6. ஜராஸுத்தனித்³தே³ஸோ

அத² ஜராஸுத்தனித்³தே³ஸம் வக்க²தி –

39. அப்பம் வத ஜீவிதம் இத³ம், ஓரம் வஸ்ஸஸதாபி மிய்யதி [மீயதி (ஸீ.)] ;

யோ சேபி அதிச்ச ஜீவதி, அத² கோ² ஸோ ஜரஸாபி மிய்யதி.

அப்பம் வத ஜீவிதம் இத³ந்தி. ஜீவிதந்தி ஆயு டி²தி யபனா யாபனா இரியனா வத்தனா பாலனா ஜீவிதம் ஜீவிதிந்த்³ரியம். அபி ச, த்³வீஹி காரணேஹி அப்பகம் ஜீவிதம் தோ²கம் ஜீவிதம் – டி²திபரித்ததாய வா அப்பகம் ஜீவிதம், ஸரஸபரித்ததாய வா அப்பகம் ஜீவிதம். கத²ம் டி²திபரித்ததாய வா அப்பகம் ஜீவிதம்? அதீதே சித்தக்க²ணே ஜீவித்த², ந ஜீவதி ந ஜீவிஸ்ஸதி; அனாக³தே சித்தக்க²ணே ஜீவிஸ்ஸதி, ந ஜீவதி ந ஜீவித்த²; பச்சுப்பன்னே சித்தக்க²ணே ஜீவதி, ந ஜீவித்த² ந ஜீவிஸ்ஸதி.

‘‘ஜீவிதம் அத்தபா⁴வோ ச, ஸுக²து³க்கா² ச கேவலா;

ஏகசித்தஸமாயுத்தா, லஹுஸோ வத்ததே க²ணோ.

‘‘சுல்லாஸீதிஸஹஸ்ஸானி, கப்பா திட்ட²ந்தி யே மரூ;

ந த்வேவ தேபி ஜீவந்தி, த்³வீஹி சித்தேஹி ஸம்யுதா [ஸமோஹிதா (ஸீ. ஸ்யா. க.)].

‘‘யே நிருத்³தா⁴ மரந்தஸ்ஸ, திட்ட²மானஸ்ஸ வா இத⁴;

ஸப்³பே³பி ஸதி³ஸா க²ந்தா⁴, க³தா அப்படிஸந்தி⁴கா.

‘‘அனந்தரா ச யே ப⁴க்³கா³, யே ச ப⁴க்³கா³ அனாக³தா;

தத³ந்தரே நிருத்³தா⁴னம், வேஸமம் நத்தி² லக்க²ணே.

‘‘அனிப்³ப³த்தேன ந ஜாதோ, பச்சுப்பன்னேன ஜீவதி;

சித்தப⁴க்³கா³ மதோ லோகோ, பஞ்ஞத்தி பரமத்தி²யா.

‘‘யதா² நின்னா பவத்தந்தி, ச²ந்தே³ன பரிணாமிதா;

அச்சி²ன்னதா⁴ரா வத்தந்தி, ஸளாயதனபச்சயா.

‘‘அனிதா⁴னக³தா ப⁴க்³கா³, புஞ்ஜோ நத்தி² அனாக³தே;

நிப்³ப³த்தா யே ச திட்ட²ந்தி, ஆரக்³கே³ ஸாஸபூபமா.

‘‘நிப்³ப³த்தானஞ்ச த⁴ம்மானம், ப⁴ங்கோ³ நேஸம் புரக்க²தோ;

பலோகத⁴ம்மா திட்ட²ந்தி, புராணேஹி அமிஸ்ஸிதா.

‘‘அத³ஸ்ஸனதோ ஆயந்தி, ப⁴ங்கா³ க³ச்ச²ந்தி த³ஸ்ஸனம்;

விஜ்ஜுப்பாதோ³வ ஆகாஸே, உப்பஜ்ஜந்தி வயந்தி சா’’தி.

ஏவம் டி²திபரித்ததாய அப்பகம் ஜீவிதம்.

கத²ம் ஸரஸபரித்ததாய அப்பகம் ஜீவிதம்? அஸ்ஸாஸூபனிப³த்³த⁴ம் [அஸ்ஸாஸூபனிப³ந்த⁴ம் (க.)] ஜீவிதம், பஸ்ஸாஸூபனிப³த்³த⁴ம் ஜீவிதம், அஸ்ஸாஸபஸ்ஸாஸூபனிப³த்³த⁴ம் ஜீவிதம், மஹாபூ⁴தூபனிப³த்³த⁴ம் ஜீவிதம், கப³ளீகாராஹாரூபனிப³த்³த⁴ம் ஜீவிதம், உஸ்மூபனிப³த்³த⁴ம் ஜீவிதம், விஞ்ஞாணூபனிப³த்³த⁴ம் ஜீவிதம். மூலம்பி இமேஸம் து³ப்³ப³லம், புப்³ப³ஹேதூபி இமேஸம் து³ப்³ப³லா, யே பச்சயா தேபி து³ப்³ப³லா, யேபி பபா⁴விகா தேபி து³ப்³ப³லா, ஸஹபூ⁴பி இமேஸம் து³ப்³ப³லா, ஸம்பயோகா³பி இமேஸம் து³ப்³ப³லா, ஸஹஜாபி இமேஸம் து³ப்³ப³லா, யாபி பயோஜிகா ஸாபி து³ப்³ப³லா. அஞ்ஞமஞ்ஞம் இமே நிச்சது³ப்³ப³லா, அஞ்ஞமஞ்ஞம் அனவட்டி²தா இமே. அஞ்ஞமஞ்ஞம் பரிபாதயந்தி இமே, அஞ்ஞமஞ்ஞஸ்ஸ ஹி நத்தி² தாயிதா, ந சாபி ட²பேந்தி அஞ்ஞமஞ்ஞம் இமே. யோபி நிப்³ப³த்தகோ ஸோ ந விஜ்ஜதி.

‘‘ந ச கேனசி கோசி ஹாயதி, க³ந்த⁴ப்³பா³ ச இமே ஹி ஸப்³ப³ஸோ;

புரிமேஹி பபா⁴விகா இமே, யேபி பபா⁴விகா தே புரே மதா;

புரிமாபி ச பச்சி²மாபி ச, அஞ்ஞமஞ்ஞம் ந கதா³சி மத்³த³ஸம்ஸூ’’தி.

ஏவம் ஸரஸபரித்ததாய அப்பகம் ஜீவிதம்.

அபி ச, சாதுமஹாராஜிகானம் [சாதும்மஹாராஜிகானம் (ஸீ. ஸ்யா.)] தே³வானம் ஜீவிதம் உபாதா³ய மனுஸ்ஸானம் அப்பகம் ஜீவிதம் பரித்தம் ஜீவிதம் தோ²கம் ஜீவிதம் க²ணிகம் ஜீவிதம் லஹுகம் ஜீவிதம் இத்தரம் ஜீவிதம் அனத்³த⁴னீயம் ஜீவிதம் நசிரட்டி²திகம் ஜீவிதம். தாவதிம்ஸானம் தே³வானம்…பே… யாமானம் தே³வானம்… துஸிதானம் தே³வானம்… நிம்மானரதீனம் தே³வானம்… பரனிம்மிதவஸவத்தீனம் தே³வானம்… ப்³ரஹ்மகாயிகானம் தே³வானம் ஜீவிதம் உபாதா³ய மனுஸ்ஸானம் அப்பகம் ஜீவிதம் பரித்தம் ஜீவிதம் தோ²கம் ஜீவிதம் க²ணிகம் ஜீவிதம் லஹுகம் ஜீவிதம் இத்தரம் ஜீவிதம் அனத்³த⁴னீயம் ஜீவிதம் நசிரட்டி²திகம் ஜீவிதம். வுத்தஞ்ஹேதம் ப⁴க³வதா – ‘‘அப்பமித³ம், பி⁴க்க²வே, மனுஸ்ஸானம் ஆயு, க³மனியோ ஸம்பராயோ, மந்தாய போ³த்³த⁴ப்³ப³ம், கத்தப்³ப³ம் குஸலம், சரிதப்³ப³ம் ப்³ரஹ்மசரியம், நத்தி² ஜாதஸ்ஸ அமரணம். யோ, பி⁴க்க²வே, சிரம் ஜீவதி, ஸோ வஸ்ஸஸதம் அப்பம் வா பி⁴ய்யோ.

‘‘அப்பமாயு மனுஸ்ஸானம், ஹீளேய்ய நம் ஸுபோரிஸோ;

சரேய்யாதி³த்தஸீஸோவ நத்தி² மச்சுஸ்ஸனாக³மோ.

‘‘அச்சயந்தி அஹோரத்தா, ஜீவிதம் உபருஜ்ஜ²தி;

ஆயு கி²ய்யதி மச்சானம், குன்னதீ³னம்வ ஓத³க’’ந்தி.

அப்பம் வத ஜீவிதம் இத³ம்.

