத்த²ம் யானம் மாலாக³ந்த⁴விலேபனம் [மாலாக³ந்த⁴ம் விலேபனம் (ஸ்யா.) இதிவு. 75] ஸேய்யாவஸத²பதீ³பேய்யம். யஞ்ஞமகப்பயிம்ஸூதி யேபி யஞ்ஞம் ஏஸந்தி க³வேஸந்தி பரியேஸந்தி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம் அன்னம் பானம் வத்த²ம் யானம் மாலாக³ந்த⁴விலேபனம் ஸேய்யாவஸத²பதீ³பேய்யம், தேபி யஞ்ஞம் கப்பேந்தி. யேபி யஞ்ஞம் அபி⁴ஸங்க²ரோந்தி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம் அன்னம் பானம்…பே… ஸேய்யாவஸத²பதீ³பேய்யம், தேபி யஞ்ஞம் கப்பேந்தி. யேபி யஞ்ஞம் தே³ந்தி யஜந்தி பரிச்சஜந்தி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம் அன்னம் பானம்…பே… ஸேய்யாவஸத²பதீ³பேய்யம், தேபி யஞ்ஞம் கப்பேந்தி. புதூ²தி யஞ்ஞா வா ஏதே புதூ², யஞ்ஞயாஜகா [யஞ்ஞயஜகா (ஸ்யா.)] வா ஏதே புதூ², த³க்கி²ணேய்யா வா ஏதே புதூ². கத²ம் யஞ்ஞா வா ஏதே புதூ²? ப³ஹுகானம் ஏதே யஞ்ஞா சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரா அன்னம் பானம் வத்த²ம் யானம் மாலம் க³ந்த⁴ம் விலேபனம் ஸேய்யாவஸத²பதீ³பேய்யம் – ஏவம் யஞ்ஞா வா ஏதே புதூ².

கத²ம் யஞ்ஞயாஜகா வா ஏதே புதூ²? ப³ஹுகா ஏதே யஞ்ஞயாஜகா க²த்தியா ச ப்³ராஹ்மணா ச வேஸ்ஸா ச ஸுத்³தா³ ச க³ஹட்டா² ச பப்³ப³ஜிதா ச தே³வா ச மனுஸ்ஸா ச – ஏவம் யஞ்ஞயாஜகா வா ஏதே புதூ².

கத²ம் த³க்கி²ணேய்யா வா ஏதே புதூ²? ப³ஹுகா ஏதே த³க்கி²ணேய்யா புதூ² ஸமணப்³ராஹ்மணா கபணத்³தி⁴கவனிப்³ப³கயாசகா [… வணிப்³ப³கஸாவகா (ஸ்யா.) இதிவு. 75] – ஏவம் த³க்கி²ணேய்யா வா ஏதே புதூ². இத⁴ லோகேதி மனுஸ்ஸலோகேதி யஞ்ஞமகப்பயிம்ஸு – புதூ²த⁴ லோகே.

புச்சா²மி தம் ப⁴க³வா ப்³ரூஹி மேதந்தி. புச்சா²தி திஸ்ஸோ புச்சா² – அதி³ட்ட²ஜோதனா புச்சா², தி³ட்ட²ஸம்ஸந்த³னா புச்சா², விமதிச்சே²த³னா புச்சா². கதமா அதி³ட்ட²ஜோதனா புச்சா²? பகதியா லக்க²ணம் அஞ்ஞாதம் ஹோதி அதி³ட்ட²ம் அதுலிதம் அதீரிதம் அவிபூ⁴தம் அவிபா⁴விதம், தஸ்ஸ ஞாணாய த³ஸ்ஸனாய துலனாய தீரணாய விபூ⁴தத்தா²ய விபா⁴வனத்தா²ய பஞ்ஹம் புச்ச²தி – அயம் அதி³ட்ட²ஜோதனா புச்சா².

கதமா தி³ட்ட²ஸம்ஸந்த³னா புச்சா²? பகதியா லக்க²ணம் ஞாதம் ஹோதி தி³ட்ட²ம் துலிதம் தீரிதம் விபூ⁴தம் விபா⁴விதம். அஞ்ஞேஹி பண்டி³தேஹி ஸத்³தி⁴ம் ஸம்ஸந்த³னத்தா²ய பஞ்ஹம் புச்ச²தி – அயம் தி³ட்ட²ஸம்ஸந்த³னா புச்சா².

கதமா விமதிச்சே²த³னா புச்சா²? பகதியா ஸம்ஸயபக்க²ந்தோ³ [ஸம்ஸயபக்க²ன்னோ (ஸ்யா.)] ஹோதி விமதிபக்க²ந்தோ³ த்³வேள்ஹகஜாதோ – ‘‘ஏவம் நு கோ², ந நு கோ², கிம் நு கோ², கத²ம் நு கோ²’’தி! ஸோ விமதிச்சே²த³னத்தா²ய பஞ்ஹம் புச்ச²தி – அயம் விமதிச்சே²த³னா புச்சா². இமா திஸ்ஸோ புச்சா².

அபராபி திஸ்ஸோ புச்சா² – மனுஸ்ஸபுச்சா², அமனுஸ்ஸபுச்சா², நிம்மிதபுச்சா². கதமா மனுஸ்ஸபுச்சா²? மனுஸ்ஸா பு³த்³த⁴ம் ப⁴க³வந்தம் உபஸங்கமித்வா புச்ச²ந்தி, பி⁴க்கூ² புச்ச²ந்தி, பி⁴க்கு²னியோ புச்ச²ந்தி, உபாஸகா புச்ச²ந்தி, உபாஸிகாயோ புச்ச²ந்தி, ராஜானோ புச்ச²ந்தி, க²த்தியா புச்ச²ந்தி, ப்³ராஹ்மணா புச்ச²ந்தி, வேஸ்ஸா புச்ச²ந்தி, ஸுத்³தா³ புச்ச²ந்தி, க³ஹட்டா² புச்ச²ந்தி, பப்³ப³ஜிதா புச்ச²ந்தி – அயம் மனுஸ்ஸபுச்சா².

கதமா அமனுஸ்ஸபுச்சா²? அமனுஸ்ஸா பு³த்³த⁴ம் ப⁴க³வந்தம் உபஸங்கமித்வா பஞ்ஹம் புச்ச²ந்தி, நாகா³ புச்ச²ந்தி, ஸுபண்ணா புச்ச²ந்தி, யக்கா² புச்ச²ந்தி, அஸுரா புச்ச²ந்தி, க³ந்த⁴ப்³பா³ புச்ச²ந்தி, மஹாராஜானோ புச்ச²ந்தி, இந்தா³ புச்ச²ந்தி, ப்³ரஹ்மானோ புச்ச²ந்தி, தே³வதாயோ புச்ச²ந்தி – அயம் அமனுஸ்ஸபுச்சா².