ஓரம் வஸ்ஸஸதாபி மிய்யதீதி. கலலகாலேபி சவதி மரதி அந்தரதா⁴யதி விப்பலுஜ்ஜதி, அப்³பு³த³காலேபி சவதி மரதி அந்தரதா⁴யதி விப்பலுஜ்ஜதி, பேஸிகாலேபி சவதி மரதி அந்தரதா⁴யதி விப்பலுஜ்ஜதி, க⁴னகாலேபி சவதி மரதி அந்தரதா⁴யதி விப்பலுஜ்ஜதி, பஸாக²காலேபி சவதி மரதி அந்தரதா⁴யதி விப்பலுஜ்ஜதி, ஜாதமத்தோபி சவதி மரதி அந்தரதா⁴யதி விப்பலுஜ்ஜதி, ஸூதிக⁴ரேபி [பஸூதிக⁴ரே (ஸ்யா.), ஸூதிகக⁴ரே (க.)] சவதி மரதி அந்தரதா⁴யதி விப்பலுஜ்ஜதி, அத்³த⁴மாஸிகோபி சவதி மரதி அந்தரதா⁴யதி விப்பலுஜ்ஜதி, மாஸிகோபி சவதி மரதி அந்தரதா⁴யதி விப்பலுஜ்ஜதி, த்³வேமாஸிகோபி…பே… தேமாஸிகோபி… சதுமாஸிகோபி… பஞ்சமாஸிகோபி சவதி மரதி அந்தரதா⁴யதி விப்பலுஜ்ஜதி, ச²மாஸிகோபி… ஸத்தமாஸிகோபி… அட்ட²மாஸிகோபி… நவமாஸிகோபி… த³ஸமாஸிகோபி… ஸம்வச்ச²ரிகோபி சவதி மரதி அந்தரதா⁴யதி விப்பலுஜ்ஜதி, த்³வேவஸ்ஸிகோபி… திவஸ்ஸிகோபி… சதுவஸ்ஸிகோபி… பஞ்சவஸ்ஸிகோபி … ச²வஸ்ஸிகோபி… ஸத்தவஸ்ஸிகோபி… அட்ட²வஸ்ஸிகோபி… நவவஸ்ஸிகோபி… த³ஸவஸ்ஸிகோபி… வீஸதிவஸ்ஸிகோபி… திம்ஸவஸ்ஸிகோபி… சத்தாரீஸவஸ்ஸிகோபி… பஞ்ஞாஸவஸ்ஸிகோபி… ஸட்டி²வஸ்ஸிகோபி… ஸத்ததிவஸ்ஸிகோபி… அஸீதிவஸ்ஸிகோபி… நவுதிவஸ்ஸிகோபி சவதி மரதி அந்தரதா⁴யதி விப்பலுஜ்ஜதீதி – ஓரம் வஸ்ஸஸதாபி மிய்யதி.

யோ சேபி அதிச்ச ஜீவதீதி. யோ வஸ்ஸஸதம் அதிக்கமித்வா ஜீவதி ஸோ ஏகம் வா வஸ்ஸம் ஜீவதி, த்³வே வா வஸ்ஸானி ஜீவதி, தீணி வா வஸ்ஸானி ஜீவதி, சத்தாரி வா வஸ்ஸானி ஜீவதி, பஞ்ச வா வஸ்ஸானி ஜீவதி…பே… த³ஸ வா வஸ்ஸானி ஜீவதி, வீஸதி வா வஸ்ஸானி ஜீவதி, திம்ஸம் வா வஸ்ஸானி ஜீவதி, சத்தாரீஸம் வா வஸ்ஸானி ஜீவதீதி – யோ சேபி அதிச்ச ஜீவதி. அத² கோ² ஸோ ஜரஸாபி மிய்யதீதி. யதா³ ஜிண்ணோ ஹோதி வுத்³தோ⁴ மஹல்லகோ அத்³த⁴க³தோ வயோஅனுப்பத்தோ க²ண்ட³த³ந்தோ பலிதகேஸோ விலூனம் க²லிதஸிரோ [க²லிதம் ஸிரோ (ஸீ.)] வலினம் திலகாஹதக³த்தோ வங்கோ போ⁴க்³கோ³ த³ண்ட³பராயனோ, ஸோ ஜராயபி சவதி மரதி அந்தரதா⁴யதி விப்பலுஜ்ஜதி, நத்தி² மரணம்ஹா மோக்கோ².

‘‘ப²லானமிவ பக்கானம், பாதோ பதனதோ [பபததோ (ஸீ.)] ப⁴யம்;

ஏவம் ஜாதான மச்சானம், நிச்சம் மரணதோ ப⁴யம்.

‘‘யதா²பி கும்ப⁴காரஸ்ஸ, கதா மத்திகபா⁴ஜனா;

ஸப்³பே³ பே⁴த³னபரியந்தா, ஏவம் மச்சான ஜீவிதம்.

‘‘த³ஹரா ச மஹந்தா ச, யே பா³லா யே ச பண்டி³தா;

ஸப்³பே³ மச்சுவஸம் யந்தி, ஸப்³பே³ மச்சுபராயனா.

‘‘தேஸம் மச்சுபரேதானம், க³ச்ச²தம் பரலோகதோ;

ந பிதா தாயதே புத்தம், ஞாதீ வா பன ஞாதகே.

‘‘பேக்க²தஞ்ஞேவ ஞாதீனம், பஸ்ஸ லாலப்பதம் புது²;

ஏகமேகோவ மச்சானம், கோ³வஜ்ஜோ² விய நிய்யதி;

ஏவமப்³பா⁴ஹதோ லோகோ, மச்சுனா ச ஜராய சா’’தி.

அத² கோ² ஸோ ஜரஸாபி மிய்யதி.

தேனாஹ ப⁴க³வா –

‘‘அப்பம் வத ஜீவிதம் இத³ம், ஓரம் வஸ்ஸஸதாபி மிய்யதி;

யோ சேபி அதிச்ச ஜீவதி, அத² கோ² ஸோ ஜரஸாபி மிய்யதீ’’தி.

40. ஸோசந்தி ஜனா மமாயிதே, ந ஹி ஸந்தி நிச்சா பரிக்³க³ஹா;

வினாபா⁴வம் ஸந்தமேவித³ம், இதி தி³ஸ்வா நாகா³ரமாவஸே.

ஸோசந்தி ஜனா மமாயிதேதி. ஜனாதி க²த்தியா ச ப்³ராஹ்மணா ச வேஸ்ஸா ச ஸுத்³தா³ ச க³ஹட்டா² ச பப்³ப³ஜிதா ச தே³வா ச மனுஸ்ஸா ச. மமத்தாதி த்³வே மமத்தா – தண்ஹாமமத்தஞ்ச தி³ட்டி²மமத்தஞ்ச…பே… இத³ம் தண்ஹாமமத்தம்…பே… இத³ம் தி³ட்டி²மமத்தம். மமாயிதம் வத்து²ம் அச்சே²த³ஸங்கினோபி ஸோசந்தி, அச்சி²ஜ்ஜந்தேபி ஸோசந்தி, அச்சி²ன்னேபி ஸோசந்தி. மமாயிதம் வத்து²ம் விபரிணாமஸங்கினோபி ஸோசந்தி, விபரிணாமந்தேபி ஸோசந்தி, விபரிணதேபி ஸோசந்தி கிலமந்தி பரிதே³வந்தி உரத்தாளிம் கந்த³ந்தி ஸம்மோஹம் ஆபஜ்ஜந்தீதி – ஸோசந்தி ஜனா மமாயிதே.

ந ஹி ஸந்தி நிச்சா பரிக்³க³ஹாதி. த்³வே பரிக்³க³ஹா – தண்ஹாபரிக்³க³ஹோ ச தி³ட்டி²பரிக்³க³ஹோ ச…பே… அயம் தண்ஹாபரிக்³க³ஹோ…பே… அயம் தி³ட்டி²பரிக்³க³ஹோ. தண்ஹாபரிக்³க³ஹோ அனிச்சோ ஸங்க²தோ படிச்சஸமுப்பன்னோ க²யத⁴ம்மோ வயத⁴ம்மோ விராக³த⁴ம்மோ நிரோத⁴த⁴ம்மோ விபரிணாமத⁴ம்மோ. தி³ட்டி²பரிக்³க³ஹோபி அனிச்சோ ஸங்க²தோ படிச்சஸமுப்பன்னோ க²யத⁴ம்மோ வயத⁴ம்மோ விராக³த⁴ம்மோ நிரோத⁴த⁴ம்மோ விபரிணாமத⁴ம்மோ. வுத்தஞ்ஹேதம் ப⁴க³வதா – ‘‘பஸ்ஸத² நோ தும்ஹே, பி⁴க்க²வே, தம் பரிக்³க³ஹம் ய்வாயம் பரிக்³க³ஹோ நிச்சோ து⁴வோ ஸஸ்ஸதோ அவிபரிணாமத⁴ம்மோ ஸஸ்ஸதிஸமம் ததே²வ ட²ஸ்ஸதீ’’தி? ‘‘நோ ஹேதம், ப⁴ந்தே’’. ‘‘ஸாது⁴, பி⁴க்க²வே! அஹம்பி கோ² ஏதம், பி⁴க்க²வே, பரிக்³க³ஹம் ந ஸமனுபஸ்ஸாமி, ய்வாயம் பரிக்³க³ஹோ நிச்சோ து⁴வோ ஸஸ்ஸதோ அவிபரிணாமத⁴ம்மோ ஸஸ்ஸதிஸமம் ததே²வ ட²ஸ்ஸதீ’’தி. பரிக்³க³ஹா நிச்சா து⁴வா ஸஸ்ஸதா அவிபரிணாமத⁴ம்மா நத்தி² ந ஸந்தி ந ஸம்விஜ்ஜந்தி ந லப்³ப⁴ந்தீதி – ந ஹி ஸந்தி நிச்சா பரிக்³க³ஹா.