கதமா நிம்மிதபுச்சா²? யம் ப⁴க³வா ரூபம் அபி⁴னிம்மினாதி மனோமயம் ஸப்³ப³ங்க³பச்சங்க³ம் அஹீனிந்த்³ரியம், ஸோ நிம்மிதோ பு³த்³த⁴ம் ப⁴க³வந்தம் உபஸங்கமித்வா பஞ்ஹம் புச்ச²தி; ப⁴க³வா விஸஜ்ஜேதி [விஸ்ஸஜ்ஜேதி (க.)] – அயம் நிம்மிதபுச்சா². இமா திஸ்ஸோ புச்சா².

அபராபி திஸ்ஸோ புச்சா² – அத்தத்த²புச்சா², பரத்த²புச்சா², உப⁴யத்த²புச்சா². அபராபி திஸ்ஸோ புச்சா² – தி³ட்ட²த⁴ம்மிகத்த²புச்சா², ஸம்பராயிகத்த²புச்சா², பரமத்த²புச்சா². அபராபி திஸ்ஸோ புச்சா² – அனவஜ்ஜத்த²புச்சா², நிக்கிலேஸத்த²புச்சா², வோதா³னத்த²புச்சா². அபராபி திஸ்ஸோ புச்சா² – அதீதபுச்சா², அனாக³தபுச்சா², பச்சுப்பன்னபுச்சா². அபராபி திஸ்ஸோ புச்சா² – அஜ்ஜ²த்தபுச்சா², ப³ஹித்³தா⁴புச்சா², அஜ்ஜ²த்தப³ஹித்³தா⁴புச்சா². அபராபி திஸ்ஸோ புச்சா² – குஸலபுச்சா², அகுஸலபுச்சா², அப்³யாகதபுச்சா². அபராபி திஸ்ஸோ புச்சா² – க²ந்த⁴புச்சா², தா⁴துபுச்சா², ஆயதனபுச்சா². அபராபி திஸ்ஸோ புச்சா² – ஸதிபட்டா²னபுச்சா², ஸம்மப்பதா⁴னபுச்சா², இத்³தி⁴பாத³புச்சா². அபராபி திஸ்ஸோ புச்சா² – இந்த்³ரியபுச்சா², ப³லபுச்சா², போ³ஜ்ஜ²ங்க³புச்சா². அபராபி திஸ்ஸோ புச்சா² – மக்³க³புச்சா², ப²லபுச்சா², நிப்³பா³னபுச்சா².

புச்சா²மி தந்தி புச்சா²மி தம் யாசாமி தம் அஜ்ஜே²ஸாமி தம் பஸாதே³மி தம் ‘‘கத²யஸ்ஸு மே’’தி புச்சா²மி தம். ப⁴க³வாதி கா³ரவாதி⁴வசனமேதம்… ஸச்சி²கா பஞ்ஞத்தி – யதி³த³ம் ப⁴க³வாதி. ப்³ரூஹி மேதந்தி ப்³ரூஹி ஆசிக்கா²ஹி தே³ஸேஹி பஞ்ஞபேஹி பட்ட²பேஹி விவராஹி விப⁴ஜாஹி உத்தானீகரோஹி பகாஸேஹீதி – புச்சா²மி தம் ப⁴க³வா ப்³ரூஹி மேதம். தேனாஹ ஸோ ப்³ராஹ்மணோ –

‘‘அனேஜம் மூலத³ஸ்ஸாவிம், [இச்சாயஸ்மா புண்ணகோ]

அத்தி² பஞ்ஹேன ஆக³மம்;

கிம் நிஸ்ஸிதா இஸயோ மனுஜா, க²த்தியா ப்³ராஹ்மணா தே³வதானம்;

யஞ்ஞமகப்பயிம்ஸு புதூ²த⁴ லோகே, புச்சா²மி தம் ப⁴க³வா ப்³ரூஹி மேத’’ந்தி.

13. யே கேசிமே இஸயோ மனுஜா, [புண்ணகாதி ப⁴க³வா]

க²த்தியா ப்³ராஹ்மணா தே³வதானம்;

யஞ்ஞமகப்பயிம்ஸு புதூ²த⁴ லோகே, ஆஸீஸமானா புண்ணக இத்த²த்தம் [இத்த²தம் (ஸ்யா.), இத்த²பா⁴வம் (க.)] ;

ஜரம் ஸிதா யஞ்ஞமகப்பயிம்ஸு.

யே கேசிமே இஸயோ மனுஜாதி. யே கேசீதி ஸப்³பே³ன ஸப்³ப³ம் ஸப்³ப³தா² ஸப்³ப³ம் அஸேஸம் நிஸ்ஸேஸம் பரியாதி³யனவசனமேதம் – யே கேசீதி. இஸயோதி இஸினாமகா யே கேசி இஸிபப்³ப³ஜ்ஜம் பப்³ப³ஜிதா ஆஜீவகா நிக³ண்டா² ஜடிலா தாபஸா. மனுஜாதி மனுஸ்ஸா வுச்சந்தீதி – யே கேசிமே இஸயோ மனுஜா புண்ணகாதி ப⁴க³வா.

க²த்தியா ப்³ராஹ்மணா தே³வதானந்தி. க²த்தியாதி யே கேசி க²த்தியஜாதிகா. ப்³ராஹ்மணாதி யே கேசி போ⁴வாதி³கா. தே³வதானந்தி ஆஜீவகஸாவகானம் ஆஜீவகா தே³வதா…பே… தி³ஸாவதிகானம் தி³ஸா தே³வதா. யே யேஸம் த³க்கி²ணேய்யா, தே தேஸம் தே³வதாதி – க²த்தியா ப்³ராஹ்மணா தே³வதானம்.

யஞ்ஞமகப்பயிம்ஸு புதூ²த⁴ லோகேதி. யஞ்ஞம் வுச்சதி தே³ய்யத⁴ம்மோ சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம் அன்னம் பானம்…பே… ஸேய்யாவஸத²பதீ³பேய்யம். யஞ்ஞமகப்பயிம்ஸூதி யேபி யஞ்ஞம் ஏஸந்தி க³வேஸந்தி பரியேஸந்தி…பே… ஸேய்யாவஸத²பதீ³பேய்யம், தேபி யஞ்ஞம் கப்பேந்தி. புதூ²தி யஞ்ஞா வா ஏதே புதூ², யஞ்ஞயாஜகா வா ஏதே புதூ², த³க்கி²ணேய்யா வா ஏதே புதூ²…பே… ஏவம் த³க்கி²ணேய்யா வா ஏதே புதூ². இத⁴ லோகேதி மனுஸ்ஸலோகேதி யஞ்ஞமகப்பயிம்ஸு – புதூ²த⁴ லோகே.