வினாபா⁴வம் ஸந்தமேவித³ந்தி. நானாபா⁴வே வினாபா⁴வே அஞ்ஞதா²பா⁴வே ஸந்தே ஸம்விஜ்ஜமானே உபலப்³பி⁴யமானே. வுத்தஞ்ஹேதம் ப⁴க³வதா – ‘‘அலம், ஆனந்த³! மா ஸோசி மா பரிதே³வி. நனு ஏதம், ஆனந்த³, மயா படிகச்சேவ [படிக³ச்சேவ (ஸீ.)] அக்கா²தம் – ‘ஸப்³பே³ஹேவ பியேஹி மனாபேஹி நானாபா⁴வோ வினாபா⁴வோ அஞ்ஞதா²பா⁴வோ. தம் குதேத்த², ஆனந்த³, லப்³பா⁴ – யம் தம் ஜாதம் பூ⁴தம் ஸங்க²தம் பலோகத⁴ம்மம் தம் வத மா பலுஜ்ஜீ’தி! நேதம் டா²னம் விஜ்ஜதி. புரிமானம் புரிமானம் க²ந்தா⁴னம் தா⁴தூனம் ஆயதனானம் விபரிணாமஞ்ஞதா²பா⁴வா பச்சி²மா பச்சி²மா க²ந்தா⁴ ச தா⁴துயோ ச ஆயதனானி ச பவத்தந்தீ’’தி – வினாபா⁴வம் ஸந்தமேவித³ம்.

இதி தி³ஸ்வா நாகா³ரமாவஸேதி. இதீதி பத³ஸந்தி⁴ பத³ஸம்ஸக்³கோ³ பத³பாரிபூரீ அக்க²ரஸமவாயோ ப்³யஞ்ஜனஸிலிட்ட²தா பதா³னுபுப்³ப³தாபேதம். இதீதி இதி தி³ஸ்வா பஸ்ஸித்வா துலயித்வா தீரயித்வா விபா⁴வயித்வா விபூ⁴தம் கத்வா மமத்தேஸூதி – இதி தி³ஸ்வா. நாகா³ரமாவஸேதி ஸப்³ப³ம் க⁴ராவாஸபலிபோ³த⁴ம் சி²ந்தி³த்வா புத்ததா³ரபலிபோ³த⁴ம் சி²ந்தி³த்வா ஞாதிபலிபோ³த⁴ம் சி²ந்தி³த்வா மித்தாமச்சபலிபோ³த⁴ம் சி²ந்தி³த்வா ஸன்னிதி⁴பலிபோ³த⁴ம் சி²ந்தி³த்வா கேஸமஸ்ஸும் ஓஹாரேத்வா காஸாயானி வத்தா²னி அச்சா²தே³த்வா அகா³ரஸ்மா அனகா³ரியம் பப்³ப³ஜித்வா அகிஞ்சனபா⁴வம் உபக³ந்த்வா ஏகோ சரேய்ய விஹரேய்ய இரியேய்ய வத்தேய்ய பாலேய்ய யபேய்ய யாபேய்யாதி – இதி தி³ஸ்வா நாகா³ரமாவஸே.

தேனாஹ ப⁴க³வா –

‘‘ஸோசந்தி ஜனா மமாயிதே, ந ஹி ஸந்தி நிச்சா பரிக்³க³ஹா;

வினாபா⁴வம் ஸந்தமேவித³ம், இதி தி³ஸ்வா நாகா³ரமாவஸே’’தி.

41. மரணேனபி தம் பஹீயதி [பஹிய்யதி (க.)] யம் புரிஸோ மமித³ந்தி மஞ்ஞதி;

ஏதம்பி விதி³த்வான [ஏதம் தி³ஸ்வான (ஸீ. க.)] பண்டி³தோ, ந மமத்தாய நமேத² மாமகோ.

மரணேனபி தம் பஹீயதீதி. மரணந்தி யா தேஸம் தேஸம் ஸத்தானம் தம்ஹா தம்ஹா ஸத்தனிகாயா சுதி சவனதா பே⁴தோ³ அந்தரதா⁴னம் மச்சுமரணம் காலம்கிரியா க²ந்தா⁴னம் பே⁴தோ³ களேவரஸ்ஸ நிக்கே²போ ஜீவிதிந்த்³ரியஸ்ஸுபச்சே²தோ³. தந்தி ரூபக³தம் வேத³னாக³தம் ஸஞ்ஞாக³தம் ஸங்கா²ரக³தம் விஞ்ஞாணக³தம். பஹீயதீதி பஹீயதி ஜஹீயதி விஜஹீயதி அந்தரதா⁴யதி விப்பலுஜ்ஜதி. பா⁴ஸிதம்பி ஹேதம் –

‘‘புப்³பே³வ மச்சம் விஜஹந்தி போ⁴கா³, மச்சோவ நே புப்³ப³தரம் ஜஹாதி;

அஸஸ்ஸதா போ⁴கி³னோ காமகாமீ, தஸ்மா ந ஸோசாமஹம் ஸோககாலே.

‘‘உதே³தி ஆபூரதி வேதி சந்தோ³, அத்தம் க³மேத்வான பலேதி ஸூரியோ;

விதி³தா மயா ஸத்துக லோகத⁴ம்மா, தஸ்மா ந ஸோசாமஹம் ஸோககாலே’’தி.

மரணேனபி தம் பஹீயதி. யம் புரிஸோ மமித³ந்தி மஞ்ஞதீதி. யந்தி ரூபக³தம் வேத³னாக³தம் ஸஞ்ஞாக³தம் ஸங்கா²ரக³தம் விஞ்ஞாணக³தம். புரிஸோதி ஸங்கா² ஸமஞ்ஞா பஞ்ஞத்தி வோஹாரோ [லோகவோஹாரோ (ஸ்யா.)] நாமம் நாமகம்மம் நாமதே⁴ய்யம் நிருத்தி ப்³யஞ்ஜனம் அபி⁴லாபோ. மமித³ந்தி மஞ்ஞதீதி தண்ஹாமஞ்ஞனாய மஞ்ஞதி, தி³ட்டி²மஞ்ஞனாய மஞ்ஞதி, மானமஞ்ஞனாய மஞ்ஞதி, கிலேஸமஞ்ஞனாய மஞ்ஞதி, து³ச்சரிதமஞ்ஞனாய மஞ்ஞதி, பயோக³மஞ்ஞனாய மஞ்ஞதி, விபாகமஞ்ஞனாய மஞ்ஞதீதி – யம் புரிஸோ மமித³ந்தி மஞ்ஞதி.

ஏதம்பி விதி³த்வான பண்டி³தோதி. ஏதம் ஆதீ³னவம் ஞத்வா ஜானித்வா துலயித்வா தீரயித்வா விபா⁴வயித்வா விபூ⁴தம் கத்வா மமத்தேஸூதி, ஏதம்பி விதி³த்வா பண்டி³தோ தீ⁴ரோ பண்டி³தோ பஞ்ஞவா பு³த்³தி⁴மா ஞாணீ விபா⁴வீ மேதா⁴வீதி – ஏதம்பி விதி³த்வான பண்டி³தோ.

ந மமத்தாய நமேத² மாமகோதி. மமத்தாதி த்³வே மமத்தா – தண்ஹாமமத்தஞ்ச தி³ட்டி²மமத்தஞ்ச…பே… இத³ம் தண்ஹாமமத்தம்…பே… இத³ம் தி³ட்டி²மமத்தம். மாமகோதி பு³த்³த⁴மாமகோ த⁴ம்மமாமகோ ஸங்க⁴மாமகோ. ஸோ ப⁴க³வந்தம் மமாயதி, ப⁴க³வா தம் புக்³க³லம் பரிக்³க³ண்ஹாதி. வுத்தஞ்ஹேதம் ப⁴க³வதா – ‘‘யே தே, பி⁴க்க²வே, பி⁴க்கூ² குஹா த²த்³தா⁴ [ப³த்³தா⁴ (க.) இதிவு. 108] லபா ஸிங்கீ³ உன்னளா அஸமாஹிதா, ந மே தே, பி⁴க்க²வே, பி⁴க்கூ² மாமகா; அபக³தா ச தே, பி⁴க்க²வே, பி⁴க்கூ² இமஸ்மா த⁴ம்மவினயா. ந ச தே இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜந்தி. யே ச கோ² தே, பி⁴க்க²வே, பி⁴க்கூ² நிக்குஹா நில்லபா தீ⁴ரா அத்த²த்³தா⁴ ஸுஸமாஹிதா, தே கோ² மே, பி⁴க்க²வே, பி⁴க்கூ² மாமகா; அனபக³தா ச தே, பி⁴க்க²வே, பி⁴க்கூ² இமஸ்மா த⁴ம்மவினயா. தே ச இமஸ்மிம் த⁴ம்மவினயே வுத்³தி⁴ம் விரூள்ஹிம் வேபுல்லம் ஆபஜ்ஜந்தி’’.

‘‘குஹா த²த்³தா⁴ லபா ஸிங்கீ³, உன்னளா அஸமாஹிதா;

ந தே த⁴ம்மே விரூஹந்தி, ஸம்மாஸம்பு³த்³த⁴தே³ஸிதே.

‘‘நிக்குஹா நில்லபா தீ⁴ரா, அத்த²த்³தா⁴ ஸுஸமாஹிதா;

தே வே த⁴ம்மே விரூஹந்தி, ஸம்மாஸம்பு³த்³த⁴தே³ஸிதே’’.