ஆஸீஸமானா புண்ணக இத்த²த்தந்தி. ஆஸீஸமானாதி ரூபபடிலாப⁴ம் ஆஸீஸமானா, ஸத்³த³படிலாப⁴ம் ஆஸீஸமானா, க³ந்த⁴படிலாப⁴ம் ஆஸீஸமானா, ரஸபடிலாப⁴ம் ஆஸீஸமானா, போ²ட்ட²ப்³ப³படிலாப⁴ம் ஆஸீஸமானா, புத்தபடிலாப⁴ம் ஆஸீஸமானா, தா³ரபடிலாப⁴ம் ஆஸீஸமானா, த⁴னபடிலாப⁴ம் ஆஸீஸமானா, யஸபடிலாப⁴ம் ஆஸீஸமானா, இஸ்ஸரியபடிலாப⁴ம் ஆஸீஸமானா, க²த்தியமஹாஸாலகுலே அத்தபா⁴வபடிலாப⁴ம் ஆஸீஸமானா, ப்³ராஹ்மணமஹாஸாலகுலே அத்தபா⁴வபடிலாப⁴ம் ஆஸீஸமானா, க³ஹபதிமஹாஸாலகுலே அத்தபா⁴வபடிலாப⁴ம் ஆஸீஸமானா, சாதுமஹாராஜிகேஸு [சாதும்மஹாராஜிகேஸு (ஸ்யா.)] தே³வேஸு அத்தபா⁴வபடிலாப⁴ம் ஆஸீஸமானா, தாவதிம்ஸேஸு தே³வேஸு யாமேஸு தே³வேஸு துஸிதேஸு தே³வேஸு நிம்மானரதீஸு தே³வேஸு பரனிம்மிதவஸவத்தீஸு தே³வேஸு ப்³ரஹ்மகாயிகேஸு தே³வேஸு அத்தபா⁴வபடிலாப⁴ம் ஆஸீஸமானா இச்ச²மானா ஸாதி³யமானா பத்த²யமானா பிஹயமானா அபி⁴ஜப்பமானாதி ஆஸீஸமானா.

புண்ணக இத்த²த்தந்தி ஏத்த² அத்தபா⁴வாபி⁴னிப்³ப³த்திம் ஆஸீஸமானா ஏத்த² க²த்தியமஹாஸாலகுலே அத்தபா⁴வாபி⁴னிப்³ப³த்திம் ஆஸீஸமானா…பே… ஏத்த² ப்³ரஹ்மகாயிகேஸு தே³வேஸு அத்தபா⁴வாபி⁴னிப்³ப³த்திம் ஆஸீஸமானா இச்ச²மானா ஸாதி³யமானா பத்த²யமானா பிஹயமானா அபி⁴ஜப்பமானாதி ஆஸீஸமானா – புண்ணக இத்த²த்தம்.

ஜரம் ஸிதா யஞ்ஞமகப்பயிம்ஸூதி ஜரானிஸ்ஸிதா ப்³யாதி⁴னிஸ்ஸிதா மரணனிஸ்ஸிதா ஸோகபரிதே³வது³க்க²தோ³மனஸ்ஸுபாயாஸனிஸ்ஸிதா. யதே³வ தே ஜாதினிஸ்ஸிதா ததே³வ தே ஜரானிஸ்ஸிதா. யதே³வ தே ஜரானிஸ்ஸிதா ததே³வ தே ப்³யாதி⁴னிஸ்ஸிதா. யதே³வ தே ப்³யாதி⁴னிஸ்ஸிதா ததே³வ தே மரணனிஸ்ஸிதா. யதே³வ தே மரணனிஸ்ஸிதா ததே³வ தே ஸோகபரிதே³வது³க்க²தோ³மனஸ்ஸுபாயாஸனிஸ்ஸிதா. யதே³வ தே ஸோகபரிதே³வது³க்க²தோ³மனஸ்ஸுபாயாஸனிஸ்ஸிதா ததே³வ தே க³தினிஸ்ஸிதா. யதே³வ தே க³தினிஸ்ஸிதா ததே³வ தே உபபத்தினிஸ்ஸிதா. யதே³வ தே உபபத்தினிஸ்ஸிதா ததே³வ தே படிஸந்தி⁴னிஸ்ஸிதா. யதே³வ தே படிஸந்தி⁴னிஸ்ஸிதா ததே³வ தே ப⁴வனிஸ்ஸிதா. யதே³வ தே ப⁴வனிஸ்ஸிதா ததே³வ தே ஸம்ஸாரனிஸ்ஸிதா. யதே³வ தே ஸம்ஸாரனிஸ்ஸிதா ததே³வ தே வட்டனிஸ்ஸிதா அல்லீனா உபக³தா அஜ்ஜோ²ஸிதா அதி⁴முத்தாதி – ஜரம் ஸிதா யஞ்ஞமகப்பயிம்ஸு. தேனாஹ ப⁴க³வா –

‘‘யே கேசிமே இஸயோ மனுஜா, [புண்ணகாதி ப⁴க³வா]

க²த்தியா ப்³ராஹ்மணா தே³வதானம்;

யஞ்ஞமகப்பயிம்ஸு புதூ²த⁴ லோகே, ஆஸீஸமானா புண்ணக இத்த²த்தம்;

ஜரம் ஸிதா யஞ்ஞமகப்பயிம்ஸூ’’தி.

14. யே கேசிமே இஸயோ மனுஜா, [இச்சாயஸ்மா புண்ணகோ]

க²த்தியா ப்³ராஹ்மணா தே³வதானம்;

யஞ்ஞமகப்பயிம்ஸு புதூ²த⁴ லோகே, கச்சிஸு தே ப⁴க³வா யஞ்ஞபதே² அப்பமத்தா;

அதாரும் [அதாரும் (ஸ்யா. க.)] ஜாதிஞ்ச ஜரஞ்ச மாரிஸ, புச்சா²மி தம் ப⁴க³வா ப்³ரூஹி மேதம்.

யே கேசிமே இஸயோ மனுஜாதி. யே கேசீதி…பே….