ந மமத்தாய நமேத² மாமகோதி. மாமகோ தண்ஹாமமத்தம் பஹாய தி³ட்டி²மமத்தம் படினிஸ்ஸஜ்ஜித்வா மமத்தாய ந நமேய்ய ந ஓனமேய்ய, ந தம்னின்னோ அஸ்ஸ ந தப்போணோ ந தப்பப்³பா⁴ரோ ந தத³தி⁴முத்தோ ந தத³தி⁴பதேய்யோதி – ந மமத்தாய நமேத² மாமகோ.

தேனாஹ ப⁴க³வா –

‘‘மரணேனபி தம் பஹீயதி, யம் புரிஸோ மமித³ந்தி மஞ்ஞதி;

ஏதம்பி விதி³த்வான பண்டி³தோ, ந மமத்தாய நமேத² மாமகோ’’தி.

42. ஸுபினேன யதா²பி ஸங்க³தம், படிபு³த்³தோ⁴ புரிஸோ ந பஸ்ஸதி;

ஏவம்பி பியாயிதம் ஜனம், பேதம் காலங்கதம் [காலகதம் (ஸீ. ஸ்யா.)] ந பஸ்ஸதி.

ஸுபினேன யதா²பி ஸங்க³தந்தி. ஸங்க³தம் ஸமாக³தம் ஸமாஹிதம் ஸன்னிபதிதந்தி – ஸுபினேன யதா²பி ஸங்க³தம். படிபு³த்³தோ⁴ புரிஸோ ந பஸ்ஸதீதி யதா² புரிஸோ ஸுபினக³தோ சந்த³ம் பஸ்ஸதி, ஸூரியம் பஸ்ஸதி, மஹாஸமுத்³த³ம் பஸ்ஸதி, ஸினேரும் பப்³ப³தராஜானம் பஸ்ஸதி, ஹத்தி²ம் பஸ்ஸதி, அஸ்ஸம் பஸ்ஸதி, ரத²ம் பஸ்ஸதி, பத்திம் பஸ்ஸதி, ஸேனாப்³யூஹம் பஸ்ஸதி, ஆராமராமணேய்யகம் பஸ்ஸதி, வனராமணேய்யகம்…பே… பூ⁴மிராமணேய்யகம்… போக்க²ரணீராமணேய்யகம் பஸ்ஸதி; படிபு³த்³தோ⁴ ந கிஞ்சி பஸ்ஸதீதி – படிபு³த்³தோ⁴ புரிஸோ ந பஸ்ஸதி.

ஏவம்பி பியாயிதம் ஜனந்தி. ஏவந்தி ஓபம்மஸம்படிபாத³னம். பியாயிதம் ஜனந்தி மமாயிதம் ஜனம் மாதரம் வா பிதரம் வா பா⁴தரம் வா ப⁴கி³னிம் வா புத்தம் வா தீ⁴தரம் வா மித்தம் வா அமச்சம் வா ஞாதிம் வா ஸாலோஹிதம் வாதி – ஏவம்பி பியாயிதம் ஜனம்.

பேதம் காலங்கதம் ந பஸ்ஸதீதி. பேதோ வுச்சதி மதோ. காலங்கதம் ந பஸ்ஸதி ந த³க்க²தி நாதி⁴க³ச்ச²தி ந விந்த³தி ந படிலப⁴தீதி – பேதம் காலங்கதம் ந பஸ்ஸதி.

தேனாஹ ப⁴க³வா –

‘‘ஸுபினேன யதா²பி ஸங்க³தம், படிபு³த்³தோ⁴ புரிஸோ ந பஸ்ஸதி;

ஏவம்பி பியாயிதம் ஜனம், பேதம் காலங்கதம் ந பஸ்ஸதீ’’தி.

43. தி³ட்டா²பி ஸுதாபி தே ஜனா, யேஸம் நாமமித³ம் பவுச்சதி;

நாமம்யேவாவஸிஸ்ஸதி, [நாமமேவா’வஸிஸ்ஸதி (ஸீ. ஸ்யா.)] அக்கே²ய்யம் பேதஸ்ஸ ஜந்துனோ.

தி³ட்டா²பி ஸுதாபி தே ஜனாதி. தி³ட்டா²தி யே சக்கு²விஞ்ஞாணாபி⁴ஸம்பூ⁴தா. ஸுதாதி யே ஸோதவிஞ்ஞாணாபி⁴ஸம்பூ⁴தா. தே ஜனாதி க²த்தியா ச ப்³ராஹ்மணா ச வேஸ்ஸா ச ஸுத்³தா³ ச க³ஹட்டா² ச பப்³ப³ஜிதா ச தே³வா ச மனுஸ்ஸா சாதி – தி³ட்டா²பி ஸுதாபி தே ஜனா.

யேஸம் நாமமித³ம் பவுச்சதீதி. யேஸந்தி யேஸம் க²த்தியானம் ப்³ராஹ்மணானம் வேஸ்ஸானம் ஸுத்³தா³னம் க³ஹட்டா²னம் பப்³ப³ஜிதானம் தே³வானம் மனுஸ்ஸானம். நாமந்தி ஸங்கா² ஸமஞ்ஞா பஞ்ஞத்தி வோஹாரோ நாமம் நாமகம்மம் நாமதே⁴ய்யம் நிருத்தி ப்³யஞ்ஜனம் அபி⁴லாபோ. பவுச்சதீதி வுச்சதி பவுச்சதி கதீ²யதி ப⁴ணீயதி தீ³பீயதி வோஹரீயதீதி – யேஸம் நாமமித³ம் பவுச்சதி.

நாமம்யேவாவஸிஸ்ஸதி அக்கே²ய்யந்தி. ரூபக³தம் வேத³னாக³தம் ஸஞ்ஞாக³தம் ஸங்கா²ரக³தம் விஞ்ஞாணக³தம் பஹீயதி ஜஹீயதி விஜஹீயதி அந்தரதா⁴யதி விப்பலுஜ்ஜதி, நாமம்யேவாவஸிஸ்ஸதி. அக்கே²ய்யந்தி. அக்கா²தும் கதே²தும் ப⁴ணிதும் தீ³பயிதும் வோஹரிதுந்தி – நாமம் ஏவாவஸிஸ்ஸதி அக்கே²ய்யம். பேதஸ்ஸ ஜந்துனோதி. பேதஸ்ஸாதி மதஸ்ஸ காலங்கதஸ்ஸ. ஜந்துனோதி ஸத்தஸ்ஸ நரஸ்ஸ மானவஸ்ஸ போஸஸ்ஸ புக்³க³லஸ்ஸ ஜீவஸ்ஸ ஜாகு³ஸ்ஸ ஜந்துஸ்ஸ இந்த³கு³ஸ்ஸ மனுஜஸ்ஸாதி – பேதஸ்ஸ ஜந்துனோ.

தேனாஹ ப⁴க³வா –

‘‘தி³ட்டா²பி ஸுதாபி தே ஜனா, யேஸம் நாமமித³ம் பவுச்சதி;

நாமம்யேவாவஸிஸ்ஸதி, அக்கே²ய்யம் பேதஸ்ஸ ஜந்துனோ’’தி.

44. ஸோகப்பரிதே³வமச்ச²ரம், ந பஜஹந்தி கி³த்³தா⁴ மமாயிதே;

தஸ்மா முனயோ பரிக்³க³ஹம், ஹித்வா அசரிம்ஸு கே²மத³ஸ்ஸினோ.

ஸோகப்பரிதே³வமச்ச²ரம் ந பஜஹந்தி கி³த்³தா⁴ மமாயிதேதி. ஸோகோதி ஞாதிப்³யஸனேன வா பு²ட்ட²ஸ்ஸ போ⁴க³ப்³யஸனேன வா பு²ட்ட²ஸ்ஸ ரோக³ப்³யஸனேன வா பு²ட்ட²ஸ்ஸ ஸீலப்³யஸனேன வா பு²ட்ட²ஸ்ஸ தி³ட்டி²ப்³யஸனேன வா பு²ட்ட²ஸ்ஸ அஞ்ஞதரஞ்ஞதரேன ப்³யஸனேன ஸமன்னாக³தஸ்ஸ அஞ்ஞதரஞ்ஞதரேன து³க்க²த⁴ம்மேன பு²ட்ட²ஸ்ஸ ஸோகோ ஸோசனா ஸோசிதத்தம் அந்தோஸோகோ அந்தோபரிஸோகோ அந்தோதா³ஹோ அந்தோபரிதா³ஹோ [அந்தோடா³ஹோ அந்தோபரிடா³ஹோ (ஸ்யா.)] சேதஸோ பரிஜ்ஜா²யனா தோ³மனஸ்ஸம் ஸோகஸல்லம். பரிதே³வோதி ஞாதிப்³யஸனேன வா பு²ட்ட²ஸ்ஸ…பே… தி³ட்டி²ப்³யஸனேன வா பு²ட்ட²ஸ்ஸ அஞ்ஞதரஞ்ஞதரேன ப்³யஸனேன ஸமன்னாக³தஸ்ஸ அஞ்ஞதரஞ்ஞதரேன து³க்க²த⁴ம்மேன பு²ட்ட²ஸ்ஸ ஆதே³வோ பரிதே³வோ ஆதே³வனா பரிதே³வனா ஆதே³விதத்தம் பரிதே³விதத்தம் வாசா பலாபோ விப்பலாபோ லாலப்போ லாலப்பாயனா லாலப்பாயிதத்தம். மச்ச²ரியந்தி பஞ்ச மச்ச²ரியானி – ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், த⁴ம்மமச்ச²ரியம். யம் ஏவரூபம் மச்ச²ரியம் மச்ச²ராயனா மச்ச²ராயிதத்தம் வேவிச்ச²ம் கத³ரியம் கடுகஞ்சுகதா அக்³க³ஹிதத்தம் சித்தஸ்ஸ – இத³ம் வுச்சதி மச்ச²ரியம். அபி ச க²ந்த⁴மச்ச²ரியம்பி மச்ச²ரியம், தா⁴துமச்ச²ரியம்பி மச்ச²ரியம், ஆயதனமச்ச²ரியம்பி மச்ச²ரியம் கா³ஹோ – இத³ம் வுச்சதி மச்ச²ரியம். கே³தோ⁴ வுச்சதி தண்ஹா. யோ ராகோ³ ஸாராகோ³…பே… அபி⁴ஜ்ஜா² லோபோ⁴ அகுஸலமூலம். மமத்தாதி த்³வே மமத்தா – தண்ஹாமமத்தஞ்ச தி³ட்டி²மமத்தஞ்ச …பே… இத³ம் தண்ஹாமமத்தம்…பே… இத³ம் தி³ட்டி²மமத்தம். மமாயிதம் வத்து²ம் அச்சே²த³ஸங்கினோபி ஸோசந்தி, அச்சி²ஜ்ஜந்தேபி ஸோசந்தி, அச்சி²ன்னேபி ஸோசந்தி, மமாயிதம் வத்து²ம் விபரிணாமஸங்கினோபி ஸோசந்தி, விபரிணாமந்தேபி ஸோசந்தி, விபரிணதேபி ஸோசந்தி, மமாயிதம் வத்து²ம் அச்சே²த³ஸங்கினோபி பரிதே³வந்தி, அச்சி²ஜ்ஜந்தேபி பரிதே³வந்தி, அச்சி²ன்னேபி பரிதே³வந்தி. மமாயிதம் வத்து²ம் விபரிணாமஸங்கினோபி பரிதே³வந்தி, விபரிணாமந்தேபி பரிதே³வந்தி, விபரிணதேபி பரிதே³வந்தி. மமாயிதம் வத்து²ம் ரக்க²ந்தி கோ³பேந்தி பரிக்³க³ண்ஹந்தி மமாயந்தி மச்ச²ராயந்தி; மமாயிதஸ்மிம் வத்து²ஸ்மிம் ஸோகம் ந ஜஹந்தி, பரிதே³வம் ந ஜஹந்தி, மச்ச²ரியம் ந ஜஹந்தி, கே³த⁴ம் ந ஜஹந்தி நப்பஜஹந்தி ந வினோதே³ந்தி ந ப்³யந்திம் கரோந்தி ந அனபா⁴வம் க³மேந்தீதி – ஸோகப்பரிதே³வமச்ச²ரம் நப்பஜஹந்தி கி³த்³தா⁴ மமாயிதே.

தஸ்மா முனயோ பரிக்³க³ஹம், ஹித்வா அசரிம்ஸு கே²மத³ஸ்ஸினோதி. தஸ்மாதி தஸ்மா தம்காரணா தம்ஹேது தப்பச்சயா தம்னிதா³னா ஏதம் ஆதீ³னவம் ஸம்பஸ்ஸமானா மமத்தேஸூதி – தஸ்மா. முனயோதி மோனம் வுச்சதி ஞாணம். யா பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி². தேன ஞாணேன ஸமன்னாக³தா முனயோ மோனப்பத்தா. தீணி மோனேய்யானி – காயமோனேய்யம், வசீமோனேய்யம், மனோமோனேய்யம்…பே… ஸங்க³ஜாலமதிச்ச ஸோ முனி. பரிக்³க³ஹோதி த்³வே பரிக்³க³ஹா – தண்ஹாபரிக்³க³ஹோ ச தி³ட்டி²பரிக்³க³ஹோ ச…பே… அயம் தண்ஹாபரிக்³க³ஹோ…பே… அயம் தி³ட்டி²பரிக்³க³ஹோ. முனயோ தண்ஹாபரிக்³க³ஹம் பரிச்சஜித்வா தி³ட்டி²பரிக்³க³ஹம் படினிஸ்ஸஜ்ஜித்வா சஜித்வா பஜஹித்வா வினோதே³த்வா ப்³யந்திம் கரித்வா அனபா⁴வம் க³மேத்வா அசரிம்ஸு விஹரிம்ஸு இரியிம்ஸு வத்திம்ஸு பாலிம்ஸு யபிம்ஸு யாபிம்ஸு. கே²மத³ஸ்ஸினோதி கே²மம் வுச்சதி அமதம் நிப்³பா³னம். யோ ஸோ ஸப்³ப³ஸங்கா²ரஸமதோ² ஸப்³பூ³பதி⁴படினிஸ்ஸக்³கோ³ தண்ஹக்க²யோ விராகோ³ நிரோதோ⁴ நிப்³பா³னம். கே²மத³ஸ்ஸினோதி கே²மத³ஸ்ஸினோ தாணத³ஸ்ஸினோ லேணத³ஸ்ஸினோ ஸரணத³ஸ்ஸினோ அப⁴யத³ஸ்ஸினோ அச்சுதத³ஸ்ஸினோ அமதத³ஸ்ஸினோ நிப்³பா³னத³ஸ்ஸினோதி – தஸ்மா முனயோ பரிக்³க³ஹம் ஹித்வா அசரிம்ஸு கே²மத³ஸ்ஸினோ.

தேனாஹ ப⁴க³வா –

‘‘ஸோகப்பரிதே³வமச்ச²ரம், ந ஜஹந்தி கி³த்³தா⁴ மமாயிதே;

தஸ்மா முனயோ பரிக்³க³ஹம், ஹித்வா அசரிம்ஸு கே²மத³ஸ்ஸினோ’’தி.

45. பதிலீனசரஸ்ஸ பி⁴க்கு²னோ, ப⁴ஜமானஸ்ஸ விவித்தமாஸனம்;

ஸாமக்³கி³யமாஹு தஸ்ஸ தம், யோ அத்தானம் ப⁴வனே ந த³ஸ்ஸயே.

பதிலீனசரஸ்ஸ பி⁴க்கு²னோதி. பதிலீனசரா வுச்சந்தி ஸத்த ஸேக்கா² [ஸேகா² (ஸீ. ஸ்யா.)]. அரஹா பதிலீனோ. கிம்காரணா பதிலீனசரா வுச்சந்தி ஸத்த ஸேக்கா²? தே ததோ ததோ சித்தம் பதிலீனேந்தா பதிகுடேந்தா பதிவட்டேந்தா ஸன்னிருத்³த⁴ந்தா [ஸன்னிரும்பே⁴ந்தா (ஸீ.)] ஸன்னிக்³க³ண்ஹந்தா ஸன்னிவாரேந்தா ரக்க²ந்தா கோ³பேந்தா சரந்தி விசரந்தி விஹரந்தி இரியந்தி வத்தேந்தி பாலேந்தி யபேந்தி யாபேந்தி, சக்கு²த்³வாரே சித்தம் பதிலீனேந்தா பதிகுடேந்தா பதிவட்டேந்தா ஸன்னிருத்³த⁴ந்தா ஸன்னிக்³க³ண்ஹந்தா ஸன்னிவாரேந்தா ரக்க²ந்தா கோ³பேந்தா சரந்தி விசரந்தி விஹரந்தி இரியந்தி வத்தேந்தி பாலேந்தி யபேந்தி யாபேந்தி, ஸோதத்³வாரே சித்தம்…பே… கா⁴னத்³வாரே சித்தம்… ஜிவ்ஹாத்³வாரே சித்தம்… காயத்³வாரே சித்தம்… மனோத்³வாரே சித்தம் பதிலீனேந்தா பதிகுடேந்தா பதிவட்டேந்தா ஸன்னிருத்³த⁴ந்தா ஸன்னிக்³க³ண்ஹந்தா ஸன்னிவாரேந்தா ரக்க²ந்தா கோ³பேந்தா சரந்தி விசரந்தி விஹரந்தி இரியந்தி வத்தேந்தி பாலேந்தி யபேந்தி யாபேந்தி. யதா² குக்குடபத்தம் வா ந்ஹாருத³த்³து³லம் வா அக்³கி³ம்ஹி பக்கி²த்தம் பதிலீயதி பதிகுடதி பதிவட்டதி ந ஸம்பஸாரியதி; ஏவமேவ ததோ ததோ சித்தம் பதிலீனேந்தா பதிகுடேந்தா பதிவட்டேந்தா ஸன்னிருத்³த⁴ந்தா ஸன்னிக்³க³ண்ஹந்தா ஸன்னிவாரேந்தா ரக்க²ந்தா கோ³பேந்தா சரந்தி விசரந்தி விஹரந்தி இரியந்தி வத்தேந்தி பாலேந்தி யபேந்தி யாபேந்தி, சக்கு²த்³வாரே சித்தம்…பே… ஸோதத்³வாரே சித்தம்… கா⁴னத்³வாரே சித்தம்… ஜிவ்ஹாத்³வாரே சித்தம்… காயத்³வாரே சித்தம்… மனோத்³வாரே சித்தம் பதிலீனேந்தா பதிகுடேந்தா பதிவட்டேந்தா ஸன்னிருத்³த⁴ந்தா ஸன்னிக்³க³ண்ஹந்தா ஸன்னிவாரேந்தா ரக்க²ந்தா கோ³பேந்தா சரந்தி விசரந்தி விஹரந்தி இரியந்தி வத்தேந்தி பாலேந்தி யபேந்தி யாபேந்தி. தம்காரணா பதிலீனசரா வுச்சந்தி ஸத்த ஸேக்கா². பி⁴க்கு²னோதி புது²ஜ்ஜனகல்யாணகஸ்ஸ வா பி⁴க்கு²னோ ஸேக்க²ஸ்ஸ வா பி⁴க்கு²னோதி – பதிலீனசரஸ்ஸ பி⁴க்கு²னோ.