கச்சிஸு தே ப⁴க³வா யஞ்ஞபதே² அப்பமத்தாதி. கச்சிஸூதி ஸம்ஸயபுச்சா² விமதிபுச்சா² த்³வேள்ஹகபுச்சா² அனேகம்ஸபுச்சா² – ‘‘ஏவம் நு கோ², ந நு கோ², கிம் நு கோ², கத²ம் நு கோ²’’தி – கச்சிஸு. தேதி யஞ்ஞயாஜகா வுச்சந்தி. ப⁴க³வாதி கா³ரவாதி⁴வசனம்…பே… ஸச்சி²கா பஞ்ஞத்தி, யதி³த³ம் ப⁴க³வாதி – கச்சிஸு தே ப⁴க³வா. யஞ்ஞபதே² அப்பமத்தாதி யஞ்ஞோயேவ வுச்சதி யஞ்ஞபதோ². யதா² அரியமக்³கோ³ அரியபதோ² தே³வமக்³கோ³ தே³வபதோ² ப்³ரஹ்மமக்³கோ³ ப்³ரஹ்மபதோ², ஏவமேவ யஞ்ஞோயேவ வுச்சதி யஞ்ஞபதோ². அப்பமத்தாதி யஞ்ஞபதே² அப்பமத்தா ஸக்கச்சகாரினோ ஸாதச்சகாரினோ அட்டி²தகாரினோ அனோலீனவுத்தினோ அனிக்கி²த்தச்ச²ந்தா³ அனிக்கி²த்தது⁴ரா தச்சரிதா தப்³ப³ஹுலா தக்³க³ருகா தன்னின்னா தப்போணா தப்பப்³பா⁴ரா தத³தி⁴முத்தா தத³தி⁴பதேய்யாதி – தேபி யஞ்ஞபதே² அப்பமத்தா. யேபி யஞ்ஞம் ஏஸந்தி க³வேஸந்தி பரியேஸந்தி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம் அன்னம் பானம்…பே… ஸேய்யாவஸத²பதீ³பேய்யம் ஸக்கச்சகாரினோ…பே… தத³தி⁴பதேய்யா, தேபி யஞ்ஞபதே² அப்பமத்தா. யேபி யஞ்ஞம் அபி⁴ஸங்க²ரோந்தி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம் அன்னம் பானம்…பே… ஸேய்யாவஸத²பதீ³பேய்யம் ஸக்கச்சகாரினோ…பே… தத³தி⁴பதேய்யா, தேபி யஞ்ஞபதே² அப்பமத்தா. யேபி யஞ்ஞம் தே³ந்தி யஜந்தி பரிச்சஜந்தி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம் அன்னம் பானம்…பே… ஸேய்யாவஸத²பதீ³பேய்யம் ஸக்கச்சகாரினோ …பே… தத³தி⁴பதேய்யா, தேபி யஞ்ஞபதே² அப்பமத்தாதி – கச்சிஸு தே ப⁴க³வா யஞ்ஞபதே² அப்பமத்தா.

அதாரும் ஜாதிஞ்ச ஜரஞ்ச மாரிஸாதி ஜராமரணம் அதரிம்ஸு உத்தரிம்ஸு பதரிம்ஸு ஸமதிக்கமிம்ஸு வீதிவத்திம்ஸு. மாரிஸாதி பியவசனம் க³ருவசனம் ஸகா³ரவஸப்பதிஸ்ஸாதி⁴வசனமேதம் மாரிஸாதி – அதாரு ஜாதிஞ்ச ஜரஞ்ச மாரிஸ.

புச்சா²மி தம் ப⁴க³வா ப்³ரூஹி மேதந்தி. புச்சா²மி தந்தி புச்சா²மி தம் யாசாமி தம் அஜ்ஜே²ஸாமி தம் பஸாதே³மி தம் கத²யஸ்ஸு மேதி – புச்சா²மி தம். ப⁴க³வாதி கா³ரவாதி⁴வசனம்…பே… ஸச்சி²கா பஞ்ஞத்தி – யதி³த³ம் ப⁴க³வாதி. ப்³ரூஹி மேதந்தி ப்³ரூஹி ஆசிக்கா²ஹி தே³ஸேஹி பஞ்ஞபேஹி பட்ட²பேஹி விவராஹி விப⁴ஜாஹி உத்தானீகரோஹி பகாஸேஹீதி – புச்சா²மி தம் ப⁴க³வா ப்³ரூஹி மேதம். தேனாஹ ஸோ ப்³ராஹ்மணோ –

‘‘யே கேசிமே இஸயோ மனுஜா, [இச்சாயஸ்மா புண்ணகோ]

க²த்தியா ப்³ராஹ்மணா தே³வதானம்;

யஞ்ஞமகப்பயிம்ஸு புதூ²த⁴ லோகே, கச்சிஸு தே ப⁴க³வா யஞ்ஞபதே² அப்பமத்தா;

அதாரு ஜாதிஞ்ச ஜரஞ்ச மாரிஸ, புச்சா²மி தம் ப⁴க³வா ப்³ரூஹி மேத’’ந்தி.

15. ஆஸீஸந்தி [ஆஸிம்ஸந்தி (ஸ்யா.)] தோ²மயந்தி, அபி⁴ஜப்பந்தி ஜுஹந்தி; [புண்ணகாதி ப⁴க³வா]

காமாபி⁴ஜப்பந்தி படிச்ச லாப⁴ம், தே யாஜயோகா³ ப⁴வராக³ரத்தா;

நாதரிம்ஸு ஜாதிஜரந்தி ப்³ரூமி.

ஆஸீஸந்தி தோ²மயந்தி அபி⁴ஜப்பந்தி ஜுஹந்தீதி. ஆஸீஸந்தீதி ரூபபடிலாப⁴ம் ஆஸீஸந்தி, ஸத்³த³படிலாப⁴ம் ஆஸீஸந்தி, க³ந்த⁴படிலாப⁴ம் ஆஸீஸந்தி, ரஸபடிலாப⁴ம் ஆஸீஸந்தி, போ²ட்ட²ப்³ப³படிலாப⁴ம் ஆஸீஸந்தி, புத்தபடிலாப⁴ம் ஆஸீஸந்தி, தா³ரபடிலாப⁴ம் ஆஸீஸந்தி, த⁴னபடிலாப⁴ம் ஆஸீஸந்தி, யஸபடிலாப⁴ம் ஆஸீஸந்தி, இஸ்ஸரியபடிலாப⁴ம் ஆஸீஸந்தி, க²த்தியமஹாஸாலகுலே அத்தபா⁴வபடிலாப⁴ம் ஆஸீஸந்தி, ப்³ராஹ்மணமஹாஸாலகுலே…பே… க³ஹபதிமஹாஸாலகுலே அத்தபா⁴வபடிலாப⁴ம் ஆஸீஸந்தி, சாதுமஹாராஜிகேஸு தே³வேஸு…பே… ப்³ரஹ்மகாயிகேஸு தே³வேஸு அத்தபா⁴வபடிலாப⁴ம் ஆஸீஸந்தி இச்ச²ந்தி ஸாதி³யந்தி பத்த²யந்தி பிஹயந்தீதி – ஆஸீஸந்தி.

தோ²மயந்தீதி யஞ்ஞம் வா தோ²மேந்தி ப²லம் வா தோ²மேந்தி த³க்கி²ணேய்யே வா தோ²மேந்தி. கத²ம் யஞ்ஞம் தோ²மேந்தி? ஸுசிம் தி³ன்னம் [வியம் தி³ன்னம் (ஸ்யா.)], மனாபம் தி³ன்னம், பணீதம் தி³ன்னம், காலேன தி³ன்னம், கப்பியம் தி³ன்னம், விசேய்ய தி³ன்னம், அனவஜ்ஜம் தி³ன்னம், அபி⁴ண்ஹம் தி³ன்னம் த³த³ம் சித்தம் பஸாதி³தந்தி – தோ²மேந்தி கித்தேந்தி வண்ணேந்தி பஸம்ஸந்தி. ஏவம் யஞ்ஞம் தோ²மேந்தி.

கத²ம் ப²லம் தோ²மேந்தி? இதோ நிதா³னம் ரூபபடிலாபோ⁴ ப⁴விஸ்ஸதி…பே… ப்³ரஹ்மகாயிகேஸு தே³வேஸு அத்தபா⁴வபடிலாபோ⁴ ப⁴விஸ்ஸதீதி – தோ²மேந்தி கித்தேந்தி வண்ணேந்தி பஸம்ஸந்தி. ஏவம் ப²லம் தோ²மேந்தி.

கத²ம் த³க்கி²ணேய்யே தோ²மேந்தி? த³க்கி²ணேய்யா ஜாதிஸம்பன்னா கோ³த்தஸம்பன்னா அஜ்ஜா²யகா மந்தத⁴ரா திண்ணம் வேதா³னம் பாரகூ³ ஸனிக⁴ண்டு³கேடுபா⁴னம் ஸாக்க²ரப்பபே⁴தா³னம் இதிஹாஸபஞ்சமானம் பத³கா வேய்யாகரணா லோகாயதமஹாபுரிஸலக்க²ணேஸு அனவயாதி, வீதராகா³ வா ராக³வினயாய வா படிபன்னா, வீததோ³ஸா வா தோ³ஸவினயாய வா படிபன்னா, வீதமோஹா வா மோஹவினயாய வா படிபன்னா, ஸத்³தா⁴ஸம்பன்னா ஸீலஸம்பன்னா ஸமாதி⁴ஸம்பன்னா பஞ்ஞாஸம்பன்னா விமுத்திஸம்பன்னா விமுத்திஞாணத³ஸ்ஸனஸம்பன்னாதி – தோ²மேந்தி கித்தேந்தி வண்ணேந்தி பஸம்ஸந்தி. ஏவம் த³க்கி²ணேய்யே தோ²மேந்தீதி – ஆஸீஸந்தி தோ²மயந்தி.

அபி⁴ஜப்பந்தீதி ரூபபடிலாப⁴ம் அபி⁴ஜப்பந்தி, ஸத்³த³படிலாப⁴ம் அபி⁴ஜப்பந்தி, க³ந்த⁴படிலாப⁴ம் அபி⁴ஜப்பந்தி, ரஸபடிலாப⁴ம் அபி⁴ஜப்பந்தி…பே… ப்³ரஹ்மகாயிகேஸு தே³வேஸு அத்தபா⁴வபடிலாப⁴ம் அபி⁴ஜப்பந்தீதி – ஆஸீஸந்தி தோ²மயந்தி அபி⁴ஜப்பந்தி. ஜுஹந்தீதி ஜுஹந்தி தே³ந்தி யஜந்தி பரிச்சஜந்தி சீவரபிண்ட³பாதஸேனாஸனகி³லானபச்சயபே⁴ஸஜ்ஜபரிக்கா²ரம் அன்னம் பானம் வத்த²ம் யானம் மாலாக³ந்த⁴விலேபனம் ஸேய்யாவஸத²பதீ³பேய்யந்தி – ஆஸீஸந்தி தோ²மயந்தி அபி⁴ஜப்பந்தி ஜுஹந்தி புண்ணகாதி ப⁴க³வா.

காமாபி⁴ஜப்பந்தி படிச்ச லாப⁴ந்தி ரூபபடிலாப⁴ம் படிச்ச காமே அபி⁴ஜப்பந்தி, ஸத்³த³படிலாப⁴ம் படிச்ச காமே அபி⁴ஜப்பந்தி…பே… ப்³ரஹ்மகாயிகேஸு தே³வேஸு அத்தபா⁴வபடிலாப⁴ம் படிச்ச காமே அபி⁴ஜப்பந்தி பஜப்பந்தீதி – காமாபி⁴ஜப்பந்தி படிச்ச லாப⁴ம்.

தே யாஜயோகா³ ப⁴வராக³ரத்தா நாதரிம்ஸு ஜாதிஜரந்தி ப்³ரூமீதி தேதி யஞ்ஞயாஜகா வுச்சந்தி, யாஜயோகா³தி யாஜயோகே³ஸு யுத்தா பயுத்தா ஆயுத்தா ஸமாயுத்தா தச்சரிதா தப்³ப³ஹுலா தக்³க³ருகா தன்னின்னா தப்போணா தப்பப்³பா⁴ரா தத³தி⁴முத்தா தத³தி⁴பதேய்யாதி – தே யாஜயோகா³, ப⁴வராக³ரத்தாதி ப⁴வராகோ³ வுச்சதி யோ ப⁴வேஸு ப⁴வச்ச²ந்தோ³ ப⁴வராகோ³ ப⁴வனந்தீ³ ப⁴வதண்ஹா ப⁴வஸினேஹோ ப⁴வபரிளாஹோ ப⁴வமுச்சா² ப⁴வஜ்ஜோ²ஸானம். ப⁴வராகே³ன ப⁴வேஸு ரத்தா கி³த்³தா⁴ க³தி⁴தா முச்சி²தா அஜ்ஜோ²ஸன்னா லக்³கா³ லக்³கி³தா பலிபு³த்³தா⁴தி – தே யாஜயோகா³ ப⁴வராக³ரத்தா.

நாதரிம்ஸு ஜாதிஜரந்தி ப்³ரூமீதி தே யாஜயோகா³ ப⁴வராக³ரத்தா ஜாதிஜராமரணம் நாதரிம்ஸு ந உத்தரிம்ஸு ந பதரிம்ஸு ந ஸமதிக்கமிம்ஸு ந வீதிவத்திம்ஸு, ஜாதிஜராமரணா அனிக்க²ந்தா அனிஸ்ஸடா அனதிக்கந்தா அஸமதிக்கந்தா அவீதிவத்தா அந்தோஜாதிஜராமரணே பரிவத்தந்தி அந்தோஸம்ஸாரபதே² பரிவத்தந்தி. ஜாதியா அனுக³தா ஜராய அனுஸடா ப்³யாதி⁴னா அபி⁴பூ⁴தா மரணேன அப்³பா⁴ஹதா அதாணா அலேணா அஸரணா அஸரணீபூ⁴தாதி; ப்³ரூமி ஆசிக்கா²மி தே³ஸேமி பஞ்ஞபேமி பட்ட²பேமி விவராமி விப⁴ஜாமி உத்தானீகரோமி பகாஸேமீதி – தே யாஜயோகா³ ப⁴வராக³ரத்தா நாதரிம்ஸு ஜாதிஜரந்தி ப்³ரூமி. தேனாஹ ப⁴க³வா –

‘‘ஆஸீஸந்தி தோ²மயந்தி, அபி⁴ஜப்பந்தி ஜுஹந்தி; [புண்ணகாதி ப⁴க³வா]

காமாபி⁴ஜப்பந்தி படிச்ச லாப⁴ம், தே யாஜயோகா³ ப⁴வராக³ரத்தா;

நாதரிம்ஸு ஜாதிஜரந்தி ப்³ரூமீ’’தி.

16. தே சே நாதரிம்ஸு யாஜயோகா³, [இச்சாயஸ்மா புண்ணகோ]

யஞ்ஞேஹி ஜாதிஞ்ச ஜரஞ்ச மாரிஸ;

அத² கோ சரஹி தே³வமனுஸ்ஸலோகே, அதாரி ஜாதிஞ்ச ஜரஞ்ச மாரிஸ;

புச்சா²மி தம் ப⁴க³வா ப்³ரூஹி மேதம்.