ப⁴ஜமானஸ்ஸ விவித்தமாஸனந்தி ஆஸனம் வுச்சதி யத்த² நிஸீத³ந்தி – மஞ்சோ பீட²ம் பி⁴ஸி தட்டிகா சம்மக²ண்டோ³ திணஸந்தா²ரோ பண்ணஸந்தா²ரோ பலாலஸந்தா²ரோ. தம் ஆஸனம் அஸப்பாயரூபத³ஸ்ஸனேன ரித்தம் விவித்தம் பவிவித்தம், அஸப்பாயஸத்³த³ஸ்ஸவனேன ரித்தம் விவித்தம் பவிவித்தம், அஸப்பாயக³ந்த⁴கா⁴யனேன… அஸப்பாயரஸஸாயனேன… அஸப்பாயபோ²ட்ட²ப்³ப³பு²ஸனேன… அஸப்பாயேஹி பஞ்சஹி காமகு³ணேஹி ரித்தம் விவித்தம் பவிவித்தம். தம் விவித்தம் ஆஸனம் ப⁴ஜதோ ஸம்ப⁴ஜதோ ஸேவதோ நிஸேவதோ ஸம்ஸேவதோ படிஸேவதோதி – ப⁴ஜமானஸ்ஸ விவித்தமாஸனம்.

ஸாமக்³கி³யமாஹு தஸ்ஸ தம், யோ அத்தானம் ப⁴வனே ந த³ஸ்ஸயேதி. ஸாமக்³கி³யோதி திஸ்ஸோ ஸாமக்³கி³யோ – க³ணஸாமக்³கீ³, த⁴ம்மஸாமக்³கீ³, அனபி⁴னிப்³ப³த்திஸாமக்³கீ³. கதமா க³ணஸாமக்³கீ³? ப³ஹு சேபி பி⁴க்கூ² ஸமக்³கா³ ஸம்மோத³மானா அவிவத³மானா கீ²ரோத³கீபூ⁴தா அஞ்ஞமஞ்ஞம் பியசக்கூ²ஹி ஸம்பஸ்ஸந்தா விஹரந்தி – அயம் க³ணஸாமக்³கீ³. கதமா த⁴ம்மஸாமக்³கீ³? சத்தாரோ ஸதிபட்டா²னா, சத்தாரோ ஸம்மப்பதா⁴னா, சத்தாரோ இத்³தி⁴பாதா³, பஞ்சிந்த்³ரியானி, பஞ்ச ப³லானி, ஸத்த போ³ஜ்ஜ²ங்கா³, அரியோ அட்ட²ங்கி³கோ மக்³கோ³. தே ஏகதோ பக்க²ந்த³ந்தி பஸீத³ந்தி ஸம்பதிட்ட²ந்தி விமுச்சந்தி; ந தேஸம் த⁴ம்மானம் விவாதோ³ பவிவாதோ³ அத்தி² – அயம் த⁴ம்மஸாமக்³கீ³. கதமா அனபி⁴னிப்³ப³த்திஸாமக்³கீ³? ப³ஹு சேபி பி⁴க்கூ² அனுபாதி³ஸேஸாய நிப்³பா³னதா⁴துயா பரினிப்³பா³யந்தி; ந தேஸம் நிப்³பா³னதா⁴துயா [தேன (ஸீ.)] ஊனத்தம் வா புண்ணத்தம் வா பஞ்ஞாயதி – அயம் அனபி⁴னிப்³ப³த்திஸாமக்³கீ³. ப⁴வனேதி நேரயிகானம் நிரயோ ப⁴வனம், திரச்சா²னயோனிகானம் திரச்சா²னயோனி ப⁴வனம், பேத்திவிஸயிகானம் பேத்திவிஸயோ ப⁴வனம், மனுஸ்ஸானம் மனுஸ்ஸலோகோ ப⁴வனம், தே³வானம் தே³வலோகோ ப⁴வனந்தி. ஸாமக்³கி³யமாஹு தஸ்ஸ தம், யோ அத்தானம் ப⁴வனே ந த³ஸ்ஸயேதி. தஸ்ஸேஸா ஸாமக்³கீ³ ஏதம் ச²ன்னம் ஏதம் பதிரூபம் ஏதம் அனுச்ச²விகம் ஏதம் அனுலோமம், யோ ஏவம் படிச்ச²ன்னே நிரயே அத்தானம் ந த³ஸ்ஸேய்ய, திரச்சா²னயோனியம் அத்தானம் ந த³ஸ்ஸேய்ய, பேத்திவிஸயே அத்தானம் ந த³ஸ்ஸேய்ய, மனுஸ்ஸலோகே அத்தானம் ந த³ஸ்ஸேய்ய, தே³வலோகே அத்தானம் ந த³ஸ்ஸேய்யாதி ஏவமாஹம்ஸு ஏவம் கதே²ந்தி ஏவம் ப⁴ணந்தி ஏவம் தீ³பயந்தி ஏவம் வோஹரந்தீதி – ஸாமக்³கி³யமாஹு தஸ்ஸ தம், யோ அத்தானம் ப⁴வனே ந த³ஸ்ஸயே.

தேனாஹ ப⁴க³வா –

‘‘பதிலீனசரஸ்ஸ பி⁴க்கு²னோ, ப⁴ஜமானஸ்ஸ விவித்தமாஸனம்;

ஸாமக்³கி³யமாஹு தஸ்ஸ தம், யோ அத்தானம் ப⁴வனே ந த³ஸ்ஸயே’’தி.

46. ஸப்³ப³த்த² முனீ அனிஸ்ஸிதோ, ந பியம் குப்³ப³தி நோபி அப்பியம்;

தஸ்மிம் பரிதே³வமச்ச²ரம், பண்ணே வாரி யதா² ந லிம்பதி.

ஸப்³ப³த்த² முனீ அனிஸ்ஸிதோதி. ஸப்³ப³ம் வுச்சதி த்³வாத³ஸாயதனானி – சக்கு²ஞ்சேவ ரூபா ச, ஸோதஞ்ச ஸத்³தா³ ச, கா⁴னஞ்ச க³ந்தா⁴ ச, ஜிவ்ஹா ச ரஸா ச, காயோ ச போ²ட்ட²ப்³பா³ ச, மனோ ச த⁴ம்மா ச. முனீதி. மோனம் வுச்சதி ஞாணம்…பே… ஸங்க³ஜாலமதிச்ச ஸோ முனி. அனிஸ்ஸிதோதி. த்³வே நிஸ்ஸயா – தண்ஹானிஸ்ஸயோ ச தி³ட்டி²னிஸ்ஸயோ ச…பே… அயம் தண்ஹானிஸ்ஸயோ…பே… அயம் தி³ட்டி²னிஸ்ஸயோ. முனி தண்ஹானிஸ்ஸயம் பஹாய தி³ட்டி²னிஸ்ஸயம் படினிஸ்ஸஜ்ஜித்வா சக்கு²ம் அனிஸ்ஸிதோ ஸோதம் அனிஸ்ஸிதோ கா⁴னம் அனிஸ்ஸிதோ ஜிவ்ஹம் அனிஸ்ஸிதோ காயம் அனிஸ்ஸிதோ மனம் அனிஸ்ஸிதோ ரூபே… ஸத்³தே³… க³ந்தே⁴… ரஸே… போ²ட்ட²ப்³பே³… த⁴ம்மே… குலம்… க³ணம்… ஆவாஸம்… லாப⁴ம்… யஸம்… பஸம்ஸம்… ஸுக²ம்… சீவரம்… பிண்ட³பாதம்… ஸேனாஸனம்… கி³லானபச்சயபே⁴ஸஜ்ஜபரிக்கா²ரம்… காமதா⁴தும்… ரூபதா⁴தும்… அரூபதா⁴தும்… காமப⁴வம்… ரூபப⁴வம்… அரூபப⁴வம்… ஸஞ்ஞாப⁴வம்… அஸஞ்ஞாப⁴வம் … நேவஸஞ்ஞானாஸஞ்ஞாப⁴வம்… ஏகவோகாரப⁴வம்… சதுவோகாரப⁴வம்… பஞ்சவோகாரப⁴வம்… அதீதம்… அனாக³தம்… பச்சுப்பன்னம்… தி³ட்ட²ம்… ஸுதம்… முதம்… விஞ்ஞாதம்… ஸப்³பே³ த⁴ம்மே அனிஸ்ஸிதோ அனல்லீனோ அனுபக³தோ அனஜ்ஜோ²ஸிதோ அனதி⁴முத்தோ நிக்க²ந்தோ நிஸ்ஸடோ விப்பமுத்தோ விஸஞ்ஞுத்தோ விமரியாதி³கதேன சேதஸா விஹரதீதி – ஸப்³ப³த்த² முனி அனிஸ்ஸிதோ.