தே சே நாதரிம்ஸு யாஜயோகா³தி தே யஞ்ஞயாஜகா யாஜயோகா³ ப⁴வராக³ரத்தா ஜாதிஜராமரணம் நாதரிம்ஸு ந உத்தரிம்ஸு ந பதரிம்ஸு ந ஸமதிக்கமிம்ஸு ந வீதிவத்திம்ஸு, ஜாதிஜராமரணா அனிக்க²ந்தா அனிஸ்ஸடா அனதிக்கந்தா அஸமதிக்கந்தா அவீதிவத்தா அந்தோஜாதிஜராமரணே பரிவத்தந்தி அந்தோஸம்ஸாரபதே² பரிவத்தந்தி. ஜாதியா அனுக³தா ஜராய அனுஸடா ப்³யாதி⁴னா அபி⁴பூ⁴தா மரணேன அப்³பா⁴ஹதா அதாணா அலேணா அஸரணா அஸரணீபூ⁴தாதி – தே சே நாதரிம்ஸு யாஜயோகா³.

இச்சாயஸ்மா புண்ணகோதி. இச்சாதி பத³ஸந்தி⁴…பே… ஆயஸ்மா புண்ணகோ.

யஞ்ஞேஹி ஜாதிஞ்ச ஜரஞ்ச மாரிஸாதி. யஞ்ஞேஹீதி யஞ்ஞேஹி பஹூதேஹி யஞ்ஞேஹி விவிதே⁴ஹி யஞ்ஞேஹி புதூ²ஹி. மாரிஸாதி பியவசனம் க³ருவசனம் ஸகா³ரவஸப்பதிஸ்ஸாதி⁴வசனமேதம் மாரிஸாதி – யஞ்ஞேஹி ஜாதிஞ்ச ஜரஞ்ச மாரிஸ.

அத² கோ சரஹி தே³வமனுஸ்ஸலோகே, அதாரி ஜாதிஞ்ச ஜரஞ்ச மாரிஸாதி அத² கோ ஏஸோ ஸதே³வகே லோகே ஸமாரகே ஸப்³ரஹ்மகே ஸஸ்ஸமணப்³ராஹ்மணியா பஜாய ஸதே³வமனுஸ்ஸாய ஜாதிஜராமரணம் அதரி உத்தரி பதரி ஸமதிக்கமி வீதிவத்தயி [வீதிவத்தி (க.)]. மாரிஸாதி பியவசனம் க³ருவசனம் ஸகா³ரவஸப்பத்திஸ்ஸாதி⁴வசனமேதம் மாரிஸாதி – அத² கோ சரஹி தே³வமனுஸ்ஸலோகே, அதாரி ஜாதிஞ்ச ஜரஞ்ச மாரிஸ.

புச்சா²மி தம் ப⁴க³வா ப்³ரூஹி மேதந்தி. புச்சா²மி தந்தி புச்சா²மி தம் யாசாமி தம் அஜ்ஜே²ஸாமி தம் பஸாதே³மி தம் கத²யஸ்ஸு மேதந்தி – புச்சா²மி தம். ப⁴க³வாதி கா³ரவாதி⁴வசனம்…பே… ஸச்சி²கா பஞ்ஞத்தி – யதி³த³ம் ப⁴க³வாதி. ப்³ரூஹி மேதந்தி ப்³ரூஹி ஆசிக்கா²ஹி தே³ஸேஹி பஞ்ஞபேஹி பட்ட²பேஹி விவராஹி விப⁴ஜாஹி உத்தானீகரோஹி பகாஸேஹீதி – புச்சா²மி தம் ப⁴க³வா ப்³ரூஹி மேதம். தேனாஹ ஸோ ப்³ராஹ்மணோ –

‘‘தே சே நாதரிம்ஸு யாஜயோகா³, [இச்சாயஸ்மா புண்ணகோ]

யஞ்ஞேஹி ஜாதிஞ்ச ஜரஞ்ச மாரிஸ;

அத² கோ சரஹி தே³வமனுஸ்ஸலோகே, அதாரி ஜாதிஞ்ச ஜரஞ்ச மாரிஸ;

புச்சா²மி தம் ப⁴க³வா ப்³ரூஹி மேத’’ந்தி.

17. ஸங்கா²ய லோகஸ்மி [லோகஸ்மிம் (ஸ்யா. க.)] பரோபரானி, [புண்ணகாதி ப⁴க³வா]

யஸ்ஸிஞ்ஜிதம் நத்தி² குஹிஞ்சி லோகே;

ஸந்தோ விதூ⁴மோ அனீகோ⁴ நிராஸோ, அதாரி ஸோ ஜாதிஜரந்தி ப்³ரூமி.

ஸங்கா²ய லோகஸ்மி பரோபரானீதி ஸங்கா² வுச்சதி ஞாணம் யா பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி². பரோபரானீதி ஓரம் வுச்சதி ஸகத்தபா⁴வோ, பரம் வுச்சதி பரத்தபா⁴வோ ஓரம் வுச்சதி ஸகரூபவேத³னாஸஞ்ஞாஸங்கா²ரவிஞ்ஞாணம், பரம் வுச்சதி பரரூபவேத³னாஸஞ்ஞாஸங்கா²ரவிஞ்ஞாணம்; ஓரம் வுச்சதி ச² அஜ்ஜ²த்திகானி ஆயதனானி, பரம் வுச்சதி ச² பா³ஹிரானி ஆயதனானி. ஓரம் வுச்சதி மனுஸ்ஸலோகோ, பரம் வுச்சதி தே³வலோகோ; ஓரம் வுச்சதி காமதா⁴து, பரம் வுச்சதி ரூபதா⁴து அரூபதா⁴து; ஓரம் வுச்சதி காமதா⁴து ரூபதா⁴து, பரம் வுச்சதி அரூபதா⁴து. ஸங்கா²ய லோகஸ்மி பரோபரானீதி பரோபரானி அனிச்சதோ ஸங்கா²ய து³க்க²தோ ரோக³தோ க³ண்ட³தோ…பே… நிஸ்ஸரணதோ ஸங்கா²ய ஜானித்வா துலயித்வா தீரயித்வா விபா⁴வயித்வா விபூ⁴தம் கத்வாதி – ஸங்கா²ய லோகஸ்மி பரோபரானி. புண்ணகாதி ப⁴க³வாதி. புண்ணகாதி ப⁴க³வா தம் ப்³ராஹ்மணம் நாமேன ஆலபதி. ப⁴க³வாதி கா³ரவாதி⁴வசனமேதம்…பே… யதி³த³ம் ப⁴க³வாதி – புண்ணகாதி ப⁴க³வா.