ந பியம் குப்³ப³தி நோபி அப்பியந்தி. பியாதி த்³வே பியா – ஸத்தா வா ஸங்கா²ரா வா. கதமே ஸத்தா பியா? இத⁴ யஸ்ஸ தே ஹோந்தி அத்த²காமா ஹிதகாமா பா²ஸுகாமா யோக³க்கே²மகாமா மாதா வா பிதா வா பா⁴தா வா ப⁴கி³னீ வா புத்தா வா தீ⁴தரா வா மித்தா வா அமச்சா வா ஞாதீ வா ஸாலோஹிதா வா – இமே ஸத்தா பியா. கதமே ஸங்கா²ரா பியா? மனாபிகா ரூபா மனாபிகா ஸத்³தா³ மனாபிகா க³ந்தா⁴ மனாபிகா ரஸா மனாபிகா போ²ட்ட²ப்³பா³ – இமே ஸங்கா²ரா பியா. அப்பியாதி த்³வே அப்பியா – ஸத்தா வா ஸங்கா²ரா வா. கதமே ஸத்தா அப்பியா? இத⁴ யஸ்ஸ தே ஹோந்தி அனத்த²காமா அஹிதகாமா அபா²ஸுகாமா அயோக³க்கே²மகாமா ஜீவிதா வோரோபேதுகாமா – இமே ஸத்தா அப்பியா. கதமே ஸங்கா²ரா அப்பியா? அமனாபிகா ரூபா அமனாபிகா ஸத்³தா³ அமனாபிகா க³ந்தா⁴ அமனாபிகா ரஸா அமனாபிகா போ²ட்ட²ப்³பா³ – இமே ஸங்கா²ரா அப்பியா. ந பியம் குப்³ப³தி நோபி அப்பியந்தி. ‘‘அயம் மே ஸத்தோ பியோ, இமே ச ஸங்கா²ரா மனாபா’’தி ராக³வஸேன பியம் ந கரோதி; ‘‘அயம் மே ஸத்தோ அப்பியோ, இமே ச ஸங்கா²ரா அமனாபா’’தி படிக⁴வஸேன அப்பியம் ந கரோதி ந ஜனேதி ந ஸஞ்ஜனேதி ந நிப்³ப³த்தேதி நாபி⁴னிப்³ப³த்தேதீதி – ந பியம் குப்³ப³தி நோபி அப்பியம்.

தஸ்மிம் பரிதே³வமச்ச²ரம் பண்ணே வாரி யதா² ந லிம்பதீதி. தஸ்மிந்தி தஸ்மிம் புக்³க³லே அரஹந்தே கீ²ணாஸவே. பரிதே³வோதி ஞாதிப்³யஸனேன வா பு²ட்ட²ஸ்ஸ போ⁴க³ப்³யஸனேன வா பு²ட்ட²ஸ்ஸ ரோக³ப்³யஸனேன வா பு²ட்ட²ஸ்ஸ ஸீலப்³யஸனேன வா பு²ட்ட²ஸ்ஸ தி³ட்டி²ப்³யஸனேன வா பு²ட்ட²ஸ்ஸ அஞ்ஞதரஞ்ஞதரேன ப்³யஸனேன ஸமன்னாக³தஸ்ஸ அஞ்ஞதரஞ்ஞதரேன து³க்க²த⁴ம்மேன பு²ட்ட²ஸ்ஸ ஆதே³வோ பரிதே³வோ ஆதே³வனா பரிதே³வனா ஆதே³விதத்தம் பரிதே³விதத்தம் வாசா பலாபோ விப்பலாபோ லாலப்போ லாலப்பாயனா லாலப்பாயிதத்தம். மச்ச²ரியந்தி பஞ்ச மச்ச²ரியானி – ஆவாஸமச்ச²ரியம், குலமச்ச²ரியம், லாப⁴மச்ச²ரியம், வண்ணமச்ச²ரியம், த⁴ம்மமச்ச²ரியம். யம் ஏவரூபம் மச்ச²ரியம் மச்ச²ராயனா மச்ச²ராயிதத்தம் வேவிச்ச²ம் கத³ரியம் கடுகஞ்சுகதா அக்³க³ஹிதத்தம் சித்தஸ்ஸ – இத³ம் வுச்சதி மச்ச²ரியம். அபி ச க²ந்த⁴மச்ச²ரியம்பி மச்ச²ரியம், தா⁴துமச்ச²ரியம்பி மச்ச²ரியம், ஆயதனமச்ச²ரியம்பி மச்ச²ரியம் கா³ஹோ – இத³ம் வுச்சதி மச்ச²ரியம்.

பண்ணே வாரி யதா² ந லிம்பதீதி. பண்ணம் வுச்சதி பது³மபத்தம். வாரி வுச்சதி உத³கம். யதா² வாரி பது³மபத்தம் ந லிம்பதி ந பலிம்பதி ந உபலிம்பதி அலித்தம் அபலித்தம் அனுபலித்தம், ஏவமேவ தஸ்மிம் புக்³க³லே அரஹந்தே கீ²ணாஸவே பரிதே³வோ மச்ச²ரியஞ்ச ந லிம்பதி ந பலிம்பதி ந உபலிம்பதி அலித்தா அபலித்தா அனுபலித்தா. ஸோ ச புக்³க³லோ அரஹந்தோ தேஹி கிலேஸேஹி ந லிம்பதி ந பலிம்பதி ந உபலிம்பதி அலித்தோ அபலித்தோ அனுபலித்தோ நிக்க²ந்தோ நிஸ்ஸடோ விப்பமுத்தோ விஸஞ்ஞுத்தோ விமரியாதி³கதேன சேதஸா விஹரதீதி – தஸ்மிம் பரிதே³வமச்ச²ரம் பண்ணே வாரி யதா² ந லிம்பதி.

தேனாஹ ப⁴க³வா –

‘‘ஸப்³ப³த்த² முனீ அனிஸ்ஸிதோ, ந பியம் குப்³ப³தி நோபி அப்பியம்;

தஸ்மிம் பரிதே³வமச்ச²ரம், பண்ணே வாரி யதா² ந லிம்பதீ’’தி.

47. உத³பி³ந்து³ யதா²பி போக்க²ரே, பது³மே வாரி யதா² ந லிம்பதி;

ஏவம் முனி நோபலிம்பதி, யதி³த³ம் தி³ட்ட²ஸுதமுதேஸு [தி³ட்ட²ஸுதே முதேஸு (ஸீ.), தி³ட்ட²ஸுதம் முதேஸு (ஸ்யா. க.)] வா.

உத³பி³ந்து³ யதா²பி போக்க²ரேதி. உத³பி³ந்து³ வுச்சதி உத³கதே²வோ. போக்க²ரம் வுச்சதி பது³மபத்தம். யதா² உத³பி³ந்து³ பது³மபத்தே ந லிம்பதி ந பலிம்பதி ந உபலிம்பதி அலித்தம் அபலித்தம் அனுபலித்தந்தி – உத³பி³ந்து³ யதா²பி போக்க²ரே. பது³மே வாரி யதா² ந லிம்பதீதி. பது³மம் வுச்சதி பது³மபுப்ப²ம். வாரி வுச்சதி உத³கம். யதா² வாரி பது³மபுப்ப²ம் ந லிம்பதி ந பலிம்பதி ந உபலிம்பதி அலித்தம் அபலித்தம் அனுபலித்தந்தி – பது³மே வாரி யதா² ந லிம்பதி.

ஏவம் முனி நோபலிம்பதி, யதி³த³ம் தி³ட்ட²ஸுதமுதேஸு வாதி. ஏவந்தி ஓபம்மஸம்படிபாத³னம். முனீதி. மோனம் வுச்சதி ஞாணம்…பே… ஸங்க³ஜாலமதிச்ச ஸோ முனி. லேபாதி த்³வே லேபா – தண்ஹாலேபோ ச தி³ட்டி²லேபோ ச…பே… அயம் தண்ஹாலேபோ…பே… அயம் தி³ட்டி²லேபோ. முனி தண்ஹாலேபம் பஹாய தி³ட்டி²லேபம் படினிஸ்ஸஜ்ஜித்வா தி³ட்டே² ந லிம்பதி, ஸுதே ந லிம்பதி, முதே ந லிம்பதி, விஞ்ஞாதே ந லிம்பதி ந பலிம்பதி ந உபலிம்பதி அலித்தோ அபலித்தோ அனுபலித்தோ நிக்க²ந்தோ நிஸ்ஸடோ விப்பமுத்தோ விஸஞ்ஞுத்தோ விமரியாதி³கதேன சேதஸா விஹரதீதி – ஏவம் முனி நோபலிம்பதி, யதி³த³ம் தி³ட்ட²ஸுதமுதேஸு வா.

தேனாஹ ப⁴க³வா –

‘‘உத³பி³ந்து³ யதா²பி போக்க²ரே, பது³மே வாரி யதா² ந லிம்பதி;

ஏவம் முனி நோபலிம்பதி, யதி³த³ம் தி³ட்ட²ஸுதமுதேஸு வா’’தி.

48. தோ⁴னோ ந ஹி தேன மஞ்ஞதி, யதி³த³ம் தி³ட்ட²ஸுதமுதேஸு வா;

நாஞ்ஞேன விஸுத்³தி⁴மிச்ச²தி, ந ஹி ஸோ ரஜ்ஜதி நோ விரஜ்ஜதி.