யஸ்ஸிஞ்ஜிதம் நத்தி² குஹிஞ்சி லோகேதி. யஸ்ஸாதி அரஹதோ கீ²ணாஸவஸ்ஸ. இஞ்ஜிதந்தி தண்ஹிஞ்ஜிதம் தி³ட்டி²ஞ்ஜிதம் மானிஞ்ஜிதம் கிலேஸிஞ்ஜிதம் காமிஞ்ஜிதம். யஸ்ஸிமே இஞ்ஜிதா நத்தி² ந ஸந்தி ந ஸம்விஜ்ஜந்தி நுபலப்³ப⁴ந்தி, பஹீனா ஸமுச்சி²ன்னா வூபஸந்தா படிபஸ்ஸத்³தா⁴ அப⁴ப்³பு³ப்பத்திகா ஞாணக்³கி³னா த³ட்³டா⁴. குஹிஞ்சீதி குஹிஞ்சி கிஸ்மிஞ்சி கத்த²சி அஜ்ஜ²த்தம் வா ப³ஹித்³தா⁴ வா அஜ்ஜ²த்தப³ஹித்³தா⁴ வா. லோகேதி அபாயலோகே…பே… ஆயதனலோகேதி – யஸ்ஸிஞ்ஜிதம் நத்தி² குஹிஞ்சி லோகே.

ஸந்தோ விதூ⁴மோ அனீகோ⁴ நிராஸோ, அதாரி ஸோ ஜாதிஜரந்தி ப்³ரூமீதி. ஸந்தோதி ராக³ஸ்ஸ ஸந்தத்தா ஸந்தோ, தோ³ஸஸ்ஸ…பே… மோஹஸ்ஸ… கோத⁴ஸ்ஸ… உபனாஹஸ்ஸ… மக்க²ஸ்ஸ… ஸப்³பா³குஸலாபி⁴ஸங்கா²ரானம் ஸந்தத்தா ஸமிதத்தா வூபஸமிதத்தா விஜ்ஜா²தத்தா [நிஜ்ஜா²தத்தா (க.) மஹானி. 18] நிப்³பு³தத்தா விக³தத்தா படிபஸ்ஸத்³த⁴த்தா ஸந்தோ உபஸந்தோ வூபஸந்தோ நிப்³பு³தோ படிபஸ்ஸத்³தோ⁴தி ஸந்தோ; விதூ⁴மோதி காயது³ச்சரிதம் விதூ⁴மிதம் வித⁴மிதம் ஸோஸிதம் விஸோஸிதம் ப்³யந்தீகதம் [ப்³யந்திகதம் (க.)], வசீது³ச்சரிதம்…பே… மனோது³ச்சரிதம் விதூ⁴மிதம் வித⁴மிதம் ஸோஸிதம் விஸோஸிதம் ப்³யந்தீகதம், ராகோ³… தோ³ஸோ… மோஹோ விதூ⁴மிதோ வித⁴மிதோ ஸோஸிதோ விஸோஸிதோ ப்³யந்தீகதோ, கோதோ⁴… உபனாஹோ… மக்கோ²… பளாஸோ… இஸ்ஸா… மச்ச²ரியம்… மாயா… ஸாடே²ய்யம்… த²ம்போ⁴… ஸாரம்போ⁴… மானோ… அதிமானோ… மதோ³… பமாதோ³… ஸப்³பே³ கிலேஸா ஸப்³பே³ து³ச்சரிதா ஸப்³பே³ த³ரதா² ஸப்³பே³ பரிளாஹா ஸப்³பே³ ஸந்தாபா ஸப்³பா³குஸலாபி⁴ஸங்கா²ரா விதூ⁴மிதா வித⁴மிதா ஸோஸிதா விஸோஸிதா ப்³யந்தீகதா. அத² வா, கோதோ⁴ வுச்சதி தூ⁴மோ –

மானோ ஹி தே ப்³ராஹ்மண கா²ரிபா⁴ரோ, கோதோ⁴ தூ⁴மோ ப⁴ஸ்மனி [க³ம்மனி (ஸ்யா.)] மோஸவஜ்ஜம்;

ஜிவ்ஹா ஸுஜா ஹத³யம் [தப்பரஸ்ஸ (ஸ்யா.)] ஜோதிட்டா²னம், அத்தா ஸுத³ந்தோ புரிஸஸ்ஸ ஜோதி.

அபி ச, த³ஸஹாகாரேஹி கோதோ⁴ ஜாயதி – அனத்த²ம் மே அசரீதி கோதோ⁴ ஜாயதி, அனத்த²ம் மே சரதீதி கோதோ⁴ ஜாயதி, அனத்த²ம் மே சரிஸ்ஸதீதி கோதோ⁴ ஜாயதி, பியஸ்ஸ மே மனாபஸ்ஸ அனத்த²ம் அசரி, அனத்த²ம் சரதி, அனத்த²ம் சரிஸ்ஸதீதி கோதோ⁴ ஜாயதி, அப்பியஸ்ஸ மே அமனாபஸ்ஸ அத்த²ம் அசரி, அத்த²ம் சரதி, அத்த²ம் சரிஸ்ஸதீதி கோதோ⁴ ஜாயதி, அட்டா²னே வா பன கோதோ⁴ ஜாயதி. யோ ஏவரூபோ சித்தஸ்ஸ ஆகா⁴தோ படிகா⁴தோ படிக⁴ம் படிவிரோதோ⁴ கோபோ பகோபோ ஸம்பகோபோ தோ³ஸோ பதோ³ஸோ ஸம்பதோ³ஸோ சித்தஸ்ஸ ப்³யாபத்தி மனோபதோ³ஸோ கோதோ⁴ குஜ்ஜ²னா குஜ்ஜி²தத்தம் தோ³ஸோ து³ஸ்ஸனா து³ஸ்ஸிதத்தம் ப்³யாபத்தி ப்³யாபஜ்ஜனா ப்³யாபஜ்ஜிதத்தம் விரோதோ⁴ படிவிரோதோ⁴ சண்டி³க்கம் அஸுரோபோ [அஸ்ஸுரோபோ (ஸ்யா.)] அனத்தமனதா சித்தஸ்ஸ – அயம் வுச்சதி கோதோ⁴.

அபி ச, கோத⁴ஸ்ஸ அதி⁴மத்தபரித்ததா வேதி³தப்³பா³. அத்தி² கஞ்சி [கிஞ்சி (க.) மஹானி. 85] காலம் கோதோ⁴ சித்தாவிலகரணமத்தோ ஹோதி, ந ச தாவ முக²குலானவிகுலானோ ஹோதி. அத்தி² கஞ்சி காலம் கோதோ⁴ முக²குலானவிகுலானமத்தோ ஹோதி, ந ச தாவ ஹனுஸஞ்சோபனோ ஹோதி. அத்தி² கஞ்சி காலம் கோதோ⁴ ஹனுஸஞ்சோபனமத்தோ ஹோதி, ந ச தாவ ப²ருஸவாசம் நிச்சா²ரணோ [ப²ருஸவாசனிச்சா²ரணோ (ஸ்யா.)] ஹோதி. அத்தி² கஞ்சி காலம் கோதோ⁴ ப²ருஸவாசம் நிச்சா²ரணமத்தோ ஹோதி, ந ச தாவ தி³ஸாவிதி³ஸானுவிலோகனோ ஹோதி. அத்தி² கஞ்சி காலம் கோதோ⁴ தி³ஸாவிதி³ஸானுவிலோகனமத்தோ ஹோதி, ந ச தாவ த³ண்ட³ஸத்த²பராமஸனோ ஹோதி. அத்தி² கஞ்சி காலம் கோதோ⁴ த³ண்ட³ஸத்த²பராமஸனமத்தோ ஹோதி, ந ச தாவ த³ண்ட³ஸத்த²அப்³பு⁴க்கிரணோ ஹோதி. அத்தி² கஞ்சி காலம் கோதோ⁴ த³ண்ட³ஸத்த²அப்³பு⁴க்கிரணமத்தோ ஹோதி, ந ச தாவ த³ண்ட³ஸத்த²அபி⁴னிபாதனோ ஹோதி. அத்தி² கஞ்சி காலம் கோதோ⁴ த³ண்ட³ஸத்த²அபி⁴னிபாதனமத்தோ ஹோதி, ந ச தாவ சி²ன்னவிச்சி²ன்னகரணோ ஹோதி. அத்தி² கஞ்சி காலம் கோதோ⁴ சி²ன்னவிச்சி²ன்னகரணமத்தோ ஹோதி, ந ச தாவ ஸம்ப⁴ஞ்ஜனபலிப⁴ஞ்ஜனோ ஹோதி. அத்தி² கஞ்சி காலம் கோதோ⁴ ஸம்ப⁴ஞ்ஜனபலிப⁴ஞ்ஜனமத்தோ ஹோதி, ந ச தாவ அங்க³மங்க³அபகட்³ட⁴னோ ஹோதி. அத்தி² கஞ்சி காலம் கோதோ⁴ அங்க³மங்க³அபகட்³ட⁴னமத்தோ ஹோதி, ந ச தாவ ஜீவிதாவோரோபனோ [ஜீவிதபனாஸனோ (ஸ்யா.) மஹானி. 85] ஹோதி. அத்தி² கஞ்சி காலம் கோதோ⁴ ஜீவிதாவோரோபனமத்தோ ஹோதி, ந ச தாவ ஸப்³ப³சாக³பரிச்சாகா³ய ஸண்டி²தோ ஹோதி. யதோ கோதோ⁴ பரம் புக்³க³லம் கா⁴தேத்வா அத்தானம் கா⁴தேதி, ஏத்தாவதா கோதோ⁴ பரமுஸ்ஸத³க³தோ பரமவேபுல்லபத்தோ ஹோதி. யஸ்ஸ ஸோ ஹோதி கோதோ⁴ பஹீனோ ஸமுச்சி²ன்னோ வூபஸந்தோ படிபஸ்ஸத்³தோ⁴ அப⁴ப்³பு³ப்பத்திகோ ஞாணக்³கி³னா த³ட்³டோ⁴, ஸோ வுச்சதி – விதூ⁴மோ.

கோத⁴ஸ்ஸ பஹீனத்தா விதூ⁴மோ, கோத⁴வத்து²ஸ்ஸ பரிஞ்ஞாதத்தா விதூ⁴மோ, கோத⁴ஹேதுஸ்ஸ பரிஞ்ஞாதத்தா விதூ⁴மோ, கோத⁴ஹேதுஸ்ஸ உபச்சி²ன்னத்தா விதூ⁴மோ. அனீகோ⁴தி ராகோ³ நீகோ⁴, தோ³ஸோ நீகோ⁴, மோஹோ நீகோ⁴, கோதோ⁴ நீகோ⁴, உபனாஹோ நீகோ⁴…பே… ஸப்³பா³குஸலாபி⁴ஸங்கா²ரா நீகா⁴. யஸ்ஸேதே நீகா⁴ பஹீனா ஸமுச்சி²ன்னா வூபஸந்தா படிபஸ்ஸத்³தா⁴ அப⁴ப்³பு³ப்பத்திகா ஞாணக்³கி³னா த³ட்³டா⁴, ஸோ வுச்சதி அனீகோ⁴.

நிராஸோதி ஆஸா வுச்சதி தண்ஹா. யோ ராகோ³ ஸாராகோ³…பே… அபி⁴ஜ்ஜா² லோபோ⁴ அகுஸலமூலம். யஸ்ஸேஸா ஆஸா தண்ஹா பஹீனா ஸமுச்சி²ன்னா வூபஸந்தா படிபஸ்ஸத்³தா⁴ அப⁴ப்³பு³ப்பத்திகா ஞாணக்³கி³னா த³ட்³டா⁴, ஸோ வுச்சதி நிராஸோ. ஜாதீதி யா தேஸம் தேஸம் ஸத்தானம் தம்ஹி தம்ஹி ஸத்தனிகாயே ஜாதி ஸஞ்ஜாதி ஓக்கந்தி அபி⁴னிப்³ப³த்தி க²ந்தா⁴னம் பாதுபா⁴வோ ஆயதனானம் படிலாபோ⁴. ஜராதி யா தேஸம் தேஸம் ஸத்தானம் தம்ஹி தம்ஹி ஸத்தனிகாயே ஜரா ஜீரணதா க²ண்டி³ச்சம் பாலிச்சம் வலித்தசதா ஆயுனோ ஸம்ஹானி இந்த்³ரியானம் பரிபாகோ. ஸந்தோ விதூ⁴மோ அனீகோ⁴ நிராஸோ, அதாரி ஸோ ஜாதிஜரந்தி ப்³ரூமீதி யோ ஸந்தோ ச விதூ⁴மோ ச அனீகோ⁴ ச நிராஸோ ச, ஸோ ஜாதிஜராமரணம் அதரி உத்தரி பதரி ஸமதிக்கமி வீதிவத்தயீதி ப்³ரூமி ஆசிக்கா²மி தே³ஸேமி பஞ்ஞபேமி பட்ட²பேமி விவராமி விப⁴ஜாமி உத்தானீகரோமி பகாஸேமீதி – ஸந்தோ விதூ⁴மோ அனீகோ⁴ நிராஸோ, அதாரி ஸோ ஜாதிஜரந்தி ப்³ரூமி. தேனாஹ ப⁴க³வா –

‘‘ஸங்கா²ய லோகஸ்மி பரோபரானி, [புண்ணகாதி ப⁴க³வா]

யஸ்ஸிஞ்ஜிதம் நத்தி² குஹிஞ்சி லோகே;

ஸந்தோ விதூ⁴மோ அனீகோ⁴ நிராஸோ, அதாரி ஸோ ஜாதிஜரந்தி ப்³ரூமீ’’தி.

ஸஹகா³தா²பரியோஸானா…பே… பஞ்ஜலிகோ ப⁴க³வந்தம் நமஸ்ஸமானோ நிஸின்னோ ஹோதி – ‘‘ஸத்தா² மே ப⁴ந்தே ப⁴க³வா, ஸாவகோஹமஸ்மீ’’தி.

புண்ணகமாணவபுச்சா²னித்³தே³ஸோ ததியோ.