தோ⁴னோ ந ஹி தேன மஞ்ஞதி, யதி³த³ம் தி³ட்ட²ஸுதமுதேஸு வாதி. தோ⁴னோதி தோ⁴னா வுச்சதி பஞ்ஞா. யா பஞ்ஞா பஜானனா…பே… அமோஹோ த⁴ம்மவிசயோ ஸம்மாதி³ட்டி². கிம்காரணா தோ⁴னா வுச்சதி பஞ்ஞா? தாய பஞ்ஞாய காயது³ச்சரிதம் து⁴தஞ்ச தோ⁴த ச ஸந்தோ⁴தஞ்ச நித்³தோ⁴தஞ்ச, வசீது³ச்சரிதம்…பே… மனோது³ச்சரிதம் து⁴தஞ்ச தோ⁴தஞ்ச ஸந்தோ⁴தஞ்ச நித்³தோ⁴தஞ்ச, ராகோ³ து⁴தோ ச தோ⁴தோ ச ஸந்தோ⁴தோ ச நித்³தோ⁴தோ ச, தோ³ஸோ… மோஹோ… கோதோ⁴… உபனாஹோ… மக்கோ²… பளாஸோ… இஸ்ஸா… மச்ச²ரியம்… மாயா… ஸாடே²ய்யம்… த²ம்போ⁴… ஸாரம்போ⁴… மானோ… அதிமானோ… மதோ³… பமாதோ³… ஸப்³பே³ கிலேஸா… ஸப்³பே³ து³ச்சரிதா… ஸப்³பே³ த³ரதா²… ஸப்³பே³ பரிளாஹா… ஸப்³பே³ ஸந்தாபா… ஸப்³பா³குஸலாபி⁴ஸங்கா²ரா து⁴தா ச தோ⁴தா ச ஸந்தோ⁴தா ச நித்³தோ⁴தா ச. தம்காரணா தோ⁴னா வுச்சதி பஞ்ஞா.

அத² வா ஸம்மாதி³ட்டி²யா மிச்சா²தி³ட்டி² து⁴தா ச தோ⁴தா ச ஸந்தோ⁴தா ச நித்³தோ⁴தா ச, ஸம்மாஸங்கப்பேன மிச்சா²ஸங்கப்போ து⁴தோ ச தோ⁴தோ ச ஸந்தோ⁴தோ ச நித்³தோ⁴தோ ச, ஸம்மாவாசாய மிச்சா²வாசா து⁴தா ச… ஸம்மாகம்மந்தேன மிச்சா²கம்மந்தோ து⁴தோ ச… ஸம்மாஆஜீவேன மிச்சா²ஆஜீவோ து⁴தோ ச… ஸம்மாவாயாமேன மிச்சா²வாயாமோ து⁴தோ ச… ஸம்மாஸதியா மிச்சா²ஸதி து⁴தா ச… ஸம்மாஸமாதி⁴னா மிச்சா²ஸமாதி⁴ து⁴தோ ச… ஸம்மாஞாணேன மிச்சா²ஞாணம் து⁴தஞ்ச… ஸம்மாவிமுத்தியா மிச்சா²விமுத்தி து⁴தா ச தோ⁴தா ச ஸந்தோ⁴தா ச நித்³தோ⁴தா ச.

அத² வா அரியேன அட்ட²ங்கி³கேன மக்³கே³ன ஸப்³பே³ கிலேஸா… ஸப்³பே³ து³ச்சரிதா… ஸப்³பே³ த³ரதா²… ஸப்³பே³ பரிளாஹா… ஸப்³பே³ ஸந்தாபா… ஸப்³பா³குஸலாபி⁴ஸங்கா²ரா து⁴தா ச தோ⁴தா ச ஸந்தோ⁴தா ச நித்³தோ⁴தா ச. அரஹா இமேஹி தோ⁴னேஹி த⁴ம்மேஹி உபேதோ ஸமுபேதோ உபக³தோ ஸமுபக³தோ உபபன்னோ ஸமுபபன்னோ ஸமன்னாக³தோ. தஸ்மா அரஹா தோ⁴னோ. ஸோ து⁴தராகோ³ து⁴தபாபோ து⁴தகிலேஸோ து⁴தபரிளாஹோதி – தோ⁴னோ.

தோ⁴னோ ந ஹி தேன மஞ்ஞதி, யதி³த³ம் தி³ட்ட²ஸுதமுதேஸு வாதி. தோ⁴னோ தி³ட்ட²ம் ந மஞ்ஞதி, தி³ட்ட²ஸ்மிம் ந மஞ்ஞதி, தி³ட்ட²தோ ந மஞ்ஞதி, தி³ட்டா² மேதி ந மஞ்ஞதி; ஸுதம் ந மஞ்ஞதி, ஸுதஸ்மிம் ந மஞ்ஞதி, ஸுததோ ந மஞ்ஞதி, ஸுதம் மேதி ந மஞ்ஞதி; முதம் ந மஞ்ஞதி, முதஸ்மிம் ந மஞ்ஞதி, முததோ ந மஞ்ஞதி, முதம் மேதி ந மஞ்ஞதி; விஞ்ஞாதம் ந மஞ்ஞதி, விஞ்ஞாதஸ்மிம் ந மஞ்ஞதி, விஞ்ஞாததோ ந மஞ்ஞதி, விஞ்ஞாதம் மேதி ந மஞ்ஞதி. வுத்தம்பி ஹேதம் ப⁴க³வதா – ‘‘அஸ்மீதி, பி⁴க்க²வே, மஞ்ஞிதமேதம், அயமஹமஸ்மீதி மஞ்ஞிதமேதம், ப⁴விஸ்ஸந்தி மஞ்ஞிதமேதம், ந ப⁴விஸ்ஸந்தி மஞ்ஞிதமேதம், ரூபீ ப⁴விஸ்ஸந்தி மஞ்ஞிதமேதம், அரூபீ ப⁴விஸ்ஸந்தி மஞ்ஞிதமேதம், ஸஞ்ஞீ ப⁴விஸ்ஸந்தி மஞ்ஞிதமேதம், அஸஞ்ஞீ ப⁴விஸ்ஸந்தி மஞ்ஞிதமேதம், நேவஸஞ்ஞீனாஸஞ்ஞீ ப⁴விஸ்ஸந்தி மஞ்ஞிதமேதம். மஞ்ஞிதம் [மஞ்ஞிதம் ஹி (ஸீ.)], பி⁴க்க²வே, ரோகோ³, மஞ்ஞிதம் க³ண்டோ³, மஞ்ஞிதம் ஸல்லம், மஞ்ஞிதம் உபத்³த³வோ. தஸ்மாதிஹ, பி⁴க்க²வே, அமஞ்ஞமானேன சேதஸா விஹரிஸ்ஸாமாதி, ஏவஞ்ஹி வோ, பி⁴க்க²வே, ஸிக்கி²தப்³ப³’’ந்தி – தோ⁴னோ ந ஹி தேன மஞ்ஞதி யதி³த³ம் தி³ட்ட²ஸுதமுதேஸு வா.

நாஞ்ஞேன விஸுத்³தி⁴மிச்ச²தீதி. தோ⁴னோ அஞ்ஞேன அஸுத்³தி⁴மக்³கே³ன மிச்சா²படிபதா³ய அனிய்யானிகபதே²ன அஞ்ஞத்ர ஸதிபட்டா²னேஹி அஞ்ஞத்ர ஸம்மப்பதா⁴னேஹி அஞ்ஞத்ர இத்³தி⁴பாதே³ஹி அஞ்ஞத்ர இந்த்³ரியேஹி அஞ்ஞத்ர ப³லேஹி அஞ்ஞத்ர போ³ஜ்ஜ²ங்கே³ஹி அஞ்ஞத்ர அரியா அட்ட²ங்கி³கா மக்³கா³ ஸுத்³தி⁴ம் விஸுத்³தி⁴ம் பரிஸுத்³தி⁴ம் முத்திம் விமுத்திம் பரிமுத்திம் ந இச்ச²தி ந ஸாதி³யதி ந பத்தே²தி ந பிஹேதி நாபி⁴ஜப்பதீதி – நாஞ்ஞேன விஸுத்³தி⁴மிச்ச²தி.

ந ஹி ஸோ ரஜ்ஜதி நோ விரஜ்ஜதீதி. ஸப்³பே³ பா³லபுது²ஜ்ஜனா ரஜ்ஜந்தி, புது²ஜ்ஜனகல்யாணகம் உபாதா³ய ஸத்த ஸேக்கா² விரஜ்ஜந்தி; அரஹா நேவ ரஜ்ஜதி நோ விரஜ்ஜதி. விரத்தோ ஸோ க²யா ராக³ஸ்ஸ வீதராக³த்தா, க²யா தோ³ஸஸ்ஸ வீததோ³ஸத்தா, க²யா மோஹஸ்ஸ வீதமோஹத்தா. ஸோ வுட்ட²வாஸோ சிண்ணசரணோ…பே… ஜாதிஜராமரணஸம்ஸாரோ, நத்தி² தஸ்ஸ புனப்³ப⁴வோதி – ந ஹி ஸோ ரஜ்ஜதி நோ விரஜ்ஜதி.

தேனாஹ ப⁴க³வா –

‘‘தோ⁴னோ ந ஹி தேன மஞ்ஞதி, யதி³த³ம் தி³ட்ட²ஸுதமுதேஸு வா;

நாஞ்ஞேன விஸுத்³தி⁴மிச்ச²தி, ந ஹி ஸோ ரஜ்ஜதி நோ விரஜ்ஜதீ’’தி.

ஜராஸுத்தனித்³தே³ஸோ ச²ட்டோ².